Ju “m’adundegi ubedo ayika” gibiwinjo

1. Dhanu bejolo lembanyong’a i ayi ma tung’ tung’ ma kani? (Tic mi Jukwenda 13:47, 48; 16:14, 15)

I RUNDI ma kwong’a, dhanu ma dupa gijolo lemandha ndhu ndhu i ng’ey ma giwinjo ponji mi Jukristu. (Som Tic mi Jukwenda 13:47, 48; 16:14, 15.) Tin bende, anyong’a nego dhanu moko saa ma giwinjo lembanyong’a wang’ ma kwong’a. Kadok ju ma gibed gijolo ngo rwonglembe mi Ker i wang’e de, gicopo dok yabu adundegi ma lac i ng’eye pi nijole. Dong’ ukwayu watim ang’o ka wanwang’u dhanu “m’adundegi ubedo ayika” i lembanyong’a?

2. Tic mwa mi ketho dhanu udok julub urombo ku pa jarafur nenedi?

² Wakenen lapor moko. Jucopo poro tic mwa mi ketho dhanu udok julub ku tic pa jarafur. Ka cam ma jarafur upidho moko ular ucek, ekayu maeca; re nwang’u asu ebewotho gwoko mange ma fodi ucek ungo. Kumeno bende, ka wanwang’u ng’atu m’uyiyo rwonglembe ma watero, wamito wakonye edok jalub pa Kristu m’umbe galu. Saa maeno, wawotho liewo jumange m’ubekwayu saa ukeukadh lee ka ginen bero mi lembe ma wabeponjo kogi. (Yoh. 4:35, 36) Copo mi ng’iyo i lembe bikonyowa nilondo bodho ma copo bedo ber pi juwinj mwa. I thiwiwec maeni, wabineno gin ma waromo timo i saa mi rombo ma kwong’a pi nikonyo dhanu ma gitie ayika niyiyo ponji. Wabineno bende gin ma waromo timo kara gitim mediri.

KINDE MA GIYIYO

3. Waromo tiyo ku bodho ma kani ka wanwang’u ju m’ujolo rwonglembe mwa? (1 Jukorintho 9:26)

³ Ka wanwang’u dhanu m’ujolo rwoglembe mwa i tic mi lembanyong’a, wamito wakonygi ndhu ndhu gicak niwotho i yo ma terojo i kwo. Saa maeno, wacikara ninyutho igi pi ponji mi Biblia man nilwong’ogi i coko mwa m’umbe galu.—Som 1 Jukorinto 9:26.

4. Caku ponji mi Biblia ndhu ndhu ukelo adwogi ma ber ma kani? Kekor.

⁴ Nyuth pi ponji mi Biblia. Jumoko ma waweco kugi gibedo ayika pi ponji mi Biblia ndhu ndhu. Ku lapor, ceng’ kas’ang’wen moko, mego moko ma kwo i Canada ucoro i kum prezanthwar man eting’o nyathibuku Icopo kwo kud anyong’a rondo ku rondo! Nyamego m’ucungo i kum prezanthwar ukoro ire nia nyathibuku eno utie pi niponjo Bilia ku dhanu m’umbe cul. Lembene unyang’u megone man eweko namba mi tefefon pare. Dhug uthieno mi cing’ nica, megone ukiewo mesaj ire pi nikwayu ponji mi Biblia. Nyamegwa uyero ire nia ebicidho niliewe i thum pa yenga, e megone upenje kumae: “Nyo icopo bino ngo urwo? Kum wang’a bidong’ thwolo.” E gicaku ponji mi Biblia kas’abic. I thum mi yenga maeca megone ucidho i coko wang’ ma kwong’a; emedere ku ponji pare mi Biblia man etimo mediri pio pio.

5. Wacopo tiyo ku copo mi ng’iyo i lembe nenedi tek wabenyutho pi ponji mi Biblia ni ng’atu moko? (Nen bende cal.)

⁵ I andha, tie ngo dhanu ceke ma waberweyo igi re ma bedo ayika calu mego ma waai waweco pire. Jumoko waliewogi wang’ dupa ka giyiyo. Waromo kecaku weco ku ng’atini iwi thiwiwec m’unyang’e. Tek wabemedara nibedo ku nen ma ber i wiye man wabenyutho nia andha wabedieng’ pire, wacopo caku kude ponji mi Biblia i ng’ey kare ma nok. Dong’ wacopo yero ang’o kinde ma wabenyutho pi ponji mi Biblia ni ng’atini? Penji maeno jugam jupenjo ko umego ku nyimego dupa ma gitie jubodho i caku the ponji mi Biblia.

