Wakony juponj Biblia gimak yub mi timo ni Yehova

1-2. (a) Pirang’o juponj Biblia moko gibedo ku jiji mi maku yub mi caku timo ni Yehova? (b) Wabineno ang’o i thiwiwec maeni?

NYO in de igam ibedo ku jiji mi doko Jamulembe pa Yehova? Saa moko nyo ibino lworo nia jurutic wedu, jurimbi kunoke wedi peri gibilokiri i kumi. Kunoke nyo ibed iparu nia ebicopere ngo iri nyanok de nikwo nimakere ku cik pa Mungu. Tek kumeno, icopo nyang’ cuu mandha ku juponj Biblia ma gitie ku jiji mi caku timo ni Yehova.

² Yesu ugam unyang’ nia kit lworo ma kumeno copo cero ng’atini nitimo mediri i thenge mi tipo. (Mat. 13:20-22) Ento cwinye utur ungo i kum ju m’ubino ku jiji mi doko julub pare; etimo lembe moko pi nikonyogi. Ukwayu wan de walub lapor pare man wakony dhanu ma kumeno kara (1) ginyang’ i lembe m’ubecerogi nitimo mediri, (2) giponj nimaru Yehova ku mer ma thuc, (3) giketh timo ni Mungu i kabedo ma kwong’a man (4) gicung ma tek i wang’ jai. Wacopo tiyo nenedi ku ponji ma Yesu umiyo ni julub pare kinde ma wabetiyo ku buku Icopo kwo kud anyong’a rondo ku rondo! pi nikonyo juponj Biblia mwa kara gimak yub mi caku timo ni Yehova?

WAKONY JUPONJ BIBLIA GINYANG’ I GIN M’UBECEROGI NITIMO MEDIRI

3. Copere nia ang’o m’ucero Nikodem nidoko jalub pa Yesu?

³ Ebino tek ni Nikodem m’ubino acel m’i kind jutelwic mi Juyahudi nidoko jalub pa Yesu. Nikodem uyiyo nia Yesu utie jaor pa Mungu i ng’ey dwi ma romo abusiel kende niai ma Yesu ucaku tic pare. (Yoh. 3:1, 2) Ento eng’iyo nicirombo ku Yesu i amung’ pilembe ebino “lworo Juyahudi.” (Yoh. 7:13; 12:42) Copere nyo ebino paru nia ebikoso lembe lee kan edoko jalub pa Yesu.a

4. Yesu ukonyo Nikodem nenedi ninyang’ i gin ma Mungu ubekwayu etim?

⁴ Nikodem ugam ung’eyo Cik, ento ebino ku yeny mi kony pi ninyang’ i gin ma Yehova ubekwayu i bang’e. Yesu ukonye nenedi? Ebino ayika niweco ku Nikodem kadok ku diewor. Saa ma gibeweco kude, enyutho ire gin m’ukwayu etim pi nidoko jalub pare, niwacu elok cwinye i kum dubo pare, elim batizo mi pii, man eyii Wod Mungu.—Yoh. 3:5, 14-21.

5. Wacopo konyo japonj Biblia nenedi kara enyang’ i gin m’ubecere ku timo mediri?

⁵ Japonj Biblia moko copo nyang’ cuu i Lembagora, re eromo bedo ku yeny mi kony pi ninyang’ i gin m’ubecere ku timo mediri. Copere nyo tic pare ubemaku ire saa ma lee, kunoke jupagi ubemito ngo nia edok Jamulembe pa Yehova. Pieno, nwang’ saa mi konye. Ku lapor, iromo lwong’e kara wubin wunamb kude yo peri. I saa ma kumeno, eromo koro iri lembe mir adundene, man icopo neno ayi mi konye. Kwaye etim alokaloka ceke m’ukwayere, ungo pi ninyayu anyong’a i ii, ento pi ninyutho nia emaru Yehova.

