Wabed ayika niworo Yehova

1. Pirang’o wacikara niworo Yehova?

WACIKARA niworob Yehova pilembe etie Jacwic mwa. Pi thelembe maeno, en re m’etie ku twero mi nyutho iwa lembe m’ukwayu watim. (Nyu. 4:11) Thelembe mange ma cwaluwa niworo Yehova utie nia, ebimo wi dhanu i ayi ma ber m’usagu zoo. Dhanu ucaku bimo wi juwagi niai con. Re jucopo poro ngo ayi ma gibimo ko wi dhanu ku ayi ma Yehova bimo ko wi dhanu, pilembe Yehova tie Jabim ma riek nisagu zoo, ma jamer, ma won kisa man ma won ngisi.​—Ai 34:6; Rum. 16:27; 1 Yoh. 4:8.

2. Nimakere ku Juebrania 12:9-11, wacikara niworo Yehova pi thelembe ma kani?

² Yehova ubemito wawore pilembe etie Wegwa m’umaruwa, ento ungo nia pilembe wabelworo nitimo ire dubo. I barua ma jakwenda Paulo ukiewo ni Juebrania, ekoro nia kwayu ‘wabed wor ni Wego’ pilembe ebeponjowa “pi kuloka mwa.”​—Som Juebrania 12:9-11.

3. (a) Wanyutho nenedi nia wabeworo Yehova? (b) Wabidwoko wang’ penji ma kani i thiwiwec maeni?

³ Wanyutho nia wabeworo Yehova nwang’u wabetimo lembe moko ci m’ebekwayu i bang’wa, man nwang’u wabejengara ngo iwi rieko mwa giwa. (Rie. 3:5) Niworo Yehova doko iwa yot akecane ka waponjo ning’eyo kite pare ma tung’ tung’ ma beco. Pirang’o? Pilembe kite ma tung’ tung’ m’etie ko re ma cwale nitimo lembe ceke. (Zab. 145:9) Ka wabemedara niponjo lembe iwi Yehova, wabigam mare lee mandha. Ka wamaru Yehova, wabibedo mbe ku yeny ma nia emii iwa cik iwi lembe ceke. Calu Yehova, watimo kero nimaru gin ma ber man nidagu gin ma rac. (Zab. 97:10) Re saa moko ebed ebedo yot ungo niworo Yehova. Pirang’o? Lapor pa Nehemia copo mio ponji ma kani ni judong cokiri? Wego copo lubo lapor p’ubimo Daudi nenedi? Mego copo nwang’u ponji ma kani niai kud i lapor pa Maria ma min Yesu? Wabidwoko wang’ penji maeno i thiwiwec maeni.

PIRANG’O ECOPO BEDO TEK NIWORO YEHOVA?

4-5. Nimakere ku Jurumi 7:21-23, pirang’o ecopo bedo iwa tek niworo Yehova?

⁴ Thelembe acel ma copo ketho ebedo iwa tek niworo Yehova utie nia walagu dubo man waleng’ ungo. Pieno saa moko wabed wamaru ngo niworo Yehova. Kinde m’Adamu giku Eva gijai ni Mungu man gicamu nying yen m’ekwero igi, gimito ging’ii gin gigi gin ma ber ku gin ma rac. (Tha. 3:22) Calu Adamu giku Eva, dhanu ma pol gimito ngo gilub cik pa Yehova, ento gimito ging’ii gin gigi gin ma ber ku gin ma rac.

⁵ Ecopo bedo tek niworo Yehova saa ceke kadok ni dhanu ma ging’eye man ma gimare. Jakwenda Paulo de unwang’ere ku lembe maeno. (Som Jurumi 7:21-23.) Calu Paulo, wan de wamito watim lembe m’atira i wang’ Yehova. Ento kwayu saa ceke watim kero ninyego i kum ava ma becwaluwa nitimo dubo.

6-7. Ecopo bedo tek niworo Yehova pi thelembe mange ma kani? Kemii lapor moko.

⁶ Thelembe mange ma copo ketho ebedo iwa tek niworo Yehova utie paru mi dhanu mi kabedo ma wadongo i ie. Dhanu ma pol gimio paru ma cwalujo nitimo lembe ma cik pa Yehova ukwero; pieno ubekwayu waii aiia kara kud walub paru migi. Wakenen lapor acel kende.

