“Nen, udul dhanu ma dit”

1. I kum oro 95, jakwenda Yohana ukadhu kud i peko ma kani?

I KUM oro 95 R.M., jakwenda Yohana ukadhu kud i peko ma lee. Saa maeno nwang’u dong’ etii, man jutwie i kol i cula mi Patmo, bende copere nia ebino jakwenda ma tokcen m’udong’ kwo. (Nyu. 1:9) M’umedo maeno, ju ma gijai i kum lemandha gibedo ponjo vupo man gikelo pokiri i cokiri mi Jukristu. Ubino nen ve nia i ng’ei nindo ma nok ci Jukristu mandha ubecithum ku wi ng’om.​—Yud. 4; Nyu. 2:15, 20; 3:1, 17.

2. Nimakere ku Lembanyutha 7:9-14, Yohana uneno ang’o i ginmawokiwang’? (Nen cal m’i ng’eye.)

² Kud i kind lembe ma tek maeno ma Yohana ubino kadhu kud i ie, Yehova uketho eneno ginmawokiwang’ moko mir udu m’unyutho lembe ma bitimere i nindo m’ubino. I ginmawokiwang’ne, jamalaika acel uyero ni jumalaika mange ang’wen nia gicer yamu mi nyoth mi masendi ma dit nitundo ma jubiketho ayi i kum jumiru pa Mungu. (Nyu. 7:1-3) Jumiru maeno utie Jukristu 144 000 ma gibibimo karacelo ku Yesu i polo. (Lk. 12:32; Nyu. 7:4) I ng’eye, Yohana uneno bende udul dhanu mange ma wendgi lee dit, uketho eyero kumae: “Aneno, man nen, udul dhanu ma dit, ma ng’atu moko mbe ma copo kwanu, m’uai kud i thek ceke kubang’gi nzu man kud i suru ceke man kodhidhanu ku dhok, gicungo wang’ komker man i wang’ Nyathi Rombo.” (Som Lembanyutha 7:9-14.) Copere nia Yohana ubino ku mutoro lee ning’eyo nia i nindo m’ubino, dhanu ma wendgi lee gibiworo Mungu i ayi m’atira!

3. (a) Pirang’o ginmawokiwang’ ma Yohana uneno copo tielo yioyic mwa? (b) Wabineno lembang’o i thiwiwec maeni?

³ M’umbe jiji, ginmawokiwang’ maeno utielo yioyic pa Yohana lee dit. Wan lundo, ginmawokiwang’ne romo tielo yioyic mwa lee nisagu, pilembe wabekwo i nindo m’epong’o i ie! Wabeneno kite ma dhanu milioni ma dupa gibemiiri ko nitimo ni Mungu, man gitie ku genogen mi both kud i masendi ma dit pi nikwo rondo ku rondo iwi ng’om. I thiwiwec maeni, wabineno kite ma Yehova ugam ukonyo ko jurutic pare ning’eyo udul ma dit maeno oro ma kadhu pier abora i wang’e. I ng’eye, wabing’io i lembe ario iwi udul maeno: (1) wendgi, man (2) kaka ma giai i ie. Lembuno bitielo yioyic mi dhanu ceke ma gitie ku genogen mi kwo rondo ku rondo iwi ng’om.

UDUL MA DIT BIKWO KANI?

4. Jurudini mi ndra giponjo ngo lemandha ma kani mi Biblia, man Juponj Biblia gibino tung’ kugi nenedi?

⁴ Jurudini mi ndra gibed giponjo ngo dhanu ku lemandha mi Biblia m’unyutho nia nindo moko ju ma giworo Mungu gibikwo rondo ku rondo iwi ng’om. (2 Kor. 4:3, 4) Tin, juponji mi dini mi ndra ma pol giponjo nia dhanu ma beco ceke becidho i polo i ng’ei tho. Ento nyathin ungu mi Juponj Biblia ma gicaku wodho gazeti Otkur ma Wiw i oro 1879, gibed giponjo ngo kumeno. Ginyang’ nia Mungu bidwogo Paradiso iwi ng’om man dhanu milioni dupa ma gibewore gibikwo iwi ng’om keni, ento i polo ngo. Re i saa nica, gigam ginyang’ ungo cuu cuu nia dhanu maeno ma gibikwo iwi ng’om gitie jukani.​—Mat. 6:10.

