Gin ma Yehova utimo pi nilaru dhanu ma judubo

1-2. (a) Dubo tie ang’o, man wacopo bedo agonya kud i the ng’eca pare nenedi? (Nen “Koro i wec.”) (b) Wabiweco iwi lembang’o i thiwiwec maeni man i thiwiwec mange m’i Otkur ma Wiw maeni? (Nen bende “Telowic ni jusom” i gazeti maeni.)

NYO ibemito ing’ey kadhiri ma Yehova Mungu umeri i iye? Tek eyo, ponj lembe iwi gin m’etimo pi nileri kud i dubo man tho. Duboa tie jakwor ma rac magwei ma ku tego peri ci icopo voye tak de ngo. Wan zoo wapodho i dubo kubang’ ceng’, man watho pilembe watie ku kum mi dubo. (Rum. 5:12) Ento lembe mir anyong’a utie nia ku kony pa Yehova, wacopo voyo dubo. M’umbe jiji, wacopo nwang’u aloci i wiye!

² Oro ma romo elufu abusiel (6000) udaru kadhu niai ma Yehova ucaku konyo dhanu ninyego i kum dubo. Pirang’o ebetimo kumeno? Utie pilembe emaruwa. Ecaku maru dhanu niai m’ecwiyogi, pieno emedere nikonyogi kud anyego maeno i kadhiri ma lee. Mungu ung’eyo nia dubo terojo i tho; en ke ebemito ngo nia watho, ento nia wakwo rondo ku rondo. (Rum. 6:23) Eno re m’utie gin m’ebemito piri. Pieno i thiwiwec maeni, wabidwoko wang’ penji adek ma e: (1) Yehova umiyo genogen ma kani ni dhanu ma judubo? (2) Dhanu mi rundi mi Biblia gitimo ang’o pi ninwang’u bero i wang’ Yehova? (3) Yesu utimo ang’o pi nilaru dhanu kud i dubo man tho?

YEHOVA UMIYO GENOGEN MA KANI NI DHANU MA JUDUBO?

3. Kwaruwa ma kwong’a gidoko judubo nenedi?

³ Kinde ma Yehova ucwiyo nico ku dhaku ma kwong’a, emito nia gikwo ku mutoro. Pieno emiyo igi kabedo ma leng’, emiyo igi giramiya mi gamiri man tic moko ma ber akeca ma e: Ugam ukwayu gipong’ ng’om ku nyikwaygi man giketh ng’om zoo udok ni paradizo calu podho mir Eden. Emiyo igi bende cik acel kende ma yot. Man emiyo igi cimowang’ ma nia tek giture ma gijai ko akakaka i kume, e dubo migi biterogi i tho. Wan ceke wang’eyo kite ma lembene udog ubedo ko. Malaika moko m’ujai m’ugam umaru ngo Mungu kadi dhanu, ubidho wang’ Adamu giku Eva kara gidubi ni Mungu. Gin de giyiyo lembe pa malaikane ngbaku. Calu ma gikoso genogen iwi Weggi m’umarugi, gipodho i dubo. E gin ma Yehova uyero uwok kubang’e. Niai eca, ugam ukwayu gikay gin ma gicoyo: gicaku tii, man tokcenne githo.—Tha. 1:28, 29; 2:8, 9, 16-18; 3:1-6, 17-19, 24; 5:5.

