Gʼoeˇ˗eu gaˬ˗eu jeˬ Aˇ poeˬ kʼaˆ˗eu seuˆ dzeuꞈ aˇ gʼehˇ

Yeˬhawˇbaˬ Pawˇluˆ˗ahˇ bi noeˬ doˆ leˇ˗awˇ yaw sahˇ neh bi pyeuꞈ laˇ˗eu seu dzeuꞈ aˇ gʼeh gʼoeˬ jeˬ bi boꞈ taˬ˗euˬ meh. (Gaˬlaˬtiˆ 5:22, 23) Muiˬ˗eu aˇ gʼehˇ heu dawˬ tawˆ luꞈ˗ahˇ “yaw sahˇ . . . laꞈ kʼoeˇ siˬ le˗eu aˇ siˬ” lehˇ kuˇ˗eu meh.a (Ehˇ lahˬ˗ahˇ haw.) Heu naˇ Ka li zaˬ deuˬ ya dm˗eu “nui ma yaw shuiꞈ” pyeuꞈ meh. (Gawˇlawˇsehˇ 3:10) Iˇ cuꞈ tsaˬ tsaˬ ni za˗eu aˇ bawˇ˗ahˇ aˇ siˬ siˬ le˗eu loꞈ˗ehˇ tsawˇ haˬ tiˬ gʼaˬ˗euˬ dehꞈ ziˇ˗ahˇ muiˬ˗eu shawˇ˗eu yaw sahˇ ahˇ naˇ muiˬ˗eu seu dzeuꞈ deuˬ ahˇ˗eu meh.—Ja ceuˬ 1:1-3.

Pawˇluˆ neh ngehˬ keuˆ dahˬ beh˗eu aˇ gʼehˇ naˇ nui gaˬ pyeuꞈ meh. Nui gaˬ aˇ poeˬ aˇ naˆ ni baw˗eu nga? Nui gaˬ maˬ ahˇ naˇ “tiˬ jeˬ˗iˬ gaˇ dahˇ maˬ tsoeˬ˗a” lehˇ Pawˇluˆ ehˇ˗eu meh. (1 Gawˇliˬtu 13:2) Toˆ˗ehˇ naˇ nui gaˬ heu aˬ jeˬ nga? Yawˬ nah na luꞈ nui gaˬ aˬ joˆ˗ehˇ bi myaˬ laˇ nya˗awˇ aˬ joˆ˗ehˇ mˇ mawˇ nya˗eu nga?

Nui gaˬ heu aˬ jeˬ nga?

Nui gaˬ heu dawˬ˗euˬ dawˬ tsuiꞈ puiˇ kʼawˬ˗eu shaˬ dui dui kʼawꞈ Jaˇliꞈ laꞈ kʼoeˇ nui gaˬ ahˇ˗eu tsawˇ haˬ aˬ joˆ˗ehˇ noeˬ˗awˇ aˬ joˆ˗ehˇ mˇ˗eu lehˇ ehˇ taˬ˗euˬ meh. Yaw jeˬ ma jeˬ nui gaˬ ahˇ˗eu tsawˇ haˬ “nui ma gʼawˬ mahˇ ni taˬ˗awˇ aˬ cawˬ˗ahˇ gʼawˬ shaˬ gaˬ nya˗eu” uˬ taꞈ “yaw tsaˬ yaw dawˇ jeˬ˗ahˇ laˬ kʼaˬ cehˇ˗eu” meh. Tsawˇ haˬ tiˬ gʼaˬ nui gaˬ ahˇ naˇ “dawˬ tawˆ luꞈ˗ahˇ daˬ coeˇ˗eu meh. Dawˬ tawˆ luꞈ˗ahˇ jah coeˇ˗eu meh. Dawˬ tawˆ luꞈ˗ahˇ noeˬ tmˬ coeˇ˗eu meh. Dawˬ tawˆ luꞈ˗ahˇ oˇ coeˇ˗eu meh.” Aˬ cawˬ˗ahˇ maˇ diˇ gaˬ˗awˇ ngehˬ gʼeh˗eu uˬ taꞈ saˇ jaˇ ziꞈ˗eu cawˬ jiˇ pyeuꞈ meh. Ehˇ kʼawꞈ nui gaˬ maˬ ahˇ naˇ myaˆ naˆ˗eu jahˇ gʼeh˗eu yaw doeˇ ngehˬ˗eu mˇ˗eu yawˬ ha gʼaˇ duˬ tehꞈ˗ehˇ shaˇ noeˬ˗eu aˬ cawˬ˗ahˇ iˬ baˇ maˬ pyehˬ nehˬ˗eu heu deuˬ mˇ˗eu meh. Aˬ dui heu loꞈ˗ehˇ gʼeh ngeh to˗aˬ “yawˬ ha˗euˬ nui kʼahˇ maˬ poˆ”˗eu nui gaˬ mˇ mawˇ kaˇ˗euˇ.—1 Gawˇliˬtu 13:4-8.

