Aradu, kud wuwek nitimo mediri i ng’ey batizo mwu

1. Aradu dupa gidaru timo lembang’o ma beco?

KUBANG’ oro, aradu elufu swa ubewotho limo batizo. Nyo in de idaru maku yub maeno? Ka eyo, anyong’a ubenego umego ku nyimego peri mi tipo man Yehova bende! (Rie. 27:11) Kepar pi lembe ma beco m’idaru timo nitundo kawoni. Iponjo Biblia aketha cwinyi, saa moko nyo pi oro ma dupa. Ponjine uketho iyiyo andha nia Biblia tie Lembe pa Mungu. M’usagu maeno, ing’eyo man imaru Won Bibliane. Mer m’imaru ko Yehova umedere uketho ithiero kwo peri ire man ilimo batizo. Itimo ng’iyong’ic ma ber mire maa!

2. Wabiweco iwi lembang’o i thiwiwec maeni?

² M’umbe jiji, kinde m’ibetimo mediri pi nitundo i batizo, inweng’iri kud amulaic dupa. Re calu ibedongo, ng’ey nia ibinweng’iri kud amulaic mange. Sitani bitimo kero kara ejwig mer m’imaru ko Yehova man iwek nitimo ire. (Efe. 4:14) Kud iwek lembuno unweng’i ki. Ang’o ma bikonyi kara igwok bedoleng’ peri ni Yehova man kara ipong’ lembang’ola peri m’ithieriri ko ire? Icikiri nitimo mediri, niwacu ‘nitimo kero peri ceke’ nidoko Jakristu m’uteng’ini. (Ebr. 6:1) Iromo timo lembuno nenedi? Wabiweco iwi lembene i thiwiwec maeni.

IROMO TIMO ANG’O KARA IDOK JAKRISTU M’UTENG’INI?

3. I ng’ey batizo, wa Jukristu ceke wacikara nitimo ang’o?

³ I ng’ey batizo, wan ceke wacikara nitiyo ku juk ma jakwenda Paulo umiyo ni Jukristu mir Efeso. Ekwayugi nia gidok Jukristu “m’uteng’ini.” (Efe. 4:13) I yo mange, emito yero igi nia ‘kud giwek nitimo mediri.’ Paulo uporo teng’ini mwa mi tipo ku dongo pa nyathin. Ka jurunyodo ginyolo nyathin, anyong’a negogi man gimare. Re nyathin ne bedo ngo mukere nja. Ento kubang’ nindo m’ubekadhu, eweko “kit timo pa nyathin cen.” (1 Kor. 13:11) Wa Jukristu bende kumeno. I ng’ey limo batizo, wacikara nitimo mediri. Dong’ wakenen lembe moko ma romo konyowa nitimo medirine.

4. Kite ma kani ma copo konyowa nitimo mediri i thenge mi tipo? Kekor. (Jufilipi 1:9)

⁴ Med mer m’imaru ko Yehova. Andha imaru Yehova lee, re mito mer peri m’imare kone umedere ameda. Nenedi? Jakwenda Paulo unyutho yone acel i Jufilipi 1:9. (Som.) Paulo urwo nia mer mi Jukristu mi Filipi “usagere asaga.” Pieno, wacopo medo mer mwa ma wamaru ko Yehova. Wacopo mede nwang’u wabeponjo nibedo ku “ng’eyong’ec ma tap man ng’iyo i lembe cuu.” Tek wabemedara ning’eyo Yehova, wabimare man wabibedo ku foyofoc pi kite pare man pi tic pare. Ava mwa mi nyayu anyong’a i iye bimedere man wabimito ngo wanyay can i iye nyanok de. Watimo kero mwa ceke pi ning’eyo yeny pare man kite ma waromo timo ko yenyne.

5-6. Wacopo medo mer ma wamaru ko Yehova nenedi? Kekor.

⁵ Wacopo medo mer ma wamaru ko Yehova, nwang’u wabeponjo ning’eyo Wode cuu mandha, kum ekwanyu kite pa Won tap tap. (Ebr. 1:3) Yo ma ber akeca ma wacopo ng’eyo ko Yesu utie niponjo buku ang’wen mir Injili. Tek fodi imbe ku ng’iyo mi somo Biblia kubang’ ceng’, nyo ecibedo ber ungo nia icake ndhundhu eni? Tek ibesomo lembe iwi Yesu, keth wii asagane iwi kite pare. Dhanu ugamu umaru nibedo kude, niweco kude, man ebed eting’o kadok awiya ma thindho de i kore. (Mark. 10:13-16) Ebed eketho julub pare giwinjiri ma ber; man gibedo mbe ku lworo mi koro kite ma giwinjiri ko ire. (Mat. 16:22) I lembe maeno Yesu ukwanyu lapor pa Won m’i polo. Yehova utie ng’atu ma juwinjiri ma ber i ng’ete. Wacopo rwo i bang’e. Kinde ma waberwo, wacopo yero lembe mir adundewa ceke ire. Cwinywa tek nia ebikwedowa ngo kum emaruwa man ebedieng’ piwa.​—1 Pet. 5:7.

