Nyo itie ayika nithiero kwo peri ni Yehova?

1-2. Ukwayu ng’atini utim ang’o i wang’ nilimo batizo?

I KIND oro abic m’ukadhu ceng’ini eni, dhanu ma wendgi sagu milion acel gilimo batizo pi nidoko Jumulembe pa Yehova. Tap calu jalub mi rundi ma kwong’a ma nyinge Timoteo, dupa m’i kindgi giponjo lemandha “niai i mukere” migi. (2 Tim. 3:14, 15) Jumoko giponjo lembe iwi Yehova saa ma gidongo, jumange ke i tiyo migi. I kind oro moko m’ukadhu ang’ec, mego moko m’uponjo Biblia ku Jumulembe pa Yehova ulimo ku oro 97.

² Tek itie japonj Biblia kunoke ibedongo i cing’ junyodo ma gitie Jumulembe pa Yehova, nyo ibecuku paru pi batizo de? Eno utie lembakeca ma ber mire ma! Re i wang’ nilimo batizo, bikwayu ilar ithier kwo peri ni Yehova. Thiwiwec maeni bikoro nia nithiero kwo peri ni Yehova thelembene tie ang’o. Ebikonyi bende ninyang’ nia imbe ku thelembe mi lworo nithiero kwo peri ni Yehova man nilimo batizo kan itie ayika.

NITHIERIRI NI MUNGU THELEMBENE ANG’O?

3. Kemii lapor moko m’i Biblia mi dhanu ma githiero kwo migi ni Yehova.

³ I Biblia, nithieriri ni Yehova thelembene tie nikoyiri ang’et pi tic moko ma segi. Thek mir Israel ubino thek m’uthierere ni Yehova. Ento dhanu moko m’i iye gibed githiero kwo migi ire i ayi ma segi. Ku lapor, Arun ubed ukendo “giranyutha mi thieriri ma leng’,” m’ubino ban mi mola m’uriang’ini i kum jamboyo wic ma segi m’i terwang’e. Ban mi mola maeno ubed unyutho nia jukethe ang’et pi tic moko ma segi, niwacu pi nibedo jalam ma dit mir Israel. (Law. 8:9) Junaziri bende gibed githiero kwo migi ni Yehova i ayi ma segi. Wec ma nia “Janaziri” m’uai kud i wec mi dhu Juebrania ma nazir, thelembene tie “Ng’atu ma jukoyo ang’et” kunoke “Ng’atu m’uthiero kwo pare.” Junaziri gibed gikwo nimakere ku lembe ma Cik pa Musa ung’olo igi.—Wel 6:2-8.

4. (a) Kan idaru thiero kwo peri ni Yehova, lembakeca peri ma pire tek bedo ang’o? (b) ‘Nikweriri gijo’ thelembene ang’o? (Nen bende cal.)

⁴ Saa m’ibethiero kwo peri ni Yehova, ing’iyo nia idaru doko jalub pa Yesu Kristu man nia iketho timo yeny pa Yehova ubed ni gin ma pire tek nisagu zoo i kwo peri. Nithiero kwo peri ni Mungu bikwayu ang’o i beng’i? Yesu uyero kumae: “Tek ng’atu moko ubemito elub toka, ekwerere gire.” (Mat. 16:24) Wec mi dhu Jugiriki ma juloko nia “ekwerere gire,” jucopo loke bende nia “ecikere niyero ungo ire gire.” Tek idaru thiero kwo peri ni Yehova, bikwayu ikwer piny ceke m’urombo ngo ku yeny pare. (2 Kor. 5:14, 15) Eno ubenyutho nia ibikwero bende “tic mi kum,” ma calu lemsasa mi tarwang’. (Gal. 5:19-21; 1 Kor. 6:18) Nyo woro cik maeno bidwoko kwo diny iri? Ebidwoko ngo tek imaru Yehova man iyiyo ku cwinyi zoo nia cik pare utie pi bero peri. (Zab. 119:97; Isa. 48:17, 18) Umego moko ma nyinge Nicholas uyero kumae: “Icopo neno cik pa Yehova calu kusika mi kol m’ubeceri nitimo gin m’imaru, kunoke calu gang’ ma jugoyo i kum umvor m’ubegwoki ni ariti.”

