Cokiri copo nyutho nenedi nen m’urombo ku pa Yehova iwi judubo?

1. Yehova ubemito ang’o pi dhanu ceke?

YEHOVA ucwiyo dhanu ceke ku bed’agonya mi timo ng’iyong’ic. Ng’atuman m’i kindwa tiyo ku giramiya maeno kubang’ ceng’ kinde m’ebemaku yub. Yub ma pire tek nisagu zoo ma ng’atini copo timo utie yub mi thiero kwo pare ni Yehova man mi mondo i kind juruot mi ju ma gibetimo ire. Yehova ubemito dhanu ceke gimak yub maeno. Pirang’o? Pilembe emaru dhanu man ebemito lembe uwoth igi miero. Ebemito gibed ku winjiri ma ceng’ini kude man gikwo rondo ku rondo.—Poy. 30:19, 20; Gal. 6:7, 8.

2. Yehova ubemito judubo m’uloko ngo cwinygi gitim ang’o? (1 Yohana 2:1)

² Ento Yehova diyo ngo ng’atu moko nia etim ire. Eweko ng’atuman umak yub mi gin m’ebitimo. Dong’ ka Jakristu moko m’ulimo uturo cik pa Mungu, m’etimo ko dubo ma pek ke? Tek eloko ngo cwinye, jucikiri niwodhe cen kud i cokiri. (1 Kor. 5:13) Re kadok kumeno de, Yehova mito lee dit nia jadubone udwog i bang’e. I andha, eno re m’utie thelembe ma pire tek lee m’uketho emiyo jamgony; niwacu pi niweko dubo mi ju m’uloko cwinygi. (Som 1 Yohana 2:1.) Mungu mwa ma jamer ubekwayu ju m’utimo dubo ma pek nia gilok cwinygi.—Zek. 1:3; Rum. 2:4; Yak. 4:8.

3. Wabiweco iwi lembang’o i thiwiwec maeni?

³ Yehova ubemito wabed ku nen m’urombo ku pare iwi dubo man iwi ju m’utimo dubo ma pek. Thiwiwec maeni binyutho iwa kite ma wacopo timo ko kumeno. Kinde m’ibesomo thiwiwecne, keth wii i kum (1) kite ma juyiko ko lemdubo moko ma pek i cokiri mi Korintho i rundi ma kwong’a, (2) i kum telowic ma jakwenda Paulo umiyo kinde ma ng’atu moko m’utimo dubo ma pek uloko cwinye, man (3) i kum gin ma kpawa maeni ubenyutho iwi nen ma Yehova tie ko iwi Jukristu m’utimo dubo ma pek.

KITE MA JUYIKO KO LEMDUBO MOKO MA PEK I RUNDI MA KWONG’A

4. Lembang’o m’utimere i cokiri mi Korintho i rundi ma kwong’a? (1 Jukorintho 5:1, 2)

⁴ Som 1 Jukorintho 5:1, 2. Saa ma jakwenda Paulo n’i woth pare mir adek i tic mi misioner, ewinjo pi lembe moko ma lic m’utimere i cokiri m’ucaku ma nyen i Korintho. Umego moko m’i cokirine ubed utimo lemsasa mi tarwang’ ku ci won. Ebino kit timo ma rac dit, m’ubino mbe “kadok i kind dhanu mi thek mange de”! Dhanu m’i cokiri gimiyo wang’gi amiya kende ngo i kum timo parene, ento copere giparu bende nia gibetimo lembe ma kakare. Saa moko nyo jumoko giparu nia i ayi maeno gibelubo lapor mi kisa ma Mungu nyutho ni dhanu ma gitie ku dub’alaga. Ento Yehova cwaku ngo timo ma reco i kind dhanu pare. Ku timo mir acidi man mi thwon maeno, m’umbe jiji ng’atuno ubino nyotho nying’ cokiri. Timo parene ubino bende kud atelatela ma rac iwi Jukristu mange ma gibino dikiri kude. Dong’ Paulo ukwayu cokiri utim ang’o?

5. Paulo ukwayu cokiri utim ang’o, man emito yero ang’o? (1 Jukorintho 5:13) (Nen bende cal.)

⁵ Som 1 Jukorintho 5:13. Ku kony mi tipo ma leng’, Paulo ukiewo barua moko ma i iye emiyo telowic ma nia juwodh jadubo m’uloko ngo cwinye cen kud i cokiri. Ugam ukwayu Jukristu ma gigwoko bedoleng’ migi gikwo kude nenedi? Paulo uyero nia ‘giwek nidikiri’ kude. Eno emito yero ang’o? Ekoro nia cik maeno ubenyutho bende nia ‘kadok acama de kud gicam ku ng’atu ma kumeno.’ (1 Kor. 5:11) Nicamu ku ng’atini copo ketho ebedo yot nidikiri kude i lembe mange bende. Pieno ubenen kamaleng’ nia Paulo umito nyutho nia dhanu mi cokiri kud gidikiri ku ng’atune. Eno bigwokogi kara kud gikwany kura pare ma rac. (1 Kor. 5:5-7) Eno romo konyo bende ng’atune ninyang’ nia ekier bor ku yo pa Yehova, romo ketho enwang’ere ku lewic, man romo cwale niloko cwinye.