⁷ I kabedo moko, judhuro mac i kum aradu nia gitim kero nisayu sente lee. Nyamego moko ma nyinge Maric ukadhu kud i lembe ma kumeno. I wang’ niponjo lemandha, ecidh esomo somo ma malu i université moko ma pire yik akeca i ng’om m’ebino kwo i ie. Jupagi Mari gigam gicego mac i kume nia esai tic ma bimio ire sente lee man ma biketho jubiwore. En de egam emaru lembene. Re kinde m’eponjo lemandha man etuc nimaru Yehova, ewilo lembakeca pare. Ekoro kumae: “Saa moko, tic mi sente ma lee benen, re ang’eyo nia kan ayio ticne, acopo timo ngo ni Yehova i kite m’abetimo kawoni. Re calu ma jular juroyo paru pa sente akeca i wiya, anyego anyega pi nikwero tije. Akwayu Yehova lee nia ekonya kara kud ayii tic ma bicera nitimo ire.”​—Mat. 6:24.

8. Wabineno lembang’o kawoni?

⁸ Waai waneno nia niworo Yehova mio iwa bero lee. Ento ukwayu ju ma gitie ku dito moko, calu ve judong cokiri, wego man mego giwor Yehova, pilembe ka gitimo kumeno gibikonyo dhanu mange bende. Kawoni wakenen lapor mi dhanu moko ma Biblia uweco pigi; laporne copo konyowa nitio ku dito mwa i kite ma foyo i Yehova.

LAPOR PA NEHEMIA COPO MIO PONJI MA KANI NI JUDONG COKIRI?

9. Nehemia unwang’ere i wang’ lembang’o ma pek?

⁹ Yehova umio rwom ma lee mi tuko ngo ni judong cokiri: emio igi tic mi gwoko rombe pare. (1 Pet. 5:2) Judong cokiri gicopo nwang’u ponji lee niai kud i kite ma Nehemia utelo ko wi dhanu pa Yehova. Nehemia ubino jabim (gouverneur) i Yuda, pieno ebino ku dito ma lee. (Neh. 1:11; 2:7, 8; 5:14) Kepar pi lembe ma pek ma Nehemia unwang’ere i wang’e. Ewinjo nia Juyahudi gibetimo lembe ma cik pa Yehova ukwero i hekalu, man gibekonyo ngo Julawi calu ma Cik ukwayu. Juyahudi gibino woro ngo Sabatu, man jumoko m’i kindgi ugamu mon mi thek ma woro ngo Yehova. Ugam ukwayu Nehemia utim lembe moko pi nidaru lembe ma pek maeno.​—Neh. 13:4-30.

10. Nehemia utimo ang’o saa m’enwang’ere i wang’ lembe ma pek?

¹⁰ Nehemia utio ngo ku dito pare pi nidiyo dhanu kara gilub paru pare. Ento ekwayu telowic i bang’ Yehova i rwo, man eponjo dhanu ku cik pa Yehova. (Neh. 1:4-10; 13:1-3) Nehemia ujwigere, uketho en de edikere ku dhanu mange pi nigiero gang’kidi mi Yerusalem.​—Neh. 4:15.

11. Nimakere ku 1 Jutesaloniki 2:7, 8, ukwayu judong cokiri gitii ku dito migi nenedi?

¹¹ Judong cokiri gicopo nwang’iri ngo ku lembe ma rom ku ma Nehemia unwang’ere ko, ento giromo lubo lapor pare i yo ma tung’ tung’. Ku lapor, gitimo tic ma tek pi kony mir umego ku nyimego. Bende ginwang’u ngo nia dito migi uketho pigi tie tek nisagu pir umego ku nyimego mange. Ento gitimo lembe ni umego ku nyimego ku bero. (Som 1 Jutesaloniki 2:7, 8.) Calu ma gitie ku jwigiri man gimaru umego, giweco i bang’gi i ayi ma ber. Umego Andre ma tie jadit cokiri niai con ukoro kumae: “Anwang’u nia ka jadit cokiri utie dhanu ma ber man eweco nza nza, eno mulo adunde umego ku nyimego. Kite maeno cwalugi nitimo lembe ma judong cokiri ukwayu.” Umego Tony ma tie bende jadit cokiri m’utimo oro dupa uyero kumae: “Abed aii nitio ku juk ma nwang’ere i Jufilipi 2:3, man saa ceke atimo kero nineno nia pi jumange tie tek nisagu pira. Eno ketho adiyo ngo umego ku nyimego kara giwora.”

