Yeremia

27 I acaki mi camuker pa Yehoiakim ma wod Yosiya m’ubimo mi Yuda, lembe pa Yehova ubino i bang’ Yeremia, uyero kumae: 2 “Yehova uwacu ira kumae: ‘Yik iri jamtwic man yen mi mberembere man kethgi i ng’uti. 3 I ng’eye, orgi i bang’ ubimo mir Edom, i bang’ ubimo mi Moab, i bang’ ubimo mi Juamon, i bang’ ubimo mi Turo man i bang’ ubimo mi Sidon kud i cing’ jukwenda m’ubino i Yeruzalem i bang’ Ubimo Zedekia mi Yuda. 4 Ng’ol igi nia giwok giyer ni rwodhi migi kumae:

“‘“Yehova mir udul ma Mungu mir Israel uwacu kumae: Wucikuru niyero ni rwodhi mwu kumae: 5 ‘An re m’acwiyo ng’om, dhanu, man yedi m’i wi ng’om ku tego para ma dit man ku bota m’arieya; man amiye ni ng’atu ma iya yenyo. 6 Man kawoni amiyo ng’om maeni ceke i cing’ jatic para m’Ubimo Nebukadnezar mi Babeli; amiyo ire kadok yedi mi lum de kara utim ire. 7 Thek ceke bitimo ire, ni wode man ni nyakware cil i saa ma jubibimo wi ng’om pare bende, kinde ma thek dupa man jubim ma dongo bidwoke ni ng’eca migi.’

8 “‘“‘Tek thek moko kunoke ker moko ukwero nitimo ni Ubimo Nebukadnezar mi Babeli, man ukwero niketho ng’ute i the mberembere p’ubimo mi Babeli, abimiyo matira ni thekne ku palamularu, ku ndru, man ku thong’om,’ Yehova wacu, ‘cil m’abidarugi pet nikadhu kud i cinge.’

9 “‘“‘Pieno kud wuwinj jubila mwu, juewlembe mwu, julek lek mwu, ju mwu ma timo maji, man ajoga mwu m’ubeyero iwu kumae: “Wubitimo ngo ni ubimo mi Babeli.” 10 Kum gibeewo iwu lembila mi ndra. Tek wuwinjogi, jubiterowu bor kud i ng’om mwu, jubilaluwu man wubithum.

11 “‘“‘Ento thek ma bikelo ng’ute i the mberembere p’ubimo mi Babeli man bitimo ire, abiweko gibibedo* i ng’om migi,’ Yehova wacu, ‘pi nifure man nibedo i iye.’”’”

12 Ni Ubimo Zedekia mi Yuda bende ayero lembe ma rom, awacu kumae: “Wukel ng’utwu i the mberembere p’ubimo mi Babeli, wutim ire man ni dhanu pare, e wubibedo kwo asu. 13 Pirang’o ukwayu in ku dhanu peri wutho ku palamularu, ku ndru, man ku thong’om, calu ma Yehova uyero pi thek ma bikwero nitimo ni ubimo mi Babeli? 14 Kud wuwinj lembe mi jubila ma gibeyero iwu nia ‘wubitimo ngo ni ubimo mi Babeli,’ pilembe gibeewo iwu lembila mi ndra.

15 “‘Kum aorogi ngo,’ Yehova wacu, ‘ento gibeewo lembila mi ndra ku nyinga; eno biketho abilaluwu man wubithum, wun ku jubila m’ubeewo iwu lembilane.’”

16 Man ayero ni julam ku dhanu maeni ceke kumae: “Yehova uwacu kumae: ‘Kud wuwinj lembe ma jubila gibeewo iwu nia “jubidwogo ajeni mi ot pa Yehova niai kud i Babeli kago eni!” Kum gibeewo iwu lembila mi ndra. 17 Kud wuwinjgi. Wutim ni ubimo mi Babeli, e wubikwo asu. Pirang’o ukwayu adhura maeni udok ni uvuru? 18 Ento tek gi jubila man tek andha lembe ma gibeyero uai i bang’ Yehova, dong’ wek gikway Yehova mir udul kara kud juter dong ajeni ma n’i ot pa Yehova, ma n’i ot* p’ubimo mi Yuda man ma n’i Yeruzalem i Babeli.’

19 “Kum maeni tie lembe ma Yehova mir udul uwacu pi mbegi, pi Nam,* pi bruwethi, man pi dong ajeni m’udong’ i adhura maeni, 20 m’Ubimo Nebukadnezar mi Babeli ucoko ngo kinde m’etero Yekonia ma wod Yehoiakim m’ubimo mi Yuda i ng’eca niai kud i Yeruzalem i Babeli, karacelo ku dhanu ceke mir awora mi Yuda man mi Yeruzalem; 21 eyo, maeni tie lembe ma Yehova mir udul ma Mungu mir Israel uyero pir ajeni m’udong’ i ot pa Yehova, i ot* p’ubimo mi Yuda, man i Yeruzalem: 22 ‘“Jubiterogi i Babeli man gibibedo kuca nitundo i nindo m’abipoy pigi,” Yehova wacu. “I ng’eye abidwogogi man abikethogi kakagi keni.”’”