5. (a) Icopo thiero kwo peri ni Yehova nenedi? (b) Tung’ tung’ ma kani m’utie i kind nithieriri ni Mungu man nilimo batizo? (Nen bende cal.)

⁵ Icopo thiero kwo peri ni Yehova nenedi? Nikadhu kud i rwo m’ibeng’olo ko ire nia ibitimo thier ire kende man nia ibiketho yeny pare i kabedo ma kwong’a i kwo peri. Saa maeno ing’olo nia ibimediri nimare “kud adundeni ceke, ku ng’eyong’ec peri ceke, ku pidoic peri ceke, man ku tegoni ceke.” (Mark. 12:30) Icopo thiero kwo peri ni Yehova i amung’; wukude kendwu re ma wung’eyo. Batizo peri lundo kadhu i wang’ dhanu ceke; inyutho ko igi nia idaru thiero kwo peri ni Mungu. Thieriri peri ni Yehova utie lembang’ola ma ku kwong’ ma leng’. Lembakeca peri utie nikwo nimakere kude; Yehova de ubekwayu kumeno.—Ekl. 5:4, 5.

UKWAYU ANG’O M’UCWELI NITHIERO KWO PERI NI YEHOVA?

6. Ang’o ma cwalu ng’atini nithiero kwo pare ni Yehova?

⁶ Thelembe ma kwong’a ma kwayu ucweli nithiero kwo peri ni Yehova utie mer m’imare ko. Merne utie ngo kende kende kite m’ibewinjiri ko. Ento ejengere iwi “ng’eyong’ec ma tap” man iwi “nyang’ i lembe mi tipo,” niwacu lembe m’ituc niponjo iwi Yehova m’uketho mer m’imare kone umedere nidongo. (Kol. 1:9) Ponji peri mi Lembagora uketho iyiyo ku cwinyi ceke nia (1) Yehova unuti andha, (2) nia Biblia utie Lembe pare m’eyuyo i wiye, man (3) nia ebetiyo ku dilo pare kara yeny pare utimere.

7. Ukwayu wawoth betimo ang’o i wang’ nithiero kwo mwa ni Mungu?

⁷ Ukwayu ju ma gibemito thiero kwo migi ni Yehova ging’ey ponji mir ukungu m’i Lembe pare man gikwo nimakere ku cik pare mir ukungu. Ukwayu bende gibed dhanu ma timo kero migi ceke pi ninyutho pi yiyoyic migi ni jumange. (Mat. 28:19, 20) Mer ma gimaru ko Yehova umedere nidongo, uketho ava mir adundegi utie nitimo thier ire kende. Nyo in de idaru pong’o lembuno? Tek itie ku kit mer maeno, ibineno ngo thieriri ni Mungu man batizo ni gin m’ukwayu itim kende kende pi nifoyo i japonji peri mi Biblia kunoke i junyodo peri, kadi pi nilubo tok jurimbi.

8. Ninyutho foyofoc bikonyi nenedi nimaku yub mi thiero kwo peri ni Yehova? (Zaburi 116:12-14)

⁸ Ebibedo iri yot nimaku yub mi thiero kwo peri ni Yehova tek ibed iparu pi gin ceke m’edaru timo iri. (Som Zaburi 116:12-14.) Biblia ulwong’o Yehova nia Jamii “giramiya ceke ma ber man ma cuu.” (Yak. 1:17) Giramiyane m’usagu zoo utie lam ma Wode ma Yesu uthiero. Kepar nyanok! Lam mi jamgony uketho ecopere iri nibedo ku winjiri ma ceng’ini ku Yehova. Man emiyo iri genogen mi kwo rondo ku rondo. (1 Yoh. 4:9, 10, 19) Nithiero kwo peri ni Yehova utie yo ma ber m’icopo nyutho ko ire foyofoc pi mer ma yawe mbe m’enyutho iri, man pi mugisa mange ceke m’emiyo iri. (Poy. 16:17; 2 Kor. 5:15) Juweco pi foyofoc ma kumeno i ponji mi 46 nyathi thiwiwec mir 4, mi buku Icopo kwo kud anyong’a rondo ku rondo!​, ma i iye junwang’u video mi dakika adek ma thiwiye tie Mii giramiya ni Mungu.