4. Pirang’o Yehova udagu dubo? (Jurumi 8:20, 21)

⁴ Yehova uketho jugoro kpawa mi can maeno pi bero mwa. Kpawane konyowa ninyang’ nia pirang’o edagu dubo ku cwinye zoo. Dubo poko kindwa ku Wegwa man eterowa i tho. (Isa. 59:2) Pi thelembe maeno re ma Sitani ma malaika m’ucaku the peko maeno ceke, umaru dubo lee mandha man esayu yore mi mewe. Saa m’eketho Adamu gidubo, copere eparu nia edaru ranyu lembakeca pa Yehova. Ento egam enyang’ ungo nia Yehova tie Mungu ma jamer. Ewilo ngo lembakeca pare pi nyikway Adamu giku Eva. Emaru dhanu lee mandha, uketho emiyo igi genogen ndhu ndhu. (Som Jurumi 8:20, 21.) Egam eng’eyo nia i kind nyikway Adamu, jumoko gibing’iyo nimare man nisayu kony i bang’e pi ninyego i kum dubo. E calu Wego man Jacwic migi, eyiko igi yo mi coro ceng’ini i vute man mi bedo agonya kud i the ng’eca mi dubo man tho. Etimo ang’o kara lembuno zoo ucopere?

5. Yehova umiyo genogen ma kani ndhu ndhu i ng’ey m’Adamu giku Eva gidubo? (Thangambere 3:15)

⁵ Som Thangambere 3:15. Nimakere ku lembila maeni, Yehova umiyo genogen ndhu ndhu ni dhanu: Eng’olo lembe pa Sitani, eewo nia “kodhi” moko bilaru dhanu man nia tokcenne kodhi maeno birungo i Sitani man ebidaru peko ceke m’enyayu i Eden. (1 Yoh. 3:8) Ento kodhine bisendere bende kud i kind lembe maeno. Sitani bitong’o ufuny tiende, niwacu ebinege. Lembuno biketho Yehova biwinjo litho lee. Yehova ubino ayika niwinjo litho maeno zoo wek kara tokcenne, dhanu ma wendgi kwaniri ngo gibin gibothi kud i the ng’eca mi dubo man tho!

DHANU MI RUNDI MI BIBLIA GITIMO ANG’O PI NINWANG’U BERO I WANG’ YEHOVA?

6. Weg yiyoyic ma calu Abel giku Noa gitimo ang’o pi nicoro ceng’ini i vut Yehova?

⁶ I kind oro ma dupa m’ulubo, Yehova umedere nok nok nimiyo lero iwi kite ma dhanu ma judubo gicopo coro ko i vute. Ku lapor, Abel m’ubino nyathin mir ario p’Adamu giku Eva, ubino ng’atu ma kwong’a m’ubedo ku yiyoyic i Yehova i ng’ey peko m’uwok i Eden. Calu m’emaru Yehova man esayu enyay anyong’a i iye, ethiero ire lam. Abel ubino jakway lim, pieno eting’o nyithi rombe moko ethumo man ethiero ni lam. Yehova utimo ang’o? Efoyo “Abel man girathiera pare.” (Tha. 4:4) Yehova ubed ufoyo bende girathiera mi dhanu mange m’umare man m’ugene, calu ve Noa. (Tha. 8:20, 21) Jol m’ejolo ko girathiera ma kumeno unyutho kamaleng’ nia dhanu m’utie ku dub’alaga gicopo nwang’u bero i wang’e man gicopo coro ceng’ini i vute.b

7. Abraham ubino ayika nithiero wode ma buu ni lam. Lembuno ubemiyo iwa ponji ma kani?

⁷ Yehova ugam ukwayu Abraham ma ng’atu ma won yiyoyic ma lee utim lembe moko ma tek lee apila; ekwaye nia ethier wode ma Isak ni lam. M’umbe jiji, Abraham unwang’u nia eno tie lembe mi litho ma lee. Re kadok kumeno de, eworo telowicne. Ento Mungu cere saa ma nwang’u dong’ ebecinego wodene. Re asu lapor maeno ubemiyo ponji moko ma pire tek lee ma e ni dhanu ceke ma weg yiyoyic: Yehova bibedo ayika nithiero Wode ma buu m’emaru ni lam. Andhandha, Yehova umaru dhanu lee dit!—Tha. 22:1-18.