⁶ Kisa ubed unego Yesu i kum dhanu. Jakwenda Matayo ukiewo pire kumae: “Kinde m’eneno udul dhanu, kisa nege i kumgi, kum jusendogi man juwenjogi calu rombe ma jakwac migi mbe.” (Mat. 9:36) Kadong’ Yehova ke winjere nenedi? Yesu uyero kumae: “Etie ngo mito pa Vwa m’i polo nia kadok acel m’i kind ju ma thindho maeni urwiny.” (Mat. 18:14) Eno lembe ma ber mi tuko! Ka wabemedara ning’eyo Yesu, mer ma wamaru ko Yehova de medere ameda.

7. Bedo karacelo ku Jukristu ma giteng’ini i tipo copo konyi nenedi?

⁷ Icopo ponjo bende ninyutho mer lee ni Yehova, man nidoko Jakristu m’uteng’ini nwang’u ibekoyo saa mi bedo kud umego ku nyimego mi cokiri peri ma giteng’ini i tipo. Nen anyong’a ma gitie ko. Gimbe kud ang’eyang’o i kwo migi pi yub ma gimaku mi timo ni Yehova. Penj gikor iri lembe moko ma ging’eyo i tic pa Yehova. Kan itie ku yub moko ma pire tek m’icimaku, penj juk i bang’gi. Poy nia “lembe bedo ber ni kum udul juporlembe.”​—Rie. 11:14.

8. Icopo timo ang’o tek itie ku jiji pi gin ma Biblia ubeponjo?

⁸ Wodh jiji kud i ii. Calu ma waneno i udukuwec mir 2, Sitani bitimo kero niceri kara kud itim mediri i thenge mi tipo. Yo acel m’eromo ceri ko utie niroyo jiji i ii pi lembe moko ma Biblia ubeponjo. Ku lapor, jumoko biketho iyi ponji ma cido nying’ Mungu ma nia piny ulokere aloka. Saa m’ibino nyanok, copere nia iparu ngo pi lembe maeno, ento kawoni ma dong’ idongo, nyo jubeponji ku lembene i somo. Saa moko nyo inwang’u nia lembe ma jubeponji ko i somone utie lemandha. Re copere nia ju ma gibeponjine ging’iyo ngo cuu i lembe m’unyutho nia Jacwic unuti andha. Poy i kum cik mir ukungu ma nwang’ere i Lembrieko 18:17 m’uwacu: “Ng’atu ma lar cungo kum lembe pare enen pwe; ento jadhugola pare bino man ekoro i lembe pare.” Pieno, kakare niyiyo i abinga lembe ma jubeponjo i somo, ponj cuu lemandha ma nwang’ere i Biblia Lembe pa Mungu. Tim sayusac i girasoma mwa. Wec kud umego ku nyimego ma con gikegiyiyo nia piny ulokere aloka.b Penj gikor gin m’uketho giyiyo nia andha Jacwic unuti man nia emaruwa. Kit wec ma kumeno copo konyi ning’iyo gin m’unyutho nia Jacwic unuti.

9. Lembe ma nyamego Melissa utimo ubemiyo iri ponji ma kani?

⁹ Nyamego Melissa unwang’u kony lee pi sayusac m’etimo iwi cwic.c Ewacu kumae: “I somo jubed juponjo nia piny ulokere aloka i ayi ma copo nen nia ve elokere aloka de andha. I wang’e, abed amito ngo atim sayusac, kum abed alworo nia moko nyo abinwang’u lembe m’unyutho nia andha piny ulokere aloka. Ento apoy nia Yehova ubemito ngo atim ire i abinga. E amondo i timo sayusac. Asomo buku Y a-t-il un Créateur qui se soucie de vous ? ku nyathibuku La vie a-t-elle été créée ? man bende Cinq questions à se poser sur l’origine de la vie. Gibino tap jamtic m’abedo ku yenyne. Anwang’u nia nang’ cing’ alar atim sayusacne i wang’e.”

