Kwo ular Ubedo Nenedi i Paradiso?

Yehova mio piny dupa mabeco ni Adamu giku Eva. Thangambere 1:28

Yehova ucwiyo ng’atu ma dhaku ma kwong’a, Eva, man emie ni Adamu kara ebed ire ni dhaku.​—Thangambere 2:21, 22.

Yehova ucwiyogi leng’; ng’eyong’ec migi ubino atira, kumgike m’umbe dubo, man m’umbe abala.

Gibed gikwo i podho ma julwong’o Paradiso mir Eden: kabedo maleng’ akeca; kulo ubedo nuti iie ku yen ma cego nying’ gi mi kwonde ma tung’ tung’ man yedi bende.

Yehova ubed uweco kugi. Ebed eponjogi. Kanang’u giwinje, nang’u gikwo rondo ku rondo i Paradiso iwi ng’om.

Mungu ukwero igi ni camu nying’ yen moko acel ma ubino i podho. Thangambere 2:16, 17

Malaika acel ugam ujai ni Mungu. Malaika ma rac ma eno ene Jok man Wonabali.

Yehova unyutho ni Adamu giku Eva yen acel ma cego nyinge i podho mir Eden. Man ewacu igi nia kud gicam nyinge moko, gimarutho.

Jok umito ngo ya Adamu giku Eva giwor Yehova. Uketho etiyo ku thwol pi niyero ni Eva nia kan ecamu nying’ yen ne ci, ebitho ungo, ento ebibedo calu Mungu. Eno ubedo ndra ma zoo.​—Thangambere 3:1-5.