Gamiri utie gin ma diko kind nico ku dhaku pi kwo migi zoo

Ka mutoro tie i gamiri mi Jukristu, eno miyo yung ni Yehova man enyayu anyong’a i min ot ku won ot bende. (Mk 10:9) Kara gamiri ubed ku mutoro man egal, Jakristu ucikere nimoko kii i kum cik mir ukungu mi Biblia kinde m’ebeng’iyo jadhoge mi gamiri.

Kud ilar isay jadhogi mi gamiri ma fodi ‘ikadhu ngo nindo mir ayada,’ kum i nindo maeno re m’ava mi timo ribiri lake bedo tek lee man eno copo ketho imaku ngo yub mi rieko. (1Ko 7:36) Tii ma ber ku nindo peri mi musuma pi nidwoko winjiri peri ku Mungu udok tek man mediri nicego kite ma tung’ tung’ mi Jukristu. Tek itimo kumeno, ibibedo ayika nitimo lembe dupa ma biketho gamiri peri bibedo ku mutoro.

I wang’ niyiyo nia wugemuru ku ng’atu moko, ting’ saa m’ing’ey ko ‘ng’atu m’upondo mir adundene.’ (1Pe 3:4) Ka jiji ucaku bemondo i ii i kum lembe moko ma pigi tek, wuwec iwi lembene ku ng’atu ma wubigemuru kude. Calu ma wabed watimo i mer mwa ku dhanu mange, i gamiri bende wacikara niketho wiwa zoo i kum gin ma wacopo timo ni jadhogwa mi gamiri kakare niketho wiwa i kum gin ma jadhogwa mi gamiri re m’utim iwa. (Flp 2:3, 4) Kan itiyo ku cik mir ukungu mi Biblia i wang’ gamiri peri, ebibedo yot iri nitimo kumeno kadok i ng’ey gamiri peri de man ebiketho gamirine bibedo ku mutoro.

NEN VIDEO MA THIWIYE TIE KITE M’ICOPO YIKIRI KO PI GAMIRI​—THENGE MIR 3: “TIM KWAN,” MAN I NG’EYE DWOK WANG’ PENJI M’ULUBO E:

• Mer m’i kind nyamego maeno giku Shane umedere nenedi?

• Kinde ma mer m’i kindgi ubemedere i wang’e, nyamego maeno unyang’ i kum lembang’o?

• Junyodo pa nyamego maeno ukonye nenedi, man nyamegone ke umaku yub ma kani mi rieko?