Yeremia
48 Eni tie lembe ma Yehova mir udul ma Mungu mir Israel uyero pi Moab:
“Can iwi Nebo, kum judaru nyothe!
Junyayu lewic iwi Kiriathaim man jumake.
Junyayu lewic iwi kapondo ma museme* man junyothe.
2 Dong’ jubepaku ngo Moab.
Jupangu nirwombe kud i Hecbon:
‘Wubin, wakethu ejig nibedo thek.’
In de, Ee Madmen, icikiri nibedo ling’,
Kum palamularu ubelubo toki.
3 Jubegoyo nduru i Horonaim,
Nduru mi nyoth man mi piny m’uberwombere.
4 Judaru rwombo Moab.
Awiya pare ma thindho ubegoyo nduru.
5 Dhanu ubewak i kaidho mi Luhith kinde ma gibeidho.
Man kinde ma gibeloro kud i yo mi Horonaim, giwinjo jubewak ku can pi nyoth.
6 Wuringi, wubodh kwo* mwu!
Wudok calu yend jenevriye i langa.
7 Calu igeno tic peri man lonyo peri,
In de jubimeki.
Man Kemoc bicidho i ng’eca,
Karacelo ku julam pare man judongo ma wijo pare.
8 Janyoth bibino iwi adhura ceke,
Man adhura moko mbe ma biboth.
9 Wuketh ayi i gengi ni Moab,
Kara kinde m’eberwombere dhanu m’i iye uringi.
Man adhura pare bidoko ni piny ma ng’oyo ndiri,
Ma ng’atu moko mbe ma bedo i iye.
10 Kwong’ iwi ng’atu m’ubetimo tic pa Yehova nyawaya waya!
Kwong’ iwi ng’atu m’ubecero palamularu pare kud ucwir rimo!
11 Jumoab ubedo migi yoo niai ma gin aradu;
Gibedo calu pigulok ma n’i wi thinge.
Fodi julokogi ngo i agulu mange,
Man fodi gicidho ngo nyanok de i ng’eca.
Eno re m’uketho mido migi ubedo kubang’e,
Man ng’wicgi ma ng’ar ulokere ngo.
12 “‘Pieno nen! nindo bebino,’ Yehova wacu, ‘m’abioro i iye dhanu pi ning’ielogi. Gibing’ielogi, gibioyo piny mir agulu migi cen, man gibing’enyo i agulu migi ma dongo nziki nziki. 13 Man lewic bimaku Jumoab pi Kemoc, tap calu ma lewic umaku ko ot mir Israel pi Bethel m’ubino genogen migi.
14 Pirang’o wubeng’ap niyero nia “wa juaskari ma jurukara m’utie ayika pi lwiny”?’
15 ‘Judaru nyotho Moab,
Jumaku adhura pare,
Man judaru nego awobi pare ma tek nisagu,’
Ubimo ma nyinge Yehova mir udul uwacu.
16 Nyoth mi Moab uwok ceng’ini,
Man nindo ma gibirwombiri i iye ubebino pio mandha.
17 Dhanu ceke ma n’i ng’etgi bikumo pigi,
Dhanu ceke m’ung’eyo nying’gi.
Wuyer igi kumae: ‘Akaa, uluth ma tek utur, uluth ma leng’!’
18 Lor piny kud i dwong’ peri,
Man bed piny ma rieu ubenegi,* Ee in m’i nyaku ma bedo i Dibon,
Kum janyoth mi Moab udaru tundo i kumi,
Man ebidwoko kabedo peri ma tek ni uvuru.
19 Cung i dhu yo man inen, in m’ibedo i Aroer.
Penj nico m’uberingo man dhaku m’ubeluy kumae: ‘Lembang’o m’utimere?’
20 Judaru nyayu lewic iwi Moab man ndiri umake.
Wuwaki man wugoy nduru.
Wutwong’ i Arnon nia judaru nyotho Moab.
21 “Pokolembe utundo i ng’om ma kpee,* iwi Holon, Yahaz man Mefaath; 22 iwi Dibon, Nebo man Beth-diblathaim; 23 iwi Kiriathaim, Beth-gamul man Beth-meon; 24 iwi Kerioth man Bozra; man iwi adhura ceke mi ng’om mi Moab, adhura ma ni bor ku ma ni ceng’ini.
25 ‘Jung’ondo tego* mi Moab cen;
Juturo bote,’ Yehova wacu.
26 ‘Wuketh emer, pilembe eting’ere i dhu Yehova.
