Ng’a m’ucaku the dini mi Jumulembe pa Yehova?

Dilo mi Jumulembe pa Yehova mi rundi mwa eni ucaku i kum oro 1900. I saa maeno ungu moko ma nok mi Juponj Biblia ma gibino kwo ceng’ini ku Pittsburgh, i Pennsylvanie, États-Unis gicaku ng’io i ponji mi Biblia kilili mandha. Gibed giporo lemandha ma Biblia ubeponjo ku ponji mir ukungu mi dini. I ng’eye, gicaku wodho lembe ma ginwang’une i buku, i jurnal, man i gazeti ma tin julwong’o Otkur ma wiw m’ubetwong’o pi Ker pa Yehova.

Jalwo moko ma nyinge Charles Taze Russell ubino i kind ungu mi dhanu maeno ma gibino ponjo Biblia ku cwinygi ceke. Kadok nwang’u Russell utelo wi tic mi ponjo Biblia i saa maeno, man ebino ng’atu ma kwong’a m’ucaku wodho Otkur ma wiw de, tie ngo en re m’ecaku the dini ma nyen maeno. Lembakeca pa Russell man mi dhanu mange ma gibino ponjo kugi Biblia udok ung’eyere kamaleng’, gibino maru niyawu pi ponji pa Yesu Kristu man nilubo timo mi cokiri mi Jukristu mi rundi ma kwong’a. Calu Yesu re m’ucaku the dini mi Jukristu, wang’eyo nia en re m’ecaku the dilo mwa.​—Jukolosai 1:18-20.