Aˬ yawꞈ tsaˬ˗eu jeˬ˗ahˇ tseˇ

Moˇseˬ lehˇ ehˇ˗eu tsawˇ myahˇ˗ahˇ aˬ yawꞈ˗euˬ Heˬbyehˇ aˬ da aˬ ma neh myahˇ nehˬ˗euˬ maˬ ngeuˇ˗a. Aˬ yawꞈ˗ahˇ ciˬ cu˗euˬ Iˇjiˇtuˆ˗euˬ sahˬ paˬ zaˬ miˬ neh myahˇ nehˬ˗euˬ meh. Tsawˇ myahˇ heu˗euˬ dawˬ tsuiꞈ naˇ “Iˇ cuꞈ laꞈ kʼoeˇ neh gʼeu doˆ˗euˬ” lehˇ ehˇ mawꞈ˗eu meh. Ehˇ˗eu loꞈ˗ehˇ Iˇjiˇtuˆ˗euˬ sahˬ paˬ zaˬ miˬ Moˇseˬ˗ahˇ iˇ cuꞈ laꞈ kʼoeˇ neh ciˬ doˆ nehˬ˗euˬ meh. Aˬ yawꞈ Moˇseˬ˗ahˇ Iˇjiˇtuˆ sahˬ paˬ˗euˬ nymˇ jiˇ laꞈ kʼoeˇ˗euˬ aˇ yeˇ huiˬ˗eu tiˬ gʼaˬ bi pyeuꞈ laˇ ma lehˇ noeˬ tmˬ gaˇ duˇ˗eu meh. Teu miˇ neh aˬ yawꞈ Moˇseˬ Iˇjiˇtuˆ miˇ kʼahˬ˗ahˇ sahˬ boꞈ dzaw goˇ luꞈ gaˇ haw haw˗ehˇ nui kʼahˇ shiˇ˗eu yaw duˬ baw meh. Jaˇliꞈ laꞈ kʼoeˇ ‘Moˇseˬ Iˇjiˇtuˆ tsawˇ jeuˬ˗euˬ zaˬ siˬ tsawˇ gahˇ dawˬ tawˆ luꞈ ya dzaw˗euˬ’ meh lehˇ ehˇ taˬ˗euˬ meh.

Moˇseˬ bym dui nya dui dui˗eu zaˬ guˬ tiˬ gʼaˬ pyeuꞈ laˇ˗euˬ meh. Aˬ yawꞈ˗aˬ “ngehˬ˗eu tmˇ˗eu paw dzeˇ maˬ ehˇ, mˇ˗eu shaˇ˗eu paw dzeˇ maˬ ehˇ, nya dui dui˗eu tsawˇ haˬ tiˬ gʼaˬ pyeuꞈ laˇ˗euˬ meh” lehˇ Jaˇliꞈ ehˇ˗eu meh. Aˬ yawꞈ Iˇjiˇtuˆ miˇ kʼahˬ˗ahˇ jawˇ˗awˇ pyuˇ shuiˇ myawˬ gahˬ, myaˆ pyawˬ naˇ mehˇ, baoˬ heu deuˬ jaˆ laˇ ni leh jeh nya meh. Ehˇ kʼawꞈ aˬ yawꞈ toˆ˗ehˇ leh jeh naˇ Yeˬhawˇbaˬ nehˬ˗ehˇ maˬ paˇ gʼoeˇ leˇ nya meh lehˇ siˬ nya meh. Teu miˇ neh aˬ yawꞈ˗euˬ dehꞈ ziˇ aˬ joˆ˗ehˇ dehꞈ daˆ leꞈ˗eu lehˇ ya tseˇ˗eu keuˆ laˇ˗euˬ meh. Aˬ yawꞈ aˬ jeˬ tseˇ˗euˬ nga?

