Иисус Христостыҥ башкарузыла иштенип јадыс

1. Кудайдыҥ табы кандый?

КУДАЙДЫҤ табыла болзо, Каандык керегинде сӱӱнчилӱ јар бастыра јер ӱстине јарлалар учурлу (Марк 13:10; 1 Тим. 2:3, 4). Бу иш Иегованыҥ ижи. Оныҥ учун Иегова бойыныҥ сӱӱген Уулына бу сӱреен керектӱ ишти башкарзын деп јакару берген. Бу иш чактыҥ учы келгелекте токтоп калар деп, бис алаҥзыбай јадыс (Матф. 24:14).

2. Бис бу јӧрмӧлдӧ нени кӧрӧрис?

² Бу јӧрмӧлдӧ Иисус кӧгӱс курсак ӱлеерге «бӱдӱмјилӱ ле керсӱ кулды» канайып тузаланып турганын кӧрӱп ийерис (Матф. 24:45). Ол оныҥ болужыла тӱӱкиликте сӱреен јаан јарлаар иштиҥ кампаниязын башкарып болушканын кӧрӧрис. Анайда ок бис кажыбыс ла Иисусты ла бӱдӱмјилӱ кулды канай јӧмӧӧристи кӧрӱп ийерис.

ИИСУС ЈАРЛААР ИШТИ БАШКАРАТ

3. Иисуска кандый јаҥ берилген?

³ Бис Иисуска јарлайтан ишти башкарар јаҥ берилген деп кайдаҥ билерис? Иисус теҥеридӧӧн барардаҥ канча да кӱн озо, Галилейде ӱренчиктериле јуулышкан тужында, олорго мындый сӧстӧр айткан: «Теҥери ле јерде ончо јаҥ Меге берилген». Бу сӧстӧрдиҥ кийнинеҥ ле мындый сӧстӧр база айткан: «Барыгар, ончо калыктардаҥ ӱренчиктер белетегер» (Матф. 28:18, 19, ЈТ). Айдарда, Иисустыҥ башкарар јаҥына јарлаар ишти башкарар јаҥ база кирип јат.

4. Иисус Христос бӱгӱнги кӱнде јарлаар ишле башкарып турган деп, нениҥ учун бӱдӱп јадыс?

⁴ Иисус јарлаар иш ле ӱренчиктер белетеер иш «ончо калыктарга» јарлалар учурлу деп айткан. Анайда ок: «Бу телекейдиҥ учы келгенче, мен слерле кажы ла кӱн кожо болорым» — деген (Матф. 28:20, ЈТ). Мынаҥ јарт кӧрӱп јадыс, Иисус бӱгӱнги де кӱнде јарлаар ишти башкарып турган деп.

5. Сарын 110:3-теги судурдыҥ бӱдӱп турганына бис канайып јӧмӧжип јадыс?

⁵ Иисус бу телекейдиҥ учында аш јуунадатан ишке туружар улус једишпес деп санааркабаган. Нениҥ учун дезе сарнаачыныҥ айткан судуры бӱдер учурлу деп билетен болгон: «Качан сен черӱӱҥди јууга апарып јатсаҥ, албатыҥ сениҥ кийниҥнеҥ барарга белен болор» (Сар. 110:3). Слер Каандык керегинде сӱӱнчилӱ јарды јарлап турган болзоор, Иисуска ла керсӱ кулга јӧмӧжип турганаарды кӧргӱзип јадаар. Анайда ок судурдыҥ бӱдӱп јатканына туружып јадаар. Бу ишти кем де токтодып болбойтон до болзо, је мында кӱчтери бар.

6. Каандыктыҥ јарчыларында кандый буудактар болот?

⁶ Каандык керегинде јарлап турган улуска бир јаан буудак болот. Ол — удурлажулар. Јана баскандар, тӧгӱн кудайлык јаҥныҥ ла политиканыҥ улузы бис керегинде тӧгӱн коп јайат. Олордыҥ тӧгӱн пропагандазына бӱделе, тӧрӧӧндӧрис, кӧрӱш-таныштарыс, кожо иштеп турган улус бисти Иегова керегинде ӱренбезин ле јарлабазын деп, кӧк-албанла токтоткылап јат. Кезик ороондордо тын истежӱлер болот: кезедиш, тӱрмелеш. Је бис бого бир де кайкабай јадыс, нениҥ учун дезе Иисус мынайып айткан: «Слерди Мениҥ адым учун ончо калыктар јаман кӧрӧр» (Матф. 24:9). Бисти јаман кӧргӧни, бис чын ла Иисустыҥ темиле барып јатканыс ла Иегова бисти јарадып турган деп керелеп јат (Матф. 5:11, 12). Бис билерис, бу истежӱлердиҥ ары јанында Дьявол турган деп! Је ол Иисусты качан да јеҥип болбос. Бистиҥ јарлаар иштиҥ Башчызыныҥ болужыла бу сӱӱнчилӱ јар ончо калыктарга јарлалат!