5. Juponj Biblia ginyang’ i lembang’o iwi dhanu 144 000?

⁵ Juponj Biblia ginyang’ bende nia nimakere ku Lembagora, ungu mi dhanu moko nuti ma “jung’iewogi kud i ng’om” pi nicibimo ku Yesu i polo. (Nyu. 14:3) Dhanu maeno tie Jukristu 144 000 ma gitimo ni Mungu kud amora man gigwoko bedoleng’ migi ire kinde ma gibino iwi ng’om. Pir udul ma dit ke Juponj Biblia gibino ku paru ma kani?

6. Juponj Biblia gibino ku paru ma kani iwi udul ma dit?

⁶ I ginmawokiwang’, Yohana uneno udul dhanu ma dit “gicungo wang’ komker man i wang’ Nyathi Rombo.” (Nyu. 7:9) Wec maeno uketho Juponj Biblia ginyang’ nia udul ma dit ku Jukristu 144 000 zoo gibicikwo i polo. Dong’ ka gin zoo gibikwo i polo, nwang’u ke tung’ tung’ ang’o m’utie i kindgi? Juponj Biblia gibed giparu nia dhanu ma bibedo i kind udul ma dit gitie Jukristu ma gibed giworo ngo Mungu ku cwinygi ceke saa ma gibino iwi ng’om. Gibed giparu bende nia dhanu moko ma gini dini mi ndra ma re gibelubo cik mi Biblia i kwo migi, gitie bende i kind udul ma dit. Juponj Biblia giparu nia dhanu maeno gimaru ngo Mungu i mukero ma giromo bimo ko ku Yesu. Calu ma gimaru ngo Mungu ku cwinygi ceke, udul ma dit gibibedo i polo i wang’ komker ento gibibedo ngo iwi komker.

7. Juponj Biblia gibed giparu nia jukani ma gibikwo iwi ng’om i the Bimobim mi oro Elufu acel, man gibino paru lembang’o pi weg bedopwe mi rundi ma con?

⁷ Ka dong’ ke ng’a ma bikwo iwi ng’om? Juponj Biblia giparu nia kinde ma Jukristu 144 000 kud udul ma dit gibicidho i polo, dhanu mange milioni dupa bikwo iwi ng’om pi ninwang’u bero mi Bimobim pa Yesu. Gibino paru nia milioni mi dhanu maeno gitie ju m’utimo ngo ni Yehova i wang’ Bimobim pa Kristu. Ento jubiponjogi ku lembe iwi Yehova i the Bimobim mi oro Elufu acel. I ng’eye, ju ma bilubo cik pa Yehova gibinwang’u kwo ma rondo ku rondo iwi ng’om, ento ju ma bijai jubinyothogi. Pi “judongomawijo” ma bikwo i the Bimobim mi oro Elufu acel, Juponj Biblia gibed giparu nia ve jumoko m’i kindgi gibinwang’u mugisa mi cikwo i polo yor i kum ajiki mi oro elufu acel. I kind dhanu maeno, jumoko bibedo weg bedopwe ma gilar githo nwang’u fodi Kristu ubino ngo iwi ng’om.​—Zab. 45:16.

8. Ubino nen nia Mungu utie kud ungu adek ma kani i lembakeca pare?

⁸ I adundo, Juponj Biblia ginwang’u nia ungu mi dhanu tie adek: (1) dhanu 144 000, ma gibibimo ku Yesu i polo; (2) Jukristu ma gitie i kind udul ma dit ma gitimo ngo ni Mungu ku cwinygi ceke, ma gibicungo i wang’ komker man i wang’ Nyathi Rombo i polo; man (3) dhanu milioni dupa ma jubiponjo ku lembe iwi Yehova i the Bimobim mi oro Elufu acel iwi ng’om keni.b Ento i ng’eye, Yehova ukonyogi ninyang’ i lembe maeno terere.​—Rie. 4:18.