Yeˬhawˇbaˬ hawˇ˗eu Yeˬsuˇ˗euˬ nui gaˬ˗ahˇ dzaw geuꞈ

“Miˬyehˇ˗aˬ gʼoeˇ˗eu gaˬ˗eu jeˬ pyeuꞈ˗eu meh.” (1 Yoˇhaˬ 4:8) Gaˇ kawˆ heu aˬ yawꞈ neh kʼaˇ beh kʼaˇ mˇ taˬ˗euˬ jeˬ˗ahˇ haw ngeh siˬ laˇ˗eu meh. Aˬ yawꞈ˗euˬ huiˬ dzehˬ˗eu nui gaˬ naˇ Yeˬsuˇ miˇ tsaˬ˗ahˇ bi oe˗awˇ naˇ dui dui˗eu laꞈ kʼoeˇ aˬ dui gʼaˇ duˬ bi shiˇ dah le˗euˬ heu meh. “Miˬyehˇ˗aˬ aˬ yawꞈ˗euˬ Zaˬmaˇ tiˬ gʼaˬ tehꞈ˗ehˇ jawˇ˗eu kʼawꞈ Zaˬmaˇ baˬ da neh aˬ dui dehꞈ˗eu jeˬ za nya ni miˇ tsaˬ kʼoeˇ taˆ kʼehˇ gʼeh le˗awˇ aˬ yawꞈ˗euˬ gʼoeˇ˗eu gaˬ˗eu jeˬ aˬ dui˗ahˇ bi mawˇ laꞈ˗euˬ meh. Gʼoeˇ˗eu gaˬ˗eu jeˬ˗aˬ heu loꞈ˗ehˇ meh. Aˬ dui Miˬyehˇ˗ahˇ gaˬ˗euˬ maˬ ngeuˇ. Aˬ yawꞈ aˬ dui˗ahˇ gaˬ˗awˇ aˬ dui˗euˬ iˬ baˇ bi pi dzeh le˗eu gʼaˇ duˬ aˬ yawꞈ˗euˬ Zaˬmaˇ˗ahˇ kʼehˇ gʼeh leꞈ˗euˬ meh” lehˇ Yoˇhaˬ ehˇ˗eu meh. (1 Yoˇhaˬ 4:9, 10) Miˬyehˇ˗euˬ gaˬ˗eu jeˬ baˬ da neh aˬ dui˗euˬ iˬ baˇ˗ahˇ pyehˬ nehˬ˗awˇ noeˬ tmˬ˗eu jeˬ jaˆ laˇ˗euˬ uˬ taꞈ dehꞈ˗eu jeˬ jiˇ za˗euˬ meh.

