Wacopo tio nenedi ku dwal ma judaru nimaku pir awinja?
1. M’umedo jemni ma tung’ tung’ m’akiewa, watie bende ku jamtic mange ma kani ma mio iwa bero?
1 Dhanu dupa gibed gimaru nitio ku jw.org, pi nisomo lemandha ma tap man ma nyayu mutoro. (Ekl. 12:10) Re, nyo idaru nitio ku dwal ma judaru nimaku pir awinja? Dwal maeno ketho juwinjo lembe dupa ma nwang’ere i kusika mwa mir Internet. Wacopo nwang’u bero nenedi ikum dwal ma judaru nimaku pir awinja?
2. Wacopo tio nenedi ku dwal ma jumaku pir awinja, pi ponji mwa ma kendwa kunoke mi juruot?
2 Pi ponji mwa ma kendwa kunoke mi juruot: Niwinjo som mi Biblia ma judaru nimaku, gazeti, kunoke jemni moko mange kinde ma wabewotho kunoke watie i tic ma tung’ tung’ ma kubang’ ceng’, copo konyowa nitio ma ber ku saa mwa. (Ef. 5:15, 16) Wacopo yiko i thier mwa mi juruot ku kit lembe ma tung’ tung’, nwang’u wabewinjo dwal ma judaru nimaku, kinde ma wabelubo somne niai kud i jemni mwa i cingwa. Tio ku dwal ma judaru nimaku pir awinja saa mi ponji ma kendjo copo nikonyo lee, asagane ka wabemito niyiko kite ma wasomo ko piny, kunoke ka wabeponjo dhok moko.
3. I kaka ma wabekwo i ie, kwond dhanu ma kani ma copo nwang’u bero nikum dwal ma jumaku pir awinja?
3 Pi tic mi rweyo lembanyong’a: Dhanu ma nwang’iri kaka ma wabekwo i ie, ma gimbe ku saa mi somo piny gicopo maru niwinjo dwal ma jumaku pir awinja. Kunoke wacopo nwang’u dhanu ma weco dhok ma tung’ ku dhok mwa, man ma copo niyiyo yot yot lembanyong’a mi Ker, ka giwinje ku “dhu thugi ma dhe.” (Tic 2:6-8) I suru moko, pire tek akeca niwinjo lembe ma jubekoro akora. Ku lapor, i suru mi Hmong, judongo gibed gikoro kpawa ni aradu m’ubedongo, man aradune gigwoko lembe maeno ma giwinjo ma ber akeca. Suru ma pol mir Afrika gibed gimaru niponjo lembe nikadhu kud i kpawa ma jubekoro igi.
4. Wacopo penjara ku penji ma tung’ tung’ ma kani ka wamito nikonyo dhanu m’i kaka ma wabekwo i ie?
4 I kaka m’ibekwo i ie, nyo niketho jawinj peri uwinj dwal ma jumaku pir awinja i dhok pare copo nimio matoke ma ber? Nyo ng’atu moko copo nwang’u kony nikum jemni m’awinja, ka waore ire nikadhu kud i Internet? Nyo wacopo nitoko jemni moko m’awinja iwi CD, man niwodho jemni ma rom iwi karatasi, man ing’eye nimiogi ni jawinj ma lembanyong’a utelo nen pare? Jemni ceke ma zoo (buku, nyithibuku, gazeti, kunoke trakt) mir elekronik ma wamio ni ng’atu moko i tic mi rweyo lembanyong’a, wacopo nikwane ikind jemni mange ma wamio ni dhanu. Jumaku dwal ma pir awinja kara watii kugi i ponji mwa ma kendwa man kara wacoi kugi kodhi mi lemandha mi Ker.—1 Kor. 3:6.