8. Lam dupa ma Cik pa Musa ubed ukwayu ubino tipopiny mir ang’o? (Lembe mi Julawi 4:27-29; 17:11)

⁸ Oro dak swa i ng’eye, Cik ma Yehova umiyo ni thek mir Israel ubed ukwayu lam dupa mi leya pi nitimo adunya pi dubo mi dhanu pa Mungu. (Som Lembe mi Julawi 4:27-29; 17:11.) Lam maeno ubino tipopiny mi lam moko ma dwong’ nisagu, ma en e lam ma bilaru dhanu kud i dubo wang’ acel pi nja. Mungu utelo wi jubila pare ku tipo pare ma leng’ pi nikoro nia kodhi ma jular juewo pire m’udok ung’eyere ni Wod Mungu ma segi bisendere, jubinege man jubithume calu urombo ma jubethiero ni lam. (Isa. 53:1-12) Kepar nyanok: Yehova bimaku yub kara Wode ma buu m’emaru uthierere ni lam pi nilaru dhanu ceke, kadok in bende, kud i dubo man tho!

YESU UTIMO ANG’O PI NILARU DHANU?

9. Yohana ma Jababutisi uyero ang’o pi Yesu? (Juebrania 9:22; 10:1-4, 12)

⁹ I rundi ma kwong’a N.N.Y., jatic pa Mungu ma Yohana ma Jababutisi ucimo ba Yesu mi Nazarethi man ewacu kumae: “Nen, Nyathi rombo pa Mungu m’ubekabu dubo mi ng’om!” (Yoh. 1:29) Wec maeno ma tipo yuyo i wiye unyutho nia Yesu tie kodhi ma juewo pire yang’ con. Ebithiero lam ma jung’olo pire. E tokcenne, kodhi pa Yehova unyuthere pi nimiyo genogen ma nging’ nging’ ni dhanu ma judubo, niwacu nilarugi kud i dubo man tho.—Som Juebrania 9:22; 10:1-4, 12.

10. Yesu unyutho nenedi nia ‘ebino lwong’o’ judubo?

¹⁰ Yesu uketho wiye asagane i kum konyo dhanu ma ter mi dubo ubino nurogi man elwong’ogi gidok julub pare. Egam eng’eyo nia dubo tie ulag peko ceke mi dhanu. Pieno ewodhere ku cwinye zoo pi nikonyo jumaco ku jumamon ma jung’eyo nia utie judubo. Etiyo ku lapor moko pi nikoro kumae: “Dhanu ma kumgi ber gimbe ku yeny pa munganga, ento ju m’utwoyo re ma gitie ku yeny pare.” Emedo kumae: “Abino ngo nilwong’o weg bedopwe, ento judubo.” (Mat. 9:12, 13) Ekwo de nimakere ku wec maeno. Ku lapor, eweko yot yot dubo pa dhaku m’ulwoko tiende ku pii wang’e. (Luka 7:37-50) Eponjo dha Samaria ku lemandha ma pigi tek, eno ke kadok egam eng’eyo pi kura pare mi lemsasa mi tarwang’. (Yoh. 4:7, 17-19, 25, 26) Mungu umiyo ni Yesu kadok copo mi daru matoke ma rac ma dubo kelo, niwacu tho. Nenedi? Yesu ucero jumaco, jumamon, awiya man judongo.—Mat. 11:5.

11. Pirang’o judubo ubed ucoro yot yot i vut Yesu?

¹¹ Etie ngo lembe mi zungo ka nia kadok judubo ma truk de gigam gimaru Yesu. Ebed enyutho igi kisa man ebed enyang’ kugi. Pieno gibino mbe ku lewic mi coro i vute. (Luka 15:1, 2) Yesu ubed ufoyo dhanu ma kumeno pilembe ginyutho nia gitie ku yiyoyic i iye man ebed enyutho igi bero. (Luka 19:1-10) I ayi maeno, enyutho nia Won utie jakisa ma lee. (Yoh. 14:9) Nikadhu kud i wec man timo pare, enyutho nia Won m’utie jakisa man jabero umaru dhanu man nia ebemito ekony ng’atuman m’i kindgi uvoy anyego m’ebenyego ko i kum dubo. Yesu ukonyo judubo gibed kud ava mi wilo timo migi man gilub toke.—Luka 5:27, 28.