6. Wacopo nyutho nenedi ni ng’atu m’ujolo ponji mwa nia wamito medara ku ponjine?

⁶ Jurwey lembanyong’a ku juyab yo ma jugam jupenjogi iwi caku the ponji mi Biblia, gikoro nia i ng’om moko kan ibemito nyutho pi ponji mi Biblia, etie ber niuro kit wec ma calu ve “ponji,” “ponji mi Biblia,” kunoke “jubiponji.” Ginwang’u nia etie ber nitiyo ku wec ma calu ve “niweco,” “nikoro lembe i kindjo,” man “ning’eyo Biblia.” Kara wec umedere icopo royo paru ma calu ve, “etie lembe ma wang’uic nineno kite ma Biblia udwoko ko wang’ penji ma pigi tek mi kwo,” kunoke “Biblia utie ngo kende kende buku m’uweco iwi lemdini; enyutho iwa gin m’umaku watim.” Iromo medo kumae: “Eting’o ngo saa ma lee; pi dakika 10 nicidho 15 ci nwang’u iponjo lembe ma pire tek.” Icopo yero lembuno m’umbe nitiyo ku wec ma calu ve “program” kunoke “kubang’ yenga,” kum wec maeno miyo paru mi macikara.

7. Jumoko ginyang’ nia ginwang’u lemandha mi Biblia i saa ma kani? (1 Jukorintho 14:23-25)

⁷ Lwong’gi i coko. I rundi pa Paulo, copere nia dhanu moko ginyang’ nia ginwang’u lemandha mi Biblia kinde ma gicidho i coko mi Jukristu. (Som 1 Jukorintho 14:23-25.) Tin de wang’ ma pol ju ma nyen dupa gitimo mediri pio pio kinde ma gicaku cidho i coko. Dong’ icopo lwong’ogi i coko i saa ma kani? Buku Icopo kwo kud anyong’a rondo ku rondo! ponji mir 10 uweco pi coko mwa. Re ukwayu ngo ikur nia wukeutund i ponji maeno kan ilwong’ ng’atini i coko. Cing’ ma wuweco kude wang’ ma kwong’a ci, icopo lwong’e i coko mi thum pa yenga; iromo nyutho ire thiwi korolembe kunoke thiwiwec mi Otkur ma Wiw ma jubiponjo i cokone.

8. Wacopo ketho nwoc iwi lembang’o Kinde ma wabelwong’o ng’atini ubin i coko?(Isaya 54:13)

⁸ Kinde m’ibelwong’o ng’atu moko ubin i coko mwa, kor ire kite ma cokone ukoc ko ku mi dini mange. Kinde ma nyamego moko ma ponjo Biblia udikere wang’ ma kwong’a i ponji mi Otkur ma Wiw, epenjo japonji pare kumae: “Eca ng’atu m’ubetelo wi ponji ca ung’eyo nying’ dhanu ceke?” Japonji pare ukoro ire nia, waii ning’eyo nying’ dhanu ceke mi cokiri mwa, tap calu ma wang’eyo ko nying’ juruot mwa. Japonj Biblia unwang’u nia lembene ukoc bor ku mi kanisa migi. M’umedo maeno, iromo koro bende ni japonj Biblia thelembe m’uketho coko mwa ukoc ku mi jumange. (Som Isaya 54:13.) Wacokara pi nitimo thier ni Yehova, niponjo lembe i wiye man watielo cwinywa i kindwa. (Ebr. 2:12; 10:24, 25) Eno re m’uketho coko mwa upangere i ayi ma ber ma konyowa niponjo lembe, man junure ngo ku seremoni m’akeca. (1 Kor. 14:40) M’umedo maeno, juruko ngo Udi Ker mwa nisagu mukero pilembe wacidho i igi pi niwinjo ponji. Man wadodo ngo ungu moko mi lemgamba nisagu mange pilembe wadikara ngo i lemgamba moko ci; waroyo ngo dhogwa i lembene, man waloko ngo dhogwa ku ng’atini iwi lembe ma mwa ungo. Ecibedo ber nia walar wanyuth video ma thiwiye uwacu Lembang’o ma bekadhu i Otker? ni ng’atune. I ayi maeno, ebing’eyo nia ang’o m’ubekure kuca.