6. Wacopo konyo japonj Biblia nenedi kara enwang’ kero mi maku yub mi caku timo ni Yehova? (1 Jukorintho 16:13)

⁶ Ka japonj Biblia utie ku tegocwiny ma nia Yehova bikonye nikwo nimakere ku cik mir ukungu mi Biblia, ebinwang’u kero mi tiyo ku gin m’ebeponjo. (Som 1 Jukorintho 16:13.) Juromo poro tic peri ku pa japonji mi somo. Japonji ma ber ponjo ngo ng’atini aponja kende ku lembe ma nyen. Ento ekonye kara enwang’ nia en de ecopo tiyo kugi. Kumeno bende, japonji ma ber mi Biblia jik ungo kende kende ku ponjo ng’atini ku gin ma Mungu ubekwayu etim, ento etielo bende cwinye nia ku kony pa Yehova, ecopo timo alokaloka m’ukwayere i kwo pare. Iromo timo ang’o mange pi nikonyo japonj Biblia?

WAKONY JUPONJ BIBLIA GIMAR YEHOVA KU MER MA THUC

7. Yesu ukonyo juwinj pare nenedi kara mer ma gimaru ko Yehova umedere nidongo?

⁷ Yesu ugam ung’eyo nia mer ma julub pare gimaru ko Yehova bicwalugi nitiyo ku gin ma giponjo. Pieno eponjogi wang’ dupa ku lembe ma bikonyogi kara mer ma gimaru ko Weggi mi polo umedere nidongo. Ku lapor, eporo Yehova ku wego ma miyo piny ma beco ni awiya pare. (Mat. 7:9-11) Copere nia i kind juwinj pa Yesu, jumoko ugam ukoso mer ma wego nyutho ni awiya pare. Pieno, kepar pi kite ma giwinjiri ko kinde ma Yesu umaku lapor pa wego moko ma jakisa m’ujolo wode m’udwogo i pacu i ng’ey m’eai etimo lembe ma reco dupa. Lapor maeno ukonyogi ninyang’ i ayi ma Yehova nyutho ko kisa ni awiya pare ma n’iwi ng’om.—Luka 15:20-24.

8. Icopo konyo japonj Biblia nenedi kara mer m’emaru ko Yehova umedere nidongo?

⁸ In bende icopo konyo japonj Biblia kara mer m’emaru ko Yehova umedere nidongo. Pi nitimo kumeno, bed iketh nwoc iwi kite ma tung’ tung’ pa Yehova i saa mi ponji. I saa mi ponjiman, konye enyang’ i kite ma lembe m’ebeponjo ubenyutho ko nia Yehova umare. Ku lapor, saa ma wubeweco iwi jamgony, keth nwoc iwi kite ma lembene umulo ko kume athothi. (Rum. 5:8; 1 Yoh. 4:10) Ka japonj Biblia unyang’ nia Yehova umare athothi, eno copo cwale bende nimaru Yehova.—Gal. 2:20.

9. Ang’o m’ukonyo jalwo moko ma nyinge Michael nitimo alokaloka i kwo pare?

⁹ Wakewec iwi lapor pa Michael mi ng’om mir Indonezia. Edongo i lemandha, ento emaku ngo yub mi limo batizo. Kinde m’edoko ku oro 18, edok i ng’om mange pi nibedo dereva mi muthukari ma dongo. I ng’eye edwogo i Indonezia pi nigamu dhaku, man edog eweko juruot pare pi nicitimo tic i ng’om mange. I kind saa ma rom eno, dhaku pare ku nyaku pare gicaku ponjo Biblia man gitimo mediri ma ber. I ng’ey tho pa min, eng’iyo nidwogo i pacu pi nigwoko won, man en de ewok eyiyo niponjo Biblia. Saa ma gibeng’iyo i thenge m’uwacu “Med nyang’ peri” mi ponji mi 27 mi buku Icopo kwo kud anyong’a rondo ku rondo!, lembene umulo adunde Michael lee mandha. Kinde m’eparu pi litho ma Yehova uwinjo saa m’ebeneno Wode ubesendere, ecaku wak. Lembuno uketho ebedo ku foyofoc ma lee pi jamgony, e etimo alokaloka i kwo pare man elimo batizo.