6. Cokiri ujolo barua pa Paulo nenedi, man ng’atu m’utimo dubo ma pekne utimo ang’o?

⁶ I ng’ey ma Paulo uoro barua ni Jukristu mi Korintho, ecaku penjere ka nyo cokiri bijole nenedi. I ng’eye, Tito udwoko ire rapor moko m’unyayu anyong’a lee i iye; cokiri ujolo barua pa Paulo ma ber mandha. (2 Kor. 7:6, 7) Giworo telowic m’emiyo igi. M’umedo maeno, nyanok i ng’ey ma Paulo uoro barua pare ma kwong’a, ng’atu m’utimo dubo ma pekne uloko cwinye. Ewilo timo ku paru pare man ecaku woro cik ma pwe pa Yehova. (2 Kor. 7:8-11) Kawoni dong’ Paulo bikwayu cokiri utim ang’o?

GIN M’UGAM UKWAYU COKIRI UTIM NI JADUBO M’ULOKO CWINYE

7. Wodh ma juwodho ko jadubo kud i cokiri ukelo adwogi ma ber ma kani? (2 Jukorintho 2:5-8)

⁷ Som 2 Jukorintho 2:5-8. Paulo uyero nia “juk ma dhanu dupa umiyo uromo ni ng’atuno.” I ayi mange jucopo yero nia, twiny ma jumiyo ire ukonye nitundo i kum lembakeca ma jumito etund i kume. Ebino lembakeca ma kani? Nikonye kara elok cwinye.—Ebr. 12:11.

8. Paulo ukwayu cokiri utim ang’o mange?

⁸ Poy nia Paulo umito cokiri kud ujik nijolo umego m’uloko cwinyene ajola kende i kindgi, ento emiyo igi bende telowic ma e: “Wucikuru niweko ire man nijuko cwinye.” Emedo nia “wunyuth ire nia wumare.” Emito umego ginyuth nikadhu kud i wec man timo migi nia andhandha giweko ire man gimare. I ayi maeno, gibinyutho kamaleng’ nia anyong’a dwogo pare i cokiri ubenegogi.

9. Copere ang’o m’uketho jumoko gibedo ku jiji mi timo kisa ni jadubo m’uloko cwinye?

⁹ Nyo jumoko m’i cokiri gibino ku jiji mi jolo jadubo m’uloko cwinye udwog i kindgi? Biblia uyero ngo, re copere nia lembuno utimere. I andha, timo pare ukelo peko i cokiri zoo, man saa moko nyo unyayu lewic iwi jumoko athothi. Copere nia jumoko giparu nia etie lembe m’umaku piny ungo nia gijol ng’atune ku yaw yaw ma lee calu umego, ma ke gin gimediri nitimo kero ma lee pi niworo cik pa Yehova. (Nen lembe m’uyenyo rombo kude i Luka 15:28-30.) Dong’ pirang’o pire bino tek nia cokiri unyuth mer mandha ni umeggi m’udwogo?

10-11. Ang’o ma nwang’u ubecitimere ka nwang’u judong cokiri gikwero nitimo kisa ni jadubo m’uloko cwinye?

¹⁰ Kepar pi gin ma nwang’u romo timere ka nwang’u judong cokiri gikwero nijolo ng’atu m’uloko cwinye i andha udwog i cokiri, kunoke ka nwang’u i ng’ey dwogo pare, cokiri ukwero ninyutho nia gimare. Nwang’u eromo mwony “nikum can pare m’akeca.” Eromo paru nia genogen umbe ire man eromo weko kadok nitimo kero niyiko winjiri pare ku Mungu.

¹¹ Ento lembe ma rac m’usagu zoo utie nia, ka nwang’u umego ku nyimego m’i cokiri gikwero nitimo kisa ni jadubo m’uloko cwinyene, nwang’u gibeciketho winjiri migi ku Yehova i ariti. Nenedi? Nwang’u gibecilubo ngo lapor pa Yehova ma weko lembe ni judubo m’uloko cwinygi, ento lapor pa Sitani ma tie ng’atu ma kwiny man ma kisa mbe i iye. E nwang’u gibecidoko ni jamtic ma Wonabali ubetiyo ko pi ninyotho winjiri pa ng’atune ku Yehova.—2 Kor. 2:10, 11; Efe. 4:27.