9-10. Ka walwong’o ng’atu moko ubino i coko, wacopo timo ang’o kara lworo kud unege? (Nen bende cal.)

⁹ Jumoko gimito ngo gicidh i coko mwa pilembe gilworo nia jubiwacu nia “gidwog i dini mwa.” Lar iketh cwiny ng’atu m’ilwong’o nia wamaru welo mwa man wadiyogi ngo ya gidikiri i lembe m’ubekadhu keca. Juruot utie ajola, uketho i iye awiya ma thindho bende. I coko mwa, juponjo ngo awiya ka kendgi, ento junyodo kud awiya ceke gibedo karacelo pi niwinjo ponji. I ayi maeno re ma junyodo ging’eyo nia awiya migi ubedikiri ku jukani man ke jubeponjogi ku lembang’o. (Poy. 31:12) Wabolo ngo thier man wapoko ngo avelop pi nikwayu sente. Ento walubo juk ma e ma Yesu umiyo: “Wunwang’u mananu, wun de wumii mananu.” (Mat. 10:8) Icopo yero ni ng’atune nia embe ku yeny mi kendo bongu mi bei ma tek pi nicidho i coko. Pilembe Mungu neno adunde ento ungo gin ma yo woko.—1 Sam. 16:7.

¹⁰ Ka ebino i coko, tim kero kara enwang’ere nia etie ajola. Nyuthe ni judong’ cokiri man ni jurwey mange. Tek enwang’u nia jujole ma ber, ebimaru edwog kendo. Tek embe ku Biblia, wusom Biblia peri wukude. Konye enyang’ i korolembe ma jubemiyo man kite ma waponjo ko OtKur ma Wiw karacelo.

KINDE MA PONJI MI BIBLIA UCAKU

11. Iromo nyutho nenedi nia ibeworo saa man program pa jawinj peri?

¹¹ Mito ngo wawil ku lembang’o ka wabetelo wi ponji pa ng’atu moko? Wor saa man program pare. Ku lapor, ka wudaru winjuru iwi saa mi caku ponji, tund con, kadok nwang’u dhanu m’i kabedo mwu beworo ngo saa de. M’umedo maeno, ecopo bedo ber nia iketh ponji mwu ma kwong’a ubed adundo. Jurwey moko ma jubodho gimiyo paru ma nia etie ber niponjo nyanok kadok nwang’u ng’atune ubemito nia wumederu asu de. Bende, kud iwec lee. Wek en re m’ekor paru pare.—Rie. 10:19.

12. Ukwayu wabed ku lembakeca ma kani niai i acaki mi ponji mi Biblia?

¹² Ukwayu ibed ku lembakeca mi konyo jawinj peri ung’ey Yehova giku Yesu, man emargi niai i acaki mi ponji mi Biblia. Pi nitimo lembe maeno, tel nen pare iwi Lembe pa Mungu, kakare nitelo nen pare i wii giri man iwi ng’eyong’ec m’itie ko iwi Biblia. (Tic. 10:25, 26) Jakwenda Paulo ubed uketho ponji pare ujengere iwi Yesu Kristu ma tie ng’atu ma Yehova uoro pi nikonyo dhanu ung’eye man umare. (1 Kor. 2:1, 2) Enyutho bende nia pire tie tek nikonyo julub ma nyen giceg kite ma tung’ tung’ ma jucopo poro ku mola ma kwar, mola ma tar man kidi ma pigi tek. (1 Kor. 3:11-15) Kite maeno uketho i iye yiyoyic, rieko, ng’iyo i lembe man lworo Yehova. (Zab. 19:9, 10; Rie. 3:13-15; 1 Pet. 1:7) Lub kit bodho mi ponji pa Paulo, niwacu kony juponj Biblia peri gibed ku yiyoyic ma tek man githey mer ma segi ku Weggi m’i polo ma jamer.—2 Kor. 1:24.