WAKONY JUPONJ BIBLIA GIKETH TIMO NI YEHOVA I KABEDO MA KWONG’A

10. Yesu ukonyo julub pare ma kwong’a nenedi kara giketh tic mi Ker i kabedo ma kwong’a? (Luka 5:5-11) (Nen bende cal.)

¹⁰ Julub pa Yesu ma kwong’a gigalu ngo ku nyang’ nia ebino Masiya ma jung’olo pire. Ento gibino ku yeny mi kony pi niketho tic mi lembanyong’a i kabedo ma kwong’a i kwo migi. Ku lapor, saa ma Yesu ubekwayu Pethro gikud Andrea nia gilub toke pi saa ceke, nwang’u dong’ gitie julub pare pi kare moko. (Mat. 4:18, 19) Gibed gitimo tic mi dwar karacelo ku Yakobo man Yohana, man tije ubino wotho ma ber. (Mark. 1:16-20) Kinde ma Pethro gikud Andrea “giweko voi migi,” copere nia gipangu kite ma juruot migi bidok kwo ko kinde ma gibelubo tok Yesu. Ang’o m’ucwalugi niketho tic mi Ker i kabedo ma kwong’a? Kpawa ma nwang’ere i buku pa Luka ubenyutho iwa nia Yesu utimo udu moko m’utego cwinygi nia Yehova utie ku copo mi pong’o yeny migi.—Som Luka 5:5-11.

11. Wacopo tiyo nenedi ku lembe ma wakadhu kud i iye pi niteng’o yiyoyic pa japonj Biblia?

¹¹ Wan wambe ku copo mi timo udu calu Yesu. Ento wacopo tiyo ku lapor m’ubenyutho kite ma Yehova konyo ko ju ma gikethe i kabedo ma kwong’a i kwo migi. Ku lapor, nyo ibepoy pi kite ma Yehova ukonyi ko saa m’icaku cidho i coko? Saa moko nyo ugam ukwayu iwec ku jadit tic peri pi nikoro ire nia pirang’o ukwayu ibed ijig tic i wang’e pi nicidho i coko. Kan ibekoro lembe m’ikadhu kud i iye ni japonj Biblia, wec iwi ayi ma yiyoyic peri udoko tek ko saa m’ineno nia Yehova ukonyi i ng’iyong’ic m’itimo mi ketho thier pare i kabedo ma kwong’a.

12. (a) Pirang’o ukwayu wabed wacidh watel wi ponji mi Biblia ku jurwey ma tung’ tung’? (b) Icopo tiyo kud ang’o pi nikonyo japonj Biblia peri utim mediri? Kemii lapor moko.

¹² Gin mange ma copo konyo japonj Biblia peri utie niwinjo kite ma Jukristu mange de gitimo ko alokaloka i kwo migi pi niketho timo ni Yehova i kabedo ma kwong’a. Pieno, bed icidh itel wi ponji pare kud umego ku nyimego ma gikadhu kud i lembe ma tung’ tung’. Kway gikor kite ma ging’eyo ko lemandha man lembe ma gitimo pi niketho timo ni Yehova i kabedo ma kwong’a i kwo migi. M’umedo maeno, wuku japonj Biblia peri wubed wuting’ saa mi neno video mi thenge m’uwacu “Med nyang’ peri” man kan ukwayere, mi thenge m’uwacu “Tim sayusac” mi buku Icopo kwo kud anyong’a rondo ku rondo! Ku lapor, kinde ma wun’i ponji mi 37, wuromo ng’iyo i cik mir ukungu ma nwang’ere i video ma thiwiye tie, Yehova bipong’o yeny mwa.

WAKONY JUPONJ BIBLIA GICUNG MA TEK I WANG’ JAI

13. Yesu ukonyo julub pare nenedi kara gibed ayika ninyego ku jai?

¹³ Yesu uyero ni julub pare wang’ dupa nia gibinwang’iri i wang’ jai mi jumange, kadok mi wedi migi bende. (Mat. 5:11; 10:22, 36) Saa ma tic pare udhingo thum, epoyo julub pare nia jubinego jumoko m’i kindgi. (Mat. 24:9; Yoh. 15:20; 16:2) Ekwayugi nia gibed ku wang’gi kinde ma giberweyo lembanyong’a. Emiyo igi juk ma nia kud gicung i wang’ ju m’ubejai i kum yiyoyic migi, man nia gitii ku rieko pi nimediri nirweyo lembanyong’a.

