Yeremia
51 Yehova uwacu kumae:
“Nen, abetugo yamu mi nyoth
I kum Babeli man i kum dhanu ma bedo i Leb-kamai.
2 Abioro dhanu ma kworo cam i Babeli,
E gibikwore man gibidwoko ng’om pare ni gin ma piny moko mbe i iye;
Gibibino i kume i nindo mi nyoth kud i ng’ete zoo.
3 Ng’atu moko kud udwany* athero pare.
Man ng’atu moko kud uai malu m’ekendo koti mi cuma.
Kisa kud unegwu i kum awobi pare.
Wunyoth udul mony pare ceke.
4 Man gibipodho ma junegogi i ng’om mi Jukaldayo,
Ma jutuco igi plu i gengi mi Babeli.
5 Pilembe Israel ku Yuda utie ngo dhatho ni Mungu migi, ni Yehova mir udul.
Ento ng’om migi* upong’ ku kier i wang’ Ng’atu ma leng’ mir Israel.
6 Wuring kud i die Babeli
Man wubodh kwo mwu.*
Kud wunyothuru nikum kosa pare.
Kum eni tie saa ma Yehova ubeculo i iye kwor.
Ebeculo ire kawang’ gin m’etimo.
7 Babeli ubino kikombe* mi mola ma kwar i cing’ Yehova;
Emero ng’om zoo.
Thek umer ku pigulok pare;
Eno re m’uketho thek udoko abelu.
8 Babeli upodho mbwang’ man erwombere.
Wugoy nduru pire!
Wucidh wusai balsam pi litho pare; saa moko nyo eromo key.”
9 “Waii nithiedho Babeli, re ecopo key ungo.
Wuweke man wadoku mwa, ng’atuman i ng’om thugi.
Kum pokolembe pare udaru tundo i polo.
Eidho lir lir rom kud afuru.
10 Yehova ukelo pokolembe m’atira iwa.
Wubin, wacidh wakoru pi tic pa Yehova Mungu mwa i Sayuni.”
11 “Wupak lak athero; wuting’ ban ma ngulu ngulu.
Yehova utugo tipo ubimo mi Jumedi,
Kum etie ku paru mi kelo nyoth iwi Babeli.
Pilembe eni tie kwor pa Yehova, kwor m’ebiculo pir hekalu pare.
12 Wuting’ ayi* i kum gang’kidi mi Babeli.
Wumed tego i kum jukur, wuketh jukur.
Wuketh juaskari moko ukan libo.
Kum Yehova udaru pangu lembe m’ebitimo,
Man ebitimo lembe m’eng’olo i kum dhanu ma bedo i Babeli.”
14 Yehova mir udul ukwong’o kwong’ ku nyinge gire kumae:
‘Abiketho dhanu bipong’ i ii, wendgi bibedo lee calu bonyo,
Man gibikogo kok mir aloci i wii.’
15 En re m’ecwiyo ng’om ku tego pare,
En re m’eketho ng’om ma cego piny ucungo ku rieko pare
Man en re m’epedho polo ku nyang’ i lembe pare.
Eketho lukoth mil* pi koth,
Man ekelo yamu kud i dero pare.
17 Dhanu ceke ubetimo lembe m’umbe rieko man m’umbe ng’eyong’ec.
Lewic bimaku jutic mir uka* ceke nikum ayi gin m’acwiya m’ang’ika;
Kum ayi gin m’acwiya mi cuma* pare utie ndra,
Man tipo* mbe igi.
18 Gitie awondi,* tic mi cac.
Gibinyothiri kinde ma nindo mi pokolembe migi biromo.
19 Makapiny pa Yakobo utie ngo calu piny maeno,
Kum etie Ng’atu m’ucwiyo piny ceke,
Kadok uluth mi giralaga pare.
Yehova mir udul utie nyinge.”
20 “Itie undoy ira, umbu mi lwiny.
Abitiyo kudi pi nirungo thek,
Man abitiyo kudi pi ninyotho ker.
21 Abitiyo kudi pi nirungo riuni* man ng’atu m’uberingo kude.
Abitiyo kudi pi nirungo magali mi lwiny man ng’atu m’uberingo kude.
22 Abitiyo kudi pi nirungo nico man dhaku.
Abitiyo kudi pi nirungo ng’atu m’utii man nyathi jalawobi.
Abitiyo kudi pi nirungo aradu ma co man ma nyaku.
23 Abitiyo kudi pi nirungo jakwac man dwol pare.
Abitiyo kudi pi nirungo jarafur man udul lim pare ma jutwiyo ario ario.
