Elisabeti unyolo nyathin

I ng’ey oro ma kadhu 400 niai ma jugiero gang’kidi mi Yeruzalem kendo, jalam moko ma nyinge Zekaria ku dhaku pare m’Elisabeti gibed gikwo ceng’ini kud adhura mi Yeruzalem. Nwang’u gigamiri oro ukadhu lee, ento ginyolo ngo awiya. Nindo moko kinde ma Zekaria ubino wang’u udok ma ng’wice ng’ar i hekalu, malaika Gabriel ugam uwok ire. Lworo umaku Zekaria, ento Gabriel uyero ire kumae: ‘Lworo kud unegi. Akelo iri lembanyong’a m’uai i bang’ Yehova. Dhaku peri m’Elisabeti binyolo nyathin ma nico, man ibicaku nyinge Yohana. Yehova ung’iyo Yohana pi tic moko ma segi.’ Zekaria upenjo kumae: ‘Acopo yiyo lembe m’ibeyero nenedi? An ku dhaku para wadaru tii, wacopo nyolo ngo nyathin.’ Gabriel uyero ire kumae: ‘Mungu ora en akel iri lembanyong’a maeni. Ento calu iyiyo ngo lembe m’ayero iri, ibiweco ngo nitundo i ng’ey ma nyathinne binyolere.’

Zekaria ugalu i hekalu pi saa ma lee nisagu ma naka. E saa m’ewok, dhanu m’ubino kure gimito ging’ey nia ang’o dhe m’utimere. Ento Zekaria copo weco ngo. Ecopo weco ndhu ku cinge kende. E dhanu ginyang’ nia Zekaria unwang’u kwenda moko m’uai i bang’ Mungu.

I ng’ey nindo moko, Elisabeti unwang’u mugisa man enyolo nyathin ma nico tap calu ma malaika ular uyero. Jurimbe man wedi pare gibin gineno mukerene. Gibino kud anyong’a lee dit i kum Elisabeti. E Elisabeti uyero kumae: ‘Nyinge bibedo Yohana.’ Gidwoko ire kumae: ‘Ng’atu ma nyinge Yohana umbe i kind wedi peri. Cak nying’ Zekaria ma won i kume.’ Ento Zekaria ugoro kumae: ‘Nyinge tie Yohana.’ E ndhu ndhu nica, Zekaria ucaku weco kendo! Lembe pa nyathinne uyik i ng’om Yudea zoo man dhanu gipenjiri ku zungo kumae: ‘Nyathin maeni bidongo ni dhanu ma nenedi?’

I ng’eye, tipo ma leng’ ugam uromo Zekaria. E eewo kumae: ‘Pak ubed ni Yehova. Eng’olo ni Abraham nia ebioro jalar ma Masiya pi nilaruwa. Yohana bibedo jabila man ebiyiko yo ni Masiya.’

Lembe moko mange ma segi utimere ni Maria ma tie bende wat pa Elisabeti. Wakenen lembene i wic m’ulubo.