Yesu uponjo Dhasamaria

Kinde ma Yesu ku julubne giai kud i Yahudi gibecidho i Galilaya, ging’olo yo malu (Nord) mi ng’om Samaria. Giwotho lee giol. I kinde mi saa abusiel, giwok gibedo ceng’ini kud adhura mi Sukar, i dhu kulo moko ma Yakobo ugam utong’o con, kunoke eculo dhanu re m’utong’o ire. Nitundo tin de kulone nuti, enwang’ere ceng’ini kud adhura ma julwong’o Naplouse.

Julub giweko Yesu ubeyom i dhu kulone, gin ke gicidho i adhura ning’iewo cam. Kinde ma tokgi umwony, Dhasamaria ugam utundo pi nitwomo pii. E Yesu uyero ire kumae: “Mi ira amadhi.”​—Yohana 4:7.

Nwang’u Juyahudi ku Jusamaria giwinjiri ngo nikum adegi ma lee ma gibino ko ikindgi. Pieno, i dhaku maeno uwang’ lii, e epenjo Yesu kumae: “Ebedo nenedi ma in m’i Jayahudi, e m’idong’ ikwayu pi i bang’a e, ma an ke a dhaku mi Samaria?” Yesu udwoko ire kumae: “Tek ing’eyo giramia pa Mungu, ku ng’atu m’uwacu iri kumae, Mi ira amadhi; kuno di ipenje, man kuno di emio iri pi mi kwo.” Dhakune dok uloko ire kumae: “Rwoth, gin moko mbe i beng’i m’itwom ko, man kulone de thuth: ka kumeno inwang’u pi mi kwo maeni kani? I dit ma sagu kwaruwa ma Yakobo, m’emio iwa kulo, ma en de emadhu pige, ku wote, man lim pare?”​—Yohana 4:9-12.

Yesu uwacu ire kumae: “Ku ba dhanu ceke m’umadhu pi maeni rieu binege kendo: ento ng’atu ma tek umadhu pi m’amio ire rieu binege kendo ki ngo; ento pi m’abimio ire bidoko ni kulo ma dhenyni i ie ni kwo ma rondo ku rondo.” (Yohana 4:13, 14) Pieno, kadok Yesu uol de, ebino ayika niyero lemandha ma mio kwo ni Dhasamaria.

Dhaku maeno uyero kendo kumae: “Rwoth, mi ira piguno, kara rieu kud unega, kadi kud abin atwom bor kuni.” Yesu unwang’u nia ukwayu elok wec udok iwi lembe mange, pieno ewacu ire kumae: “Cidhi, ilwong’ cweri, e kan idwog keni.” Edwoko ni Yesu kumae: “Cwara mbe.” Yesu uyero lembe pa dhaku maeno i dhoge kumae: “Iwacu dre kumae, cwara mbe: kum naka ibedo ku cogi abic, man ng’atu m’ibedo kude kawono de en e cweri ngo.” I dhaku maeno ulund uwang’ lii.​—Yohana 4:15-18.

Enyang’ maber i wec ma Yesu uyero ire, uketho ewacu m’ebezungo kumae: “Rwoth, aneno in i jabila.” Ing’eye, dhakune uyero wec m’unyutho nia emaru Lembe pa Mungu. Nenedi? Emedo kumae: “Naka kwaruwa [Jusamaria] girwo wi goduni [Got Gerizim ma nwang’ere ceng’ini ku keca], enke wuwacu [Juyahudi] nia Yerusalem e ma ka ma maku jurwo i ie.”​—Yohana 4:19, 20.

Pieno, Yesu ukoro ire nia kaka ma jutimo i ie thier ni Mungu tie ngo lembe ma pire tek. Eyero kumae: “Saa bino, ma wubirwo ie ni Wego wi goduni ngo, kadok i Yerusalem de ngo.” Edok emedo kumae: “Ento saa bino, man enuti kawono, ma ju ma jurwo mandha gibirwo ni Wego i tipo man i lemandha: kum Wego yenyo wagi ju maeni e ma gibed jurwo ire.”​—Yohana 4:21, 23, 24.

Lembe ma nyayu mutoro i Wego utie ngo kaka ma jubetimo i ie thier, ento utie kite ma jurutic pare mandha gibetimo ko thierne. E dhu dhaku utal. Ewacu ire kumae: ‘Ang’eyo ya Masiya bebino (ng’atu ma julwong’e Kristu): kan ebino, ebiyero iwa pi gin ceke.’​—Yohana 4:25.