Abitiyo kudi pi nirungo jubim man bajego.
24 Abiculo kwor i kum Babeli man i kum dhanu ceke ma bedo i Kaldayo,
Pi lembe ma reco ceke ma gitimo i Sayuni i weng’wu,” Yehova wacu.
25 “Nen, an’i kumi, Ee got ma janyoth,” Yehova wacu,
“In m’inyotho ng’om zoo.
Abirieyo cinga i kumi man abing’ieli piny niai kud iwi cana
Man abiketho ibidoko ni got m’uwang’.”
26 “Dhanu bigamu ngo kidi mi gul kadi kidi mi kathere kud i beng’i,
Kum ibidoko ni uvuru ma nja ku nja,” Yehova wacu.
27 “Wuting’ ayi i ng’ombe.
Wukudh agwara i kind thek.
Wuketh thek i kume.
Wuwak ker mir Ararat, mi Mini man mir Ackenaz i kume.
Wuketh jaaskari ma kiewo jumange i tic i kume.
Wuketh riuni uidh i kume calu udul nyithi bonyo.
28 Wuketh thek i kume,
Jubim mi Medi, jutelane ku jutelwicne ceke
Man ng’om ceke ma gibebimo wigi.
29 Ng’om biyengere man ebimiel krr,
Kum lembe ma Yehova uparu pi Babeli bitimere
Pi nidwoko ng’om mi Babeli ni piny ma ng’oyo ndiri, ma ng’atu moko mbe ma bedo i iye.
30 Jurumony mi Babeli uweko lwiny.
Gibedo i udi migi ma tek.
Kero thum i kumgi.
Gidoko calu mon.
Juwang’u udi migi ku mac.
Man riu migi udaru tur.
31 Jater barua acel uberingo nicirombo ku jater barua ma kucelo,
Man jakwenda acel nicirombo ku jakwenda ma kucelo,
Pi nicinyutho ni ubimo mi Babeli nia judaru maku adhura pare i ng’ete ceke,
32 Nia judaru maku kaka ma pii mwomere i iye,
Judaru wang’u yei mi kolo ku mac,
Man ndiri udaru maku juaskari.”
33 Kum Yehova mir udul ma Mungu mir Israel uwacu kumae:
“Nyababeli utie calu lela mi fwodo cam.
Eni utie saa mi nyono iye ma tek.
Ceng’ini eni, nindo mi kayucam biromo pire.”
34 “Ubimo Nebukadnezar* mi Babeli umvora;
Eketho wiya lal.
Eketha i ng’om calu agulu ma iye nanu.
Emwonya calu thwol ma dit;
Epong’o iye ku piny para ma beco.
Ebaya cen.*
35 Nyasayuni uwacu kumae: ‘Wek rop ma junyayu i kuma man i kum dhanu para uwok iwi Babeli.’
‘Man dong’ rimba ubed iwi dhanu ma bedo i Kaldayo!’ Yeruzalem uwacu.”
36 Pieno Yehova uwacu kumae:
“Nen, abecero bang’ lemkesi peri,
Man abiculo kwor piri.
Abithwoyo nam pare man abithwoyo pii m’atong’a pare.
37 Man Babeli bidoko ni udhuru mi kidi,
Kabedo mir utho,
Gin ma ng’oyo ndiri man ma julwiyo i kume ku zungo,
Ma ng’atu moko mbe ma bedo i iye.
38 Gin ceke gibirundo tap calu nyithindh umvor.*
Gibing’ang’ini calu nyithindh umvor ma thindho.”
39 “Kinde m’awanya ma lake tek uopo i kumgi, abiketho cemo igi man abiketho gibimer,
Kara anyong’a uneggi;
I ng’eye gibinindo nindo ma nja ku nja
Ma gibicew ungo kendo,” Yehova wacu.
40 “Abiketho gibiloro i kathum calu nyithi rombe,
Calu nyogi rombe karacelo ku nyogi diegi.”
41 “Akaa, kenen maram jumaku ko Cecak,*
Maram jumaku ko Pak mi ng’om zoo!
Maram Babeli udoko ko ni gin ma ng’oyo ndiri i kind thek!
42 Nam ucorere iwi Babeli
Udul mujangane uume.
43 Adhura pare udoko ni piny ma ng’oyo ndiri, ng’om ngele man langa.
Ng’om ma ng’atu moko mbe ma bikwo i iye man ma ng’atu moko mbe ma bikadhu kud i iye.
44 Abiloko wang’a i kum Bel i Babeli,
Man abiwodho piny m’emwonyo cen kud i dhoge.