Miˬyehˇ neh noeˬ taˬ˗euˬ jeˬ mˇ byah˗eu gʼaˇ duˬ Yeˬsuˇ aˬ yawꞈ˗euˬ dehꞈ ziˇ lawˇ nehˬ˗euˬ heu naˇ tsawˇ haˬ zaˬ˗ahˇ nui gaˬ mˇ mawˇ˗eu jeˬ pyeuꞈ meh. “Yeˬsuˇ Ka li˗aˬ Miˬyehˇ bi mˇ mawꞈ˗eu jeˬ˗ahˇ mˇ byah˗euˬ miˇ neh aˬ dui iˬ baˇ˗ahˇ law˗iˇ˗euˬ ma. . . . aˬ yawꞈ˗euˬ gʼawˇ mawˇ lawˇ dah˗euˬ miˇ neh aˬ dui˗euˬ iˬ baˇ shawˇ laˇ gʼaˬ˗euˬ meh” lehˇ Pawˇluˆ ehˇ˗eu meh. (Heˬbyehˇ 10:9, 10) Tsawˇ haˬ tiˬ gʼaˬ˗iˬ heu naˆ ni huiˬ˗eu nui gaˬ maˬ mˇ nya˗a. “Yawˬ ha˗euˬ cawˬ gʼaˇ duˬ shiˇ dah nehˬ˗eu naˆ maˬ tseˇ huiˬ dzehˬ˗eu gʼoeˇ˗eu gaˬ˗eu jeˬ maˬ paˇ jaˆ meh” lehˇ Yeˬsuˇ ehˇ˗eu meh. (Yoˇhaˬ 15:13) Aˬ dui maˬ byah kuꞈ˗eu tsawˇ haˬ Yeˬhawˇbaˬ hawˇ˗eu Yeˬsuˇ˗euˬ nui gaˬ˗ahˇ aˬ joˆ˗ehˇ mˇ caw nya˗eu nga? Aˬ joˆ˗ehˇ mˇ caw nya nga lehˇ ja sawˇ kaˇ˗euˇ.

“Gʼoeˇ˗eu gaˬ˗eu jeˬ laꞈ kʼoeˇ dehꞈ gʼeh˗awˬ”

Pawˇluˆ “Miˬyehˇ gaˬ dui dui˗eu zaˬ deuˬ pyeuꞈ˗eu loꞈ˗ehˇ aˬ yawꞈ˗ahˇ duˇ laˇ ni leh jeh˗awˬ. Ka li . . . aˬ yawꞈ˗euˬ gʼawˇ mawˇ aˬ dui gʼaˇ duˬ lawˇ nehˬ˗euˬ gaˇ duˇ ni gʼoeˇ˗eu gaˬ˗eu jeˬ laꞈ kʼoeˇ dehꞈ gʼeh˗awˬ” lehˇ gʼaˬ biꞈ˗eu meh. (Eˇpeˇsu 5:1, 2) “Gʼoeˇ˗eu gaˬ˗eu jeˬ laꞈ kʼoeˇ dehꞈ gʼeh” lehˇ ehˇ˗eu heu aˬ jeˬ nga? Aˬ myah luꞈ nui gaˬ mˇ mawˇ gaˇ ehˇ˗eu meh. Aˬ cawˬ˗ahˇ gaˬ ma lehˇ tehꞈ˗ehˇ maˬ ehˇ ni ya mˇ doˆ laꞈ˗eu meh. Yoˇhaˬ “Ngaˇ gaˬ dui dui˗eu zaˬ deuˬ˗oˇ aˬ dui˗euˬ gʼoeˇ˗eu gaˬ˗eu heu˗aˬ mehˬ boeˬ neh tehꞈ˗ehˇ gaˬ˗eu jeˬ taˬ bi pyeuꞈ. Maˇ jawˆ ni gʼeh˗eu gʼoeˇ˗eu gaˬ˗eu jeˬ bi pyeuꞈ˗awˇ mˇ˗eu shaˇ˗eu laꞈ kʼoeˇ bi doˆ laˇ˗awˬ” lehˇ ehˇ˗eu meh. (1 Yoˇhaˬ 3:18) Aˬ dui Yeˬhawˇbaˬ hawˇ˗eu tsawˇ haˬ˗ahˇ gaˬ˗eu miˇ neh “Miˬyehˇ Miˇkʼahˬ gaˇ kawˆ laꞈ kʼaˬ cehˇ˗eu guiˬ lahˬ dawˬ” tsaꞈ gaˬ iˇ˗eu ma. (Maꞈtehˬ 24:14; Luˇkaꞈ 10:27) Kʼoeˇ naˇ oˇ˗awˇ gʼawˬ shaˬ gaˬ˗eu laꞈ kʼoeˇ iˬ baˇ pyehˬ nehˬ naˇ jiˇ “gʼoeˇ˗eu gaˬ˗eu jeˬ laꞈ kʼoeˇ dehꞈ gʼeh”˗eu jeˬ pyeuꞈ meh. Yeˬhawˇbaˬ aˬ dui˗ahˇ “iˬ baˇ pyehˬ nehˬ laꞈ˗euˬ loꞈ˗ehˇ tiˬ gʼaˬ tiˇ gʼaˬ iˬ baˇ pyehˬ˗awˬ” lehˇ ehˇ˗eu dawˬ˗ahˇ aˬ dui mˇ caw ma.—Gawˇlawˇsehˇ 3:13.

