Yob
24 “Pirang’o Jategokpo ubeketho ngo nindo moko?
Pirang’o ju m’ung’eye gibeneno ngo nindo pare?*
2 Dhanu moko gicoro alama m’i wang’ kieu;
gikwalu udul lim pi dwol migi gigi.
4 Gidiyo jucan kara uwek yo cen;
ju ma jukony migi mbe mi ng’om gipondo aponda igi.
5 Jucan sayu cam calu kana mi lum ma kwo i langa;
gisayu cam ni nyithindhgi i langa.
6 Ukwayu gikay cam i podho pa ng’atu mange
man gibek kund ulok i podho mir ulok mi jutimrac.
7 Givuto muneru m’umbe bongu diewor traka;
gimbe ku jam um pi koyo.
8 Koth mi wi gudi tobogi blo;
ging’wenyo cana kii pilembe gimbe ku kavogo.
9 Jufudho nyathikic* cen ku dhu cak;
man jumayu bongu mi jucan ni mukwatu* pi banja,
10 eno uketho gibewotho muneru ma bongu mbe i kumgi,
man ma kec unegogi ma giyeyo kanga cam.
11 Gitimo tic ma tek i kum got i kind gang’ mi kidi ku dieceng’ ma heyhey;*
ginyono nying ulok i vur mi biyo pigulok, re asu rieu negogi.
12 Ju m’udhingo tho giberundo i adhura;
ju m’ulimo ret ma pek* gibekok nia jubin jukonygi,
ento Mungu ubeneno lembuno rac ungo.*
13 Jumoko gibejai i kum der;
gibeng’eyo ngo yo mi derne,
man gibelubo ngo gengi pare.
14 Janek ai pir kugweno;
enego ju ma jukony migi mbe man jucan,
diewor ke emondo i kwalu kwo.
15 Wang’ won abor kuro piny ukeucidi,
ma nwang’u ewacu kumae: ‘Ngatu moko mbe ma binena!’
Man eumo wang’e.
16 Gikakiri* i udi kud i mudho;
dieceng’ ke giciko bang’gi i udi migi.
Ging’eyo ngo der mi dieceng’.
17 Kum kugweno de bedo igi ve mudho ma bii;
ging’iyo ku ndiri ma mudho ma bii nyayu.
18 Ento pii terogi pio pio.*
Jubilamu theng ng’om migi.
Gibidok ungo i podho mir ulok migi.
19 Tap calu ma pei m’uloy rwinyo ko i ka oro man i saa mi lietho,
ju m’udubo de girwinyo kumeno i Liel!*
20 Wi min* biwil pire; ukoko bitimo foc i wiye.
Jubipoy pire kendo ngo,
man jubituro gondiri calu yen.
21 Evuro dhaku ma jamugumba,
man esendo dhatho.
22 Mungu* bitiyo ku tego pare pi nidaru weg tego cen;
kadok nwang’u giai malu, ging’eyo ngo nia gibikwo.
24 Judodogi pi saa ma nyanok, i ng’eye ke nwang’u gimbe.
Gitie calu withcam ma jukayu man jucoko dhoge;
jujwigogi man githo calu dhanu ceke.
25 Kawoni ng’a ma copo nyutho ngbeng’ nia atie javupo,
kadi ke ma romo thiro wec para?”