‘Mediri niwotho i lemandha’

1. Ka wabeweco iwi ayi ma wang’eyo ko “lemandha,” lembene miyo iwa bero ma kani?

“ING’EYO lemandha nenedi?” M’umbe jiji idaru dwoko wang’ penji eno wang’ dupa. Etie acel m’i kind penji ma wapenjara ko i kindwa ku juyic wadwa ka wamito wang’eyara i kindwa. Anyong’a negowa ka wabewinjo umego ku nyimego gibekoro kite ma ging’eyo man gimaru ko Yehova, man ka wan de wabekoro igi gin m’uketho wadoko Jumulembe pa Yehova. (Rum. 1:11) Wec maeno poyo wiwa nia lemandha pire tie tek lee. Ekonyowa bende nibedo ku lembakeca ma wamedara ko “niwotho i lemandha,” niwacu, nikwo i ayi ma ketho wanwang’u mugisa pa Yehova man ma nyayu anyong’a i iye.​—3 Yoh. 4.

2. Wabiweco iwi lembang’o i thiwiwec maeni?

² I thiwiwec maeni, wabineno thelembe moko m’uketho wamaru lemandha. I ng’eye wabineno kite ma wacopo medara ko ninyutho nia wamaru giramiya maeno ma pire tek. M’umbe jiji lembe maeno bimedo foyofoc mwa pi gin ma Yehova utimo, m’etelo kowa i lemandha. (Yoh. 6:44) Ebikonyowa bende nibedo kud ava mi ponjo lemandha m’i Biblia ni jumange.

THELEMBE M’UKETHO WAMARU “LEMANDHA”

3. Thelembe ma kani ma pire tek akeca m’uketho wamaru lemandha?

³ Wamaru lemandha pi thelembe dupa. Thelembe ma pire tek akeca utie pilembe wamaru Yehova Mungu ma tie acaki mi lemandha. Nikadhu kud i Biblia Lembe pare, wang’eye nia etie ngo kende kende Jatego kpo m’ucwiyo polo ku ng’om, ento bende nia etie Wegwa m’i polo ma jamer m’ubedieng’ lee piwa. (1 Pet. 5:7) Wang’eyo nia Mungu mwa utie “won kisa ku bero, ng’atu ma bedo yo ni ng’ecwiny, man dit ku mer mi bero ku lemandha.” (Ai 34:6) Yehova umaru bedopwe. (Isa. 61:8) Ewinjere rac kan ebeneno wabesendara, uketho etie ayika man etie kud ava mi daru masendi ceke i nindo m’ekeco. (Yer. 29:11) Wabekuro nindo maeno kud ava! Eno tie thelembe acel m’uketho wamaru Yehova lee nisagu!

4-5. Pirang’o jakwenda Paulo uporo genogen mwa ku nanga?

⁴ Thelembe mange m’uketho wamaru lemandha utie ma kani? Lemandha ubemiyo iwa bero dupa. Wakewec iwi laporne moko. Lemandha m’i Biblia uketho i iye genogen mwa pi nindo m’ubino. Pi ninyutho bero mi genogen maeno, jakwenda Paulo ukiewo kumae: “Genogen maeni utie iwa calu nanga pi ng’eyong’ec mwa, ma e mandha man ma tek.” (Ebr. 6:19) Tap calu nanga ketho yey cungo kakare iwi pii i saa pa yamu, genogen mwa m’ujengere iwi Biblia de ketho wacungo ma tek i saa mi peko.

⁵ I giragora eno, Paulo ubino weco pi genogen mi cikwo i polo ma Jukristu ma juwiro ku tipo gitie ko. Ento lembene umulo bende kum Jukristu ma gibekuro kud ava nikwo rondo ku rondo iwi ng’om i paradizo. (Yoh. 3:16) Ma jiji mbe, ponjo lembe iwi genogen mi kwo ma rondo ku rondo uketho kwo mwa utie ku thelembe.

6-7. Ponjo lemandha pi nindo m’ubino ukonyo Yvonne nenedi?

⁶ Wakewec iwi lapor pa nyamego moko ma nyinge Yvonne. Edongo ngo i lemandha, man ebino ku lworo mi tho kinde ma e nyathin. Ebepoy i kum wec ma e m’esomo ma wiye copo wil pire ngo: “Nindo moko nuti m’urwo bibedo mbe.” Ewacu kumae: “Wec maeno ubed uketho anindo ngo, nwang’u abeparu kwa pi nindo m’ubino. Abed aparu nia ‘kwo mwa e copo bedo eni kende ngo.’ Bende, ‘pirang’o an’iwi ng’omi?’ Abino mito ngo nia atho!”

