Buku mi Lembanyutha ubeponji ku lembang’o pi nindo m’ubino?

1. Dhanu ceke ubenwang’iri i wang’ ng’iyong’ic ma kani ma pire tek m’ukwayu gitimi?

TIN dhanu ginwang’iri i wang’ ng’iyong’ic ma pire tek m’ukwayu gitim. Nyo gibidiko cing’gi i kum Yehova Mungu pilembe nia en re m’etie ku twero mi bedo Jabim iwi ng’om zoo, kunoke nyo gibidiko cing’gi i kum Sitani Wonabali ma jadegi pare? Ng’iyong’ic mange mbe m’uweko maeno. Yub moko ci ma gibemaku binyutho ka nyo gibikwo rondo ku rondo kunoke ngo. (Mat. 25:31-33, 46) I nindo mi “masendi ma dit,” gibibedo kud ayi i kumgi ma binyutho ka nyo giromo ku both kunoke ku nyoth.​—Nyu. 7:14; 14:9-11; Eze. 9:4, 6.

2. (a) Juebrania 10:35-39 ubecwaluwa nitimo ang’o? (b) Buku mi Lembanyutha ke copo konyowa nenedi?

² Som Juebrania 10:35-39. Kan idaru ng’iyo nidiko cingi i kum bimobim pa Yehova, eno itimo ng’iyong’ic mi rieko. Kawoni itie kud ava mi konyo jumange de kara gitim ng’iyong’ic ma cuu. Pi nikonyogi, icopo tiyo ku lembe ma nwang’ere i buku mi Lembanyutha. Buku maeno ma pire tek, unyutho gin ma binwang’u ju ma gijai ni Yehova, ento enyutho bende mugisa ma dhanu m’udiko cing’gi cuu i kum bimobim pare gibinwang’u. Wacikara niponjo lemandha maeno ma pire tek. Ka watimo kumeno, wabinwang’u tego ma wabimedara ko nitimo ni Yehova. M’umedo maeno, wacopo konyo bende dhanu mange nimaku yub ma gitim ko ni Yehova man gimok i kume.

3. I thiwiwec maeni wabiweco iwi lembang’o?

³ I thiwiwec maeni, wabiweco iwi penji mae: Lembang’o m’ubekuro ju m’ubediko cing’gi ku bimobim pa Mungu? Ju m’ung’iyo nidiko cing’gi ku yedi ma kwiny ma kwar ngbo ma jukoro pire i buku mi Lembanyutha ke lembang’o ma binwang’ugi?

LEMBE M’UBEKURO JU M’UGWOKO BEDOLENG’ MIGI NI YEHOVA

4. Jakwenda Yohana uneno ungu ma kani m’ubedo karacelo ku Yesu i polo?

⁴ Jakwenda Yohana uneno i ginmawokiwang’ ungu ario mi ju m’udiko cing’gi i kum bimobim pa Yehova man ginwang’u mugisa mi kwo ma rondo ku rondo. Ungune mi kwong’o utie ku dhanu elufu dak acel pier ang’wen wi ang’wen (144 000). (Nyu. 7:4) Juting’ogi kud i ng’om kara gibed ni jubim iwi Ker karacelo ku Yesu i polo. Gibibimo ke wi ng’om. (Nyu. 5:9, 10; 14:3, 4) I ginmawokiwang’ne, Yohana uneno gibedo karacelo ku Yesu i polo iwi got Sayuni.​—Nyu. 14:1.

5. Ceng’ini eni lembang’o ma bitimere ni dong ju ma juwiro ma fodi gibekwo iwi ng’omi?

⁵ Niai i rundi ma kwong’a nitundo tin, judaru ng’iyo dhanu elufu swa pi nibedo i ungu maeno mi dhanu 144 000. (Luka 12:32; Rum. 8:17) Ento juyero ni Yohana nia, donggi kunoke wendgi ma nok kende re ma bibedo kwo i nindo mi kajik ceng’. “Dong” ju maeno m’udong’ gibinwang’u “ayi” ma tokcen m’unyutho nia Yehova uyiyogi i wang’ caku mi masendi ma dit. (Nyu. 7:2, 3; 12:17) I ng’eye, i saa mi masendi ma dit, jubiting’ogi pi nicinwang’u juwagi i polo ma gidaru tho pi nitwiyo dhu kwan 144 000. Kuca gibibimo karacelo ku Yesu i Ker pa Mungu.​—Mat. 24:31; Nyu. 5:9, 10.