14. Waromo konyo japonj Biblia nenedi kara ebed ayika pi jai ma romo wok? (2 Timoteo 3:12)

¹⁴ Pi nikonyo japonj Biblia mwa kara ebed ayika ninyego ku jai, wakor ire lembe ma jutic wadi, ma jurimbe man ma wedi pare romo yero ire. (Som 2 Timoteo 3:12.) Wanyuth ire nia jutic wadi moko romo caye pilembe ebekwo nimakere ku cik mir ukungu mi Biblia. Jumange romo cayu yiyoyic pare m’ujengere iwi Biblia, eno ke kadok wedi pare ma ceng’ini. Ka wakonyo juponj Biblia mwa con con kara gibed ayika pi jai ma romo wok, e gibicungo ma tek kinde ma gibenwang’iri i wang’ jai.

15. Ang’o ma copo konyo japonj Biblia ninyego ku jai mi wedi pare?

¹⁵ Ka wedi pa japonj Biblia moko ubenyutho ire jai, kor ire nia eno tie lembe ma timere, kum kadok Yesu ngi de jupagi ubino ku nen ma rac i wiye. (Mark. 3:21; Yoh. 7:5) Kwaye epar pi thelembe ma saa moko nyo uketho ng’eicwiny umakugi i kume. Copere nyo gibeparu nia erwinyo, kunoke kende kende nyo gitie ku paru ma rac iwi Jumulembe pa Yehova. Pieno, kony japonj Biblia kara emedere ninyutho cirocir man ebed ewec i bang’ jumange ku woro, kadok i bang’ wedi pare.

16. Wacopo konyo japonj Biblia nenedi kara ebed ewec pi yiyoyic pare ku bodho?

¹⁶ Kadok nwang’u wedi pa japonj Biblia moko ubenyutho nen ma ber de, re etie ber nia kud ekor igi lembe ceke wang’ acel maru wigi bipong’o, man eno romo ketho macen giyiyo ngo niweco kude iwi lemdini. Pieno kway japonj Biblia ubed uwec pi yiyoyic pare i ayi ma romo weko kaka mi wec pi macen. (Kol. 4:6) Saa moko ecopo kwayu wedi pare gimond i kusika mwa mir internet jw.org. Eno bikonyogi niponjo lembe lee iwi Jumulembe pa Yehova gin gigi.

17. Icopo konyo japonj Biblia peri nenedi kara eng’ey nikonyo dhanu m’utie ku paru ma vii iwi Jumulembe pa Yehova? (Nen bende cal.)

¹⁷ Iromo tiyo ku thiwiwec m’ulwobiri mi jw.org m’uwacu “Penji ma dhanu bepenjo akeca iwi Jumulembe pa Yehova” pi nikonyo japonj Biblia uyik dwokowang’ lembe ma yot mi penji ma wedi pare kunoke jurutic wadi giromo penje ko. (2 Tim. 2:24, 25) I ajiki mi ponjiman, wuwec iwi thenge m’uwacu “Dhanu moko beyero kumae” kunoke “Ng’atu moko romo penji kumae” mi buku Icopo kwo kud anyong’a rondo ku rondo!​ Kway japonj Biblia urud dwokowang’ penjine ku wec pare gire. Kan ukwayere, konye ku lilo wang’ dwokowang’ penji pare. Ng’iyo ma kumeno bikonye nicero bang’ yiyoyic pare ku tegocwinye.

18. Icopo miyo amora nenedi i kum japonj Biblia kara ecak rweyo lembanyong’a? (Matayo 10:27)

¹⁸ Yesu ukwayu julub pare nia girwey lembanyong’a kamaleng’. (Som Matayo 10:27.) Ka japonj Biblia ucaku weco pi yiyoyic pare con con, eno biketho ebigalu ngo ku caku jengere iwi Yehova. Icopo konye nenedi kara eketh lembakeca maeno? Ka jutwong’o pi kampany moko, calu ve mi lwong’o dhanu i Poy pi tho pa Yesu kunoke i coko ma dit mir adhura, kwaye epar pi gin m’eromo timo kara erom nidoko jarwey. Kor ire thelembe m’uketho dhanu ma dupa ginwang’u nia ebino igi yot nicaku rweyo lembanyong’a i saa mi kampany. Icopo kwaye bende nia etim kero epong’ lembe m’ukwayere pi nicaku miyo korolembe i coko m’i kind yenga, kara eponj niweco pi yiyoyic pare ku tegocwinye.

