Penji mi jusom

Nyo judong cokiri kunoke umego ku nyimego mi cokiri re ma giketho ayi i kum ng’atini, calu ma jukoro i 2 Juthesaloniki 3:14?

Jakwenda Paulo ukiewo ni Jukristu mi Thesaloniki kumae: “Tek ng’atu moko ubeworo ngo lembe ma wagoro i barua maeni, wuketh ayi i kume.” (2 Thes. 3:14, kmt) I wang’e wabed wayero nia jumiyo telowic maeno ni judong cokiri. Tek ng’atu moko ubemedere nicayu cik mir ukungu mi Biblia ma ke jumiyo ire juk wang’ dupa, judong cokiri gibed gimiyo korolembe mi kogowic ni cokiri. I ng’eye, jurwey gibed gidikiri ngo ku ng’atu ma juketho ayi i kumene.

Ento ubekwayu watim alokaloka iwi lembuno. Ubenen kamaleng’ nia juk pa Paulo eno ubenyutho ng’iyong’ic m’ukwayu Jakristuman utim i kit lembe moko. Pieno judong cokiri gimbe ku yeny mi miyo korolembe mi kogowic. Pirang’o watimo alokaloka maeno? Wakeng’iyu i juk ma Paulo umiyo i verse mange m’udhoko kum verse maeno.

Paulo uneno nia jumoko mi cokiri gibino ‘wotho swa;’ gibed gicayu juk ma tipo yuyo i wiye. Saa m’ecidh eliewogi i wang’e, ewok emiyo telowic ma e: “Tek ng’atu moko ubemito ngo etim tic, dong’ acama de kud ecam.” Re asu jumoko gibed gikwero nitimo tic pi nipong’o yeny migi, kadok gibino ku copone de. Gibed gimondo bende i lembe mi jumange. Ugam ukwayu Jukristu gikwo nenedi ku dhanu maeno ma gibetimiri swa?—2 Thes. 3:6, 10-12.

Paulo ukiewo kumae: “Wuketh ayi i kume.” Wec mi dhu Jugiriki m’etiyo ko keni ubemiyo paru mi ng’iyo ng’atune man mi bedo ku wang’jo i kume. Paulo umiyo telowic maeno ni cokiri ceke, ento ungo ni judong cokiri kendgi. (2 Thes. 1:1; 3:6) Pieno Jakristuman m’uneno jayic wadi moko ubeworo ngo juk ma tipo uyuyo i wiye romo ng’iyo nia kwayu ‘ewek nidikere kude.’

Nyo eno ubenyutho nia ubed ukwayu jukwo ku ng’atune calu ng’atu ma juwodho kud i cokiri? Ungo, kum Paulo umedo kumae: “Wumeduru nijuke calu umego.” Pieno umego ku nyimego giromo dikiri asu ku ng’atu ma juketho ayi i kumene i coko man i tic mi lembanyong’a, ento gibidikiri ngo kude i saa mi nambu. Pirang’o? Paulo yero nia, “kara lewic umake.” Ka juketho ayi i kum Jakristu m’ubetimere swa, eno romo ketho lewic make i kum timo pare man etimo alokaloka.—2 Thes. 3:14, 15.

Jukristu gicopo tiyo ku juk maeno nenedi tin? Ku kwong’a ukwayu wanyang’ cuu ka nyo andha ng’atune ubetimere “swa,” calu ma Paulo uyero. Paulo ubino weco ngo pi ju ma pidocwiny mwa kunoke ng’iyong’ic mwa ukoc ku migi. Man ebino weco ngo pi ju ma gitimo lembe m’ukierowa akiera kende. Ento eweco pi ju ma ging’iyo nijai akakaka i kum juk ma terere ma Mungu umiyo.

Tin tek waneno nia Jakristu wadwa moko tie ku pidoic mi jaia ma kumeno, wabing’iyo wan giwa nia wabidikara ngo kude i saa mi nambu. Calu ma eno tie ng’iyong’ic pa ng’atuman, wabiweco ngo iwi lembene ku jumange m’uweko juruot mwa ma Jukristu ma wakwo kugi. Ento wabimedara nidikara ku ng’atu maeno i coko man i tic mi lembanyong’a. Tek ewilo timo pare, e wabicaku dikara kude kendo i lembe ceke calu m’i wang’e.