Moab ubeng’iendere i ng’ok pare,
Man dhanu ceke ubecaye.
27 Nyo ibed icayu ngo Israeli?
Nyo junwang’e i kind jukwo,
M’uketho ibetong’o wii man ibeweco rac i kume?
28 Wuai kud i adhura man wucidh wukwo iwi cana, wu ju ma wubedo i Moab,
Man wudok calu akuru ma giero ode i dhu longoro.’”
29 “Wawinjo pi doro pa Moab, eting’ere ku rac,
Wawinjo pi kethiri pare, doro pare, ting’iri pare, man nim mir adundene.”
30 “‘Ang’eyo kwinyo pare ma lake tek,’ Yehova wacu,
‘Ento wec pare ma iye nanu bitimo ngo gin moko.
Gin ma gibitimo mbe.
31 Pi thelembe maeno abigoyo nduru pi Moab,
Abiwak ma tek pi Moab ceke,
Man abicur pi dhanu mi Kir-heres.
32 Abiwak lee piri nisagu m’awak ko pi Yazer,
Ee yend ulok mi Sibma.
Jengi m’uluk ukadhu nam.
Ecidho nitundo i nam, cil i Yazer.
Janyoth uloro iwi nying yen peri mi cir
Man iwi nying ulok peri i nindo mi pone.
33 Jukabu anyong’a ku mutoro cen kud i podhoyen ma cego nyinge,
Man kud i ng’om mi Moab.
Aketho pigulok ujigo nicwir kud i vur mi biyo pigulok.
Ng’atu moko mbe ma binyono nying ulok ku muzira.
Jubikok, ento ebibedo kit kok m’ukoc.’”
34 “‘Wak ubewinjere niai i Hecbon nitundo i Eleale.
Dwandgi ubewinjere cil i Yahaz,
Niai i Zoar nitundo i Horonaim, cil i Eglath-celiciya.
Kadok kulo mi Nimrim de bidwono.
35 Abikabu kud i Moab,’ Yehova wacu
‘Ng’atu ma kelo girathiera kaka ma malu,
Man ng’atu ma thiero lam ni mungu pare.
36 Pieno adundena biwak pi Moab calu bilo,
Man adundena biwak pi dhanu mi Kir-heres calu bilo.
Pilembe lonyo m’enwang’u bithum.
37 Wi dhanu ceke uwang’,
Man julielo yirtik ceke.
Juthumo kum cing’ ceke,
Man kendi mi saki n’i piergi!’”
38 “‘I die wi udi ceke mi Moab
Man i akarayone ceke,
Nduru kende re m’ubewinjere.
Kum aturo Moab
Calu agulu ma jubayu,’ Yehova wacu.
39 ‘Wukenen ma ndiri make ko! Wugoy nduru!
Wukenen maram Moab uloko ko ng’eye ku lewic!
Dhanu ceke ubecayu Moab,
Edoko ni gin m’ubeng’oyo ndiri i dhanu ceke m’i ng’ete.’”
40 “Kum Yehova uwacu kumae:
‘Nen! tap calu m’acur loro ko ma tek,
Jadegi biyaru vombe iwi Moab.
41 Jubimaku adhurane,
Man jubimaku udine ma tek.
I nindo maeca, cwiny jurumony mi Moab
Bidoko calu cwiny dhaku m’ubegonyere.’”
42 “‘Man jubinyotho Moab kud ubed ni thek kendo,
Kum eting’ere i dhu Yehova.
43 Ndiri ku vur man uwic n’i weng’i,
Ee in m’ibedo i Moab,’ Yehova wacu.
44 ‘Ng’atu moko ci m’uberingo nikum ndiri bipodho i vur,
Man ng’atu moko ci m’ubewok kud i vur bimoko i uwic.’
‘Kum abikelo oro mi matira iwi Moab,’ Yehova wacu.
45 ‘Ju m’uberingo gicungo ma kero thum i kumgi i the tipo mi Hecbon.
Pilembe mac biwok kud i Hecbon
Man lebmac biwok kud i die Sihon.
Ebiwang’u terwang’ Moab
Man upoko wi wot jurop.’
46 ‘Can i wii, Ee Moab!
Dhanu pa Kemoc uthum.
Pilembe jutero woti i ng’eca,
Man awiya peri ma nyir de ucidho i ng’eca.
47 Ento abicoko dhanu mi Moab ma jutero i ng’eca i dong nindo mir ajiki,’ Yehova wacu.
‘Pokolembe iwi Moab ujik keni.’”