NYO ITIE AYIKA NITHIERO KWO PERI NI MUNGU MAN NILIMO BATIZO?

9. Pirang’o ukwayu ngo ng’atini uporere ku jumange tek emito thiero kwo pare ni Mungu?

⁹ Iromo nwang’u nia fodi itie ngo ayika nithiero kwo peri ni Yehova man nilimo batizo. Saa moko nyo ubekwayu itim alokaloka i kwo peri pi nikwo nimakere ku cik mir ukungu pa Yehova, kunoke ukwayu iting’ saa ma lee pi niteng’o yiyoyic peri. (Kol. 2:6, 7) Juponj Biblia gitimo ngo mediri i ayi ma rom, man utie ngo aradu ceke ma gibedo ayika nithiero kwo migi ni Mungu man nilimo batizo ku oro ma rom. Tim kero ing’ii i mediri peri nimakere ku copo peri, ento kud iporiri ku ng’atu mange.—Gal. 6:4, 5.

10. Icopo timo ang’o tek inwang’u nia fodi itie ngo ayika nithiero kwo peri ni Mungu man nilimo batizo? (Nen bende sanduku ma thiwiye tie, “Ni ju ma gibedongo i lemandha.”)

¹⁰ Kadok ituc ninwang’u nia andha fodi itie ngo ayika nithiero kwo peri ni Yehova de, mediri asu nitiyo iwi lembakeca maeno. Kway Yehova ukonyi itim alokaloka ceke m’ukwayere. (Filip. 2:13; 3:16) Man cwinyi bed tek nia ebiwinjo rwo peri man ebidwoko wang’e.—1 Yoh. 5:14.

THELEMBE MA CERO JUMOKO

11. Yehova bimiyo iwa ang’o kara wamedara nigwoko bedoleng’ mwa ire?

¹¹ Jumoko giceriri nithiero kwo migi ni Mungu man nilimo batizo kadok nwang’u dong’ gitie ayika. Saa moko nyo gibepenjiri kumae: ‘Eni kan i ng’eye apodho i dubo ma pek man jukoya ke?’ Tek lworo maeno n’i ii, cwinyi bed tek nia Yehova bimiyo iri gin ceke m’itie ku yenyne kara iwoth “i ayi m’uromo [kude] pi ninyayu anyong’a i iye i lembe ceke.” (Kol. 1:10) Ebimiyo iri bende tego mi timo gin m’atira. Edaru konyo jumange dupa. (1 Kor. 10:13) Eno utie thelembe acel m’uketho dhanu ma wendgi nok re ma jubed jukoyo kud i cokiri. Yehova konyo dhanu pare nigwoko bedoleng’ migi ire.

12. Wacopo timo ang’o pi niuro dubo ma peki?

¹² Dhanu ceke ma gitie ku dubalaga ginwang’iri i wang’ abidhe mi timo lembe ma reco. (Yak. 1:14) Ento ng’atuman re ma ng’iyo gin m’ebitimo i saa ma kumeno. Ng’ey nia kadok ang’o de, in re m’itie ku copo mi ng’iyo kite ma kwo peri bibedo ko. Jumoko giromo kwero paru maeno, re ng’ey nia icopo bimo wi ava peri ma reco. Man kadok nwang’u abidhe uwok i weng’i de, icopo ceriri nipodho i iye. Pi ninwang’u tego, bed irwo kubang’ ceng’, mediri nibedo ku ng’iyo ma ber mi ponjo Lembe pa Mungu, bed icidh i coko nja man bed inyuth pi yiyoyic peri ni jumange. Nitimo kumeno thiri thiri bimiyo iri tego mi kwo nimakere ku lembang’ola mi thieriri peri. Kud iwil nyanok de nia Yehova bikonyi.—Gal. 5:16.

