Yeremia
50 Eni tie lembe ma Yehova uyero pi Babeli, pi ng’om mi Jukaldayo, nikadhu kud i bang’ jabila Yeremia:
2 “Wutwong’ lembene i kind thek man wurwey lembene.
Wuting’ lanyuth man wurwey lembene.
Kud wukan lembe moko acel de!
Wuwac nia ‘judaru maku Babeli.
Judaru nyayu lewic iwi Bel
Ndiri umaku Merodak
Junyayu lewic iwi ayi gin m’acwiya pare.
Ndiri umaku ayi* gin m’acwiya pare ma judagu.’*
3 Pilembe thek ubino i kume niai ku yo malu.
Gidwoko ng’om pare ni gin ma ng’oyo ndiri;
Ng’atu moko mbe ma bedo i iye.
Dhanu ku ley ceke uringo;
Giciyo cen.”
4 “I rundi maeca man i saa maeca,” Yehova wacu, “dhanu mir Israel man dhanu mi Yuda bibino karacelo. Gibiwak kinde ma gibewotho, man gibisayu kaka Yehova Mungu migi karacelo. 5 Gibipenjo yo mi cidho i Sayuni ma nwang’u giloko wang’gi yor i bang’e, gibiyero kumae: ‘Wubin man wadikura karacelo i bang’ Yehova, pi nitimo lembariba ma rondo ku rondo ma jucopo wil ungo i kume.’ 6 Dhanu para udoko calu dwol mi rombe m’urwinyo. Jukwac migi uketho gikier. Gitelo wigi iwi gudi, giketho giwotho swa niai iwi got nitundo iwi ungulu got.* E wigi wil ku kayom migi. 7 Dhanu ceke m’unwang’ugi umvorogi man judegi migi uyero kumae: ‘Kier umbe i wiwa pilembe gidubo ni Yehova, ni kabedo mi bedopwe, en e Yehova ma ng’atu ma kwarugi ugeno.’”
8 “Wuring cen kud i die Babeli,
Wuwok kud i ng’om mi Jukaldayo,
Man wubed calu leya m’ubetelo wi dwol.
9 Kum nen, abecoko udul thek ma dongo niai kud i ng’om ma yo malu,
Man abekelogi i kum Babeli.
Gibibino i kume ma gikperiri pi lwiny,
Gibimake keca.
Athero migi calu pa jaramony,
Ma kabu awiya;
Edwogo ngo mananu.
10 Jubiyaku Kaldayo.
Dhanu ceke ma biyaku piny kud i iye gibiyeng’ lee,” Yehova wacu.
11 “Kum wumeduru nibedo kud anyong’a man wufoyuru
Kinde ma wubeyaku giralaga para ma dhe.
Kum wuwotho gweyo tiendwu calu rwaya dhiang’ i lum
Man wuwotho kuzo calu thwon kana.
12 Junyayu lewic iwi megwu.
Cwiny ng’atu m’unyolowu tur.
Nen! etie thek ma nok magwei kud i kind thek,
Langa ma pii mbe i iye man ng’om ngele.
13 Jubibedo ngo i iye nikum kwinyo pa Yehova;
Ebidong’ ni uvuru andha.
Dhanu ceke ma bikadhu kud i Babeli binene ku zungo
Man gibilwiyo pi goco ceke m’unwang’e.
14 Wubin i kum Babeli ma wukperuru pi lwiny i ng’ete ceke,
Wun ceke ma wutelo* atumb athero.
Wukile, kud wuwek nyinge moko dong’
Kum edubo ni Yehova.
15 Wukok kok mi lwiny i ng’ete ceke.
Edaru thierere.*
Mbegi pare upodho man gang’ pare urwombere,
Pilembe Yehova re m’ubeculo kwor i kume.
Wucul kwor i kume.
Tap gin m’etimo re ma wutim i kume.
16 Wukab jacoy kodhi cen kud i Babeli
Man ng’atu m’ubetiyo ku viringo i saa mi kayucam.
Ng’atuman bidok i bang’ juthugi nikum palamularu ma kwiny,
Ng’atuman biringo i ng’om ma thugi.
17 “Dhanu mir Israel tie rombe m’ulal. Umvor ulalu igi. Ku kwong’a ubimo mir Asiria umvorogi, i ng’eye Ubimo Nebukadnezar* mi Babeli umwodo cogogi. 18 Pieno Yehova mir udul ma Mungu mir Israel uwacu kumae: ‘Nen, abimiyo matira ni ubimo mi Babeli man ni ng’om pare i ayi ma rom m’amiyo ko matira ni ubimo mir Asiria. 19 Man abidwogo Israel i luba pare, ebicamu lum iwi Karmel man iwi Bacan man ebiyeng’ iwi gudi mir Efraim ku mi Gilead.’”
20 “I rundi maeca man i saa maeca,” Yehova wacu,
“Jubiyenyo ka kier pa Israel,
Ento jubinwang’u ngo acel de,
Man dubo pa Yuda binwang’ere ngo,
Pilembe abitimo kisa ni ju m’aweko udong’.”
21 “Idh i kum ng’om mi Merathaim man i kum dhanu ma bedo i Pekod.
Neggi man nyothgi zoo,” Yehova wacu.
“Tim lembe ceke m’ang’olo iri.
22 Dwal mi lwiny ubewinjere i ng’ombe,
Nyoth ma lee dit.
23 Wukenen maram nyondo m’ubed ufwodo piny i ng’om zoo utur man ung’eny ko!
Wukenen maram Babeli udoko ko piny ma ng’oyo ndiri i kind thek!
