Wanwang’u ponji i bang’ Japonji mwa ma dit i kwo mwa zoo

LAPOR MI JUNYODO PARA

I oro 1957, junyodo para giweko Italie gidok i Kindersley, i Saskatchewan, i ng’om mi Canada. E ndhu ndhu, giwok giponjo lemandha, man lemandha udoko ni gin ma pire tek lee i ot fwa. Abepoy nia saa m’abino nyathin, abed ariyo duu i tic mi lembanyong’a ku jufwa. Eno uketho saa moko abed asembo nia acaku “tic pa jayab yo ma jakony” ku oro abora.

Junyodo para gibino jucan; ento gibed gitwoniri ku piny dupa pi Yehova. E kumeno, giweko iwa lapor ma ber mandha. Ku lapor, i oro 1963 gilworo piny migi ma pol pi ninwang’u sente mi cidho i coko ma dit ma diko ng’om ma tung’ tung’ ma jutimo i Pasadena, i Californie, i États-Unis. I oro 1972, wadok i Trail, i theng ng’om mi Colombie britanique i ng’om mi Canada, i kilometre ma romo 1000 pi nikonyo i therithwar ma juweco i iye dhok mir Italie. Baba ubed utimo tic mi yiko kum udi ma dongo. Ekwero wang’ dupa nia kud jumed rwom pare i tic kara eketh wiye zoo i kum lembe mi thenge mi tipo.

Atie ku foyofoc ma lee pi lapor ma ber ma junyodo para giweko iwa wakud awiya fwa mange adek. Acaku nwang’u ponji ma dongo m’ukonya i tic pa Yehova niai kud i lapor migi. Ponjine moko ni e: Tek ayenyo ma kwong’a Ker, Yehova bigwoka.—Mat. 6:33.

ACAKI MI TIC MI SAA CEKE

I oro 1980, wagamara ku nyamego moko ma leng’ man m’uketho wiye zoo i kum timo ni Yehova. Nyinge Debbie. Wabino kud ava mi caku tic mi saa ceke, pieno Debbie umaku tic pa jayab yo dwi adek i ng’ey nyom mwa. I ng’ey ma watimo oro acel i gamiri mwa, wadok i nyathi cokiri moko ma yeny ubino lee i iye, man an de awok acaku tic pa jayab yo.

I ng’ey kare moko, cwinywa utur, man wanwang’u nia mito wadok kaka mange. Ento i wang’ niai, waweco ku jaliew mi twodiri. Ewacu iwa ku mer man terere kumae: “Wun re m’ubedwoko lembe tek iwu. Wubeketho wiwu kwa i kum peko mwu. Kakare nitimo kumeno, wuketh wiwu zoo i kum lembe ma beco, e wubinwang’ugi.” Eno ubino tap juk ma wabino ku yenyne. (Zab. 141:5) Watiyo kude ndhu ndhu; e wanyang’ nia wabino nwang’ara ku lembe ma beco dupa kaka ma wan’i iye. Ju ma pol mi cokiri gibino kud ava mi timo lee i tic pa Yehova, uketho i iye aradu man jumoko ma judhoggi mi gamiri utie ngo Jumulembe pa Yehova. Lapor migi uponjowa ku lembe dupa. Waponjo niketho wiwa i kum lembe ma beco man nijengara zoo iwi Yehova nia en re m’ebiyiko lembe m’ubeyenyo nen ve nia ubewotho cuu ngo. (Mik. 7:7) E kumeno, wanwang’u anyong’a mwa kendo, man de andha lembe udog uyikere.

Umego m’uponjowa i somo ma kwong’a mi tic mi juyab yo ma wadikara i iye gigam gitimo i ng’om mange. Kinde ma gibenyutho iwa cal ma gimaku man gibekoro iwa peko ku mugisa ma ginwang’u, giopo ava mi tic mi misioner i kumwa. Pieno wakeco nia mito wan de wakewamak tic maeno.

Pi niyikara nitundo i kum lembakeca maeno, i oro 1984 wadok i theng Quebec ma juweco iye dhok mi Français i kilometre ma kadhu 4000 niai kud i Colombie britanique. Pieno ugam ukwayu waponj suru man dhok ma nyen. Peko mange ubino nia wabino ku sente nyanok. Pi nikwo, saa moko ubed ukwayu wabek ubulu kata i podho pa jalwo moko. Debbie ubino jabodho mi tedo katane! Ento peko maeno ucerowa ngo ku ketho wiwa i kum anyong’a ma wabino nwang’u. Bende, wabed waneno cing’ Yehova i kwo mwa.—Zab. 64:10.

