PONJI MIR 09

Rwo bikonyi nibedo jarimb Mungu ma ceng’ini

Ma juwodho iwi karatasi

Nyo nindo moko idaru nwang’u de nia itie ku yeny mi telowic i kwo peri? Nyo ibed ipenjiri ku penji moko ma pigi tek m’ibemaru judwok wang’gi? Nyo itie ku yeny pa ng’atu moko ma romo juko cwinyi? Nyo ibemaru kindwu bed ceng’ini ku Yehova? Rwo copo konyi i lembe maeno ceke. Re saa moko nyo ibepenjiri nia, ayi m’atira ma wacopo rwo ko tie ma kani? Nyo Mungu winjo rwo ceke? Aromo timo ang’o kara Mungu winj rwo para? Wakenen.

1. Wacikara nirwo i bang’ ng’a man pi lembang’o?

Yesu uponjo nia wacikara nirwo i bang’ Wegwa m’i polo kende. En gire de erwo i bang’ Yehova. Ewacu nia, “Dong’ ukwayu wurwo kumae: ‘Wegwa ma n’i polo . . .’” (Matayo 6:9) Ka waberwo i bang’ Yehova, nwang’u wabetudo i mer mwa kude udok ma tek.

Dong’ wacopo rwo pi lembang’o ke? Pi lembe moko ci. Re kara Mungu uwinj rwo mwane, wacikara nirwo nimakere ku yeny pare. Biblia uyero kumae: “Gin moko ci ma tek wabekwayu i bang’e nimakere ku yeny pare, ewinjowa.” (1 Yohana 5:14) Yesu unyutho lembe moko ma pigi tek ma waromo rwo pigi. (Som Matayo 6:9-13.) M’uweko nirwo pi yeny mwa giwa, kwayu ngo wiwa uwil nifoyo bende Mungu pi lembe ma beco m’etimo iwa, man nikwaye ekony dhanu mange de.

2. Wacikara nirwo nenedi?

Biblia ubekwayuwa nia ‘wakonj adundewa woko [ni Mungu].’ (Zaburi 62:8) Eno nyutho nia ka waberwo, wacikara niyero ni Mungu lembe ma tap man m’uai i adundewa. Wacopo rwo ma tek kunoke nyaling’ ling’. Bende waromo rwo saa moko ci, kaka moko ci, man i ayi moko ci ma wamaru, nik’ebed aruma, acunga kunoke avuta. Gin ma pire tek utie nirwo i bang’ Yehova i ayi m’ubenyutho woro.

3. Mungu dwoko wang’ rwo mwa nenedi?

Yehova dwoko wang’ rwo mwa i yore ma tung’ tung’. Wang’ ma pol wabed wanwang’u wang’ penji kunoke kwac mwa i Lembe pare Biblia, m’emiyo iwa. Nimakere ku Zaburi 19:7, somo Lembe pa Mungu copo “dwoko ng’atu ma cobo (m’ung’eyo lembe ngo) riek.” (Som Yakobo 1:5.) Bende, Mungu copo miyo iwa kwiyocwiny mir adunde ka wabekadhu i lembe ma tek. M’uweko maeno, ecopo cwalu jutic pare kara gikonywa saa ma watie ku yeny.

MED NYANG’ PERI

Wanen kawoni kite m’icopo rwo ko i ayi ma nyayu anyong’a i Mungu, man wanen ayi ma rwo copo konyi ko.

4. Kara Mungu uwinj rwo mwa

Lembang’o ma tung’ tung’ ma copo ketho Mungu jolo rwo mwa kunoke ngo? Nen VIDEO.

VIDEO: Nyo Mungu winjo rwo ceke?—Thenge (2:42)

Yehova ubemito warwo i bang’e. Som Zaburi 65:2, man i ng’eye wuwec iwi penji m’ulubo e:

Nyo iyiyo andha nia ‘Ng’atu ma winjo rwo’ ubemito irwo i bang’e? Pirang’o iyero kumeno?

Tekene wabemito Mungu uwinj rwo mwa, wacikara nitimo kero niworo cik pare. Som Mika 3:4 man 1 Pethro 3:12, man i ng’eye wuwec iwi penji m’ulubo e:

Kara Yehova uwinj rwo mwa, lembang’o m’ubekwayere i bang’wa?

I saa mi lwiny, thenge ario zoo rwo nia gin re ma giloy lwiny. Iparu nia Mungu copo winjo andha rwo ma kumeno?

5. Ka waberwo, wacikara niyero lembe m’uai i adundewa giwa

Dhanu moko juponjogi nia kwayu gimaki ku wigi wec ma gibibeyero saa ceke ka giberwo. Gitimo de kumeno andha. Ento nyo kumeno re ma Mungu ubemito wabed warwo i bang’e? Som Matayo 6:7, man i ng’eye wuwec iwi penji m’ulubo e:

Ang’o ma bikonyi kara kud ibed idwog kwa “iwi lembe ma rom” kinde m’iberwo?

Kubang’ ceng’, bed ipar kadok lembe moko acel ma Yehova utimo iri man foye pire. Tekene kubang’ nindo inwang’u lembe moko acel m’ifoye pire, i ng’ei yenga acel binwang’u nia idaru rwo pi lembe abiro ma tung’ tung’ kakare nibedwogo kwa iwi lembe ma rom.

Nyathin moko ma coo ubekoro lembe ni junyodo pare. — Wego ma ber mito nyathin pare ukor ire lembe m’i cwinye. Yehova bende ubemito nia ka waberwo, wayer ire lembe mi cwinywa

6. Rwo tie giramiya m’uai i bang’ Mungu en gire

Rwo copo konyowa nenedi i saa mi mutoro ku mi peko bende? Nen VIDEO.

VIDEO: Rwo konyowa niciro peko (1:32)

Biblia unyutho nia rwo copo konyowa kara wanwang’ kwiyocwiny mandha mir adunde. Som Jufilipi 4:6, 7, man i ng’eye wuwec iwi penji m’ulubo e:

Kadok rwo romo daru ngo peko mwa saa ceke, re elund ekonyowa nenedi?
Kekwan lembe moko m’icopo maru irwo pigi

Nyo ing’eyo?

Wec ma nia “amen” thelembene tie “ebed kumeno,” “andha,” kunoke “tap.” Jucaku tiyo ku wecne i thum pa rwo niai i rundi ma con dit.—1 Lemkei 16:36.

7. Bed inwang’ saa pi nirwo

Saa moko lembe copo pong’ lee i wang’wa, e wiwa gam wil nia ukwayu warwo. Re rwo pire bino tek rukani i i Yesu? Som Matayo 14:23 man Marko 1:35, man i ng’eye wuwec iwi penji m’ulubo e:

Yesu utimo ang’o pi ninwang’u saa mi rwo?
Iromo berwo saa ma kani?

Cal: Dhaku moko uberwo i saa ma tung’ tung’ mi dieceng’. 1. Kugweno. 2. Karacelo kud awiya pare. 3. I tic. 4. I wang’ cam.

DHANU MOKO BEYERO KUMAE: “Nirwo tie ninyotho saa mananu pilembe ng’atu ma winjo mbe.”

In ke iromo yero ang’o?

I ADUNDO

Ka wabed warwo niai kud i adundewa, wabidoko jurimb Mungu ma ceng’ini, wabinwang’u kwiyocwiny mir adunde, man wabinwang’u tego ma watie ku yenyne pi ninyayu mutoro i Yehova.