Moˇseˬ 40 kʼoꞈ kʼawˆ laˇ ngeh aˬ yawꞈ tiˬ jeˬ paˬ˗ahˇ yaw duˬ duˬ˗ehˇ tseˇ˗euˬ meh. Jaˇliꞈ heu loꞈ˗ehˇ ehˇ˗eu meh. “Moˇseˬ jah˗eu miˇ neh, aˬ yawꞈ huiˬ laˇ ngeh sahˬ paˬ Paˬlawˇ˗euˬ zaˬ miˬ˗euˬ zaˬ yo lehˇ tiˬ pawꞈ˗iˬ maˬ bi kuˇ mawꞈ˗a. Moˇseˬ˗aˬ iˬ baˇ˗euˬ laꞈ kʼoeˇ tiˬ kʼehˇ laˇ kʼehˬ cehˇ gʼa˗eu naˆ maˬ tseˇ Miˬyehˇ˗euˬ tsawˇ haˬ deuˬ nehˬ˗ehˇ tiˬ kawˆ loꞈ˗ehˇ shaˬ zahˬ˗ahˇ daˬ ma lehˇ tseˇ geuꞈ˗euˬ meh.” Aˬ yawꞈ nui jah ziꞈ dah ni gʼeh˗awˇ kʼaˬ duˬ ni gʼeh˗eu miˇ neh, tsaˬ˗eu jeˬ˗ahˇ tseˇ nya˗euˬ meh. Ehˇ kʼawꞈ aˬ yawꞈ tiˬ jeˬ na mˇ lehˬ˗euˬ meh.

Moˇseˬ Iˇsaˬleˬlaˆ tsawˇ haˬ deuˬ˗ahˇ “aˬ yawꞈ˗euˬ tsawˇ jeuˬ” lehˇ haw˗eu meh. Aˬ yawꞈ aˬ yawꞈ˗euˬ tsawˇ jeuˬ deuˬ maˬ tsaˬ maˬ dawˇ˗eu jeˬ˗ahˇ ya daˬ gaˇ haw haw˗ehˇ caw ba nehˬ mawꞈ˗eu meh. Teu miˇ neh tiˬ nah aˬ yawꞈ˗euˬ tsawˇ haˬ deuˬ aˇ naˆ ni ya shaˬ luꞈ nga lehˇ haw˗iˇ˗euˬ meh. Teu ngeh Moˇseˬ gaˇ˗ahˇ haw saˆ˗eu gʼaˬ pyeuꞈ gaˇ duˇ˗eu Iˇjiˇtuˆ tsawˇ haˬ tiˬ gʼaˬ, Heˬbyehˇ tsawˇ haˬ tiˬ gʼaˬ˗ahˇ diˬ luꞈ gaˇ ya mawˇ˗euˬ meh. Aˬ yawꞈ Iˇjiˇtuˆ tsawˇ haˬ˗ahˇ toˆ˗ehˇ taˬ jahˇ lehˇ ehˇ ngaˬ˗aˇ laˬ? Aˬ dui maˬ ya siˬ˗a. Teu ngeh Moˇseˬ ‘jawˬ jawˬ˗ehˇ haw˗euˬ’ meh. Aˬ yawꞈ zaˬ kʼaˆ teu gʼaˬ˗ahˇ caw ba nehˬ˗eu tiˬ gʼaˬ paˬ jawˇ ngaˇ laˬ lehˇ haw˗eu kʼawꞈ pyeuꞈ nya meh. Ehˇ kʼawꞈ tiˬ gʼaˬ˗ahˇ˗iˬ maˬ ya mawˇ˗eu miˇ neh tiˬ jeˬ paˬ ya jahˇ nga lehˇ noeˬ˗awˇ ‘Iˇjiˇtuˆ tsawˇ haˬ kʼoeˇ gʼaˬ˗ahˇ sehꞈ˗euˬ’ meh. Aˬ yawꞈ diˇ daˬ˗ahˇ sehꞈ˗euˬ nga laˬ? Maˬ ngeuˇ naˇ nui ma aˇ dzehˬ˗ehˇ pehˇ˗eu miˇ neh, maˬ yehˆ maˇ yehꞈ˗ehˇ diˬ sehꞈ˗euˬ nga laˬ? Gaˇ kawˆ teu Jaˇliꞈ laꞈ kʼoeˇ maˬ ehˇ taˬ˗aˬ. Moˇseˬ tiˬ gʼaˬ paˬ mawˇ naˇ aˬ yawꞈ˗ahˇ shaˬ laˇ nya nga lehˇ siˬ nya˗eu miˇ neh, Iˇjiˇtuˆ tsawˇ haˬ teu gʼaˬ˗ahˇ kʼaˇ shuiꞈ laꞈ kʼoeˇ beuˬ pahˬ yaꞈ˗euˬ meh.