⁷ I ng’eye kinde ma Yvonne udoko aradu, erombo ku Jumulembe pa Yehova moko. Ekoro kumae: “Acaku yiyo nia kara acopo bedo ku genogen mi kwo rondo ku rondo iwi ng’om i paradizo.” Ponjo lemandha umiyo bero ma kani ni yamego mwa? Emedo kumae: “Dong’ apidacwiny pi nindo m’ubino man lworo pa tho lalu ngo nindo i wang’a ku diewor.” Ubenen kamaleng’ nia Yvonne umaru lemandha mi Biblia man etie kud anyong’a niweco pi genogen mi nindo m’ubino ku jumange.​—1 Tim. 4:16.

8-9. (a) Ng’atu ma Yesu uweco pire i lembabola pare uneno lonyo m’enwang’u ni gin ma pire tek i kadhiri ma rukani? (b) In ke lemandha pire tie tek iri i kadhiri ma rukani?

⁸ Lemandha m’i Biblia uketho i iye bende lembanyong’a mi Ker pa Mungu. Yesu uporo lemandha mi Ker pa Mungu ku lonyo moko m’upondo. I Matayo 13:44, Yesu uyero kumae: “Ker mi polo tie calu lonyo m’ukanere i podho, ma ng’atu moko uwok unwang’u man ekane kendo; ni kum anyong’a m’ubenege, ecidho man elworo piny ceke m’etie ko, eng’iewo ko podhone.” Poy nia ng’atuno ubino sayu ngo lonyo eno. Ento kinde m’erube, etwonere ku piny dupa, elworo piny pare ceke kara ebed ku lonyone. Pirang’o? Kum eng’eyo nia lonyo m’enwang’une pire ubino tek lee nisagu piny moko ci m’etwonere ko.

⁹ Nyo in de ibewinjiri kumeno pi lemandha? M’umbe jiji eyo! Wang’eyo nia gin moko mbe i ng’om maeni ma jucopo poro kud anyong’a ma watie ko mi timo ni Yehova kawoni, man genogen mi kwo ma rondo ku rondo i the bimobim mi Ker pare i nindo m’ubino. Rwom ma watie ko mi bedo ku winjiri ma ceng’ini ku Yehova usagu gin moko ci ma waweko. Mutoro mwa ma dit utie “ninyayu anyong’a i iye i lembe ceke.”​—Kol. 1:10.

10-11. Ang’o m’uketho Michael utimo alokaloka ma lee i kwo pare?

¹⁰ Ju dupa m’i kindwa utimo kero ma lee pi ninwang’u bero i wang’ Yehova. Jumoko uweko tic mi sente ma lee i ng’om maeni. Jumange ke uweko nilubo tok lonyo. Jukurucel ke giloko magwei ayi mi kura kwo migi kinde ma gicaku ng’eyo Yehova. Eno tap gin ma Michael utimo. Edongo ngo i lemandha. Kinde m’ebino aradu, eponjo goyo karate. Ewacu kumae: “Abedo kud anyong’a pi kite m’abino tiyo ko ku kuma. Pi kare moko, abed aparu nia ng’atu ma loya mbe.” Ento kinde ma Michael ucaku ponjo Biblia, enyang’ i kum kite ma Yehova neno ko rop. (Zab. 11:5) Eyero pir umego ku min ot pare ma giponjo kude Biblia kumae: “Giyero ngo ira nyanok de nia acikara niweko goyo karate, ento gimediri kende kende niponja ku lemandha m’i Biblia.”

¹¹ Kinde ma Michael ubino medere niponjo lembe iwi Yehova, mer m’emare ko de umedere ameda. Gin m’umulo adundene akeca ubino kisa ma Yehova nyutho ni jurutic pare. Saa maeno, Michael unwang’u nia mito emak yub mi timo alokaloka i kwo pare. Ewacu kumae: “Ang’eyo nia niweko goyo karate bibedo ira lembe ma tek. Ento kan aweke anyong’a binego Yehova, man ang’eyo nia timo ire tie ber nisagu lembe moko ci.” Michael uneno lemandha m’enwang’u ni gin ma pire tek, uketho ebino ayika nitimo alokaloka ma lee i kwo pare.​—Yak. 1:25.

12-13. Lemandha mi Biblia ukonyo Mayli nenedi?

¹² Pi ninyutho nia lemandha pire tie tek, Biblia upore ku der m’uberieny i mudho. (Zab. 119:105; Efe. 5:8) Mayli ma kwo i ng’om mi Azerbaïdjan ufoyo lee mandha kony m’enwang’u i Lembe pa Mungu. Min ku won zoo gibino i dini m’ukoc. Won ubino jaislam, min ke ubino i dini mi Juyahudi. Mayli uwacu kumae: “Kadok abino mbe ku jiji nia Mungu umbe de, re penji ubino dupa m’ubed usendo wiya. Abed apenjara nia ‘Pirang’o Mungu ucwiyo dhanu, man kulokane ang’o ma nia ng’atini usendere i kwo pare zoo man i ng’eye ke edok ewang’ bende i mac ma kuthumi?’ Calu ma dhanu beyero nia lembe ceke ubetimere nikum yeny pa Mungu, e apenjara nia ‘nyo Mungu re m’uketho wabeneno can man anyong’a nege ka wabesendara?’”