12. Cokiri romo lubo lapor pa Yehova nenedi?

¹² Dong’ cokiri mi Korintho romo timo ang’o pi nilubo lapor pa Yehova, ento ungo pa Sitani? Nwang’u gibeweko lembe ni judubo m’uloko cwinygi calu ma Yehova timo. Kenen gin ma jugor moko giyero iwi Yehova. Daudi uyero nia Yehova ‘ber man etie ayika niweko lembe.’ (Zab. 86:5) Mika ukiewo kumae: “Ng’a ma Mungu calu in, ma weko kier woko, man ma kadhu ku wi gondri?” (Mik. 7:18) Man Isaya uwacu kumae: “Dong’ jadubo wek yo pare, man won gondri pidoic pare; man wek edwog ba Yehova, e kisa binege i kume; man ba Mungu mwa, kum ebiweko ire ma gwei.”—Isa. 55:7.

13. Pirang’o ebino lembe ma kakare nidwogo ng’atu m’uloko cwinye i cokiri m’umbe galu? (Nen sanduku ma thiwiye tie, “Judwogo ng’atu ma juwodho kud i cokiri mi Korintho i ng’ey kare ma rukani?”)

¹³ Pi nilubo lapor pa Yehova, ugam ukwayu cokiri mi Korintho ujol ng’atu m’uloko cwinye man unyuth ire nia gimare. Paulo uyero nia tek gitimo kisa ni ng’atune, nwang’u ‘gibenyutho woro migi i lembe ceke.’ (2 Kor. 2:9) Andha dwi moko kende re m’ukadhu niai ma juwodho ng’atune kud i cokiri, re twiny m’enwang’u ukonye niloko cwinye. Pieno, yeny ubino mbe nikuro pi nidwoge i cokiri.

KITE MA WACOPO LUBO KO LAPOR MI POKOLEMBE MA PWE MAN MI KISA PA YEHOVA

14-15. Wanwang’u ponji ma kani i kite ma juyiko ko lemdubo m’utimere i cokiri mi Korintho ma con? (2 Pethro 3:9) (Nen bende cal.)

¹⁴ Jukiewo kpawa mi kite ma juyiko ko lemdubo i cokiri mi Korintho ma con man jugwoke “pi ponji mwa.” (Rum. 15:4) Kpawa maeno ubemiyo iwa ponji ma nia Yehova miyo ngo wang’e ni dubo ma pek ma jutimo i kind dhanu pare. Jumoko giromo paru nia calu ma Yehova tie “jakisa,” ebiweko jadubo m’uloko ngo cwinye ubed i cokiri. Ento eno tie ngo ayi m’enyutho ko kisa pare. Andha Yehova tie jakisa, re eyiyo ngo kit timo ceke, kadi edhong’o de ngo i cik pare. (Yuda 4) Ka nwang’u eweko ju m’uloko ngo cwinygi ubed i cokiri, nwang’u eno romo nyutho nia etie ngo jakisa, kum lembene romo ketho cokiri ceke i ariti.—Rie. 13:20; 1 Kor. 15:33.

¹⁵ Re waponjo nia Yehova ubemito ngo ng’atu moko acel de unyothere. Ebemito ebodh dhanu saa ceke ma kan ecopere. Etimo kisa ni ju ma giloko cwinygi man ma gibemito giyik winjiri migi kude. (Eze. 33:11; som 2 Pethro 3:9.) Pieno, saa ma ng’atu m’utimo dubo i Korintho uloko cwinye man uwilo timo pare ma rac, Yehova utiyo ku Paulo pi nikoro ni cokiri nia gicikiri nitimo ire kisa man nijole kendo i kindgi.

16. Ayi ma juyiko ko lemdubo ma ng’atu moko utimo i cokiri mi Korintho uketho ibewinjiri nenedi?

¹⁶ Ning’iyo i kite ma juyiko ko lemdubo m’utimere i cokiri mi Korintho ukonyowa ninyang’ nia Yehova tie Mungu ma jamer, ma pwe, man ma poko lembe atira. (Zab. 33:5) Nyo lembuno ubecweli ngo nipaku Mungu mwa nisagu? Watie ku foyofoc lee yor i bang’e, pilembe wan ceke watie judubo man watie ku yeny mi kisa pare. Watie bende ku foyofoc yor i bang’e pi jamgony m’emiyo pi niweko dubo mwa. Etie lembe mi jukocwiny man mi tielocwiny ma lee ning’eyo nia Yehova umaru dhanu pare i andha man nia ebemito lembe uwoth igi miero!

17. Wabiponjo lembang’o i thiwiwec ario m’ulubo?

¹⁷ Dong’ tin ka ng’atu moko utimo dubo ma pek, judong cokiri gicopo lubo lapor mi mer pa Yehova, man gicopo konyo ng’atune ulok cwinye nenedi? Cokiri ucikere nitimo ang’o kinde ma judong cokiri gimaku yub mi wodho ng’atu moko cen kud i cokiri kunoke mi dwogo ng’atu moko i cokiri? Wabidwoko wang’ penji maeno i thiwiwec ario m’ulubo.