Moˇseˬ nyaˆ taꞈ nah paˇ cah haw˗iˇ˗euˬ meh. Heu poˆ naˇ Heˬbyehˇ tsawˇ haˬ zaˬ kʼaˆ nyiˬ gʼaˬ ceh luꞈ gaˇ ya mawˇ˗euˬ meh. Aˬ yawꞈ laˆ piˇ˗eu lehˇ gʼeh ngeh, yaw lehˬ mˇ˗euˬ zaˬ kʼaˆ gʼaˬ Moˇseˬ˗ahˇ “nga maꞈ kʼoeˇ taˆ aˬ yuiꞈ aˬ tsu geuꞈ˗awˇ, yaˇ kʼaˬ bi daˇ˗eu gʼaˇ duˬ, aˬ suˇ gʼaˬ nawˬ˗ahˇ tseˇ doˆ taˬ ta. Iˇjiˇtuˆ tsawˇ haˬ kʼoeˇ gʼaˬ˗ahˇ sehꞈ˗euˬ loꞈ˗ehˇ, ngaˬ˗ahˇ nawˇ paˇ sehꞈ˗eu gʼeh te loˇ” lehˇ ehˇ nehˬ˗euˬ meh. Moˇseˬ aˬ yawꞈ neh mˇ˗euˬ jeˬ˗ahˇ aˬ cawˬ siˬ nya jiˇ˗euˬ miˇ neh guˆ˗eu meh.

Moˇseˬ neh noeˬ taˬ˗euˬ loꞈ˗ehˇ tiˬ jeˬ˗iˬ maˬ pyeuꞈ laˇ˗aˬ. Aˬ yawꞈ aˬ joˆ˗ehˇ noeˬ taˬ˗euˬ nga? Jaˇliꞈ laꞈ kʼoeˇ “Miˬyehˇ aˬ yawꞈ˗ahˇ zmˬ˗eu laꞈ kʼoeˇ, aˬ yawꞈ˗euˬ tsawˇ jeuˬ˗ahˇ ka kʼoꞈ˗eu lehˇ gʼeh˗eu gaˇ kawˆ aˬ yawꞈ˗euˬ tsawˇ haˬ deuˬ noeˬ siˬ tehꞈ˗a lehˇ aˬ yawꞈ noeˬ˗euˬ meh. Ehˇ kʼawꞈ, aˬ yawꞈ maꞈ maˬ noeˬ siˬ˗a” lehˇ ehˇ taˬ˗euˬ meh. Moˇseˬ Miˬyehˇ aˬ yawꞈ˗ahˇ zmˬ˗awˇ Iˇsaˬleˬlaˆ deuˬ˗ahˇ Iˇjiˇtuˆ tsawˇ haˬ deuˬ˗euˬ laꞈ˗ahˇ neh ka kʼoꞈ nehˬ meh lehˇ jah gaˇ duˇ˗eu meh. Ehˇ kʼawꞈ Iˇsaˬleˬlaˆ deuˬ˗ahˇ Miˬyehˇ ka kʼoꞈ˗eu aˇ yamˬ maˬ keuˆ laˇ˗aˬ siˬ lehˇ aˬ yawꞈ maˬ siˬ nya˗a. Iˇsaˬleˬlaˆ deuˬ aˬ yawꞈ˗ahˇ toˆ˗ehˇ ehˇ laˇ meh lehˇ jiˇ maˬ noeˬ˗aˬ. Moˇseˬ˗aˬ Heˬbyehˇ tsawˇ haˬ pyeuꞈ kʼawꞈ, Iˇjiˇtuˆ nymˇ jiˇ laꞈ kʼoeˇ huiˬ laˇ˗euˬ miˇ neh Iˇsaˬleˬlaˆ deuˬ aˬ yawꞈ˗ahˇ maˬ jah˗a.