10-11. Ang’o ma bikonyi kara iceriri ni abidhe? (1 Juthesaloniki 4:3, 4)

¹⁰ Kwer timo ma rac. Saa m’itie aradu, ava mi timo ribiri copo bedo lee, man jumange romo bidhi kara ipodh i lemsasa mi tarwang’. Sitani ubemito itim tap lembuno. Ang’o ma bikonyi kara iceriri ni abidhe? (Som 1 Juthesaloniki 4:3, 4.) Kor ni Yehova kite m’ibewinjiri ko i rwo peri ma segi, man kwaye ekonyi kara icung ma tek. (Mat. 6:13) Poy nia Yehova ubemito ekonyi, ento ungo nimiyo iri matira. (Zab. 103:13, 14) Icopo nwang’u bende kony i Biblia Lembe pare. Melissa ma waweco pire unyego ku peko mi paru mi tarwang’. Eyero kumae: “Somo Biblia kubang’ ceng’ ukonya ninyego i dhug ava ma rac m’abino ko. Ebed epoya nia a pa Yehova man nia abemito atim ire.”​—Zab. 119:9.

¹¹ Kud igoy kori nidaru lembe peri kendi. Wec pi lembe m’ubesendi ni junyodo peri. Etie yot ungo nikoro lembe peri ma segi ni ng’atu mange, re pire tie tek nia ikore. Melissa uyero kumae: “Arwo kara anwang’ tegocwiny man i ng’eye waweco iwi lembene ku baba. I ng’eye awinjara ma ber nisagu. Ang’eyo nia anyong’a unego Yehova pira.”

12. Icopo timo ng’iyong’ic ma cuu nenedi?

¹² Wek cik mir ukungu mi Biblia utel wii. Kinde m’ibedongo, nok nok ibinwang’u bedagonya mi timo ng’iyong’ic peri giri. Ento lembe fodi utie dupa m’ing’eyo ngo i kwo peri. Icopo uro kier ma romo nyotho winjiri peri ku Yehova nenedi? (Rie. 22:3) Nyamego moko ma nyinge Kari ukoro lembe m’ukonye nitimo ng’iyong’ic ma cuu. Enyang’ nia kan itie Jakristu m’uteng’ini, imbe ku yeny ma nia cik uwec iwi lembe ceke mi kwo peri. Eyero kumae: “Abino ku yeny mi nyang’ i kite ma Yehova neno ko lembe kakare nilubo kende kende cik.” Kan ibesomo Biblia, kepenjiri kumae: ‘Lembuni ubeponja ku lembang’o iwi kite ma Yehova paru ko lembe? Nyo cik mir ukungu moko tie i iye ma romo telo wi timo para? Ka eyo, acopo nwang’u bero ma kani kan atiyo kugi?’ (Zab. 19:7; Isa. 48:17, 18) Ebibedo yot iri nitimo ng’iyong’ic ma nyayu anyong’a i Yehova, tek ibesomo Biblia man ibenyamu i lembe iwi cik mir ukungu ma nwang’ere i iye. Kinde m’ibemediri niteng’ini i tipo, ibinwang’u nia kara imbe ku yeny ma nia cik uwec iwi lembe ceke, pilembe nwang’u inyang’ i paru pa Yehova iwi lembenegi.

13. Jurimo ma beco copo konyi nenedi? (Lembrieko 13:20)

¹³ Ng’ii jurimo m’umaru Yehova. Calu ma waneno i udukuwec mir 7, jurimo m’ing’iyo copo konyi nidoko Jakristu m’uteng’ini. (Som Lembrieko 13:20.) Nyamego moko ma nyinge Sara ugam ubayu anyong’a pare. Re gin moko bedo nuti m’udok ukonye ninwang’u anyong’a kendo lee. Ekoro kumae: “Anwang’u jurimo ma beco, tap i saa m’ubekwayere. Kubang’ yenga, wabed warombo ku nyamego moko m’aradu pi niyiko Otkur ma Wiw mi ponji. Jarimona mange ke ukonya nicaku dwoko wang’ penji i coko. Nikum kony migi, ponji para ma segi man rwo udoko ira ni lembe ma pire tek. Winjiri para ku Yehova de ucaku medere nidoko tek, e anyong’a para ucaku dwogo kendo kakare.”

14. Julien unwang’u jurimo ma beco nenedi?

¹⁴ Icopo timo ang’o kara inwang’ jurimo ma bibedo ku matoke ma ber i kwo peri? Julien ma kawoni utie jadit cokiri uyero kumae: “Kinde m’abino aradu, jurimo ma beco m’anwang’u, ubino i saa mi rweyo lembanyong’a. Gibino weg amora, man gikonya nineno anyong’a ma jucopo nwang’u i tic mi lembanyong’a. Acaku bedo ku lembakeca mi tic mi saa ceke. Anwang’u nia karaman gin m’uketho abino ngo ku jurimo dupa ma beco, utie pilembe abed asayu kwa jurimba ubed dhanu mir adiyo para. I ng’eye, adok anwang’u bende jurimo ma beco i Bethel. Lapor migi ukonya ning’iyo galuwang’ ma ber man lembene uketho kindwa udoko ceng’ini ku Yehova.”