Ceng’ acel, mbwang’ kumeni julwong’owa ku telefon. Ebino lwong’o mi citimo i Bethel mi Canada. I wang’e ke nwang’u wagam wapong’o karathasi mi kwayu pi somo mi Gilead. Pieno wiwa ujebere. Wapenjara ka nyo mito wacidh i Bethel kunoke ngo. Re wadog wayiyo lwong’one. Saa ma watundo i Bethel, wapenjo umego Kenneth Little m’ubino acel m’i kind umego mi komite mi filial kumae: “Ka dong’ karathasi ma wapong’o pi Gilead ca ke?” Edwoko kumae: “Wabineno lembuno ka saane romo.”

E yenga acel i ng’eye, saa mi neno lembene ugam uromo: Julwong’owa waku Debbie i Gilead. Pieno ugam ukwayu wang’ii i kind lembe ario; nyo wabibedo i Bethel kunoke wabicidho i Gilead. Umego Little uwacu iwa kumae: “Wung’ii lembe acel, re wung’ey nia nindo moko wubiparu ng’iyong’ic mucelo. Gin zoo gi rom; Yehova poko mugisa i wigi ceke.” Wayiyo mwa lwong’o mi Gilead, man pi oro ma dupa, waneno nia umego Little ugam uyero lemandha. Watiyo ku juk parene pi nikonyo jumange m’ukwayu nia gin bende ging’ii nia gibiyiyo kit tic ma kani.

KWO MWA I TIC MI MISIONER

Wabino kud anyong’a ma lee nibedo i kind jukalasi 24 ma julwong’o i kalasi mi 83 mi somo mi Gilead m’ucaku i dwi mir 4, oro 1987 i Brooklyn, i New York. Juponji mwa ma kwong’a ubino umego Ulysses Glass giku Jack Redford. Dwi abic umol ve pii, man jumiyo diplom mwa i nindo 6 mi dwi mir 9, oro 1987. Juorowa i Haiti karacelo ku John giku Marie Goode.

Nwang’u juoro ngo jumisioner m’uai i Gilead i Haiti niai ma juryemo ungu migi ma tokcen i oro 1962. Yenga adek i ng’ey ma jumiyo diplom mwa, wanwang’ara i Haiti bor i kind gudi i nyathi cokiri moko mi jurwey 35. Wabino aradu man nwang’u wang’eyo ngo lembe lee. M’umedo maeno, wabed wakwo kendwa i ot mi jumisioner. Dhanu mi ng’ombe gibino jucan ma ngolo ngolo, man dupa m’i kindgi dhiang’ unyono wang’gi. I kind nindo ma kwong’a mi tic mwa mi misioner eno, wanwang’ara i wang’ yakini, alaralara mi ker, mac ma jucwinyo i ndaki pi nicero gengi man vira.

Wanwang’u ponji lee i lapor mir umego ku nyimego mwa mir Haiti ma gibino jumutoro man weg tego. Kwo ubino tek ni ju dupa m’i kindgi, ento gimaru Yehova man tic mi rweyo lembanyong’a. Nyamego moko m’utii ugam ung’eyo ngo nisomo piny; ento emaku giragora ma romo 150 ku wiye. Lembe ma wabed waneno kubang’ ceng’ umedo amora mwa i tic mi rweyo lembanyong’a mi Ker pilembe Ker maeno kende re ma bidaru peko mi dhanu. Wabedo kud anyong’a ma lee nineno nia i kind juponj Biblia mwa ma kwong’a, jumoko udoko juyab yo ma nja, juyab yo ma segi man judong cokiri.

Saa ma wan’i Haiti, arombo ku Trevor m’ubino jamisioner moko m’aradu mi dini mi Mormon. Waweco kude iwi lembe m’i Biblia wang’ dupa. Oro ma lee i ng’eye, rek kumeni anwang’u barua moko m’uai i bang’e; ekiewo kumae: “Abilimo batizo i coko ma dit mi twodiri m’ubebino! Abemito adok i Haiti kara abed jayab yo ma segi i kabedo ma rom m’alar atimo i iye calu jamisioner mi dini mi Mormon.” Gitimo tap kumeno karacelo giku min ot pare pi oro ma dupa.