12. Pirang’o pire tie tek nia judong cokiri gibed ku jwigiri?

¹² Judong cokiri gicikiri nibedo ku jwigiri calu Yehova. Kadok Yehova tie Ubimo ma malu ngbir de, re Biblia uyero nia ‘ejwigre gire’ kara eting’ “dhanu ma sai kud i utur.” (Zab. 18:35; 113:6, 7) Bende, Biblia uyero nia Yehova udagu dhanu ma gi jukuhaya.​—Rie. 16:5.

13. Pirang’o jadit cokiri ucikere ‘nicero lebe’?

¹³ Jadit cokiri m’ubeworo Yehova ucikere ‘nicero lebe.’ Kan ungo ecopo nyotho wec ka ng’atu moko ukoso ire woro. (Yak. 1:26; Gal. 5:14, 15) Umego Andre ma wadaru weco pire uwacu kumae: “Saa moko abed amito nia aler wi umego kunoke wi nyamego m’anwang’u nia ukoso ira woro, an m’atie jadit cokiri. Ento agam anyamu i lembe iwi lapor ma beco mi dhanu moko ma Biblia uweco pigi, eno uketho anwang’u nia ubekwayu abed ajwigara man abed mol.” Judong cokiri ginyutho woro ni Yehova nwang’u gibeweco i ayi ma ber kud umego ku nyimego man ku judong cokiri wagi.​—Kol. 4:6.

WEGO GICOPO LUBO LAPOR P’UBIMO DAUDI NENEDI?

14. Yehova umio tic ma kani ni wego, man ekwayu ang’o i bang’e?

¹⁴ Yehova uketho wego ni wic mi ot, man ekwayu nia eponj awiya pare, etel wigi, man etwinygi. (1 Kor. 11:3; Ef. 6:4) Ento eno nyutho ngo nia wego copo tio ku dito pare i ayi m’emaru en. Yehova re m’ucaku the kwo mi juruot, pieno wego biwodho wel ire pi kite m’ebetelo ko wi juruot pare. (Ef. 3:14, 15) Wego nyutho woro ni Yehova nwang’u ebetio ku dito pare i ayi ma foyo i Mungu. Kan ebeponjo lembe ma tung’ tung’ m’utimere i kwo p’ubimo Daudi, ecopo nwang’u ponji dupa.

15. Pirang’o Ubimo Daudi utie lapor ma ber m’ukwayu wego gilubi?

¹⁵ Daudi ubino ku dito iwi juruot pare, ento Yehova ung’ie bende kara ebim wi thek ceke mir Israel. Calu Daudi ubino ubimo, ebino ku dito ma lee. Re saa moko etio rac ku dito parene, e egam etimo kosa ma lee mandha. (2 Sam. 11:14, 15) Ento edok enyutho woro ni Yehova. Nenedi? Ejolo twiny ma Yehova umio ire. Bende, ekonjo adundene i wang’ Yehova i rwo. (Zab. 51:1-4) M’umedo maeno, ebino ku jwigiri, uketho ewinjo juk ma beco mi jumaco kende ngo ento m’uai i bang’ jumamon bende. (1 Sam. 19:11, 12; 25:32, 33) Daudi unwang’u ponji i kum kosa pare, man edok emiyere zoo nitimo ni Yehova.

16. Lapor pa Daudi copo mio ponji ma kani ni wego?

¹⁶ Wego, lapor p’ubimo Daudi copo mio iri ponji ma kani? Kud itii ku dito ma Yehova umio iri i ayi ma rac. Yii kosa peri, man jol juk m’ucungo iwi Biblia ma jumange ubemio iri. Kan itimo kumeno, juruot peri gibiwori pilembe gibineno nia itie ku jwigiri. Kinde m’iberwo karacelo ku juruot peri, kor paru mir adundeni ni Yehova kara ging’ei nia ibeyenyo kony man telowic i bang’ Yehova. M’usagu zoo, keth tic pa Yehova i kabedo ma kwong’a i kwo peri. (Poi. 6:6-9) Lapor peri ma ber utie giramia ma pire tek nisagu gin moko ci m’icopo mio ni juruot peri.