WANYUTH NIA WAGENO JUPONJ BIBLIA MWA

19. Yesu unyutho nenedi nia egeno julub pare, man wacopo lubo lapor pare nenedi?

¹⁹ I wang’ tho pa Yesu man i wang’ dok pare i polo, ewacu ni julub pare nia gibidok bedo kendo karacelo kugi. Ginyang’ ungo nia ebino yero nia gibicidho i polo. Re Yesu uketho wiye zoo i kum gwoko bedoleng’ migi ento ungo i kum jiji ma gibino ko. (Yoh. 14:1-5, 8) Egam eng’eyo nia bikwayu kare moko ukeukadhi kara ginyang’ i lembe moko, calu ve i genogen mi cidho i polo. (Yoh. 16:12) Calu Yesu, ukwayu wan bende wanyuth ni juponj Biblia mwa nia watie ku tegocwiny nia gibemito ginyay anyong’a i Yehova.

20. Nyamego moko mi Malawi unyutho nenedi nia etie ku genogen nia japonj Biblia pare bitimo gin m’atira?

²⁰ Wamedara nibedo ku genogen nia juponj Biblia mwa gibemito gitim gin m’atira. Wakewec iwi lapor pa nyamego moko mi ng’om mi Malawi ma nyinge Chifundo. Ecaku telo wi ponji mi Biblia pa dhaku moko m’aradu ma nyinge Alinafe m’ubino i dini mi Katholiki. Ebed etiyo ku buku Icopo kwo kud anyong’a rondo ku rondo!​ Saa ma gibedaru ponji mir 14, Chifundo ukwayu Alinafe ukeukor paru pare iwi tiyo kud ayi gin m’acwiya pi nitimo thier ni Mungu. Alinafe udwoko ku ng’eicwiny kumae: “Eno tie ng’iyong’ic pa ng’atini en gire!” Chifundo uparu nia dong’ ponji mi Bibliane bijik de cing’ nica. Ento emedere nitelo wi ponji pa Alinafe ku cirocir, m’etie ku genogen nia saa biromo m’ebinyang’ i iye. Dwi moko i ng’eye, Chifundo upenjo Alinafe ku penji ma e ma nwang’ere i ponji mi 34: “Niai m’icaku ponjo Biblia man m’icaku ng’eyo Mungu mandha ma Yehova, bero ang’o m’idaru nwang’u?” Chifundo ukoro kumae: “[Alinafe] uweco iwi lembe dupa ma beco; acel m’i kindgi ubino nia Jumulembe pa Yehova gitimo ngo lembe ma Biblia ukwero.” Nyanok i ng’eye, Alinafe ujigo nitiyo kud ayi gin m’acwiya man epong’o lembe m’ukwayere pi nilimo batizo.

21. Wacopo konyo japonj Biblia nenedi kara ebed kud ava mi maku yub mi caku timo ni Yehova?

²¹ Kadok nwang’u Yehova re ‘ma ketho [kodhi mi lemandha] dongo’ i dhanu de, re wan de watie ku tic mi konyo japonj Biblia kara etim mediri. (1 Kor. 3:7) Wajik ungo kende kende niponje ku lembe ma Mungu ubekwayu i bang’e, ento wakonye eponj nimaru Yehova ku mer ma thuc. Wakwaye bende nia pi ninyutho nia emaru Mungu, mito eketh timo ire i kabedo ma kwong’a i kwo pare. Man wakonye eng’ey kite m’ecopo jengere ko zoo iwi Yehova saa m’ebenwang’ere i wang’ jai. Ka wabenyutho ni japonj Biblia nia watie ku genogen nia ebitimo gin m’atira, eno ketho cwinye doko tek nia ebicopere ire bende nikwo nimakere ku cik pa Yehova man nimaku yub mi timo ire.