Yeremia
49 Yehova uwacu kumae pi Juamon:
“Nyo Israel umbe kud awiya ma co?
Nyo embe ku jacampacu?
Pirang’o Malkam umaku Gad?
Man pirang’o dhanu pare ubekwo i adhura mir Israel?”
2 “‘Pieno nen! nindo bebino,’ Yehova wacu,
‘M’abiketho dwal mi lwiny biwinjere i kum Raba mi Juamon.
Ebidoko ni udhuru mir uvuru,
Man jubiwang’u nyithindh adhura m’i ng’ete.’
‘Man Israel bimaku ng’om mi dhanu ceke m’ular umayu ng’om pare,’ Yehova wacu.
3 ‘Goy nduru, Ee Hecbon, kum judaru nyotho Ai!
Wuwaki, Ee nyithindh adhura m’i ng’et Raba.
Wurony kendi mi saki.
Wugoy nduru man wuwoth swa i kind gang’ mi kidi,*
Kum Malkam bicidho i ng’eca,
Karacelo ku julam pare man judongo ma wijo pare.
4 Pirang’o iyungiri pi poga,*
Pi pambu peri ma pii mol i iye, Ee nyaku ma jadubo,
In m’igeno lonyo peri,
Man iwacu kumae: “Ng’a ma bibino i kuma?”’”
5 “‘Nen, abekelo lembe ma ng’oyo ndiri i wii,’ Rwoth Ubimo ma Malu Ngbir Yehova mir udul uwacu,
‘Niai kud i bang’ dhanu ceke m’utieko ng’eti tingili.
Jubilalu iwu, ng’atuman biringo i yo pare,
Man ng’atu moko mbe ma bicoko dhu ju m’uringo.’”
6 “‘Ento i ng’ey maeno, abidocoko dhu Juamon ma jutero i ng’eca,’ Yehova wacu.”
7 Yehova mir udul uwacu kumae pir Edom:
“Nyo rieko dong’ umbe nyanok de i Theman?
Nyo juk ma beco uthum kud i bang’ ju ma nyang’ i lembe?
Nyo rieko migi utopi?
8 Wuringi, wulok ku ng’eywu!
Wucidh wubed piny kaka ma thuc, Ee dhanu mi Dedan!
Kum abikelo nyoth iwi Esau
Saa ma nindo m’abiloko wang’a i kume biromo.
9 Tek ju ma pono nying ulok ucoro i wii,
Nyo gibiweko ngo nying ulok moko ma juromo beko?
Tek jukwo umondo ku diewor,
Gibinyotho ndhu kadhiri ma igi yenyo.
10 Ento abiwodho bongu kud i kum Esau.
Abiyabu wi kabedo pare m’upondo,
Kara kud epondi.
Jubinyotho awiya pare, umego pare, man jirani pare ceke,
Man en de ebibedo mbe kendo.
12 Kum Yehova uwacu kumae: “Nen! tek ju ma jupoko ngo lembe i wigi nia gimadh kikombe gicikiri nimadhe, nyo in ke jubiweki m’umbe nimiyo iri matira nyanok de? Jubiweki ngo m’umbe nimiyo iri matira, pilembe icikiri nimadhe.”
13 “Kum akwong’o ku nyinga gira,” Yehova wacu, “nia Bozra bidoko ni gin ma ng’oyo ndiri, cac, nyoth, man alam; adhurane ceke bidoko ni uvuru mi magwei.”
14 Awinjo rwonglembe moko m’uai i bang’ Yehova.
Juoro jakwenda moko i kind thek uwac kumae:
“Wucokuru karacelo man wubin i kume;
Wuyikuru pi nikiedo lwiny.”
15 “Kum nen! adwoki ni gin ma kabang’e mbe i kind thek,
Ng’atu ma jucayu i kind dhanu.
16 Mielkum m’inyayu
Man rikini mir adundeni uwondi,
Ee in m’ibedo i odicana,
M’ibedo iwi ungulu gudi* m’uting’ere.
Kadok nwang’u igiero odi lir lir calu acur de,
Abilori piny ku kuca,” Yehova wacu.
17 “Edom bidoko ni gin ma ng’oyo ndiri. Dhanu ceke m’ubekadhu kud i kume binene ku zungo man gibilwiyo pi goco ceke m’unwang’e. 18 Tap calu ma Sodoma ku Gomora man adhura m’i ng’etgi urwombere,” Yehova wacu, “ng’atu moko mbe ma bikwo i iye, man ng’atu moko mbe ma bibedo i iye.
