Yeremia
52 Zedekia ubino ku oro pier ario wi acel kinde m’edoko ubimo, man ecamu ker i Yeruzalem pi oro apar acel. Nying’ min ubino Hamutal ma nya Yeremia mi Libna. 2 Emedere nitimo lembe ma rac i wang’ Yehova, tap calu ma Yehoiakim utimo. 3 Lembe maeno utimere i Yeruzalem man i Yuda nikum ng’eicwiny pa Yehova, nitundo m’elalugi cen kud i wang’e. Zedekia ugam ujai ni ubimo mi Babeli. 4 I oro mir abung’wende mi camuker pa Zedekia, i dwi mir apaje, nindo apar mi dwije, Ubimo Nebukadnezar* mi Babeli ubino i kum Yeruzalem kud udul askari pare ceke. Gigonjo i kum adhurane man gigiero gang’ i kume tingili pi nitieke. 5 Man gitieko adhurane nitundo i oro mir apar acende mi camuker p’Ubimo Zedekia.
6 I nindo mir abung’wende mi dwi mir ang’wen, lak kec udoko tek mandha i adhurane, man cam ubino mbe ni dhanu mi ng’ombe. 7 Tokcenne, jugam jumugo wang’ gang’kidi, e juaskari ceke giringo ku diewor kud i dhugang’ ma n’i kind gang’kidi ario, ceng’ini ku podho p’ubimo. Saa maeno nwang’u Jukaldayo gibetieko adhura man gimediri kud i yo mir Araba. 8 Ento udul askari mi Jukaldayo giriemo tok Ubimo Zedekia, man giwok ginwang’e i pambu mi langa mi Yeriko; e juaskari pare ceke gilal kud i kume. 9 I ng’eye gimaku ubimo man gitere malu i bang’ ubimo mi Babeli i Ribla i ng’om mir Hamath, man eng’olo lembe i wiye. 10 Man ubimo mi Babeli unego wot Zedekia i wang’e m’ebeneno, enego bende judongo ma wijo ceke mi Yuda i Ribla keca. 11 I ng’eye, ubimo mi Babeli uloyo wang’ Zedekia, etwiye ku kongo mi mola man etere i Babeli; etwiyo bang’e i kol cil i nindo mi tho pare.
12 I dwi mir abije, nindo mir apar mi dwije, i oro mir apar abung’wende mi camuker p’Ubimo Nebukadnezar* mi Babeli, Nebuzaradan ma jadit mi jukur, m’ubino jatic p’ubimo mi Babeli utundo i Yeruzalem. 13 Ewang’u ot pa Yehova, kal* p’ubimo, man udi ceke mi Yeruzalem; ewang’u bende udi ceke ma dongo. 14 Man juaskari mi Jukaldayo zoo ma gibino karacelo ku jadit mi jukur girwombo gang’kidi m’utieko Yeruzalem cen.
15 Nebuzaradan ma jadit mi jukur ugam ucoko dhanu moko ma kabang’gi mbe man dong dhanu m’udong’ i adhura eterogi i ng’eca. Etero bende ju ma gipiey giringo i bang’ ubimo mi Babeli man bende dong jutic ma jubodho. 16 Ento Nebuzaradan ma jadit mi jukur uweko dhanu moko ma jucan ma ngolo ngolo gidong’ i ng’ombe, kara gibed giyik kum yend ulok man gitim tic mir adici.
17 Jukaldayo girungo i mbegi mi mola mi ot pa Yehova nziki nziki, burwethi mi cwalu pii, man nam mi mola m’ubino i ot pa Yehova; giyeyo molane kpo gitero i Babeli. 18 Gicoko bende ndoy, lupau, jamnego mac, tabu, kikombe,* man ajeni ceke mi mola ma jubed jutimo ko tic i hekalu. 19 Jadit mi jukur ucoko base, tabu mi mac, tabu, ndoy, tiend thala, kikombe, man tabu mi mola ma kwar ku mi mola ma tar ma leng’. 20 Ento mbegi ario, nam, thwoni dhieng’ apar ario mi mola ma nam ubedo i wigi, man gadigadi m’Ubimo Suleman uyiko pi ot pa Yehova, mola ma juyiko ko piny maeno ceke ubino lee dit, uketho ecopere ngo nipimo pekne.
21 Pi mbegi ke, mbegiman dongone ubino bot* apar abora, man jucopo dhoko kore tingili ku thol ma borne bot apar ario; dhoge bino thuthuru nyig cing’* ang’wen, man iye bino thwolo. 22 Man uthac m’i wiye ubino mi mola; kabor mir uthacne acel ubino bot abic; man voi ku nying ulemo m’udhoko kum uthacne tingili juyikogi ceke ku mola. Mbegi mir arionde de juyiko kumeno man nying ulemo bende. 23 Nying ulemo ubino pier abung’wen wi abusiel i ng’ete; i zoo nying ulemo ubino dak acel i dhu voine tingili.
24 Jadit mi jukur uting’o bende Seraya ma jadit mi julam, Zefania ma jalam mir ario, man jukur dhugola adek. 25 Man eting’o jadit mi kal acel kud i adhura m’ubino janen wi juaskari, ku dhanu abiro ma gi jumii juk ma ceng’ini p’ubimo ma nwang’u gidong’ i adhura, man bende jagor pa jadit mir udul askari ma tie ng’atu m’ubed ucoko dhu juaskari mi ng’ombe, man dhanu pier abusiel kud i kind dhanu mi ng’ombe ma nwang’u gidong’ i adhura. 26 Nebuzaradan ma jadit mi jukur ucokogi man eterogi i bang’ ubimo mi Babeli i Ribla. 27 Ubimo mi Babeli ugoyogi man enegogi i Ribla i ng’om mir Hamath. Kumeno re ma jutero Yuda i ng’eca niai kud i ng’om pare.
28 Maeni tie dhanu ma Nebukadnezar* utero i ng’eca: I oro mir abiro, Juyahudi elufu adek ku pier ario wi adek (3 023).
29 I oro mir apar abora mi camuker pa Nebukadnezar,* jutero dhanu* dak abora ku pier adek wi ario niai kud i Yeruzalem.
30 I oro mi pier ario wi adek mi camuker pa Nebukadnezar,* Nebuzaradan ma jadit mi jukur utero Juyahudi i ng’eca, niwacu dhanu* dak abiro ku pier ang’wen wi abic.
I zoo, jutero dhanu elufu ang’wen ku dak abusiel (4 600) i ng’eca.
31 I ng’eye, i oro mi pier adek wi abirone, niai m’Ubimo Yehoiakin mi Yuda ucidho i ng’eca, i dwi mir apar ario, i nindo pier ario wi abic mi dwije, Ubimo Evil-merodak mi Babeli ugonyo* Ubimo Yehoiakin mi Yuda kud i kol. I oro maeno re ma Evil-merodak udoko ubimo, man ewodhe kud i kol. 32 Ebed eweco ma ber i bang’e man edodo komker pare malu nisagu komker mi jubim mange ceke ma gibino karacelo kugi i Babeli. 33 E Yehoiakin uwodho bongu pare mi kol cen, man ebed ecamu nja i dhu meza pare i dong kwo pare ceke. 34 Man ubimo mi Babeli uketho jubed jumiyo ire cam nja kubang’ ceng’ i dong kwo pare ceke, nitundo i nindo mi tho pare.