Moˇseˬ Iˇjiˇtuˆ miˇ kʼahˬ˗ahˇ zaˬ kʼaˆ geuꞈ luꞈ˗eu Yeˬhawˇbaˬ˗euˬ tsawˇ haˬ deuˬ˗ahˇ ka kʼoꞈ doˆ gʼeh˗eu gʼaˇ duˬ, aˬ yawˇ yawꞈ dah laˇ maˬ lehˇ noeˬ˗eu meh. Maˇ diˇ naˇ maˬ dah laˇ˗aˬ siˬ. Miˬyehˇ˗euˬ mehˬ shi˗aˬ aˬ yawꞈ gʼawˬ mya jeˬ ya dzaw˗a siˬ. Moˇseˬ naˇ kʼaˬ duˬ ni gʼeh˗awˇ gʼaˬ kʼaˆ˗eu uˬ taꞈ, “ngehˬ˗eu tmˇ˗eu paw dzeˇ nya dui dui˗eu tsawˇ haˬ tiˬ gʼaˬ pyeuꞈ” meh. Ehˇ kʼawꞈ Miˬyehˇ mehˬ shi aˇ poeˬ baw˗eu seu dzeuꞈ aˇ gʼehˇ tiˬ hmˬ loˬ luꞈ˗a siˬ. Teu naˇ nahˬ yu ni gʼeh˗eu jeˬ meh. Aˬ yawꞈ tiˬ jeˬ˗iˬ yaw kʼaˆ˗ehˇ maˬ shaˇ noeˬ ni Iˇjiˇtuˆ tsawˇ haˬ˗ahˇ sehꞈ˗euˬ meh.

Moˇseˬ neh mˇ˗euˬ jeˬ˗ahˇ Paˬlawˇ ya siˬ˗euˬ meh. Paˬlawˇ aˬ yawꞈ˗ahˇ tiˬ jeˬ˗iˬ dzawˇ nehˬ˗eu aˬ kawˬ˗aˬ maˬ biꞈ ni sehꞈ˗eu lehˇ leh jeh˗eu meh. Teu miˇ neh Moˇseˬ Iˇjiˇtuˆ miˇ kʼahˬ˗ahˇ neh cehˆ˗euˬ meh. Aˬ yawꞈ pyuˇ shuiˇ myawˬ gahˬ, saˇ lehˆ ni ya dehꞈ˗eu jeˬ, myaˆ pyawˬ naˇ mehˇ jaˆ˗eu jeˬ, heu deuˬ dawˬ tawˆ luꞈ ya byehˇ dzeh yaꞈ jiˇ˗awˇ, mehˬ hu paw aˬ jeˬ pyeuꞈ laˇ˗eu lehˇ jiˇ maˬ siˬ nya˗a. Aˬ yawꞈ dehꞈ le˗euˬ miˇ kʼahˬ˗ahˇ byehˇ dzeh yaꞈ˗awˇ gaˇ mahˇ kaˬ dui dui˗eu Miˇdiˬyaˬ miˇ kʼahˬ˗ahˇ cehˆ gʼeh˗eu heu naˇ, yaw awˬ nmˇ maˬ ngeuˇ˗a. Kʼaˬ duˬ ni ya gʼeh meh. Moˇseˬ koˆ kaˆ ni gʼeh˗eu miˇ kʼahˬ teu˗ahˇ ‘boeˇ miˬ siˬ kʼaˬ tiˬ gʼaˬ pyeuꞈ˗eu’ laꞈ kʼoeˇ yaw myaˬ tseˇ kʼoꞈ ya jawˇ˗euˬ meh. Moˇseˬ kʼaˬ duˬ ni gʼeh˗eu laꞈ kʼoeˇ laˆ poˆ laˆ paˇ ngaˬ˗aˇ laˬ? Yeˬhawˇbaˬ bi pyeuꞈ mawꞈ˗eu loꞈ˗ehˇ taˬ aw˗awˇ nahˬ yu ni gʼeh˗eu tiˬ gʼaˬ pyeuꞈ laˇ ngaˇ laˬ? Haw kaˇ˗euˇ.

Jaˇliꞈ aˇ deuˆ heu deuˬ˗ahˇ gui:

• Doˆ˗iˇ˗eu 2:11-22

• Gʼaˬkʼehˇ 7:22-29

• Heˬbyehˇ 11:24-26

Ja sawˇ˗eu gʼaˇ duˬ:

Moˇseˬ dehꞈ ziˇ aˇ yamˬ heu yamˬ˗ahˇ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Naꞈ suiˇ ni poˆ tseˇ

1. 1. Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ˗ahˇ zaˬ kʼaˆ geuꞈ yaꞈ˗euˬ lehˇ bi siˬ laˇ˗eu, maˇ diˇ pyeuꞈ yaꞈ˗euˬ aˬ jeˬ jeˇ˗euˬ saˇ kiˇ jaˆ˗eu nga? (w20.03 30) (Aˇ baˇ 1)

   Dawˬ kʼoꞈ

   