7. Ачылта 14:6, 7-деги сӧстӧр бӱдӱп турган деп, кандый керелер бар?

⁷ База бир јаан буудак — ӧскӧ тилдерди оҥдобозы. Је Иисус Иоанныҥ кӧрӱлтези ажыра јӱзӱн башка тилдердиҥ бар болгоны јарлаар ишке буудак болбос деген. (Ачылта 14:6, 7 кычырыгар.) Бу кӧрӱлте канайып бӱдет? Бис Каандык керегинде сӱӱнчилӱ јарды бастыра албатыларга јарлап јадыс. Темдектезе, библиялык материалдарды улус бистиҥ сайттаҥ кычырар аргалу. Бу сайт 1 000-наҥ ажык тилге чыгат. Башкару јӧп дезе «Јажын-чакка ырысту јӱригер!» деген бичиктиҥ кӧчӱрерин јараткан. Бу, Агару Бичикти ӱренетен тӧс бичик — 700-теҥ ажык тилдерге чыккан. Кӧзи кӧрбӧй турган улуска библиялык материалдар Брайльдиҥ шрифтине чыгат. Анайда ок кулагы укпай турган улуска видеолор чыгарылат. Бис бу судурлардыҥ бӱдӱп турганын бойыстыҥ кӧзисле кӧрӱп јадыс. Агару Бичикте айдылганыла, «бастыра албатылардаҥ болгон ло башка-башка тилдерге куучындап турган» албатылар чындыктыҥ «ару тилиле» куучындаарга ӱренип јат (Зах. 8:23; Соф. 3:9). Бу ончо неме Иисус Христостыҥ сӱреен јакшы башкарып турганын кӧргӱзет.

8. Јарлаар иште кандый једимдер болот?

⁸ Бӱгӱнги кӱнде Иегованыҥ организациязына 240 ороондо ло оноҥ до ӧскӧ јерлерде јадып турган 8 000 000-ноҥ ажыра Иегованыҥ Керечилери кирет. Анайда ок кажы ла јыл канча муҥдар улус сууга чӧҥӱрилет. Биске улустыҥ тоозы јаан учурлу эмес, је «јаҥы кижи» болуп калган улус, ӧскӧртӧ айтса, христиан кылык-јаҥды ӧскӱрип турган улус баалу (Кол. 3:8—10). Бу улуска Исайя 2:4-тӧги «албаты... јуулажарга ӱренбес» деп судур бӱдӱп јат. Кезик улус балыр јӱрӱм јӱрген, казыр болгон, ӧскӧ укту улусты јаман кӧргӧн. Је оноҥ бу кылыктаҥ олор араайынаҥ айрылып калган. Бистер бойыстыҥ јараш кылык-јаҥысла улуска Иеговага келерге болужадыс. Оноҥ Иисус Христостыҥ бистиҥ Башчыбыстыҥ кийнинеҥ барып јатканысты керелейдис (Иоанн 13:35; 1 Пётр 2:12). Бу недеҥ улам болуп турган? Бу ӱзе Иисус Христостыҥ болужы ажыра эдилип јаткан иш.

ИИСУС КЕРСӰ КУЛ КӦСТӦГӦН

9. Матфей 24:45—47-де чактыҥ учы керегинде кандый судур айдылган?

