Yeremia
46 Eni tie lembe ma Yehova uyero ni jabila Yeremia pi thek ma tung’ tung’: 2 Pi Misiri, pir udul mony pa Farao Neko m’ubimo mi Misiri, m’ubino i dhu Kulo Efrath man m’Ubimo Nebukadnezar* mi Babeli uvoyo i Karkemic i oro mir ang’wende mi camuker pa Yehoiakim ma wod Yosiya m’ubimo mi Yuda:
3 “Wuyik nyithi ban* mwu man ban ma dongo,
Man wucidh i lwiny.
4 Wurony jamwoth iwi riuni man wuidhe, wu ju ma wuringo ku riuni.
Wubed ayika man wukend sabu mwu.
Wupak lak tong’ man wurony koti mwu mi cuma.
5 ‘Abeneno gitie ku ndiri, lembang’o m’utimere?
Gibedok ku ng’eygi, jurungo jurukara migi.
Giberingo ku ndiri, jurukara migi uneno ngo ng’eygi.
Ndiri ni kakare zoo,’ Yehova wacu.
6 ‘Ju ma ringo ma tek copo ringo ngo, man jurukara migi copo both ungo.
Gikier man gipodho
Yo malu i dhu Kulo Efrath.’
7 Ng’a m’ubeidho malu calu Kulo Nil,
Calu kulo ma pige dhetho?
8 Misiri ubeidho malu tap calu Kulo Nil,
Calu kulo ma pige dhetho,
Man ebewacu kumae: ‘Abiidho malu man abiumo ng’om.
Abinyotho adhura ku dhanu ma bedo i iye.’
9 Wuidh malu, wu riuni!
Wuring ma tek ve abelu, wu magali!
Wek jurukara bin,
Kuc man Put m’uyiko ban,
Man Juludim m’uyiko man m’utelo i athero.
10 “Nindo maeno utie pa Rwoth Ubimo ma Malu Ngbir Yehova mir udul, nindo mi culo kwor m’ebiculo i iye kwor iwi judegi pare. Man palamularu bimvoro, biyeng’ man bimadhu rimgi bik, pilembe Rwoth Ubimo ma Malu Ngbir Yehova mir udul utie ku lam* i ng’om ma yo malu i dhu Kulo Efrath.
11 Idh malu i Gilead pi nigamu balsam,
Ee nyaku ma sumba mi Misiri.
Imedo jamthieth peri mananu,
Pilembe keyokum umbe iri.
12 Thek uwinjo pir acidi ma junyayu i wii,
Man nduru peri upong’o ng’ombe zoo.
Pilembe jaramony ubekiedo i kum jaramony,
Man gin zoo gibepodho karacelo.”
13 Eni tie lembe ma Yehova uyero ni jabila Yeremia pir Ubimo Nebukadnezar* mi Babeli m’ubebino pi nigoyo ng’om mi Misiri:
14 “Wutwong’ lembene i Misiri, wutwong’e i Migdol.
Wutwong’e i Nof* man i Tapanes.
Wuyer kumae: ‘Wucung kakewu man wubed ayika,
Kum palamularu bimvoro piny i ng’etwu tingili.
15 Pirang’o juweyo jurukara mwu ceni?
Gicungo ngo ma tek kakagi,
Kum Yehova ucwalugi i ng’om.
16 Ju ma wendgi lee ubekier man ubepodho.
Gibeyero i kindgi kumae:
“Wuai malu, wadoku i bang’ juthuwa man i ng’om mwa ma dhe
Nikum palamularu ma kwiny.”’
17 Gibetwong’o kuca kumae:
‘Farao m’ubimo mi Misiri ubewoy mananu,
Eweko kare ma cuu* ukadhu.’
18 ‘Calu andha abedo kwo,’ Ubimo ma nyinge Yehova mir udul uwacu ,
‘Ebibino* calu i Tabor i kind gudi
Man calu Karmel i dhu nam.
19 Yik ter peri pi nicidho i ng’eca,
Ee nyaku ma bedo i Misiri
Kum Nof* bidoko ni piny ma ng’oyo ndiri;
Jubiwang’e ku mac,* man ebibedo ma ng’atu moko mbe i iye.
20 Misiri tie calu rwaya dhiang’ ma leng’ lee,
Ento nyoth bicoro i wiye niai ku yo malu.
21 Kadok juaskari pare ma juculo acula ma n’i kindgi de gi calu nyithi dhiang’ ma ful ful,
Ento gin bende giloko ng’eygi man giringo karacelo.
Giromo cungo ngo kakagi,
Pilembe nindo mi nyoth migi udaru tundo i wigi,
Nindo migi m’ukwayu giwodh i iye wel.’
22 ‘Badwande calu badwand thwol m’uberingo,
Pilembe gibelubo toke ku kero, ku lei
Calu jumaco m’ubeng’ondo yen.*
23 Jubing’ondo luli pare,’ Yehova wacu, ‘kadok nwang’u enen nia ejiyere ma mondere ngo i iye de.
Kum wendgi kadhu kadok wend bonyo, gikwaniri ngo.
24 Jubinyayu lewic iwi Nyamisiri.
Jubimiye i cing’ dhanu ma yo malu.’
25 “Yehova mir udul ma Mungu mir Israel uwacu kumae: ‘Kawoni abeloko wang’a i kum Amon mi No,* i kum Farao, i kum Misiri, i kum mungu pare man i kum jubim pare, eyo, i kum Farao man i kum dhanu ceke m’ugene.’
26 “‘Man abimiyogi i cing’ ju m’usayu nikabu kwo migi,* i cing Ubimo Nebukadnezar* mi Babeli man i cing’ jutic pare. Ento i ng’eye jubibedo ngo i iye calu ma yang’ con,’ Yehova wacu.
27 ‘In i Yakobo ma jatic para re, lworo kud unegi,
Man ndiri kud ung’oy i ii, Ee Israel.
Kum abibodhi niai ku bor
Man abibodho nyikweyi* niai kud i ng’om ma juterogi i iye i ng’eca.
Yakobo bidwogo man ebibedo yoo m’umbe masendi,
Ma ng’atu moko mbe m’ubenyayu lworo i iye.
28 Dong’ lworo kud unegi, jatic para ma Yakobo,’ Yehova wacu, ‘kum ani kudi.
Abidaru thek ceke m’alalu ii i kindgi,
In re abideri ngo.
Abimiyo iri matira* i mukero m’ukwayere,
Ento abiweki ngo nyanok de m’umbe matira.’”