Yob
23 Yob udwoko kumae:
2 “Kadok tin eni de abiwagara para asu;*
tego para thum nikum cur para.
3 Ka nwang’u ndhu ang’eyo kaka m’acopo nwang’u i iye Mungu ba!
Nwang’u acidho kaka m’ebedo i iye.
4 Nwang’u atero kesi para i wang’e
man abepong’o dhoga ku wec mi cero bang’a;
5 Nwang’u ang’eyo kite m’ebidwoko ko ira lembe
man abeciko itha pi niwinjo gin m’ebeyero ira.
6 Nyo nwang’u eromo tiyo ku copo pare ma dit pi ninyego kuda?
Ungo, m’umbe jiji nwang’u ebewinja.
7 Kuca, ng’atu m’atira copo yiko lembe wang’ acel kude,
man nwang’u Japoklembe para gonyo lembe m’i wiya mi magwei.
8 Ento tek acidho yo nyangu, nwang’u embe kuca;
man tek aloko, acopo dok nwang’e ngo.
9 Tek ebetimo tic yor acam, acopo nene ngo;
i ng’eye edok elokere yor acwic, re asu anene ngo.
10 Ento eng’eyo yo m’ang’olo.
I ng’ey m’emulo iya, abiwok calu mola ma kwar m’alili.
11 Tienda nyono batiende tap tap;
awotho kwa i yo pare m’umbe nikier.
12 Alokara ngo cen kud i kum lembang’ola mi dend dhoge.
Agwoko lembe pare cuu nisagu kadhiri ma nwang’u ukwayere ira.*
13 Kan ekeco lembe moko, ng’a ma copo cerere ire?
Kan ebemito* nitimo gin moko, etime.
14 Kum ebitimo gin ceke m’ekeco* pira,
man egwoko lembe dupa ma kumeno.
15 Eno re m’uketho lembe pare ubedieng’o cwinya;
kan aparu pire, lworo medere ameda i iya.
16 Mungu uketho adoko lwor,
man Jategokpo unyayu ndiri i iya.
17 Re fodi asu mudho uketho ngo abedo ling’
kadi mudho ma bii de uumo wang’a ngo.