⁹ Матфей 24:45—47 кычырыгар. Иисус калганчы кӱндерде «бӱдӱмјилӱ ле керсӱ кул» кӧстӧлӧр деп айдып салган. Бу кул оныҥ ӱренчиктерине кӧгӱс курсак белетеер. Бис олордыҥ колын бир де бош салбай иштенип турганын кӧрӱп јадыс. Бистиҥ Башкаарачы Иисус майлаткан тоолу эр улустыҥ болужыла Кудайдыҥ чындык улузына ла јилбиркеп турган улуска «ӧйинде курсак» берип турзын деп јакару берген. Бу майлаткан улустар ака-эјелердиҥ бӱдӱмјизин бийлебей јат (2 Кор. 1:24). Анайда ок олор Иисус Христосты Кудайдыҥ албатызына «Башчы ла башкараачы» деп тооп јадылар (Иса. 55:4).

10. Ӱргӱлји јӱрӱмге барарга кандый бичик слерге болушкан? (Јуруктарды база кӧрӱгер.)

¹⁰ 1919 јылда керсӱ кулды кӧстӧгӧн кийнинеҥ, ол кул кӧп бичиктер чыгарып баштаарда, акту јӱректу улус кӧгӱс курсакты амзап баштаган. 1921 јылда улуска Агару Бичиктиҥ тӧс ӱредӱлерин оҥдозын деп болужарга, керсӱ кул «Арфа Божия» деп бичик чыгарган. Ӧй солынарда база да ӧскӧ бичиктер чыгып баштаган. Слер кандый бичиктиҥ болужыла Иегованы јакшы билип ле сӱӱп баштаганаар? «Бог верен», «Истина, ведущая к вечной жизни» ол эмезе «Ты можешь жить вечно в раю на земле»?, «Ӱргӱлји јӱрӱмге баштап апарар билгир», «Чему на самом деле учит Библия?», «Агару Бичик неге ӱредет?» ол эмезе бистиҥ калганчы чыккан «Јажын-чакка ырысту јӱригер!» деп бичик? Бу бичиктердиҥ амадузы — Иисус Христостыҥ ӱренчиктерин белетеери. Олордыҥ кажызы ла сыраҥай бойыныҥ ӧйинде чыккан.

11. Кӧгӱс курсак нениҥ учун бистиҥ ончобыска керектӱ?

¹¹ Кату кӧгӱс курсак јаҥыс ла бу јуукта чындыкка јилбиркеп баштаган улуска эмес, је бистиҥ кажыбыска ла керектӱ. Апостол Павел мындый сӧстӧр бичиген: «Кату курсак дезе тереҥ кӧгӱстӱ улуска берилген». Бу курсактаҥ улам, бис «јакшыны јаманнаҥ ылгаштырар аргалу» (Евр. 5:14, ЈТ). Бу телекейдиҥ кӧрӱм-санаазы, коркышту тын ӱрелген. Оноҥ улам, бистерге Иегованыҥ нормаларыла јӱрерге јеҥил эмес. Андый да болзо, карын Иисус Агару Бичикке тӧзӧлӧнгӧн амтанду кӧгӱс курсак бӱдӱмјибисти тыҥыдып турзын деп башкарып турган. Керсӱ кул кӧгӱс курсакты белетейле, Иисус Христостыҥ башкартузыла Кудайдыҥ албатызына ӱлеп јат.

12. Нениҥ учун бисти Иисус ла чылап, Кудайдыҥ адын тереҥ тооп турган деп айдарга јараар?

¹² Бис Иисус ла чылап, Кудайдыҥ адын тереҥ тооп јадыс (Иоанн 17:6, 26). Темдектезе, бис 1931 јылда Агару Бичикке тӧзӧлӧнип, Иегованыҥ Керечилери деп ат аданганыс. Бу дезе теҥеридеги Адабысла јуук колбуларлу болгонысты кӧргӱзип јат (Иса. 43:10—12). Оноҥ бу ла јылдыҥ ӱлӱрген айында, «Каруулчы шибеениҥ» кадарында Иегованыҥ ады бичилип башталган. Анайда ок Кудайдыҥ ады Агару Бичиктиҥ «Јаҥы телекей» деп кӧчӱрмезинде бойыныҥ туратан јерине тургузылган. Бу телекейдиҥ христиан серкпелери бойлорыныҥ Агару Бичигиниҥ кӧп кӧчӱрмелеринеҥ Кудайдыҥ адын јоголтып турган.

ИИСУС БОЙЫНЫҤ ӰРЕНЧИКТЕРИН БАШТАП АПАРАТ

13. Слер «бӱдӱмјилӱ ле керсӱ кулды» Иисус башкарып турган деп, нениҥ учун бӱдӱп турганаар? (Иоанн 6:68).