LERO MI LEMANDHA UWOK TERERE

9. (a) Udul ma dit copo cungo i “wang’ komker man i wang’ Nyathi Rombo” nenedi? (b) Pirang’o lero maeno m’uwok iwi Lembanyutha 7:9 umondo rwit iwi dhanu?

⁹ I oro 1935, Jumulembe pa Yehova ginyang’ terere nia udul ma dit ma Yohana uneno i ginmawokiwang’ gitie jukani. Ginyang’ bende nia udul ma dit bicidho ngo i polo pi ‘nicungo i wang’ komker man i wang’ Nyathi Rombo.’ Ento gicungo i wang’ komker maeno i ayi mi lapor. Kadok gibekwo iwi ng’om de, udul ma dit copo cungo i “wang’ komker” pa Yehova nwang’u giyio nia en re m’etie Ubimo ma Malu Ngbir man gibeworo telowic pare. (Isa. 66:1) Gicungo “i wang’ Nyathi Rombo” nwang’u gibenyutho yioyic i lam mi jamgony ma Yesu thiero. Giragora mange bende nuti ma copo konyowa ninyang’ nia wec ma nwang’ere i Lembanyutha 7:9 utie wec mi lapor. Matayo 25:31, 32 uwacu nia “thek ceke,” uketho i ie jutimrac bende, “bicokri” i wang’ Yesu saa m’ebijany iwi komker mi dwong’ pare. Ubenen kamaleng’ nia thek maeno ceke gini polo ngo ento iwi ng’om. Pieno, lero maeno uwok umondo rwit iwi dhanu. Lerone ukonyo Jumulembe pa Yehova ninyang’ bende nia pirang’o Biblia uwacu ngo ya jubiting’o udul ma dit i polo. Mungu ung’olo nia ebimio kwo ma rondo ku rondo i polo ni ungu acel kende, niwacu dhanu 144 000 ma “gibimo bim wi ng’om” karacelo ku Yesu.​—Nyu. 5:10.

10. Pirang’o ukwayu jular juponj udul ma dit ku lemandha iwi Yehova i wang’ Bimobim mi oro Elufu acel?

¹⁰ Niai i oro 1935, Jumulembe pa Yehova ginyang’ nia udul ma dit ma Yohana uneno i ginmawokiwang’ nyutho udul mi Jukristu ma gigwoko bedoleng’ migi man ma gitie ku genogen mi kwo rondo ku rondo iwi ng’om. Kara udul dhanu maeno gibothi i masendi ma dit, ubekwayu jular juponjgi ku lembe iwi Yehova man gicak timo ire ma fodi Bimobim mi oro Elufu acel ucaku ngo. Ukwayu ginyuth yioyic ma tek kara ‘gibin gibothi ni gin ceke ma bitimbre’ i wang’ Bimobim pa Yesu mi oro Elufu acel.​—Lk. 21:34-36.

11. Pirang’o Juponj Biblia moko giparu nia ve jubiting’o jumoko pi nicidho i polo i ng’ei Bimobim mi oro Elufu acel?

¹¹ Ka pi weg bedopwe moko ma jubino paru nia ve jubiting’ogi i polo i ajiki mi Bimobim mi oro Elufu acel ke? Jukoro paru maeno i gazeti Otkur ma Wiw mi nindo 15, dwi mir 2, 1913. Re paru maeno copo cwalu ng’atini nipenjere kumae: ‘Pirang’o jurutic pa Mungu ma con ma giweg bedopwe gibicer pi nikwo iwi ng’om, ma ke lundo Jukristu moko ma gitimo ni Mungu kumeno kumeno gibicidho i polo?’ I andha, thelembe moko ario ma cuu ngo re m’unyolo paru maeno; jubino paru nia (1) udul ma dit gibikwo i polo, man (2) nia Jukristu ma gitimo ngo ni Mungu kud amora re ma gitie i kind udul ma dit.

12-13. Jukristu ma juwiro ku tipo kud udul ma dit ceke ging’eyo lembang’o iwi sukulia ma gibinwang’u?

