Yeremia
47 Eni tie lembe ma Yehova uyero ni jabila Yeremia pi Jufilisti, ma nwang’u fodi Farao ugoyo ngo Gaza. 2 Yehova uwacu kumae:
“Nen! pii ubebino niai ku yo malu.
Pige bidoko ni kulo m’upong’.
Man ebipong’o ng’om ku piny ceke ma n’i iye,
Adhura ku dhanu ma bedo i iye.
Dhanu biwak,
Man ng’atu moko ci ma bedo i ng’ombe bigoyo nduru.
3 Saa ma badwand ubong’ tiend riuni* m’ufwodo piny biwinjere,
Saa ma magali pare mi lwiny biwoy
Man tiend magali pare bitwak,
E wego bilokiri ngo pi nilaru kadok wotgi,
Kum cing’gi bikonjere jebele,
4 Pilembe nindo m’ubebino binyotho Jufilisti ceke;
Ebikabu dong dhanu ceke m’udikiri kugi kud i Turo man Sidon.
Kum Yehova binyotho Jufilisti,
Ma gitie dong ju m’udong’ kud i cula mi Kafthor.*
5 Wi Gaza biwang’.*
Ackelon udaru ling’.
Ee in m’idong’ i pambu mi poga,
Ibimediri nithumo kumi nitundo awene?
6 Akaa! Palamularu pa Yehova!
Ibibedo ngo yoo nitundo awene?
Dok i ukoroni.
Keyom man ibed ling’.
7 Eromo bedo yoo nenedi
Ma Yehova re m’umiyo ire ng’oli?
Eoro ecidhi
I kum Ackelon man i kum dhu wat.”