Anyong’a man ponji m’anwang’u i kum timo ni Yehova

Junyodo para giweko ng’om mi Estonie i saa mi lwiny mir II, gidok i Allemagne kaka ma juwok junyola i iye. I ng’eye gicaku yikiri pi nidok i ng’om mi Canada. Ot mwa ma kwong’a ubino ceng’ini kud adhura ma dit mir Ottawa, i ng’om mi Canada; ebino ot ma nok ma gweno de ubed uvuto i iye. Wabino jucan ma ngolo ngolo, re timba wabed wamadhu cai ku tong’gweno.

Ceng’ acel, Jumulembe pa Yehova giwok gisomo Lembanyutha 21:3, 4 ni mama. Lembene umulo adundene lee dit man ecaku wak. Lemandha maeno ma jupidho udongo, uketho en giku baba ceke gitimo mediri pio pio man gilimo batizo.

Junyodo para ging’eyo dhok mir Anglais nyanok, ento gibedo kud amora lee mi timo ni Yehova. Nja kubang’ ceng’ soko, kadok nwang’u baba ubed utimo tic mi twagu cuma diewor traka i adhura mi Sudbury i Ontario de, re asu ebed eting’a waku nyamira ma nok ma nyinge Sylvia nicidho i tic mi lembanyong’a. Bende, kubang’ yenga wabed waponjo Otkur ma Wiw karacelo ku juruot fwa. Mama giku baba giponja nimaru Mungu. Lembuno ucwala nithiero kwo para ni Yehova i oro 1956 kinde m’abino ku oro apar. Mer ma tek ma gibino ko yor i bang’ Yehova umiyo ira amora m’amedara ko nitimo ni Yehova i kwo para ceke.

I ng’ey m’adaru somo mi sekonder, agam aketho ngo wiya cuu i kum timo ni Yehova. Aparu nia kan adoko jayab yo, abinwang’u ngo sente lee pi niketho lek para mi wotho kud avio man mi neno ng’om ma tung’ tung’ utimere. Anwang’u tic i ot radio moko, m’abino jaketh mizik i iye man amaru tije lee. Ento abed atimo tije kwa uthieno, pieno abed akoso coko wang’ ma pol, man abed adikara ku dhanu m’umaru ngo Mungu. Tokcenne, pidocwinya ma Biblia uponjo ucwala nitimo alokaloka.

Adok i adhura mi Oshawa, i Ontario. Kuca wawok wanwang’ara ku Ray Norman, Lesli ma tie nyamin ma nok, man juyab yo mange. Gin ceke gijola ma ber mandha. Anyong’a ma gibino ko ucwala nidok ng’iyo kendo i lembakeca para. Gitielo cwinya nia acak tic pa jayab yo, e acake de andha i dwi mir abungw’en, i oro 1966. Abino kud anyong’a man ubino nen nia lembe de ubewotho ma ber i kwo para. Re lembe moko m’ubin uloko kwo para uwok rek ma nwang’u aparu de ngo.

KA YEHOVA UKWEYI NITIMO GIN MOKO, KEPIM NITIME

Kinde ma nwang’u fodi abesomo asu somo mi senkoder, apong’o karatasi mi cidho i Bethel mi Toronto, i Canada. I ng’eye saa m’abemedara ku tic pa jayab yo, julwong’a nia acidh atim tic pi oro ang’wen i Bethel. Re amaru Lesli lee mandha, man abino lworo nia kan ayiyo lwong’o mi cidho i Bethel, dong’ abinene ngo kendo. I ng’ey m’arwo lee mandha kud adundena ceke, ayiyo nicitimo i Bethel ento abedo ku can i cwinya niyero ni Lesli nia edong’ ma ber.

I Bethel, abed atimo kaka ma julwoko iye bongu man i ng’eye adoko jagor (Secrétaire). I ng’ey kare moko, Lesli udoko jayab yo ma segi i adhura mi Gatineau, i Quebec. Re wang’ ma pol abed apenjara nia ebetimo ang’o, man nyo eni re amaku yub ma cuu andha! I ng’eye, lembe moko ma ber mandha ugam uwok rek i kwo para. Julwong’o Ray ma tie umin Lesli i Bethel. Wacaku bedo wakude i kusika ma rom! Eno uketho mer m’amaru ko Lesli udok kendo kakare. Wagamara i nindo 27, dwi mir 2, oro 1971 ma tie nindo ma tokcen m’abino twiyo ko oro ang’wen mi tic para i Bethel.

