Nyo Lembe pa Mungu tie ku tego i kwo peri ma kubang’ ceng’?

Somo Biblia kubang’ ceng’ copo nikonyowa kara waketh ‘ulagwa nyang’’ man ‘wacung nging’ nging’ i yioyic.’ (Kol. 2:6, 7) Re, Kara Lembe pa Mungu ubed ku tego i kwo mwa, wacikara ninyamu cuu i Lembene man nitio ku cik mir ukungu ma nwang’ere i ie. (Ebr. 4:12; Yak. 1:22-25) Yocuwa 1:8 unyutho lembe adek ma wacopo timo kara wanwang’ matoke ma ber i som mwa: (1) Somo Lembe pa Mungu “dieceng’ ku diewor.” (2) Nisome ku ‘dwal ma piny,’ eno ubenyutho nia ukwayu nisome i ayi ma copo ketho iwoth ka nyamu ie, man isome ve in de itie kaka ma lembene utimere i ie. (3) Tim kero nitimo cuu “calku gin m’ugore i ie.” Tek waii nitio ku juk ma junyutho eno, ‘yo [mwa] bibedo miero’ man ‘wabitimo ku rieko’ i kwo mwa ma kubang’ ceng’.