WATIMO I EUROPE MAN I NG’EYE I AFRIKA

Juorowa nicitimo i theng Europe moko ma dhu tic mi Ker ubino yabere magway i iye. I oro 1992, watundo i Ljubljana, i ng’om mi Slovénie, ceng’ini ku kabedo ma junyodo para gidongo i iye i wang’ nidok i Italie. Lwiny ubino medere asu i ng’om mi Yougoslavie ma con. Umego mi Vienne, i ng’om mir Autriche; mi Zagreb, i Croatie; ku mi Belgrade, i Serbie re m’ubed uneno wi tic mi lembanyong’a i kabedo maeno. Kawoni dong’ ng’om maeno ceke man utie ku Bethel ma pare gire.

Pieno ugam ukwayu wang’ii ku dhok man suru ma nyen. Dhanu ma kuca ubed utiyo ku wec ma nia, “Jezik je težek” ma thelembene tie “Dhok meni tek ma rac.” Ebino tek de andha! Wagam wamaru umego ku nyimego lee pi gwoko bedoleng’ migi; gibino ayika nijolo alokaloka ma dilo mwa ukelo, man waneno kite ma Yehova umiyo ko igi mugisa. Wang’uni bende waneno kite ma Yehova yiko ko lembe i saane man i ayi ma ber. Oro ma dupa ma watimo i ng’om mi Slovénie ukonyowa nitiyo ku ponji ma walar wanwang’u i wang’e man ninwang’u mange ma nyen.

Ento alokaloka mange de dupa ubino kurowa. I oro 2000 juorowa i Côte d’Ivoire, i Afrika ma yo Reto. I ng’eye i dwi mir 11, oro 2002, lwiny utugowa uketho waringo i ng’om mi Sierra Leone. Kuca de nwang’u fodi lwiny moko m’utimo oro 11 uai uthum athuma. Wabino ku can lee niweko Côte d’Ivoire ahakahaka. Ento ponji ma walar wanwang’u ukonyowa nigwoko anyong’a mwa.

Waketho wiwa i kum adwogi ma ber ma wabino nwang’u i therithwar mwa man i kum umego ku nyimego mwa ma jumer ma giciro lwiny pi oro ma dupa. Andha gibino jucan, ento gibino ayika nikonyiri i kindgi ku piny ma gitie ko. Nyamego moko umiyo bongu ni Debbie. Debbie uyenyo kwero, ento ecung’e ko asu; eyero kumae: “I saa pa lwiny, umego mwa mi ng’om mange gikonyowa. Kawoni ewok i wiwa.” E waketho lembakeca mi lubo lapor migi.

Tokcenne, wadok i Côte d’Ivoire, ento anyobanyoba mi lemgamba unyolo yakini kendo. Pieno i dwi mir 11, oro 2004, wawok kud i ng’ombe kud helikopter, man ng’atuman uringo ku sakoc mi kilo 10 kende. Cing’ nica wanindo i die ng’om i kambi mi juaskari mi France man urwonde waringo i Suisse. Saa ma watundo i Bethel ma kuca i kum diewor ma ling’, umego mi komite mi filial man juponji mi Dharaza mi tendo umego pi tic pa Mungu karacelo ku mon migi gijolowa ku yaw yaw; gigwakuwa man gimiyo iwa cam ma lieth ku cokola dupa mi Suisse. Lembene umulo adundewa lee mandha.

Juorowa pi kare moko i Ghana, man i ng’eye wadok i Côte d’Ivoire i ng’ey ma lak yakini ukwiyo. Berocwiny mir umego ukonyowa lee mandha i kind nindo mir ang’abacwiny ma waringo i iye ng’wec man saa ma wabetimo tic ma jukwayu i bang’wa i wang’ nidok kaka ma juorowa i iye. Kadok nwang’u waku Debbie wagam wang’eyo nia dhanu pa Yehova ging’iyo ninyutho mer i kindgi de, re wakeco nia wabineno ngo lembene ku tuko. I ng’eye wanyang’ nia lengelenge mi kwo maeno zoo uponjowa ku lembe dupa ma beco.