¹³ Иисус улуска Кудайга јууктазын деп болужарга, «бӱдӱмјилӱ ле керсӱ кул» ажыра јерде бойыныҥ ӱренчиктеринеҥ организация тӧзӧгӧн. Бу организацияга слердиҥ кӧрӱмеер кандый? Слер байла, апостол Пётр ла чылап: «Бис кемге баратан эдис? Сенде ӱргӱлји јӱрӱмниҥ сӧстӧри бар» — деп айдар болороор? (Иоанн 6:68). Бис Иегованыҥ Керечилериле танышпаган болзоос, эмди та нени эдип јӱрер эдис? Иисус биске Кудайдыҥ организациязы ажыра јӱзӱн-јӱӱр кӧгӱс курсак берет, агару ишти јакшы бӱдӱрерге болужат, анайда ок Иегованы сӱӱндирерге, «јаҥы кижини» кийип аларга болужат (Эф. 4:24).

14. Слер Иегованыҥ организациязыла кожо иштенип тура, COVID-19-тыҥ ӧйинде кандый туза алдаар?

¹⁴ Иисус кӱч ӧйлӧрдӧ биске бӱдӱмјилӱ јакарулар берип јат, бу анчада ла COVID-19 јайылып башталарда кӧрӱнген. Ол ӧйдӧ бу телекейдиҥ улузы чочып, нени эдерин билбей турган болгон. Је Иисус бисти корулаарга, чокум, јарт јакарулар берген. Темдектезе, маска кийзин ле бой-бойыныҥ ортозында дистанция тутсын деп. Аксагалдарга јаантайын ака-эјелердиҥ кӧгӱс јанын ла эт-кан јанын угуп турзын деп, эске алындыратан (Иса. 32:1, 2). Анайда ок Башкару јӧптиҥ баштанузында база да ӧскӧ јӧптӧр берип, ака-эјелердиҥ кӱӱнин кӧдӱрген.

15. Пандемияныҥ ӧйинде организация јуундарга ла јарлаар ишке кандый башкартулар берген? Мынаҥ кандый туза болды?

¹⁵ Организация пандемияныҥ ӧйинде, јуунныҥ туштажуларын ла јарлаар ишти канайып ӧткӱретен башкартулар база берген. Бу башкартуларды јуундар тургуза ла тузаланып баштаган. Анайып јуундар ла курултайлар видеосвязьла ӧткӱрилген. Јарлаар ишке дезе, телефон согуп, самаралар бичип турушканыс. Мынайып албаданганыстаҥ Иегованыҥ алкыштары јок артпайдыс. Кӧп ороондордо јарчылардыҥ тоозы билдирлӱ кӧптӧй берген. Кезик јерлерде јилбилӱ учуралдар болгон. («Иегова јарлаар ишке алкыжын берет» деген рамканы кӧрӱгер.)

16. Бис неге алаҥзыбай јадыс?

¹⁶ Та кем де организация ӧйинеҥ ӧткӱре ајарыҥкай болуп турган деп сананган болор. Је бис Иисустыҥ јакаруларыныҥ тузазын канча катап кӧрдис (Матф. 11:19). Бисти Иисус сӱӱшле башкарып турган деп, бир де алаҥзыбай јадыс. Келер ӧйдӧ бисти кандый да айалгалар сакып јаткан болзо, Иегова ла Иисус бистиҥ јаныста болор деп бӱдӱп јадыс. (Еврейлерге 13:5, 6 кычырыгар.)

17. Бисти Иисус башкарып турганына канайып кӧрӧдӧӧр?

¹⁷ Бисти Иисус Христос башкарып турганына тыҥ сӱӱнип јадыс. Бис культуразы ла угы-тӧзи јанынаҥ, анайда ок ӧскӧ тил билбези јанынаҥ бӧлӱништер јок организацияга кирип јадыс. Алдыста дезе кӧгӱс курсагыла байлык стол турат. Кажыбыс ла Каандык керегинде сӱӱнчилӱ јарды јарлаарга јакшы белетенип алганыс, анайда ок јараш кылык-јаҥдарды кийип аларга ла акту јӱрегистеҥ бой-бойысты сӱӱрге, оноҥ ло ары ӱренедис. Оныҥ да учун Иисус бистиҥ Башкараачы болуп турганына оморкоп јӱредис!