6-7. (a) Yohana udok uneno ungu mange ma kani, man wacopo nwang’u ponji ma kani i kumgi? (b) Pirang’o lembila m’i buku mi Lembanyutha thek 7 umulo kum dong ju ma juwiro man ‘udul ma dit’ bende?

⁶ I ng’ey ungu mi ju ma bikwo i polo, Yohana udok uneno “udul ma dit.” Tung’ ku dhanu 144 000, ungu maeni lundo wendgi kwanere ngo. (Nyu. 7:9, 10) Wacopo nwang’u ponji ma kani i kumgi? Yohana uyero nia “dhanu maeni gitie ju ma giai kud i masendi ma dit man gilwoko kanzu migi gidwokogi tar de i rimo pa Nyathi rombo.” (Nyu. 7:14) I ng’ey both kud i masendi ma dit, “udul ma dit” maeni bikwo iwi ng’om man gibinwang’u mugisa ma yawe mbe.​—Zab. 37:9-11, 27-29; Rie. 2:21, 22; Nyu. 7:16, 17.

⁷ Kadok nwang’u jung’ii icidh ikwo i polo kunoke idong’ iwi ng’om keni, nyo in de ibeneniri i lembe maeni ma jukoro i Lembanyutha thek 7? Eyo ibeneniri. Eno bibedo nindo mir anyong’a mi tuko ngo ni ungu ario ceke m’ubetimo ni Mungu. Anyong’a binegowa lee nisagu pilembe wadiko cingwa i kum bimobim pa Yehova. Lembang’o mange ma buku mi Lembanyutha uweco pire pi masendi ma diti?​—Mat. 24:21.

LEMBE MA BINWANG’U JU M’UJAI I KUM MUNGU

8. Masendi ma dit bicaku nenedi, man dhanu dupa bitimo ang’o?

⁸ Calu ma waneno i thiwiwec m’i wang’e, ceng’ini eni gavmenti mi ng’om maeni bilokere i kum Babeli ma dit m’utie dini ceke mi vupo. (Nyu. 17:16, 17) Lembe maeno bibedo ni acaki mi masendi ma dit. Nyo lembene biketho dhanu dupa bicaku timo ni Yehova? Ungo. Tung’ ku maeno, Lembanyutha thek 6 unyutho nia saa nino, dhanu ma gibetimo ngo ni Yehova gibisayu gwok i bang’ gavmenti man i ungu mi kuloka mi ng’om maeni ma juporogi ku gudi. Calu ma gidiko ngo cing’gi i kum Ker pa Mungu, Yehova bikwanugi ni ju m’ujai.​—Luka 11:23; Nyu. 6:15-17.

9. Jurutic pa Yehova gibinyuthiri nenedi nia gitie tung’ i nindo mi masendi ma dit, man lembene bimiyo adwogi ma kani?

⁹ Jurutic pa Yehova gibinyuthiri nia gitie tung’ i nindo maeno ma lembe tek i iye i saa mi masendi ma dit. Gin re ma gibibedo ungu mi dhanu m’ubetimo ni Yehova Mungu iwi ng’om, man m’ukwero nidiko cing’gi ku “yedi ma kwiny.” (Nyu. 13:14-17) Cungo migi ma tek binyayu kwinyo i dhanu ma gijai ni Yehova. Eno biketho thek ma bidikiri (Gog) bitugo ali iwi dhanu pa Mungu. Biblia ulwong’o rop maeno ni ali ma Gog mi Magog utugo i dhu dhanu pa Mungu.​—Eze. 38:14-16.

10. Calu ma jukoro i Lembanyutha 19:19-21, Yehova bitimo ang’o pir ali ma jutugo iwi dhanu pare?

¹⁰ Yehova bitimo ang’o pir ali maeno ma jutugo iwi dhanu pare? Eyero iwa kumae: “Kwinyo para bibino malu i odiuma.” (Eze. 38:18, 21-23) Lembanyutha thek 19 ukoro gin ma bitimere i ng’eye. Yehova bioro Wode pi nigwoko dhanu pare man ninyotho judegi migi. Yesu karacelo kud udul mony mi polo man ju m’ebibimo kugi 144 000, gibikiedo lwiny maeno i dhu Gog mi Magog. (Nyu. 17:14; 19:11-15) Lwinyne bithum nenedi? Jubinyotho dhanu ku dilo ceke m’ujai ni Yehova mi magwei!​—Som Lembanyutha 19:19-21.