MEGO GICOPO NWANG’U PONJI MA KANI NIAI KUD I LAPOR PA MARIA?

17. Yehova umio tic ma kani ni mego?

¹⁷ Yehova umio tic ma pire tek ni mego i ot, man emio igi dito mi kadhiri moko iwi awiya. (Rie. 6:20) Lembe ma mego ubetimo man m’ebeyero copo bedo ku matoke ma lee iwi awiya pare i kwo migi zoo. (Rie. 22:6) Kenen ponji ma mego gicopo nwang’u niai kud i lapor pa Maria ma min Yesu.

18-19. Lapor pa Maria copo mio ponji ma kani ni mego?

¹⁸ Maria ugam ung’eyo giragora cuu mandha. Ebed eworo Yehova man ebino ku mer ma ceng’ini kude. Ebino ayika niworo Yehova kadok lembene ukelo alokaloka ma lee i kwo pare de.​—Lk. 1:35-38, 46-55.

¹⁹ Mego, lapor pa Maria copo mio iri ponji ma kani? Mi kwong’o, mediri nibedo ku mer ma ceng’ini ku Yehova. Pieno, bed itim ponji peri ma kendi, man bed inwang’ saa mi rwo inikendi. Mir ario, bed ayika nitimo alokaloka i kwo peri kara inyai anyong’a i Yehova. Ku lapor, saa moko nyo junyodo peri gibino dhanu ma kwiny kud awiya, man gibed gikok i wiwu kwa akoka. Eno uketho idongo m’ing’eyo nia juponjo awiya kumeca. Kadok kawoni dong’ idaru ng’eyo kite ma Yehova ubemito iponj ko awiya peri de, re saa moko ecopo bedo yot ungo nikwio kumi man nicirogi asagane ka gitimo iri tegowic kinde m’iol. (Ef. 4:31) I saa ma kumeno, pire tie tek lee dit nia ikwai kony i bang’ Yehova. Mego moko ma nyinge Lydia uyero kumae: “Saa moko, abed arwo wang’ udul nia Mungu ukonya kara kud awec ku ng’ecwiny ni woda saa m’ekoso ira. Saa mange kan abeweco i bang’e, aling’ bip man akwayu kony i bang’ Yehova kara kud acodh ire wec acodha.”​—Zab. 37:5.

20. Mego moko ginwang’u nia etie pek nitimo ang’o, re gicikiri nitimo ang’o?

²⁰ Mego moko ginwang’u nia etie lembe ma pek ninyutho mer ni awiya migi. (Tit. 2:3, 4) Mego moko gigam gidongo i udi ma mer mandha ubino mbe i kind awiya ku junyodo. Ka in de idongo i udi ma kumeno, kud ipodh i kit kosa maeno. Mego m’ubemito ewor Yehova ucikere niponjo ayi ma tung’ tung’ m’ecopo nyutho ko mer ni awiya pare. Saa moko ecopo bedo ire lembe ma tek niloko paru man timo pare, ento etie lembe ma copere. Kan etimo alokaloka maeno, en ku juruot pare ceke gibibedo ku mutoro.

MEDIRI NIWORO YEHOVA

21-22. Nimakere kud Isaya 65:13, 14, bero ma kani ma wanwang’u ka wabeworo Yehova?

²¹ Ubimo Daudi ugam ung’eyo bero mi nyutho woro ni Yehova. Ekiewo kumae: “Cik pa Yehova atira, m’enyanyu anyong’a i adunde: lembang’ola pa Yehova e leng’ m’emio der ni wang’. Mange ke jutwong’o kugi jatic peri: sukulia ma dit nuti kum worogi.” (Zab. 19:8, 11) Tin, wabeneno kamaleng’ tung’ tung’ m’utie i kind dhanu ma gibeworo Yehova ku ju m’ubewore ngo. Ju ma gibeworo Yehova ‘giwero wer ni anyong’a mir adundegi.’​—Som Isaya 65:13, 14.

²² Ka judong cokiri, wego man mego gitie ayika niworo Yehova, kwo migi bedo ma ber, juruot migi bedo kud anyong’a, man cokiri de bedo i acel. M’usagu zoo, ginyayu anyong’a i Yehova. (Rie. 27:11) Eno tie lembe ma ber mi tuko ngo!