13. Yozefu uweko iwa lapor ma kani?

¹³ Ebibedo iri yot nikwo nimakere ku lembang’ola m’itimo ni Mungu kan ilar ing’eyo gin m’ibitimo saa m’abidhe biwok. Biblia ukoro pi dhanu dupa ma gitimo kumeno, kadok gibino ku dubalaga calu wan. Ku lapor, dhaku pa Pothifar ubidho Yozefu wang’ udul. Re egam eng’eyo cuu mandha gin m’ukwayu etim. Biblia ukoro nia “ekwero,” man eyero kumae: “Acopo timo lembe ma rac tho rukeni nenedi, m’adub ko ni Mungu?” (Tha. 39:8-10) Ubenen kamaleng’ nia i wang’ ma fodi dhakune ubidhe ngo, elar eng’eyo gin m’ebitimo. Eno uketho ebino ire yot nitimo gin m’atira kinde m’enwang’ere i wang’ abidhe.

14. Wacopo ponjo nenedi niuro timo ma reco?

¹⁴ Icopo lubo lapor pa Yozefu nenedi? Lar imak yub niai kawoni iwi gin m’ibitimo saa m’abidhe biwok. Ponj niyero ungo ni piny ma Yehova udagu, man ur kadok niparu pigi. (Zab. 97:10; 119:165) E kumeno, ibikier ungo i wang’ abidhe, pilembe binwang’u dong’ ilar ing’eyo gin m’ibitimo.

15. Icopo nyutho nenedi nia ‘ibeyenyo Yehova ku cwinyi ceke?’ (Juebrania 11:6)

¹⁵ Saa moko nyo ing’eyo nia idaru nwang’u lemandha man nia ubemito itim ni Yehova kud adundeni ceke, re asu itie ku jiji mi thiero kwo peri ire man mi limo batizo. Ka kumeno, lapor p’ubimo Daudi copo konyi. Kway Yehova kumae: “Yeny iya, E Mungu, man ng’ey adundena. Ng’iya man ng’ey paru m’ubedieng’o cwinya. Nen ka nyo yo moko ma rac utie i iya, man tel wiya kara akwo rondo ku rondo.” (Zab. 139:23, 24, NWT.) Yehova miyo mugisa ni ju “m’ubeyenye ku cwinygi ceke.” Kero m’ibetimo pi nitundo i kum lembakeca mi thiero kwo peri ire man mi limo batizo, uketho ebeneno nia in de ibeyenye ku cwinyi ceke.—Som Juebrania 11:6.

MEDIRI NICORO CENG’INI I VUT YEHOVA

16-17. Yehova telo ju ma gibedongo i lemandha nenedi? (Yohana 6:44)

¹⁶ Yesu uyero nia Yehova re ma telo julub pare. (Som Yohana 6:44.) Kepar nyanok iwi kite ma lemandha maeno pire tie tek ko man iwi kite m’emulo ko kumi. Yehova neno gin ma ber i ng’atuman m’ebetelo i bang’e. Eneno ng’atu m’edaru telo ni “piny pare ma segi,” kunoke ni “lonyo pare.” (Poy. 7:6; kmt.) In de ebeneni tap kumeno.

¹⁷ Ento copere nia junyodo peri gitie Jumulembe pa Yehova. Iromo paru nia ibelubo kende kende tokgi kunoke nia in Yehova uteli ngo athothi i bang’e. Ento poy nia Yehova neni ngo kende kende ni acel m’i kind dhanu pare; etelo ng’atuman acel acel, kadok ng’atu m’ubedongo i lemandha. Biblia uyero bende kumae: “Wucor ceng’ini i vut Mungu, man en de ebicoro ceng’ini i vutwu.” (Yak. 4:8; 1 Kei. 28:9) Pieno tek imaku yub mi coro ceng’ini i vut Yehova, en de ebitimo lembe moko; ebicoro ceng’ini i vuti, tap calu ma Yakobo 4:8 uyero.—Nen lembe m’uyenyo rombo kude i 2 Juthesaloniki 2:13.

18. Wabiweco iwi lembang’o i thiwiwec m’ulubo? (Zaburi 40:8)

¹⁸ Kan ithiero kwo peri ni Yehova man ilimo batizo, nyutho nia ibelubo lapor pa Yesu. Ewodhere gire ni Won pi nitimo gin ceke m’ekwayu i bang’e. (Som Zaburi 40:8; Ebr. 10:7) I thiwiwec m’ulubo, wabiweco iwi gin ma bikonyi kara imediri nitimo ni Yehova ku bedopwe i ng’ey batizo peri.