Aˬ dui aˬ cawˬ˗ahˇ mehˬ˗awˇ yaw lehˬ tiˬ jeˬ na toeˬ ceh nehˬ˗eu heu naˇ nui gaˬ maˬ ahˇ˗eu miˇ neh maˬ ngeuˇ˗a. Yaw jeˬ ma jeˬ zaˬ ngoeˇ gaˇ laˆ naˬ˗eu gʼaˇ duˬ aˬ da aˬ ma tiˬ deuˬ na zaˬ kʼaˇ shaˇ˗eu jeˬ biꞈ˗eu meh. Ehˇ kʼawꞈ nui gaˬ ahˇ˗eu aˬ da aˬ ma naˇ zaˬ neh shaˇ˗euˬ yaw bahˬ˗eu jeˬ˗ahˇgʼaˬ maˬ biꞈ˗a. Teu gaˇ duˇ ni Yeˬhawˇbaˬ nui gaˬ ahˇ˗eu kʼawꞈ aˬ yawꞈ “gaˬ˗eu gʼaˬ˗ahˇ aˬ yawꞈ mehˬ paˇ tsoˆ paˇ nehˬ”˗eu meh. (Heˬbyehˇ 12:6) Teu miˇ neh loˬ ngeh tsaˬ tsaˬ ni ehˇ nehˬ˗eu heu naˇ nui gaˬ mˇ mawˇ˗eu jeˬ pyeuꞈ meh. (Dawˬdaˬ 3:11, 12) Ehˇ kʼawꞈ aˬ dui yawˬ gʼaˬ na luꞈ iˇ baˇ zaˬ pyeuꞈ˗eu miˇ neh tiˬ kʼehˬ maˬ taˬ nui gaˬ maˬ mˇ mawˇ nehˬ˗a lehˇ taˬ ngehˇ. Aˬ dui nui gaˬ mˇ mawˇ˗eu paw bi muiˬ daˆ laˇ nya meh. Aˬ joˆ˗ehˇ ya jahˇ˗eu nga? Mˇ nya˗eu smˬ kawˆ˗ahˇ ja sawˇ ma.

Aˬ dui nui gaˬ mˇ mawˇ˗eu paw aˬ joˆ˗ehˇ bi muiˬ daˆ laˇ nya˗eu nga?