Juorowa waku Lesli wacidh wakony cokiri ma weco dhok mi Français i Quebec. I ng’ey oro moko ma nok, saa m’adoko ku oro 28, apoy ma julwong’a nia acak timo calu jaliew mi twodiri. Anwang’ara nia fodi an aradu dit, man aromo ngo; ento wec ma nwang’ere i Yeremia 1:7, 8 utielo cwinya lee. Lembe ma rac utie nia Lesli unwang’u ret mi muthukari wang’ ario man ni nindo ire de udoko tek. Eni ke dong’ wabitimo tic mi twodiri e nenedi? Re eyero kumae: “Ka Yehova ubekwayuwa nia watim gin moko, nyo kwayu ngo wakepim nitime?” Wayiyo ticne, man pi oro 17 wanwang’u anyong’a mi bewotho pi nitimo tije.

Lembe ubino lee dit i wang’a, man abed anwang’u ngo saa akeca ma wabed ko ku Lesli. Agam anwang’u ponji mange. Kas’acel con kugweno, judiyo ulang’ mi dhogola. Ng’atu moko acel de bino mbe, ento kende kende kithunga, bongu m’i wi meza, nying yen, fromaj, mukathi, cupa mi divai, ver, man karth moko ma jukiewo kwan i wiye nia “bin ku min ot peri i nambu.” Ebino nindo ma ber mi tuko ngo. Ento akoro ni Lesli nia atie ku korolembe m’ukwayu ayiki, acopo cidho ngo. E nyang’ kuda, re ebino ku nyathi can moko i cwinye. Kinde m’abedo i dhu meza para, cwinya caku pido. Apoy pi Juefeso 5:25, 28 ma i iye lembe pa Yehova ubetielo cwinya nia adieng’ i kum kite ma min ot para ubewinjere ko. I ng’eye kinde m’arwo, ayero ni Lesli nia “dong’ wacidhi;” lembene nyang’e. Wacidho kaka moko ma leng’ mandha i dhu pii, wapedho bongu m’i wi meza, man ebino iwa nindo ma ber mandha ma wabedo i iye karacelo. Re asu adog ayiko korolembe para.

Tic mi twodiri ma watimo i Colombie nitundo i Terre-Neuve umiyo iwa anyong’a ma lee. Ava para ma bino ko mi wotho i ng’om ma tung’ tung’ upong’o. Abed aparu pi somo mi Gilead, re abino mbe kud ava mi bedo misioner. Ubed unen ve ju misioner gitie dhanu ma segi, uketho abed anwang’ara nia aromo ngo. M’umedo maeno, abino ku lworo nia jubiorowa i ng’om mir Afrika kaka ma thong’om ku lwiny usagu i iye. Abino kud anyong’a kaka m’ani iye i Canada.

LWONG’O MA REK PI CIDHO I ESTONIE MAN I BALTIQUES

I oro 1992 kinde ma judog juyiyo nia Jumulembe pa Yehova gicopo rweyo lembanyong’a kendo i theng ng’om ma Union Soviétique neno wiye, umego gipenjowa ka nyo waromo foyo nicidho i Estonie man nibedo jumisioner. Lembene upoyowa rek, re warwo pire. Wapoy kendo i kum wec ma e: ‘Ka Yehova ubekwayuwa nia watim gin moko, nyo kwayu ngo wakepim nitime?’ E wayiyo lembene, man agam anyang’ nia ‘wabecidho ngo i Afrika.’

Wacaku ponjo dhok mi Estonie wang’ acel. I ng’ey ma watimo dwi moko i ng’ombe, jukwayuwa nia watim tic mi twodiri. Wabed waliewo cokiri ma romo 46 kud ungu ma tung’ tung’ i theng ng’om adek mi Baltiques, man i Kaliningrad, i Russie. Ugam ukwayere nia watim kero waponj dhok mi Letton, mi Lituanie, man mi Russie moko kokoro. Ebino lembe ma tek. Re asu kero ma wabed watimo unyayu anyong’a i jurimbwa man gibed gikonyowa. I oro 1999, juketho biro mi filial i Estonie, man jung’iya nitimo i komite mi filialne karacelo ku Toomas Edur, Lembit Reile, man Tommi Kauko.