E Yesu utuco ire lemandha ma pire tek, ewacu kumae: “An m’ayero iri nini an a en.” (Yohana 4:26) Kepar nyanok! Dhaku moko ubino nitwomo pii i kulo ku dieceng’. Re Yesu uwok unyutho ire lembe ma pire tek lee dit. Ewacu ire ngbeng’ nia etie Masiya; nwang’u fodi eyero ngo lembuno ni ng’atu moko acel de.

JUSAMARIA DUPA GIYIO

Julub giloko kud i Sukar, gidwogo ku cam. Saa ma gitundo, ginwang’u Yesu ubedo ka ma giweke i ie, re kawoni ebeweco ku Dhasamaria. Kinde ma gitundo, dhakune weko agulu pii pare man ecidho i adhura.

Saa m’etundo i Sukar, ekoro lembe ceke ma Yesu uyero ire ni dhanu. Ewacu igi ku tegocwiny kumae: “Wubin, wunen ng’atu m’uyero ira pi gin ceke ma naka atimo.” Ing’eye, epenjo penji mae, saa moko nyo pi nitelo nen pa dhanu: “Maeni copo bedo Kristu?” (Yohana 4:29) Epenjo penji iwi lembe ma pire tek, m’ucaku telo nen pa dhanu niai i rundi pa Musa. (Poi mi Cik 18:18) Lembuno uketho dhanu mir adhura ginwang’u nia gikebin ginen Yesu ku wang’gi.

Kinde ma fodi dhakune uringo i adhura, julub pa Yesu girere nia ekecam cam ma gikelo. Re Yesu uculo igi kumae: “Cam para nuti mir acama ma wung’eyo ngo.” Kinde ma julub giwinjo wec maeno, gipenjiri ikindgi kumae: “Ng’atu moko kelo ire giracama moko?” Yesu ukoro igi ku yoo, lembe ma pire tek ma gin ceke ginyang’ i ie, eyero kumae: “Cemo para en e timo yeny ma i ng’atu m’uora yenyo, ku daru tic pare bende.”​—Yohana 4:32-34.

Tic ma Yesu ubino weco pire ubino ngo tic mi kayu cam ma nwang’u ubecicaku ing’ei dwi ang’wen. Ento, ebino weco iwi kayu mwoka mi tipo, m’eyero pire kumae: “Wung’ai weng’wu malu, wunen pothi, ya gidaru thwo mir akaya. Ng’atu m’ukayu enwang’u sukulia, man ecoko nying’ ni kwo ma rondo ku rondo; kara ng’atu m’ucoyo ku ng’atu m’ukayu de anyong’a neggi karacelo.”​—Yohana 4:35, 36.

Ecicopere nia Yesu ugam ung’eyo adwogi maber mi wec ma giweco giku Dhasamaria. Lembe ma dhaku maeno ucidh ukoro ucwalu dhanu dupa mi Sukar nibedo ku yioyic i Yesu, kum dhakune yero igi kumae: “Eyero ira gin ceke ma naka atimo.” (Yohana 4:39) Pieno, kinde ma dhanu mi Sukar gibino i dhu kulone, gikwayu nia Yesu kud ukeucidhi, ento ekekor igi lembe mange dupa. Yesu uyio, man ebedo i Samaria pi nindo ario.

Ikind Jusamaria ma giwinjo, jumapol giyio Yesu. Giyero ni dhakune kumae: “Kawono wayio ni kum wec peri ngo: kum wawinjo giwa, e wang’eyo nia maeni en e Jabodh mi ng’om andha.” (Yohana 4:42) Ma piem umbe, Dhasamaria uweko iwa lapor maber iwi kite ma wacopo mio ko lembatuca iwi Kristu, nwang’u wabetelo nen mi juwinj mwa ku wec ma copo ketho gibed kud ava mi ng’eyo lembe dupa.

Kawoni, copere nia Yesu gini dwi mir 11 kunoke 12, pilembe fodi dwi udong’ ang’wen ka kayu nganu ma betimere i ng’ombuca dwi mir 3 kud 4 bicaku. Eno nyutho nia ing’ei Kadhukuwijo mi oro 30 R.M., Yesu ku julubne gitimo dwi abora kunoke nikadhu i Yahudi, ma gibeponjo man gibemio batizo ni dhanu. Kawoni dong’ gibedok ibang’gi i Galilaya. Lembang’o m’ubekurogi kuca?