Pirang’o Ukwayu Imedri Asu Niponjo Iwi Mungu?

1. Bero makani m’ibinwang’u kan imedri asu niponjo Biblia?

M’umbe jiji, ponji mir ukungu ma idaru ni ponjo i nyathibuku maeni umedo mer peri yor i bang’ Yehova. Ukwayu imediri ni ketho mer maeno kud ukwii ento umedre i wang’e. (1 Petro 2:2) Kara ibin inwang’ kwo ma rondo ku rondo, ukwayu ndhu imediri nicoro ceng’ni i vut Mungu ni kadhu kud i ponjo lembe pare.​—Som Yohana 17:3; Yuda 21.

Kan imediri asu nimedo ng’eyong’ec peri iwi Mungu, yioyic peri de bidoko tek. Yioyic eno bilund konyi kara inyai anyong’a i i Mungu. (Juebrania 11:1, 6) Yioyic ma rom bicweli kara iyew dubo peri man itim alokaloka maber i kit kwo peri. Som Tic mi Jukwenda 3:19.

2. Icopo timo ang’o kara jumange de unwang’ bero ni kadhu kud i ng’eyong’ec ma itie kudo iwi Mungu?

I kwo mwa, ka wanwang’u lembe moko maber, wakane ngo i iwa, ento wayere ni juwadwa de kara gin bende ging’ei lembene. Kan ibemediri niponjo Biblia, ibing’eyo kite ma icopo tio kudo ku Biblia pi nikoro ni jumange pi yioyic peri iwi Yehova man iwi lembanyong’a.​—Som Jurumi 10:13-15.

Dhanu mapol caku nirweyo lembanyong’a ni jurimo kunoke ni wat migi. Kan ibetimo kumeno, bed ku riekowang’. Kakare niyero nia kusoma migi tie mi ndra, yer igi pi lembang’ola pa Mungu. Bende, ng’ei nia gin ma copo telo nen mi dhanu ma pol i beng’i, utie ngo ponji peri kende ento akeca timo peri re.​—Som 2 Timoteo 2:24, 25.

3. Icopo bedo ku ribri ma nenedi karacelo ku Yehova?

Ponjo lembe pa Mungu bikonyi kara iteng’ni i tipo. Icopo doko jarimo ma segi akeca pa Yehova. I andha, niai kawoni icopo doko acel mi kind jupare.​—Som 2 Jukorinto 6:18.

4. Icopo nimediri asu i weng’i nenedi?

Icopo nitimo medri mi tipo nang’u ibeponjo lembe pa Mungu asu asu. (Juebrania 5:13, 14) Kwai Jamulembe pa Yehova acel uponj kudi Biblia ni kadhu kud i buku Biblia Inafundisha Kabisa Nini? Kan imedri niponjo lembe lee niai kud i Biblia, kwo peri de bimedre nibedo kud nyong’a.​—Som Zaburi 1:1-3; 73:27, 28.

Lembanyong’a uai i bang’ Yehova, Mungu ma won anyong’a. Icopo coro ceng’ni i vute nang’u ibecokiri karacelo ku dhanu pare. (Juebrania 10:24, 25) Kan imediri ni ii pi ninyayu anyong’a i i Yehova, ibigam nwang’u kwo mandha, niwacu kwo ma rondo ku rondo. Eyo, coro ceng’ni i vut Mungu re m’utie gin ma ber akeca ma icopo timo i kwo peri.​—Som 1 Timoteo 1:11; 6:19.