Thek bicoriri ngo kendo i bang’e,
Man gang’ mi Babeli bipodho.
45 Wuwok kud i iye, Ee dhanu para!
Wubodh kwo* mwu kud i lak kwinyo pa Yehova m’uopo!
46 Cwinywu kud utur kadi lworo de kud unegwu pi rwonglembe ma wubiwinjo i ng’ombe.
I ng’ey oro acel, wubiwinjo rwonglembene,
Man i ng’ey oro ma bilubo wubiwinjo rwonglembe mange,
Wubiwinjo rwonglembe mi rop i ng’ombe man mi jubim m’ubekiedo i kindgi.
47 Pieno nen! nindo bebino
M’abiloko wang’a i iye i kum ayi gin m’acwiya m’ang’ika mi Babeli.
Lewic bimaku ng’om pare zoo,
Man dhanu pare ceke ma junego bipodho i die iye.
48 Polo ku ng’om man piny ceke ma n’i igi
Bikok kud anyong’a pi Babeli,
Pilembe junyoth bibino i kume niai ku yo malu,” Yehova wacu.
49 “Babeli uketho ngo kende kende dhanu mir Israel ma junego re m’upodho,
Ento dhanu ma junego mi ng’om zoo bende upodho i Babeli.
50 Wun ma wuboth kud i lak palamularu, wumeduru i weng’wu, kud wucungi!
Wupoy pi Yehova ku bor,
Man dong’ wiwu kud uwil pi Yeruzalem.”
51 “Lewic unyay i wiwa, kum wawinjo cac.
Acidi uumo wang’wa,
Pilembe juwirok ubino i kum kabedo ma leng’ mi ot pa Yehova.”
52 “Pieno nen! nindo bebino,” Yehova wacu,
“M’abiloko wang’a i iye i kum ayi gin m’acwiya pare m’ang’ika,
Man ju ma junyayu ret i kumgi bicur i die ng’om pare zoo.”
53 “Kadok nwang’u Babeli uidho bir nitundo i polo,
Kadok nwang’u emedo tego mi udi pare ma tek ma wiw,
Junyoth pare biai kud i bang’a,” Yehova wacu.
54 “Wuwinji! Nduru ubewinjere i Babeli,
Dwal mi nyoth ma dit ubeai i ng’om mi Jukaldayo,
55 Kum Yehova ubenyotho Babeli.
Ebiketho dwande ma dit biling’,
Man mujangane biwoy calu pii dupa.
Badwande biwinjere.
56 Kum janyoth bibino iwi Babeli;
Jubimaku jurumony pare,
Man jubirungo i athero migi,
Kum Yehova en e Mungu ma ketho juwodh wel.
Ebiculo kwor andha.
57 Abimero judongo ma wijo pare, jururieko pare,
Jubim pare, jutelwic pare man jurumony pare;
E gibinindo nindo ma nja ku nja,
Ma gibicew ungo kendo,” Ubimo ma nyinge Yehova mir udul uwacu.
58 Yehova mir udul uwacu kumae:
“Kadok nwang’u gang’kidi mi Babeli tie ma lac de, jubirwombe ceke,
Kadok nwang’u dhugang’ pare uidho lir lir de, jubiwang’e ku mac.
Dhanu bisendiri ku tic mananu;
Thek biol yere yere ndhu ku cwaku mac kende.”
59 Eni tie lembe ma jabila Yeremia ung’olo ni Seraya ma wod Neria ma wod Maaseya, kinde m’ecidho karacelo kud Ubimo Zedekia mi Yuda i Babeli, i oro mir ang’wende mi camuker pare; Seraya ubino jadit mi jukurpiny. 60 Yeremia ukiewo nyoth ceke ma bibino iwi Babeli i buku acel, lembe maeni ceke m’ekiewo pi Babeli. 61 M’umedo maeno, Yeremia uyero ni Seraya kumae: “Saa m’itundo i Babeli man inene, icikiri nisomo wec maeni ceke ku dwendi ma tek. 62 I ng’eye yer kumae: ‘Ee Yehova, iyero pi kabedo maeni nia jubinyothe man ebidong’ ma jubedo ngo i iye, nik’ebed dhanu kadi ley, man ebidoko ni uvuru mi magwei.’ 63 Saa m’idaru somo buku maeni, twii kidi i kume man bole i die Efrath. 64 I ng’eye yer kumae: ‘Babeli bimwony kumeno man ebiai kendo ngo nyanok de pi nyoth m’abekelo i wiye; e gibiol.’”
Wec pa Yeremia ujik keni.