NYOM PA NYATHI ROMBO I NG’EY LWINY

11. Lembang’o ma pire tek akeca ma jukiewo pire i buku mi Lembanyutha?

¹¹ Kepar kite ma ju m’ugwoko bedoleng’ migi biwinjiri ko saa ma gineno nia giboth kud i lwiny m’unyotho judegi pa Mungu ceke! Iwi ng’om zoo anyong’a re m’ubenego dhanu! Kadok anyong’a bibedo dit i polo i ng’ey ma junyotho Babeli ma dit de, re gin mange nuti ma binyayu anyong’a lee nisagu. (Nyu. 19:1-3) Etie lembe ma pire tek akeca ma jukiewo pire i buku mi Lembanyutha, niwacu “nyom pa Nyathi rombo.”​—Nyu. 19:6-9.

12. Calu ma junyutho i Lembanyutha 21:1, 2, nyom pa Nyathi rombo bikadhu i saa ma kani?

¹² Nyom pa Nyathi rombo bikadhu i saa ma kani? Nyanok i wang’ kiedo lwiny mi Armagedon, binwang’u dhanu 144 000 ceke gidaru idho i polo. Ento eno bibedo ngo saa mi nyom pa Nyathi rombo. (Som Lembanyutha 21:1, 2.) Nyom pa Nyathi rombo bikadhu i ng’ey lwiny mi Armagedon, saa ma nwang’u junyotho iye judegi pa Mungu ceke.​—Zab. 45:3, 4, 13-17.

13. Lembang’o ma bitimere i saa mi nyom pa Nyathi rombo?

¹³ Lembang’o ma bitimere i saa mi nyom pa Nyathi rombo? Tap calu ma lembe mi nyom diko kind ng’atu ma co ku ng’atu ma dhaku, kumeno bende nyom mi lapor pa Nyathi rombo bidiko Rwoth Yesu Kristu karacelo ku dhanu 144 000 ma gitie “mugole” pare. Lembe maeno ma pire tek, bimiyo kaka ni bimobim ma nyen ma bibimo wi ng’om zoo pi oro 1 000.​—Nyu. 20:6.

ADHURA MA LENG’ MA BIMIYO BERO IRI I NINDO M’UBINO

14-15. Lembanyutha thek 21 uporo dhanu 144 000 kud ang’o? (Nen cal m’i ng’eye.)

¹⁴ I ng’eye, Lembanyutha thek 21 uporo dhanu 144 000 kud adhura moko ma leng’ lee. Julwong’e nia “Yeruzalem ma nyen.” (Nyu. 21:2, 9) Adhura eno jugiere iwi kathere m’utie ku kidi 12 ma jukiewo nying’ “apar ario mi jukwenda apar ario pa Nyathi rombo i wigi.” Pirang’o lembuno utelo nen pa Yohana? Pilembe eneno jukiewo nyinge bende iwi kidine acel. Eno rwom ma dit mi tuko ngo!​—Nyu. 21:10-14; Efe. 2:20.

¹⁵ Adhura eno mi lapor ukoc kud adhura mange ceke. Ndakine juyiko ku mola ma kwar ma leng’, dhugolane 12 juyiko ku kidi ma i upal, gang’ man kathere juruko ku kidi ma pigi tek, man jupimogi ku jampim ma tap. (Nyu. 21:15-21) Re asu ubenen nia piny moko fodi udong’! Yohana uwacu kumae: “Aneno ngo hekalu i iye pilembe Yehova Mungu ma Jategokpo re m’utie hekalune man bende Nyathi rombo. Adhurane umbe ku yeny pa ceng’ kadi dwi pi nirieny i wiye, pilembe dwong’ pa Mungu ucare man thala pare utie Nyathi rombo.” (Nyu. 21:22, 23) Ju ma gin’i Yeruzalem ma nyen, gibibedo karacelo ku Yehova. (Ebr. 7:27; Nyu. 22:3, 4) Pieno, Yehova giku Yesu re ma gitie hekalu i adhurane.