12. Yesu uyero ang’o ni julub pare iwi tho pare?

¹² Yesu ugam ung’eyo gin m’ubekure. Eyero wang’ udul ni julub pare nia jubicibe man jubinege iwi yen. (Mat. 17:22; 20:18, 19) Egam eng’eyo nia lam m’ebithiero bikabu dubo mi ng’om tap calu ma Yohana ma Jababutisi uyero man calu ma jubila gilar giewo. Yesu uyero bende nia i ng’ey thiero kwo pare, ‘ebitelo kwond dhanu ceke i bang’e.’ (Yoh. 12:32) Pieno dhanu m’utie ku dub’alaga giromo nyayu anyong’a i Yehova nwang’u gijolo Yesu ubed Rwoth migi, man nwang’u gibelubo ba tiende. Tek gitimo kumeno, ‘jubigonyogi kud i ng’eca mi dubo.’ (Rum. 6:14, 18, 22; Yoh. 8:32) Pieno Yesu bino ayika man cwinye bino tek nitho tho mi litho.—Yoh. 10:17, 18.

13. Tho pa Yesu ubino nenedi, man tho pare uponjowa ku lembang’o iwi Yehova Mungu? (Nen bende cal.)

¹³ Jucibo Yesu, jutwiye, juyanye, jucido nyinge man jufwode. Juaskari gitere kaka ma jubinege i iye man giwok gigure iwi yen. Yesu ciro peko ma lith maeno ku gwoko bedoleng’. Ento Yehova uwinjo litho lee nisagu kinde m’ebeneno peko ma Wode n’i iye. Re ecerere nitiyo ku tego pare m’ajikine mbe pi nibodhe. Pirang’o? Ang’o ma romo cwalu Wego m’umaru nyathin pare nitimo kumeno? I adundo utie mer. Yesu uyero kumae: “Mungu umaru ng’om lee mandha uketho emiyo Wode ma kulong’, kara kubang’ dhanu ceke ma tek ubenyutho yiyoyic i iye kud unyothere, ento enwang’ kwo ma rondo ku rondo.”—Yoh. 3:16.

14. Lam ma Yesu uthiero ubemiyo iri ponji ma kani?

¹⁴ Lam pa Yesu utie lanyuth ma dit nisagu zoo mi mer ma lee ma Yehova umaru ko nyikway Adamu giku Eva. Ebenyutho nia Yehova meri lee mandha. Yehova ucidho bor cil m’eciro ko can ma lith nisagu zoo pi nileri kud i dubo man tho. (1 Yoh. 4:9, 10) Andhandha, ebemito ekony ng’atuman m’i kindwa unyeg i kum dubo man uloy anyegone.

15. Ukwayu watim ang’o pi ninwang’u bero i kum giramiya ma Mungu umiyo ma en e lam mi jamgony ma Yesu uthiero?

¹⁵ Giramiya ma Mungu umiyo ma en e lam mi jamgony ma Wode ma kulong’ uthiero, uketho dubo mwa copo wekere. Ento kara dubo mwa uwekere, ukwayu watim lembe moko. Lembang’o? Yohana ma Jababutisi udwoko wang’ penji maeno. I ng’eye Yesu ku kume de udwoko wang’e i ayi ma rom kumae: “Wulok cwinywu, kum Ker mi polo udhingo.” (Mat. 3:1, 2; 4:17) Ukwayu wabed walok cwinywa tek andha wabemito nia wanyeg i kum dubo man wacor ceng’ini i vut Wegwa m’umaruwa. Re niloko cwiny thelembene tie ang’o i andha, man lokocwiny konyowa nenedi ninyego i kum dubo man ninyayu anyong’a i Yehova? Wabinwang’u dwokowang’ penji maenogi i thiwiwec m’ulubo.