¹² Calu ma waneno, niai i oro 1935, Jumulembe pa Yehova ginyang’ kamaleng’ nia dhanu ma biboth i lwiny mir Armagedon re ma gitie udul ma dit ma Yohana uneno. Gibikadhu kud “i masendi ma dit” iwi ng’om keni, man gibikok “ku dwandgi ma dit, giwacu kumae, Both ubed ni Mungu mwa m’ujany wi komker, man ni Nyathi Rombo.” (Nyu. 7:10, 14) M’usagu zoo, Biblia ubeponjo nia Jukristu ma gicer pi kwo mi polo ginwang’u “gin ma ber m’usagu” ma weg bedopwe ma con gibinwang’u. (Ebr. 11:40) Lero maeno uketho umego ku nyimego gicaku lwong’o dhanu kud amora kara gibin gitim ni Yehova ma gitie ku genogen mi kwo iwi ng’om.

¹³ Dhanu ma gitie i kind udul ma dit gitie ku mutoro pi genogen maeno ma Mungu umio igi. Ginyang’ nia Yehova re ma ng’io kaka ma jurutic pare ma gigwoko bedoleng’ migi ire gibikwo i ie, dok ebed i polo kunoke iwi ng’om. Jukristu ma juwiro ku tipo man udul ma dit bende, ging’eyo nia gibinwang’u sukulia ni kum bero ma kaporne mbe pa Yehova, m’unen nikadhu kud i lam mi jamgony ma Yesu uthiero.​—Rum. 3:24.

WENDGI KWANERE NGO

14. I ng’ei oro 1935, pirang’o dhanu dupa gibino penjiri iwi kite ma lembila m’ukoro pir udul ma dit bipong’o ko?

¹⁴ I ng’ei ma lero uwok iwi ponji mi Jumulembe pa Yehova i oro 1935, jumoko gimediri nipenjiri nia wend dhanu ma bikwo iwi ng’om bimedere nenedi? Ku lapor, umego Ronald Parkin ubino ku oro 12 kinde ma jukoro kamaleng’ nia udul ma dit utie jukani. Ewacu kumae: “I saa maeca, jurwei lembanyong’a ubino 56 000 i wang’ ng’om zoo, man ve ju ma pol m’i kindgi ubino Jukristu ma juwiro ku tipo. Pieno, wend udul ma dit ubino nen nyanok.”

15. Wend udul ma dit umedere ameda nenedi?

¹⁵ I kind oro m’ulubo, juoro bamisioner i ng’om ma tung’ tung’, eno uketho wend Jumulembe pa Yehova ucaku medere ameda. I ng’eye, i 1968, Jumulembe pa Yehova ucaku tio ku buku La vérité qui conduit à la vie éternelle pi niponjo Biblia ku dhanu. Kite ma buku maeno ukoro ko lemandha mi Biblia yot yot uketho dhanu ma mol dupa gibino i lemandha nisagu m’i wang’e. I kind oro ang’wen kende ci, wend dhanu ma kadhu elufu dak abic ulimo batizo. M’umedo maeno, calu ma tego mi dini mi Katoliki ucaku jwik i ng’om moko mir Amerika man i ng’om mange, man calu ma wanwang’u bedagonya pi tic mwa i ng’om moko mir Europe ma yo nyangu man i ng’om moko mir Afrika, wend dhanu ma lee ugam ulimo batizo. (Isa. 60:22) I kind oro m’ukadhu ceng’ini eni, dilo pa Yehova uwodho jamtic ma tung’ tung’ mange pi nikonyo dhanu kara ging’ei lembe ma Biblia ubeponjo. M’umbe jiji, Mungu ubecoko dhog udul ma dit ma kawoni wendgi kadhu milioni abora.