Tiꞈ nui gaˬ ahˇ˗eu gʼaˇ duˬ Miˬyehˇ˗ahˇ yaw sahˇ ya shaˇ meh. Yeˬhawˇbaˬ “aˬ yawꞈ˗ahˇ kʼaˇ shaˇ˗eu tsawˇ haˬ deuˬ˗ahˇ muiˬ˗eu shawˇ˗eu yaw sahˇ” biꞈ meh lehˇ Yeˬsuˇ ehˇ˗eu meh. (Luˇkaꞈ 11:13) Teu miˇ neh aˬ dui muiˬ˗eu shawˇ˗eu yaw sahˇ shaˇ˗awˇ bi caw ba naˇ aˬ dui˗euˬ nui gaˬ myaˬ dzehˬ laˇ˗eu meh. (Gaˬlaˬtiˆ 5:16) Yaw jeˬ ma jeˬ nawˇ aˇ muˇ˗ahˇ sheuˬ gʼeh˗eu gʼaˬ pyeuꞈ naˇ Jaˇliꞈ˗ahˇ gʼoe˗awˇ mehˇ nmˇ deuˬ˗ahˇ nui noeˬ nui duˇ biꞈ ngeh nui gaˬ bi ahˇ nehˬ laꞈ lehˇ muiˬ˗eu shawˇ˗eu yaw sahˇ shaˇ nya meh. Kʼoeˇ naˇ aˬ da aˬ ma pyeuꞈ naˇ kʼawꞈ zaˬ˗ahˇ nui pehˇ neh maˬ ngeuˇ˗eu nui gaˬ neh bi mehˬ laꞈ lehˇ Miˬyehˇ˗euˬ yaw sahˇ shaˇ nya meh.

Nyiꞈ Yeˬsuˇ aˬ cawˬ yehˬ baw sehˇ lu˗ehˇ jahˇ laˇ kʼawꞈ nui gaˬ aˬ joˆ˗ehˇ mˇ mawˇ nga lehˇ shaˇ noeˬ. (1 Beˬtuˆluˆ 2:21, 23) Tiˬ gʼaˬ na nawˬ˗ahˇ nui ma laˆ pehˇ laˇ˗eu maˬ ngeuˇ naˇ maˬ tsaˬ maˬ dawˇ˗eu jeˬ jahˇ laˇ ngeh ‘Yeˬsuˇ law nmˇ˗aˬ aˬ joˆ˗ehˇ jahˇ nga?’ lehˇ yawˬ haˇ yawˬ ha naˇ haˬ. Heu loꞈ˗ehˇ jeˬ hu naˇ haˬ naˇ maˬ mˇ doˆ mi na˗ehˇ jeˬ hu shaˇ noeˬ ni caw ba nehˬ miˇ˗a lehˇ mehˇ nmˇ Li ehˇ˗eu meh. “Tiˬ poˆ ngaˬ˗euˬ gaˇ mˇ cawˬ tiˬ gʼaˬ ngaˬ˗euˬ gaˇ kawˆ hawˇ˗eu ngaˬ neh mˇ˗euˬ gaˇ˗ahˇ maˬ muiˬ jeˬ˗ehˇ boꞈ˗awˇ aˬ cawˬ˗ahˇ sha nehˬ˗euˬ meh. Ngaˇ˗ahˇ nui ma naˇ˗eu lehˇ miˇ˗a. Ehˇ kʼawꞈ ‘Cawˬ teu gʼaˬ˗ahˇ Yeˬsuˇ mˇ kʼoꞈ nehˬ˗eu jeˬ˗ahˇ ngaˇ aˬ joˆ˗ehˇ dzaw geuꞈ paˬ nga?’ lehˇ ngaˇ yawˬ haˬ˗ahˇ naˇ haˬ˗awˇ Yeˬsuˇ mˇ paˬ˗ehˇ gʼeh˗eu jeˬ˗ahˇ shaˇ noeˬ gʼaˬ naˇ tiˬ jeˬ maˬ ngeuˇ˗a lehˇ bi dzeuˇ iˇ˗euˬ ma. Myahˇ laˇ ngeh ngaˬ˗euˬ cawˬ teu gʼaˬ naˇ dui dui˗awˇ nui ma cawˆ dui dui luꞈ nga lehˇ ngaˇ ya siˬ˗awˇ aˬ yawꞈ yawˬ ha neh boꞈ˗euˬ loꞈ˗ehˇ maˇ diˇ ehˇ mawꞈ˗eu maˬ ngeuˇ paˬ lehˇ ngaˇ noeˬ˗euˬ ma. Aˬ cawˬ nui ma laˆ pehˇ laˇ kʼawꞈ Yeˬsuˇ˗euˬ nuiˬ gaˬ˗ahˇ noeˬ mawˇ˗eu heu naˇ aˬ cawˬ˗ahˇ nui gaˬ mˇ nya ni caw ba nehˬ miˇ˗a.” Aˬ dui Yeˬsuˇ˗ahˇ dzaw geuꞈ naˇ aˬ myah luꞈ nui gaˬ mˇ mawˇ nya˗eu meh.