19 “Nen! ng’atu moko biai kud i vunga m’ujiyere m’i dhu Yordan man ebibino calu umvor i kum luba m’utie agwoka. Ento i ng’ey kare ma nok kende ci abiketho ebiringo cen kud i kume. Man abiketho ng’atu m’ang’iyo re m’utel wiye. Kum ng’a ma calu an, man ng’a ma copo nyayu piem i dhoga? Jakwac ma kani ma copo cungo i wang’a? 20 Pieno, Ee dhanu, wuwinj lembe ma Yehova ukeco nitimo i kum Edom man lembe m’eparu i kum dhanu ma bedo i Theman:
Andha jubipeyo ju ma thindho m’i dwol jubicidho ko cen.
Ebiketho kabedo migi bidoko ni uvuru pigi.
21 Ng’om uyengere nikum badwal mi podho ma gipodho ko.
Jubegoyo nduru!
Dwalne uwinjere nitundo bir i Nam ma Kwar.
22 Nen! ebiidho man ebiloro ma tek, tap calu acur
Man ebiyaru vombe iwi Bozra.
I nindo maeca, cwiny jurumony mir Edom
Bidoko calu cwiny dhaku m’ubegonyere.”
23 Pi Dameski:
“Lewic unyay iwi Hamath man iwi Arpad,
Pilembe giwinjo rwonglembe ma rac.
Lworo daru tego migi.
Ndiri maku nam m’ecopo bedo ngo yoo.
24 Tegocwiny uthum i kum Dameski.
Elokere kara eringi, ento ndiri make.
Can ku litho umake kii,
Calu dhaku m’ubegonyere.
25 Juwenjo ngo adhura mi pak
Man adhura mi foc nedi?
26 Kum awobi pare bipodho i akarayo pare,
Man juaskari pare ceke bitho i nindo maeca,” Yehova mir udul uwacu.
27 “Abigudo mac i kum gang’ mi Dameski,
Man ebiwang’u udi ma wiw ma tek mi Ben-hadad.”
28 Eni tie lembe ma Yehova uyero pi Kedar, man pi ker mir Hazor m’Ubimo Nebukadnezar* mi Babeli uredho:
“Wuai malu, wuidh i Kedar,
Man wunyoth wot ma yo Nyangu.
29 Jubicoko hema migi kud udul lim migi,
Bongu mi hema migi man piny migi ceke.
Jubicidho cen ku ngamia migi,
Man jubiwak i bang’gi kumae: ‘Ndiri ni kakare zoo!’”
30 “Wuringi, wuring bor mandha!
Wucidh wubed piny kaka ma thuc, Ee dhanu mir Hazor,” Yehova wacu.
“Kum Ubimo Nebukadnezar* mi Babeli upangu lembe ma rac i kumwu,
Man ethungo plan i kumwu.”
31 “Wuai malu, wuidh i kum thek m’ukwo i kwiyocwiny,
Man m’ubedo museme!” Yehova wacu.
“Embe ku dhugola kadi riu; gibedo kendgi.
32 Jubiyaku ngamia migi,
Man jubiyaku bende udul lim migi m’upong’.
Abilalu i ju ma thumo dhu wigi yor i theng’gi
I yamu ceke,*
Man abekelo nyoth migi niai kud i kakare zoo,” Yehova wacu.
33 “Hazor bidoko ni kabedo mir utho,
Ni uvuru mi magwei.
Ng’atu moko mbe ma bikwo i iye,
Man ng’atu moko mbe ma bibedo i iye.”
34 Eni tie lembe pa Yehova m’ubino i bang’ jabila Yeremia pir Elam, i acaki mi camuker p’Ubimo Zedekia mi Yuda: 35 “Yehova mir udul uwacu kumae: ‘Nen, abeturo i atumb athero mir Elam, ukungu* mi tego migi. 36 Abikelo yamu ang’wen niai kud i gund polo ang’wen iwi Elam, man abilalu igi i yamu ceke. Thek moko mbe ma bidong’ ma ju ma julalu mir Elam bicidho ngo i iye.’”
37 “Abinyayu ndiri i Juelam i wang’ judegi migi man i wang’ ju m’ubesayu nikabu kwo migi;* man abikelo nyoth i wigi, kwinyo para m’uopo,” Yehova wacu. “Man abioro palamularu i tokgi nitundo m’abidarugi pet.”
38 “Abiketho komker para i Elam, man abinyotho ubimo ku judongo ma wijo kud i iye,” Yehova wacu.
39 “Ento i dong nindo mir ajiki, abicoko dhu dhanu mir Elam ma jutero i ng’eca,” Yehova wacu.