13. Wacopo nyutho cirocir man ninyang’ ku japonj Biblia nenedi? (2 Jukorintho 10:4, 5) (Nen bende cal.)

¹³ Lub kit bodho mi ponji pa Yesu: Nyuth cirocir man nyang’ ku dhanu. Kud ipenj penji ma ketho ng’atini winjere ber ungo. Ka ponji moko uwok tek ire, wukadh kud i wiye, wubidwogo i wiye i ng’eye. Kakare nidiye nia eyii ponji moko ma fodi etie ngo ayika niyiyo, wek ire saa ma lemandha ugur ko ulage i adundene. (Yoh.16:12; Kol. 2:6, 7) Biblia uporo ponji mi vupo ma wabeii niwodho kud iwi dhanu ku piny m’ucungo ma tek. (Som 2 Jukorintho 10:4, 5) Kakare ni ii niwodho ponji mi vupo m’unyang’ iwi japonj Biblia, ukwayu ku kwong’a wakonye eketh Yehova re m’ubed ni Kapondo pare ma tek, ka nok nok ebibedo yot ire niweko ponji mi vupo.—Zab. 91:9.

KINDE M’ECAKU BECIDHO I COKO

14. Wacikara nijolo ju m’utundo ma nyen i coko nenedi?

¹⁴ Yehova ubemito nia wajol ju ceke m’utundo ma nyen i coko mwa m’umbe akoyakoya. Ebemito kud wanen suru migi, nivo kunoke levol migi, kadi thek migi. (Yak. 2:1-4, 9) Dong’ wacopo nyutho igi mer nenedi?

15-16. Wacopo ketho ju m’utundo ma nyen i coko giwinjiri ma ber nenedi?

¹⁵ Ng’atu moko copo bino i coko mwa kende kende pilembe ebemito ekeng’ey lembe ma timere i iye, kunoke nyo wadi moko ma bedo bor kude re m’ukwaye nia ekecidhi. Pieno, wajol ng’atu ma kumeno m’umbe niketho ewinjere rac. Kwaye ebed i ng’eti. Wusom Biblia ku jamtic mange mi ponji karacelo kude, kunoke mii ire ma pare. Bende, dieng’ pi kite m’ebewinjere ko. Jalwo moko m’ubino wang’ ma kwong’a i coko mwa uyero ni umego m’ujole nia lewic ubenege pi bongu ma cuu ngo m’ekendo. Umegone uketho ewinjere ma ber man ekoro ire nia Jumulembe pa Yehova gikoc ungo ku dhanu mange. Jalwone utimo mediri nitundo i batizo, ento wiye uwil ungo ku lembe m’umego maeno udwoko ire. Re kinde ma wabedieng’ pi ju ma nyen m’utundo i coko mwa, wabed ku wang’wa, kud wapenjgi ku penji ma copo ketho giwinjiri rac kunoke m’umulo kum kwo migi gigi.—1 Pet. 4:15.

¹⁶ Wacopo ketho welo mwa giwinjiri ma ber tek wabenyutho woro i wec mwa kinde ma wabedwoko wang’ penji, wabekoro lembe moko, kunoke wabeweco pi ju m’utie ngo Jumulembe pa Yehova man iwi yiyoyic migi. Ur wec ma copo ketho gikier man ma nen ni anyware. (Tito 2:8; 3:2) Ku lapor, wacikara ngo niweco pi ponji migi i ayi m’ukoso woro. (2 Kor. 6:3) I lembe maeno, umego ma gibemiyo korolembe gicikiri nibedo ku wangg’gi lee. Gibinyutho nia gibedieng’ pi ju m’utie ngo Jumulembe pa Yehova m’ubino i Ot Ker, nwang’u gibekoro i wec ma nyang’ i iye tek igi.

17. Tek wanwang’u ju “m’adundegi ubedo ayika” i tic mi lembanyong’a, ukwayu watim ang’o?

¹⁷ Kubang’ nindo m’ubekadhu, tic mwa mi rweyo lembanyong’a ubedoko ni tic m’ukwayu wadhul pio pio, man wabemedara nisayu dhanu “m’adundegi ubedo ayika pi kwo ma rondo ku rondo.” (Tic. 13:48) Ka wanwang’ugi, wacikara ninyutho igi pi ponji mi Biblia wang’ acel, man nilwong’ogi i coko. Tek watimo kumeno, wabikonyogi nicaku wotho i yo ma “terojo i kwo.”—Mat. 7:14.