15. Paul umiyo cimowang’ ma kani ni Timoteo pi jurimo ma reco? (2 Timoteo 2:20-22)

¹⁵ Dong’ kan inwang’u nia i cokiri jumoko nuti ma gitie ngo iri jurimo ma beco ke? Paulo ugam ung’eyo nia dhanu moko m’i cokiri mi rundi ma kwong’a ubino ngo ku paru man timo m’ukwayu Jakristu ubed ko, uketho ewacu nia Timoteo ubed ku wang’e i kumgi. (Som 2 Timoteo 2:20-22.) Winjiri mwa ku Yehova pire tie tek lee. Wacikara ngo niweko ng’atu moko unyoth winjiri mwa ki ku Wegwa m’i polo, kum watimo tego pi ninwang’e.​—Zab. 26:4.

KETH LEMBAKECA MA COPO KONYI NITIMO MEDIRI I THENGE MI TIPO

16. Kit lembakeca ma nenedi m’ukwayu iketh iri?

¹⁶ Keth lembakeca ma bikonyi. Keth lembakeca ma biteng’o yiyoyic peri man ma biketho ibidoko Jakristu m’uteng’ini. (Efe. 3:16) Ku lapor, icopo maku yub mi ponjo Biblia man mi some thiri thiri. (Zab. 1:2, 3) Kunoke icopo maku yub mi berwo thiri thiri ke niai kud i adundeni. Kunoke nyo icopo nwang’u nia itie ku yeny mi bedo ku weng’i i kum ng’iyong’ic mi galuwang’, man mi tiyo ma ber ku saa peri. (Efe. 5:15, 16) Anyong’a binego Yehova kan eneno nia ibeii nitimo mediri i thenge mi tipo.

17. Bero ma kani m’icopo nwang’u kan ibekonyo dhanu mange?

¹⁷ Kan ibekonyo dhanu mange ibidoko Jakristu m’uteng’ini. Yesu uwacu kumae: “Nimiyo nyayu anyong’a lee ma sagu nigamu agama.” (Tic. 20:35) Ibinwang’u bero lee tek ibetiyo ku kum saa peri man tego peri mir aradu pi nikonyo dhanu mange. Ku lapor, icopo ketho lembakeca mi konyo ju m’utii man ju ma goru m’i cokiri peri. Kunoke nyo icopo yiyo igi or man nikonyogi kara ging’ey nitiyo ku jamtic migi mir elektronik. Kan itie umego, keth lembakeca mi doko jakony tic pi nikonyo umego ku nyimego peri. (Filip. 2:4) Ibenyutho bende mer ni dhanu ma woko nikadhu kud i lembanyong’a mi Ker m’iberweyo igi. (Mat. 9:36, 37) Tek ecopere iri, keth lembakeca mi timo ayi tic moko mi saa ceke.

18. Timo tic mi saa ceke ukonyi nenedi nitimo mediri i thenge mi tipo?

¹⁸ Tic mi saa ceke copo miyo iri kaka dupa mi timo mediri i thenge mi tipo. Timo tic pa jayab yo copo yabu iri yo mi cisomo Somo mi jurwey Injili mi Ker. Icopo nwang’u kaka mi citimo i Bethel kunoke i giedo mi udi ma tung’ tung’ mi theokrasi. Nyamego moko ma jayab yo m’aradu ma nyinge Kaitlyn uwacu kumae: “Nirweyo karacelo kud umego ku nyimego ma gi jubodho i tic mi lembanyong’a, ukonya nitimo mediri i thenge mi tipo i ng’ey batizo para. Lapor migi ucwala nimedo ng’eyong’ec para i Biblia man bodho para mi ponjo dhanu i lembanyong’a.”

19. Ibinwang’u mugisa ma kani tek ibetimo mediri i thenge mi tipo?

¹⁹ Ibinwang’u mugisa dupa tek ibetimo mediri i thenge mi tipo. Ibinyotho ngo nindo mir aradu peri ku lubo tok lembakeca ma iye nanu. (1 Yoh. 2:17) Ibibedo agwoka i kum litho ma juwang’u i cwinyjo ka jutimo ng’iyong’ic ma rac. Lembe bibedo iri miero man ibibedo jamutoro. (Rie. 16:3) Bende, lapor peri ma ber bimiyo amora i kum jumange m’aradu ku ju m’utii ceke. (1 Tim. 4:12) M’usagu zoo, ibibedo ku kwiyocwiny man anyong’a ma junwang’u ka jubetimo lembe ma foyo i Yehova man mi bedo ku winjiri ma ceng’ini kude.​—Rie. 23:15, 16.