   Courtesy Brooklyn Museum, gift of Theodora Wilbour

2. 2. Moˇseˬ aˬ yawꞈ˗euˬ aˬ da aˬ ma˗ahˇ neh aˬ jeˬ jeˇ ya siˬ˗euˬ nga? “Iˇjiˇtuˆ tsawˇ haˬ˗euˬ zaˬ siˬ tsawˇ gahˇ dawˬ tawˆ luꞈ” ya dzaw ngeh jiˇ aˬ jeˬ jeˇ ya siˬ˗euˬ nga? (Gʼaˬkʼehˇ 7:22; w02-SI 6/15 10 ¶2-5)

   Dawˬ kʼoꞈ

3. 3. Iˇjiˇtuˆ tsawˇ haˬ deuˬ tsawˇ shiˇ aˬ joˆ˗ehˇ bui˗eu nga? Moˇseˬ Iˇjiˇtuˆ tsawˇ haˬ˗ahˇ sehꞈ˗euˬ tehꞈ˗ehˇ maˬ gʼaˬ ni tsawˇ shiˇ maˬ bui nehˬ˗euˬ uˬ taꞈ, kʼaˇ shuiꞈ˗ahˇ baꞈ pahˬ yaꞈ˗euˬ heu naˇ Iˇjiˇtuˆ tsawˇ haˬ˗ahˇ aˬ joˆ˗ehˇ gʼeh leˇ paˬ nga? (it “Iˇjiˇtuˆ, Iˇjiˇtuˆ tsawˇ haˬ” ¶28-wcgr˗SI) (Aˇ baˇ 2)

   Dawˬ kʼoꞈ

   

4. 4. Moˇseˬ Miˇdiˬyaˬ miˇ kʼahˬ˗ahˇ cehˆ gʼeh˗euˬ meh. Miˇdiˬyaˬ tsawˇ haˬ deuˬ hawˇ˗eu Iˇsaˬleˬlaˆ tsawˇ haˬ deuˬ aˬ jeˬ duˇ leˇ˗eu nga? (it “Miˇdiˬyaˬ” Naˬ ba 2 ¶1-2-wcgr˗SI)

   Dawˬ kʼoꞈ

Aˬ joˆ˗ehˇ zmˬ˗iˇ nya nga lehˇ shaˇ noeˬ

• Nui ma˗ahˇ gʼaˬ leˇ˗eu jeˬ nehˬ˗ehˇ taꞈ leˇ˗awˇ Moˇseˬ˗ahˇ neh aˬ jeˬ ya siˬ nga?

  Dawˬ kʼoꞈ

• Zaˬ guˬ deuˬ kʼaˬ duˬ ni gʼeh˗eu laꞈ kʼoeˇ tsaˬ˗eu jeˬ˗ahˇ tseˇ˗eu jeˬ nehˬ˗ehˇ taꞈ leˇ˗awˇ Moˇseˬ˗ahˇ aˬ jeˬ dzaw geuꞈ nya nga? (Aˇ baˇ 3)

  Dawˬ kʼoꞈ

  

• Moˇseˬ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga siˬ?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Moˇseˬ gʼoꞈ dehꞈ laˇ ngeh, aˬ yawꞈ zaˬ guˬ ngeh˗euˬ dehꞈ ziˇ nehˬ˗ehˇ taꞈ leˇ˗awˇ ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ˗eu Moˇseˬ˗ahˇ aˬ joˆ˗ehˇ dzaw geuꞈ nya nga?

Nui jah maˬ ahˇ˗eu deuˬ˗ahˇ maˬ ngeuˇ˗eu nui jah ahˇ˗eu deuˬ˗ahˇ dzaw geuꞈ—Paˬlawˇ˗ahˇ maˬ ngeuˇ˗eu Moˇseˬ˗ahˇ dzaw geuꞈ (2:27)

Moˇseˬ Yeˬhawˇbaˬ˗euˬ gaˇ mˇ˗eu gʼaˇ duˬ pyuˇ shuiˇ myawˬ gahˬ byehˇ dzeh yaꞈ˗euˬ meh. Nymˬ˗mˇ iˬ nah tawˇ neh toˆ˗ehˇ jahˇ˗eu teu naˇ gaˇ kahˇ dahˇ ngaˇ laˬ?

Mehˬ hu paw yaw muiˬ˗ehˇ bi dehꞈ gʼeh nya˗eu gaˇ˗ahˇ tseˇ (4:58)