Wang’eyo Jumulembe dupa ma jugam jutero i Siberie. Kadok kud i kind masendi ma tek ma jutwiyo kogi i kol man kadok jupokogi ku wedi migi de; re cwinygi utur ngo. Gigwoko anyong’a man amora migi pi tic mi lembanyong’a. Lapor migi uponjowa nia kadok kud i kind peko de, wacopo bedo ku cirocir man kud anyong’a.

Ku oro m’ubecidho, calu ma wabed wayom ungo akeca, Lesli ucaku nwang’u olo lee dit. Wagam wang’eyo ngo nia karaman olone udikere ku twoyo ma julwong’o fibromyalgie. Waneno nia ugam ukwayu wawek tic mwa man wadok i Canada. Kinde ma julwong’owa i Somo mi ju mi Komite mi Filial i Patterson, New York, États-Unis, abino ku jiji ka nia andha wacopo cidho. I ng’ey ma warwo ku cwinywa ceke, e wawiyo nicidho. Yehova upoko mugisa iwi yubne. Saa ma wabino i somone re ma Lesli uwok unwang’u yath m’ebino ku yenyne. Tokcenne, wadwog wamedara ku tic mwa calu ma naka.

JUOROWA KENDO I NG’OM MANGE

Uthieno moko kumeni i oro 2008, kinde m’adok i Estonie, julwong’a niai kud i kabedo mwa ma dit mi ng’om zoo pi nipenja ka nyo acopo yiyo nicitimo i ng’om mi Congo-Kinshasa. Ewok ira nilembe ma rek, pilembe ukwayere nia adwok wang’ penjine urwonde. Ku kwong’a, anyutho ngo lembene ni Lesli kum ang’eyo nia ecopo nindo ngo diewor ma ceng’ nica. Ento an re m’abino ng’atu ma kwong’a m’unindo ngo ceng’ nica, kum abino rwo pi lworo m’ubino nega pi cidho i ng’om mir Afrika.

Urwonde kinde m’ayero lembene ni Lesli, wanyamu i lembe nia “Yehova re m’ubekwayuwa wacidh watim i ng’om mir Afrika. Wacopo ng’eyo nenedi nia waromo timo kuca man ninwang’u anyong’a tek wacidho ngo?” Pieno, i ng’ey oro 16 ma watimo i Estonie, wacidho i Congo-Kinshasa. Juyiko lela mi Bethel mi ng’ombe ma leng’ mandha, m’ibedo i iye de ma cwinyi kwiyo. Kud i kind gin ma kwong’a ma Lesli uketho i ot ma jumiyo wabed i iye ubino karth m’egam egwoko, ma waai ko i Canada. Iwi karthne jukiewo nia “Bed kud anyong’a kaka ma in’i iye.” I ng’ey coko umego gibed gitelo wi ponji mi Biblia, man wanwang’u anyong’a i tic mi bedo jumisioner. Ing’eye, wanwang’u rwom mi liewo filial ma tung’ tung’ ma romo 13 i ng’om mange mir Afrika. Lembuno uketho wabed waneno kit dhanu ma tung’ tung’ man ma pigi beco. Lworo m’alar abino ko ku kwong’a uthum, man wabedwoko foyofoc ni Yehova pilembe eorowa nitimo i ng’om mir Afrika.

I Congo, jubed jumiyo iwa cam ma tung’ tung’, camne moko ubino ukoko m’aparu nia copo camere ngo ira. Ento kinde ma waneno umego gibecame kud anyong’a, wayero nia wan de wakepimo; e wabedo kud anyong’a nicame.

Wabed wacidho yo nyangu mi ng’ombe pi nitero kony mi thenge mi tipo man mi kum ni umego i kabedo m’ulum ubed usendo iye dhanu, asagane jumamon kud awiya. Umego ma pol gibino jucan. Re asu gibino ku genogen ma tek iwi cer, mer ma gimaru ko Yehova, ku gwoko bedoleng’ migi i dilo pare umulo adundewa lee. Lapor migi ucwaluwa niparu pi thelembe m’uketho wabetimo ni Yehova, man lembene udwoko yiyoyic mwa tek. Umego moko gibed gineno can pilembe cam ku ot migi unyothere. Lembuno uketho aparu kite ma giki mi kum copo weko kowa mbwang’, man nia gin ma pire tek nisagu utie winjiri mwa ku Yehova. Kadok umego gibino kadhu kud i peko ma lee de, re gibed giwagiri ngo akeca. Nen ma ber ma gibino ko ukonyowa ninyego ku peko man ku remokum mwa ku tegocwinywa.