24 Aciko iri uwic, man imoko, Ee Babeli,
Man ing’eyo de ngo pi lembene.
Junweng’i man jumeki,
Kum ijai ni Yehova.
25 Yehova uyabu dhu kakanpiny pare,
Man ewodho jamlwiny mi ng’eicwiny pare.
Kum Rwoth Ubimo ma Malu Ngbir Yehova mir udul utie ku tic
I ng’om mi Jukaldayo.
26 Wubin i kume niai ku kaka ma bor.
Wuyab dhu dero pare.
Wudhure calu ma judhuro ko nying cam.
Wunyothe ceke.
Kud edong’ ku ng’atu moko acel de.
27 Wuneg nyithi thwoni dhieng’ pare ceke;
Wulor kugi i kathum.
Can i wigi, kum nindo migi udaru romo,
Saa m’ukwayu giwodh i iye wel!
28 Dwand ju m’uberingo ubewinjere,
Ju m’upiey kud i ng’om mi Babeli,
Pi nicitwong’o kwor pa Yehova Mungu mwa i Sayuni,
Kwor m’ebeculo pir hekalu pare.
29 Wuwak weg athero i kum Babeli,
Dhanu ceke ma telo i atumb athero.
Wugonj i ng’ete tingili, kud wuwek ng’atu moko uringi.
Wucul ire kawang’ lembe m’etimo.
Tap gin m’etimo re ma wutim i kume.
Kum eting’ere i dhu Yehova,
I dhu Ng’atu ma leng’ mir Israel.
30 E awobi pare bipodho i akarayo pare,
Man juaskari pare ceke bitho i nindo maeca,” Yehova wacu.
31 “Nen! an’i kumi, Ee in ma wii tek,” Rwoth Ubimo ma Malu Ngbir Yehova mir udul uwacu,
“Kum nindo peri ucikere niromo, saa m’abiketho iwodho i iye wel.
32 Ee in ma wii tek, ibikier man ibipodho,
Ma ng’atu moko mbe ma biting’i.
Abidhuro mac i kum adhura peri,
Man ebiwang’u piny ceke ma n’i ng’eti tingili.”
33 Yehova mir udul uwacu kumae:
“Jubesendo dhanu mir Israel man mi Yuda,
Dhanu ceke m’uterogi i ng’eca ucerogi.
Gikwero niweko gicidhi.
34 Ento Jawar migi tie tek.
Yehova mir udul tie nyinge.
Ebicero bang’gi andha i lemkesi migi,
Pi niketho ng’ombe uyom
Man pi nikelo yakini i kind dhanu ma bedo i Babeli.”
35 “Palamularu n’i kum Jukaldayo,” Yehova wacu,
“I kum dhanu ma bedo i Babeli, i kum judongo ma wijo pare man i kum jururieko pare.
36 Palamularu n’i kum jubila mi ndra,* man gibitimiri ve abelu.
Palamularu n’i kum jurumony pare, man ndiri bimakugi.
37 Palamularu n’i kum riuni* migi man i kum magali migi mi lwiny,
I kum thek ceke m’ujebere i kindgi,
Man gibidoko calu mon.
Palamularu n’i kum lonyo pare, man jubiyake.
38 Nyoth n’i wi kulo pare, man gibidwono.
Kum etie ng’om m’ayi gin m’acwiya m’ang’ika upong’ i iye,
Man gin ma wok i wang’ migi ma ng’oyo ndiri uketho gibetimiri asu ve abelu.
39 Pieno, giracwiya mi langa bibedo ku yedi ma kok akoka,
Man udo bibedo i iye.
Jubibedo ngo i iye kendo nyanok de,
Kadi ebibedo ngo ni kaka ma dhanu bedo i iye i kind dhanu m’utuk ceke.”
40 “Tap calu ma Mungu urwombo Sodoma ku Gomora man adhura m’i ng’etgi,” Yehova wacu, “ng’atu moko mbe ma bikwo i iye, man ng’atu moko mbe ma bibedo i iye.
41 Nen! dhanu moko bebino niai ku yo malu,
Thek ma dit man jubim ma dongo biai malu
Niai kud i theng ng’om ma bor mandha.
42 Gimaku athero ku tong’.
Gi kwiny man gibibedo mbe ku kisa.
Kinde ma giberingo ku riuni migi,
Dwandgi calu dwand nam m’ubewoy.
Gikperiri pi lwiny i dhogi calu ng’atu acel, Ee Nyababeli.
43 Ubimo mi Babeli uwinjo rwonglembe pigi,
Man kero thum i kume.
Cwinye ng’abere,
Man litho ma calu pa dhaku m’ubegonyere umake.
44 “Nen! ng’atu moko biai kud i vunga m’ujiyere m’i dhu Yordan man ebibino calu umvor i kum luba m’utie agwoka. Ento i ng’ey kare ma nok kende ci abiketho gibiringo cen kud i kume. Man abiketho ng’atu m’ang’iyo utel wiye. Kum ng’a ma calu an, man ng’a ma copo nyayu piem i dhoga? Jakwac ma kani ma copo cungo i wang’a? 45 Pieno, Ee dhanu, wuwinj lembe ma Yehova ukeco nitimo i kum Babeli man lembe m’eparu i kum ng’om mi Jukaldayo.
Andha jubipeyo ju ma thindho m’i dwol jubicidho ko cen.
Ebiketho kabedo migi bidoko ni uvuru pigi.
46 Ng’om biyengere kinde ma dwal ma jumaku ko Babeli biwinjere,
Man nduru biwinjere i kind thek.”