KAKA M’UDUL MA DIT UAI I IE

16. Mungu ubecoko udul ma dit niai kani?

¹⁶ Kinde ma Yohana ubino kiewo ginmawokiwang’ m’eneno, eyero nia udul ma dit giai “kud i thek ceke kubang’gi nzu man kud i suru ceke man kodhidhanu ku dhok.” Jabila Zekaria ular uewo lembe moko m’urombo ku maeno; ekiewo kumae: “I ceng’ maeca ebitimbre, nia co apar, kud i dhu thek ceke, gibimaku dhu kendi pa Jayahudi, gibiwacu kumae, wabicidho wakudu, kum wawinjo nia Mungu ni kudu.”​—Zek. 8:23.

17. Jumulembe pa Yehova gibetimo ang’o pi nikonyo dhanu mi thek man mi dhok ceke?

¹⁷ Jumulembe pa Yehova ginyang’ nia kara Yehova ucok dhanu mi dhok ceke, ukwayu jurwei lembanyong’a i dhok ma pol. Pieno, wacaku loko piny i dhok ma tung’ tung’. Niai ma wacaku loko buku ma jucopo ponjo ko Biblia, oro udaru kadhu 130, man kawoni wabeloko piny nisagu m’i wang’e, i dhok ma kadhu 900. M’umbe jiji, kite ma Yehova ubecoko ko dhog udul ma dit niai kud i thek ceke, utie lembe mir udu! Wabefoyo Yehova lee dit pi cam ma dupa mi tipo m’ebemio iwa i dhok ma tung’ tung’, eno uketho wabetimo ire i acel kadok nwang’u waai i thek ma dupa de. Bende, Jumulembe pa Yehova ging’eyiri cuu mandha ni kum lembanyong’a ma girweyo kud amora man mer ma gibenyutho i kindgi. Lembe maeno tielo yioyic mwa lee dit!​—Mat. 24:14; Yoh. 13:35.

GINMAWOKIWANG’ MAENO UGWAKU KUMWA NENEDI?

18. (a) Nimakere kud Isaya 46:10, 11, pirang’o iwa wang’ ungo nineno kite ma Yehova ubepong’o ko lembila m’uewo pir udul ma dit? (b) Pirang’o dhanu ma bikwo iwi ng’om gibenwang’u ngo nia Yehova utwonogi ku gin moko?

¹⁸ Watie ku mutoro lee nineno kite ma lembila m’ukoro pir udul ma dit ubepong’o ko! Iwa ubewang’ ungo i kum kite ma Yehova upong’o ko lembila maeno i ayi mir udu. (Som Isaya 46:10, 11.) Dhanu ma gitie i kind udul ma dit gidwoko foyofoc lee ni Yehova pi genogen m’emio igi. Ginwag’u ngo nia Mungu utwonogi ku piny moko pilembe ewirogi ngo ku tipo pare maleng’ kara gicidh gitim ku Yesu i polo. Kadok i Biblia de, wanwang’u dhanu dupa ma tipo maleng’ utelo wigi nitimo lembe ma dongo, re gitie ngo i kind dhanu 144 000. Acel m’i kindgi ubino Yohana ma Jababutisi. (Mat. 11:11) Mange ubino Daudi. (Tic. 2:34) Gin eno ku dhanu mange ma wendgi kwanere ngo, gibicer pi nikwo i paradiso iwi ng’om. Gin ceke man udul ma dit, gibinwang’u kaka mi nyutho nia gimoko i kum Yehova man gijolo bimobim pare ma malu ngbir.

19. Ka wanyang’ i kum lembila ma Yohana uneno iwi udul ma dit, wabitimo ang’o?

¹⁹ Eni tie wang’ ma kwong’a ma Yehova ubecoko ie dhanu milioni dupa niai kud i thek ceke pi nitimo ire i acel. Kadok watie ku genogen mi cikwo i polo kunoke mi kwo iwi ng’om de, ka wanyang’ i kum lembila maeno, wabitimo kero nikonyo dhanu dupa kara gibin gimond i kind ‘rombe mange.’ (Yoh. 10:16) Kago eni, Yehova bikelo masendi ma dit ma binyotho bimobim man dini ceke m’unyayu masendi i kum dhanu. I ng’eye, udul ma dit bibedo ku rwom ma lee dit: gibitimo ni Yehova rondo ku rondo iwi ng’om keni!​—Nyu. 7:14.