WANWANG’U RWOM MI TIC MANGE MA NYEN I ASIE

I ng’eye, wanwang’u lwong’o mange ma rek. Jukwayuwa nia wacidh i filial mi Hong Kong. Waparu ngo nia nang’u waromo kwo i ng’om mir Asie! Re i ng’eye saa ma waparu pi kony ma Yehova ukonyo kowa i ticne mange ceke ma walar watimo, e wajolo lwong’one. I 2013, ku piwang’wa waweko jurimbwa dupa ma beco, man leng’o mi ng’om mir Afrika, wacidho ma wang’eyo de ngo lembe mi wang’wa.

Nikwo i Hong Kong ubino iwa alokaloka ma dit, pilembe ebino adhura ma kwond dhanu ma tung’ tung’ upong i iye. Ng’eyo dhok mi chinois ubino iwa lembe ma tek. Re Umego gijolowa ku yaw yaw mandha, man wabed wacamu kit cam migi kud anyong’a. Tic unyay pio pio i filial, uketho bethel ubino ku yeny mi medo kaka ticne mange. Re bei mi giero kaka ticne mange ubino tek, uketho Guriri m’utelowic unwang’u nia ukwayu judwok kabedo mi ticne moko kaka mange man moko ke julwor. I ng’eye nyanok i oro 2015, wadok i Korea ma yo piny, kaka ma wabemedara i iye ku tic nitundo kawoni. Keni i Korea de wawok wanwang’ara ku peko mange mi ng’eyo dhok, ento kadok wawece ngo cuu de, umego ku nyimego gitielo cwinywa, gifoyowa nia wabetimo mediri niweco dhok mi Korea.

PONJI M’ANWANG’U

Ninwang’u jurimo ma nyen utie lembe ma yot ungo, ento tek wamaku yub mi nyutho jol ni jumange; wacopo ng’eyogi pio pio. Wanwang’u nia umego mwa gitie ngo calu ma waparu man nia Yehova ucwiyowa kara wayab adundewa man wanyuth mer ni jurimbwa dupa.​—2 Kor. 6:11.

Wanwang’u nia wabino ku yeny mi jolo dhanu ceke calu ma Yehova jolo man nineno gin m’unyutho nia emaruwa man ebetelo wiwa. Tek wanwang’u nia cwinywa utur, kunoke wabepenjara nia nyo andha umego ku nyimego gimaruwa, wadok wasomo kendo karth man barua mi tielocwiny ma jurimbwa ubed umiyo iwa. Andha waneno kite ma Yehova udwoko ko wang’ rwo mwa, enyutho nia emaruwa man emiyo iwa tego.

Kubang’ oro m’ubekadhu, waku Lesli wanwang’u nia pire tie tek nibekoyo saa m’ibedo karacelo i kindwa, kadok lembe upong’ i wang’wa de. Wanwang’u bende nia pire tie tek nibeng’ierara i kindwa, asagane kinde ma wabeponjo ning’eyo dhok ma nyen. M’umedo maeno, kubang’ uthieno watimo tego ninwang’u lembe moko ma ber ma wacopo foyo Yehova pire.

I andha, agam aparu ngo zoo de nia nwang’u acopo bedo jamisioner kunoke nikwo i ng’om mange. Re anwang’u nia lembe ceke copere ku kony pa Yehova. Apoy i kum wec pa jabila Yeremia, m’uwacu kumae: “E Yehova, iwonda.” (Yer. 20:7, B.L.L) Eyo, eketho wanwang’u anyong’a ku mugisa ma rek ma nwang’u waparu de ngo, epong’o kadok ava para mi wotho kud avio. Wawotho kud avio i ng’om ma tung’ tung’ dupa ma kinde m’abino nyathin agam aleko ngo aleka de nia abitundo i igi. I tic mwa ceke ma watimo, atie ku foyofoc lee mandha pi kony pa Lesli man pi miyiri pare.

Wawotho poyo wiwa i kindwa nia wabetimo tic maenigi ceke ni ng’a man ke pirang’o. Mugisa ma wabenwang’u tin utie abila mi kwo ma rondo ku rondo ma wabinwang’u kinde ma Yehova ‘biyabu cinge, man ebiyeng’o gin ceke ma kwo kubang’gi.’​—Zab. 145:16.