JUOROWA I MOYEN-ORIENT

I oro 2006, wanwang’u barua moko m’uai i kabedo mwa ma dit m’unyutho nia juorowa i tic ma nyen i Moyen-Orient. E wang’uni bende wanwang’ara ku lembe mange ma nyen, peko ma nyen, dhok ma nyen ku suru de ma nyen. Ugam ukwayu waponj lembe dupa dit i kabedo maeno m’ulag lemgamba ku lemdini unyang’ lee i iye. Wagam wamaru lee dhok ma tung’ tung’ m’umego mi cokiri ubed uweco, man waneno nia kan umego gibeworo telowic ma dilo mwa umiyo, eno ketho bedo i acel i kindgi. Wamaru umego ku nyimego mwa ma kuca lee pilembe dupa m’i kindgi uciro ku tegocwinygi jai mi wedi migi, mir awiya wagi mi somo, mi jurutic wagi man mi jirani migi.

Wacidho i coko ma segi ma jutimo i oro 2012 i Tel Aviv, i Israel. Ebino wang’ ma kwong’a ma nia dhanu pa Yehova ucokiri i kabedo maeno i wel ma lee tho rukeca niai i ceng’ mi Pentekoste mi oro 33 N.N.Y. Ebino nindo ma wabiwil ko ngo nyanok de!

I kind oro maeno, juorowa niciliewo ng’om moko ma jucero tic mwa i iye. Wawotho ku girasoma mwa moko, wawok wadikara i tic mi rweyo lembanyong’a man i coko ma dongo mi twodiri ma wend dhanu ubino nyanok i igi. Juaskari ma kud atum ma keyo kum dhanu ubino kakare zoo, ento wabed wawinjara nia watie museme ka wabewotho i amung’ ku jurwey moko ma kuca.

WADOK KENDO I AFRIKA

I oro 2013, ebino alokaloka ma lee kinde ma juorowa i Bethel mi Kinshasa i ng’om mi Congo m’utie ng’om moko ma lac man ma leng’ lee, ento ma dhanu m’i iye utie jucan ma ngolo ngolo man ma lwiny upong’ lee i iye. Ku kwong’a wayero kumae: “Wang’eyo Afrika cuu; watie ayika nidok kuca.” Ento ugam ukwayu waponj lembe lee mandha pilembe saa moko wabed wawotho kaka ma gengi kadi bralo de mbe i iye. Re wanwang’u lembe dupa ma beco ma wacopo ketho wiwa i kumgi. Ku lapor, umego gibino mediri niciro kud anyong’a kadok gibino ku peko pa sente, gimaru tic mi lembanyong’a man gibed gitimo kero ma lee pi nicidho i coko ku coko ma dongo. Waneno ku wang’wa kite ma tic mi Ker umedere ko i wang’e kende kende nikum kony man mugisa pa Yehova. Tic mi saa ceke ma watimo i Congo pi oro m’ulwar uponjowa ku lembe dupa ma beco man uketho juruot mwa mi tipo umedere.

I thum pa oro 2017, wadok i ng’om mange, niwacu i Afrique du Sud. Etie Bethel ma dit nisagu zoo ma watimo i iye nitundo kawoni. Tic ma juwok jumiyo iwa de ubino tic ma nyen. Wang’uni de ugam ukwayu waponj lembe lee. Ento ponji ma walar wanwang’u i wang’e ukonyowa lee. Wamaru umego ku nyimego mwa dupa ma gidaru ciro udoko pi oro m’ulwar. Etie ber dit nineno nia juruot mi Bethel gibetimo tic i acel kadok gitie dhanu mi rangi man mi suru ma tung’ tung’. Ubenen kamaleng’ nia Yehova ubemiyo mugisa ni dhanu pare ku kwiyocwiny, pilembe giberonyo ng’atu ma nyen man gibetiyo ku cik mir ukungu mi Biblia.

Pi oro ma dupa, waku Debbie watimo tic dupa ma beco, waponjo ning’iyo ku suru ma tung’ tung’ man waponjo dhok ma nyen swa. Lembe ubino yot ungo iwa saa zoo, ento saa ceke waneno mer ma lokere ngo ma Yehova unyutho iwa nikadhu kud i dilo pare man i bang’ umego ku nyimego mwa m’i wang’ ng’om zoo. (Zab. 144:2) Tic mi saa ceke ma watimo uponjowa nidoko jutic ma beco pa Yehova.

Atie ku foyofoc lee pi ponji ma junyodo para gimiyo ira, pi kony pa min ot para mir amara ma Debbie, man pi lapor ma beco mir umego ku nyimego mwa m’i wang’ ng’om zoo. Kawoni waketho wiwa zoo i kum lembe m’ubebino i wang’wa, man wakeco nia wabimedara nijolo ponji ma Japonji mwa ma dit ubemiyo iwa.