¹³ Mayli ubino medere nisayu dwokowang’ penji pare. Saa maeno ejolo ponji mi Biblia man i ng’eye edoko Jamulembe pa Yehova. Ewacu kumae: “Ponji ma terere m’i Biblia ukonya nidoko jamutoro. Korolembe ma kamaleng’ m’anwang’u i Lembe pa Mungu uketho anwang’u kwiyocwiny mir adunde.” Calu Mayli, wan ceke wabepaku Yehova ‘Ng’atu m’ulwong’owa niai kud i mudho i der pare ma wang’u ijo.’​—1 Pet. 2:9.

14. Wacopo medo mer ma wamaru ko lemandha nenedi? (Nen sanduku “Lapor mange.”)

¹⁴ Eni tie lapor ma nok kud i kind lapor dupa m’ubenyutho nia lemandha pire tie tek. M’umbe jiji ibepoy pi lapor mange de dupa. Nyo ecibedo ber ungo nia i saa mi ponji peri ma segi isay thelembe mange ma wacikara nimaru ko lemandha? Tek wabemedara nimaru lemandha, wabinwang’u bende yo mi nyutho mer mwa pire.

YO MA WANYUTHO KO NIA WAMARU LEMANDHA

15. Yo acel ma wacopo nyutho ko nia wamaru lemandha utie ma kani?

¹⁵ Wacopo nyutho nia wamaru lemandha nwang’u wabesomo Biblia ku girasoma mwa mange m’ujengere i wiye. Kadok wagalu i lemandha rukani de, re lembe utie dupa m’ukwayu waponji. Otkur ma Wiw m’ular uwok ma kwong’a i dhok mir anglais uwacu kumae: “Lemandha utie ve thiwe m’ubenwang’ere i kind lum m’udinyo man m’udhoke, ma dong’ gidiye nikum dinyo migi. Kara inwang’e mito ilur weng’i cuu pi ninene. . . . Kan inwang’e, kokoro mito ing’ediri man ikul kori kan ipone. Kud ijik nipono thiwe mi lemandhane acel kende. . . . Pon gi man cokgi lee.” Timo ponji ma segi tie tic ma tek, re etie ku bero lee.

16. Ayi bodho ma kani mi ponji m’inwang’u tie ber iri? (Lembrieko 2:4-6)

¹⁶ Tie ngo dhanu zoo re m’umaru nisomo man niponjo piny. Ento Yehova ubemito wamedara ‘niyenyo’ kara wanyang’ cuu i lemandha. (Som Lembrieko 2:4-6.) Tek wabeii nitimo kumeno, wanwang’u berone kokoro. Umego Corey uwacu nia kan ebesomo Biblia, eketho wiye i kum verse acel i wang’ nikadhu iwi mange. Ekoro kumae: “Asomo korolembe mi thereman, asomo verse mange ceke m’utie ku winjiri kude, man atimo sayusac. . . . Bodho maeno konya ning’eyo lembe dupa!” Nik’ebed wabetiyo ku bodho maeno kunoke ngo de, wanyutho nia lemandha pire tek iwa nwang’u wabekoyo saa man wabeii niponjo lemandhane.​—Zab. 1:1-3.

17. Nikwo nimakere ku lemandha thelembene tie ang’o? (Yakobo 1:25)

¹⁷ Wang’eyo nia ponjo lemandha kende kende uromo ngo. Kara wanwang’ bero lee, umito wakwo nimakere ku lemandhane, niwacu watii ku gin ma wabeponjo i kwo mwa. Ka watimo kumeno kadong’ lemandha bimiyo iwa anyong’a ma cuu. (Som Yakobo 1:25.) Wacopo ng’eyo nenedi nia wabekwo nimakere ku lemandha? Umego moko uwacu nia mito wang’iyara giwa pi nineno thenge ma wabetimo i iye cuu ku thenge m’umito watim alokaloka i iye. Jakwenda Paulo uyero pi lembuno kumae: “I kadhiri ma wadaru timo iye mediri, dong’ wamedara asu niwotho kumeno i gengi ma rom.”​—Filip. 3:16.

18. Pirang’o wabeii “niwotho i lemandha”?

¹⁸ Kepar pi bero ma wanwang’u ka wabeii “niwotho i lemandha”! Wanwang’u ngo kende kende alokaloka i kwo mwa, ento wanyayu bende anyong’a i Yehova man i juyic wadwa. (Rie. 27:11; 3 Yoh. 4) Eno gitie thelembe ma beco m’ubecwaluwa nimaru lemandha man nikwo nimakere kude.