Smˇ yawˬ ha nui kʼahˇ maˬ geuꞈ˗eu nui gaˬ dzaw. Heu naˇ Yeˬsuˇ˗euˬ zaˬ lahˇ pyeuꞈ˗eu lehˇ siˬ laˇ˗eu tiˬ jeˬ pyeuꞈ meh. (Yoˇhaˬ 13:34, 35) Yeˬsuˇ kʼawꞈ ni heu loꞈ˗ehˇ gʼeh˗eu nui gaˬ ahˇ˗awˇ aˬ dui˗ahˇ mˇ mehˬ nehˬ yaꞈ˗euˬ meh. Aˬ joˆ˗ehˇ nga? Aˬ yawꞈ mˬ kʼoeˇ taˆ neh oe ka˗awˇ “dawˬ tawˆ luꞈ byehˇ dzeh yaꞈ jiˇ˗awˇ” aˬ dui˗euˬ gʼaˇ duˬ “shiˇ gaˇ keuˆ ni” lawˇ nehˬ le˗euˬ meh. (Piˇliˇpiˆ 2:5-8) Aˬ dui Yeˬsuˇ neh yawˬ ha nui kʼahˇ lawˇ nehˬ˗euˬ nui gaˬ˗ahˇ dzaw geuꞈ naˇ aˬ dui˗euˬ nui noeˬ hawˇ˗eu nui ma aˬ yawꞈ˗ahˇ duˇ leˇ˗awˇ aˬ cawˬ loˬ˗eu jeˬ˗ahˇ jeˬ hu taˬ˗eu meh.

Nui gaˬ mˇ mawˇ˗eu baˬ da neh za˗euˬ jeˬ

Aˬ dui nui gaˬ mˇ mawˇ naˇ gaˇ dahˇ tsoeˬ dui dui˗eu meh. Yaw jeˬ ma jeˬ nyiˬ hmˬ˗ahˇ haw ma.

• Miˇ kʼahˬ doe ni jawˇ˗eu mehˇ nmˇ deuˬ: Aˬ dui tiˬ gʼaˬ˗ahˇ tiˬ gʼaˬ gaˬ˗eu miˇ neh miˇ kʼahˬ doe ni jawˇ˗eu aˬ geu muˇ˗ahˇ iˇ kʼawꞈ mehˇ nmˇ deuˬ aˬ dui˗ahˇ lmˇ buˬ ni ha geuꞈ nehˬ laꞈ meh lehˇ siˬ nya˗eu ma. “Miˇ tsaˬ kʼoeˇ taˆ kʼaˇ jawˇ˗eu Ka li˗ahˇ jah˗eu” mehˇ nmˇ deuˬ nawˬ˗ahˇ gaˬ meh lehˇ ya siˬ˗eu heu naˇ yaw˗ehˇ muiˬ˗eu tiˬ jeˬ pyeuꞈ meh. (1 Beˬtuˆluˆ 5:9) Heu loꞈ˗ehˇ gʼeh˗eu nui gaˬ aˬ dui Miˬyehˇ˗euˬ tsawˇ haˬ yaw kaˬ˗ahˇ maˬ ngeuˇ naˇ maˬ mawˇ nya˗a.

