Yohana ma Jababutisi ubino ng’a?

Lembe ma Biblia udwoko

Yohana ma Jababutisi ubino jabila pa Mungu. (Luka 1:76) Junyole nyanok i wang’ thum mi rundi ma kwong’a W.N.Y. man ekwo i rundi ma kwong’a N.N.Y. Mungu umiyo ire tic mi yiko yo ni Masia kunoke Kristu. Pi nitimo tic maeno, Yohana ubed urweyo rwonglembe pa Mungu ni Juyahudi wagi kara gilok adundegi gidwog i bang’ Mungu.​—Marko 1:1-4; Luka 1:13, 16, 17.

Rwonglembe pa Yohana ukonyo dhanu ma gitie kud adunde m’atira ning’iyo nia Yesu mi Nazarethi re m’utie Masia ma jung’olo pire. (Matayo 11:10) Yohana umiyo amora i kum juwinj pare nia gilokiri kud i kum dubo man gilim batizo pi ninyutho nia giloko cwinygi. (Luka 3:3-6) Pilembe Yohana ubolo dhanu dupa i pii, eno re m’uketho julwong’e nia Yohana ma Jababutisi. Batizo ma pire tek nisagu zoo ma Yohana umiyo ubino pa Yesu.a​—Marko 1:9.

I thiwiwec maeni

• Girang’o m’uketho Yohana ma Jababutisi ubino ng’atu ma segi?

• Jurunyodo pa Yohana ma Jababutisi ubino ng’agi?

• Ng’a m’uketho junego Yohana ma Jababutisi?

• Nyo Yohana ma Jababutisi gibed giwinjiri ngo giku Yesu?

• I Biblia junwang’u dhanu adi ma nying’gi Yohana?

Girang’o m’uketho Yohana ma Jababutisi ubino ng’atu ma segi?

Jular junyutho pi tic m’ebitimo i kwo pare: Nikadhu kud i tic pare mi rweyo lembayong’a, Yohana upong’o lembila m’uweco pi jakwenda pa Yehova. (Malaki 3:1; Matayo 3:1-3) Enyutho nia etie ng’atu ma bikelo “dhanu ma dong’ gitie ayika i bang’ Yehova” niwacu eyiko yo ni Juyahudi wagi kara giyii rwonglembe pa ng’atu ma kwong’a m’ubino kaka Yehova, niwacu Yesu Kristu.​—Luka 1:17.

Sukulia pare: Yesu uyero nia “ng’atu moko mbe m’uwok dit ma sagu Yohana ma Jababutisi, ento ng’atu ma nok i Ker mi polo e dit nisage.” (Matayo 11:11) Calu Yohana ubedo ngo kende kende jabila ento bende “jakwenda” ma jular juewo pire, jatic pa Mungu moko mbe m’ular ukwo i wang’e m’ubino dit nisage. Bende, wec pa Yesu unyutho nia Yohana bibedo mbe i Ker mi polo.b Jabila maeno ma won bedopwe ular utho nwang’u fodi Yesu uyabu ngo dhu yo mi kwo i polo. (Juebrania 10:19, 20) Pieno, Yohana bibedo i kind dhanu ma bikwo i the Ker pa Mungu iwi ng’om, ma nwang’u etie ku genogen mi kwo rondo ku rondo i Paradizo.​—Zaburi 37:29; Luka 23:43.

Jurunyodo pa Yohana ma Jababutisi ubino ng’agi?

Jurunyodo pa Yohana ubino Zekaria gikud Elizabeth. Zekaria ubino Jayahudi ma jalam. Nyol pa Yohana ubino lembe mir udu pilembe min ubino jamugumba; bende nwang’u dong’ min giku won zoo “oro migi ucidho lee.”​—Luka 1:5-7, 13.

Ng’a m’uketho junego Yohana ma Jababutisi?

Ubimo Herode Antipa uketho juthumo wi Yohana. Eketho juthume pilembe dhaku pare ma Herodia re m’uyero nia nyare ukway wiyene. Herodia udagu Yohana pilembe eyero ni Herode, m’ubed utimere nia etie Jayahudi, nia gamiri migi urombo ngo ku cik mi Juyahudi.​—Matayo 14:1-12; Marko 6:16-19.

Nyo Yohana ma Jababutisi gibed giwinjiri ngo giku Yesu?

Lembe moko mbe acel de i Biblia m’ubecwaku paru maeno. (Yohana 3:25-30) I andha, Yohana ung’eyo kamaleng’ nia ebino ku rwom mi yiko yo ni Masia, ento ungo mi laru tic i dhoge. Yohana uyero kumae: “Abino miyo batizo i pii kara enyuthere kamaleng’ ni Israel.” I ng’eye emedo kumae: “Ng’atu maeni utie Wod Mungu.” (Yohana 1:26-34) Pieno, Yohana ubino kud anyong’a niwinjo pi tic pa Yesu m’ubecego nyinge ma ber mandha.