Nyo Jumulembe pa Yehova giriemo jumoko m’ular ubino i dini migi?

Nyo ka ng’atu moko m’ulimo batizo pi nidoko Jamulembe pa Yehova uweko nirweyo lembanyong’a, kunoke nidikiri ku juyic wadi, eno ketho jurieme kud i cokiri? Ungo, jurieme ngo. Ento watimo kero nikonye kara edok emar lembe mi tipo kendo.

Wakoyo ngo ndhu ndhu kud i cokiri ng’atu moko m’utimo dubo ma pek. Re ka Jamulembe moko utimo lembe moko m’uturo cik mi Biblia, ento eyewo ngo dubo parene, jurieme niwacu jukoye kud i cokiri. Biblia uwacu kumae: “Wukab jadubo nino woko kud i kindwu.”​—1 Jukorinto 5:13.

Ka jukoyo won ot moko kud i cokiri, ento dhaku pare kud awiya gitie Jumulembe pa Yehova, gicopo kwo nenedi? I andha lembe mi dini ma nwang’u udikogi gam jik, ento winjiri mi ot migi medere asu. Dhaku giku cware gimediri asu nikwo karacelo man ninyutho mer i kindgi man ni awiya migi.

Ju ma jukoyo kud i cokiri gicopo mediri asu nibino i somo mwa. Tekene gimaru, judong cokiri copo bemio igi kony mi thenge mi tipo. Lembakeca mi kony maeno utie nikonyogi kara gitim lembe ma copo ketho gidoko kendo Jumulembe pa Yehova. Ju ma jukoyo kud i cokiri ma giweko timo migi ma reco man ma ginyutho andha nia gimaru nikwo nimakere ku cik mi Biblia, gitie ajola nidoko Jumulembe pa Yehova kendo.