• Tsaˬ leˇ dzoeˇ leˇ˗eu jeˬ: “Goeˇ˗eu gaˬ˗eu laꞈ kʼoeˇ tiˬ gʼaˬ tiˇ gʼaˬ oˇ”˗eu heu naˇ “tsaˬ leˇ dzoeˇ leˇ˗eu jeˬ neh gahˇ dzahˬ” taˬ˗eu meh. (Eˇpeˇsu 4:2, 3) Aˬ dui heu loꞈ˗ehˇ gʼeh˗eu nui saˇ oꞈ˗eu jeˬ bawˬ dzaˬ gaˇ maˬ ehˇ huiˬ˗eu mehˬ bawˬ tiˬ nah hawˇ˗eu smˬ nah˗ahˇ maˬ ehˇ ya mawˇ˗euˬ ma. Nui saˇ heu nymˇ iˬ nah maˬ tsaˬ maˬ dzoeˇ leˇ˗eu miˇ tsaˬ nehˬ˗ehˇ beu gaˇ ngaˇ lehˇ nawˇ noeˬ miˇ˗a loˇ? (Ja ceuˬ 119:165; Iˇsaˬyaˇ 54:13) Aˬ dui aˬ cawˬ nehˬ˗ehˇ tsaˬ leˇ naˇ aˬ yawꞈ maꞈ˗ahˇ maˇ diˇ gaˬ˗awˇ mˬ taˆ jawˇ˗eu Aˬda˗ahˇ jiˇ laꞈ kʼaˬ bi cehˇ˗eu meh.—Ja ceuˬ 133:1-3; Maꞈtehˬ 5:9.

“Gʼoeˇ˗eu gaˬ˗eu jeˬ˗aˬ tsawˇ haˬ zaˬ˗ahˇ bi huiˬ bi mahˇ laˇ”

“Gʼoeˇ˗eu gaˬ˗eu jeˬ˗aˬ tsawˇ haˬ zaˬ˗ahˇ bi huiˬ bi mahˇ laˇ” meh lehˇ Pawˇluˆ ehˇ meh. (1 Gawˇliˬtu 8:1) Heu aˬ jeˬ˗ahˇ ehˇ mawꞈ˗eu nga? “Nui gaˬ˗eu dawˬ caˇ” lehˇ kuˇ˗eu 1 Gawˇliˬtu yaw huiˬ 13-ahˇ nui gaˬ aˬ joˆ˗ehˇ bi huiˬ bi mahˇ laˇ nga lehˇ ja sawˇ taˬ˗euˬ meh. Gaˬ˗eu jeˬ˗aˬ aˬ cawˬ˗ahˇ muiˬ˗eu jeˬ˗ahˇ noeˬ keuˆ˗awˇ loˬ˗eu jeˬ˗ahˇ ngehˬ gʼeh nehˬ˗eu meh. (1 Gawˇliˬtu 10:24; 13:5) Kʼoeˇ naˇ aˬ cawˬ gʼaˇ duˬ noeˬ mawˇ˗eu oˇ oˬ˗eu gʼawˬ shaˬ gaˬ˗eu heu deuˬ baˬ da neh nymˇ jiˇ laꞈ kʼoeˇ muiˬ daˆ laˇ˗awˇ aˇ muˇ laꞈ kʼoeˇ jiˇ mehˬ bawˬ gm laˇ meh.—Gawˇlawˇsehˇ 3:14.

Aˬ cawˬ˗ahˇ nui gaˬ yaw myaˬ paw neh mˇ nya kʼawꞈ Miˬyehˇ˗ahˇ gaˬ˗eu heu naˇ aˇ poeˬ baw dzehˬ˗awˇ aˬ dui˗euˬ nui gaˬ˗ahˇ bi myaˬ dzehˬ laˇ˗eu meh. Aˬ jeˬ miˇ neh nga? Miˬyehˇ˗ahˇ gaˬ˗eu jeˬ aˬ dui˗ahˇ nui ma tiˬ siˬ tehꞈ˗ehˇ biꞈ taꞈ˗eu miˇ neh. Dehꞈ˗eu jeˬ tsawˇ jeuˬ dawˬ beu gaˇ˗eu tsawˇ haˬ deuˬ Yeˬhawˇbaˬ˗ahˇ uˬ duˬ tahˬ˗awˇ aˬ yawꞈ “ehˇ dawˬ naˇ haˬ” luꞈ˗eu meh. (Zeˬpaˬniˇ 3:9) Aˬ dui Miˬyehˇ˗euˬ yaw sahˇ neh siˬ le˗euˬ aˇ gʼehˇ heu yawˬ nah na luꞈ mˇ mawˇ kaˇ˗euˇ.