16. Lembang’o ma bitimere ni dhanu i the bimobim mi oro elufu acel mi Ker pa Mungu?

¹⁶ Etie lembe mir anyong’a ma dit ni ju ma juwiro niparu pir adhura maeno. Ento ju ma gitie ku genogen mi kwo iwi ng’om de lembene ukwayu utel nen migi. I the bimobim mi oro elufu acel mi Ker pa Mungu, Yeruzalem ma nyen bimiyo mugisa ma kwanere ngo. Yohana uneno mugisane ubemol ve “kulo mi pii mi kwo.” Man “yen mi kwo” utie i ng’et kulone kun ku kun ma giwodho ithgi “pi keyo kum thek.” (Nyu. 22:1, 2) Dhanu ceke m’ubekwo saa maeno, bibedo ku kaka mi nwang’u bero i kum yub maeno. Nok nok, dhanu ceke ma wor bidoko ku kum ma leng’ m’umbe dubo. Saa maeno remo kadok can kadi wak de bibedo nuti kendo ngo.​—Nyu. 21:3-5.

17. Calu ma Lembanyutha 20:11-13 uyero, jukani ma gibinwang’u bero i the bimobim mi oro elufu aceli?

¹⁷ Jukani ma binwang’u bero i kum yub maeno ma wang’u ijo? Mi kwong’o zoo, bibedo udul dhanu ma dit ma biboth kud i lwiny mi Armagedon, kud awiya ceke ma saa moko jubinyolo i ng’om ma nyen. Re Lembanyutha thek 20 ung’olo bende nia ju m’utho de gibicer. (Som Lembanyutha 20:11-13.) “Weg bedopwe” ma githo con, ku “weg bedopwe ngo” m’ugam unwang’u ngo kaka mi ponjo lembe iwi Yehova, ceke gibicer pi nikwo kendo iwi ng’om. (Tic. 24:15; Yoh. 5:28, 29) Nyo eno ubenyutho nia dhanu ceke bicer pi nikwo iwi ng’om i the bimobim mi oro elufu aceli? Ungo. Ju ma gikwero ku rac nitimo ni Yehova kinde ma fodi gibino kwo iwi ng’om, gibicer ungo pilembe kaka ugam unen igi mi ponjo lembe i wiye, re ginyutho nia giromo ngo nikwo i paradizo iwi ng’om.​—Mat. 25:46; 2 Thes. 1:9; Nyu. 17:8; 20:15.

AMULAIC MA TOKCEN

18. Lembang’o ma bitimere iwi ng’om i thum mi oro 1 000?

¹⁸ I thum mi oro 1 000, dhanu ceke ma gibekwo iwi ng’om gibidoko ku kum ma leng’ m’umbe dubo. Dubo ma walagu i bang’ Adamu, bibedo mbe ku tego iwi ng’atu moko acel de. (Rum. 5:12) Jubikabu peko ceke ma dubo p’Adamu unyayu. Eno ubenyutho nia ju ma gibikwo iwi ng’om ‘gibicer’, niwacu gibidoko ku kum ma leng’ i thum mi oro 1 000.​—Nyu. 20:5.

19. Pirang’o ubekwayere nia amulaic ma tokcen ubed unuti?

¹⁹ Wang’eyo nia Yesu ugam ugwoko bedoleng’ pare ni Mungu kadok kinde ma Sitani ukethe i amulaic ma tek de. Nyo dhanu ceke m’udaru doko ku kum ma leng’ bitimo lembe ma rom kinde ma Sitani bikethogi i amulaici? Ng’atuman bidwoko wang’ penji eno gire i thum mi oro 1 000 kinde ma jubigonyo Sitani kud i longoro ma there mbe. (Nyu. 20:7) Ju ma gibigwoko bedoleng’ migi i amulaic ma tokcen eno, gibinwang’u kwo ma rondo ku rondo man bedagonya mandha. (Rum. 8:21) Ju ma gijai ni Yehova, jubinyothogi mi magwei karacelo ku Sitani man pajogi pare.​—Nyu. 20:8-10.

20. Ibewinjiri nenedi pi lembila ma wang’u ijo ma nwang’ere i buku mi Lembanyutha?

²⁰ Ibewinjiri nenedi pi buku mi Lembanyutha ma wang’iyo iye i adundo? Nyo etie ngo lembe ma ber nineno nia in de in’i lembila maeni ma wang’u ijo? Nyo ebecweli ngo nilwong’o jumange de nidikiri kudwa i thier ma leng’ ma wabetimo ni Mungu mwa? (Nyu. 22:17) Lembe ma beco ma waweco i wiye ma bitimere i nindo m’ubino, ubecwaluwa niyero kud anyong’a calu ma jakwenda Yohana uyero kumae: “Amen! Bin, Rwoth Yesu.”​—Nyu. 22:20.