Pirang’o Junazi gigam ginego Juyahudi lee? Pirang’o ke Mungu ucero ngo nek maeno?
Dhanu ma pol ma gipenjo penji maeno jugam junego wedi migi dupa, pieno gibesayu dwokowang’ penji maeno kende ngo, ento bende jukocwiny. Jumange gineno nek ma jugam junego ko Juyahudi ni racu m’usagu zoo ma dhanu utimo, pieno etie igi tek niyiyo Mungu.
Paru ma cuu ngo ma dhanu tie ko iwi Mungu man nek ma jugam junego ko Juyahudi
Vupo: Etie rac nipenjo nia pirang’o Mungu uweko junego Juyahudi.
Lemandha: Dhanu moko ma gibino ku yiyoyic ma lee de gibed gipenjiri nia pirang’o Mungu uweko lembe ma rac ubetimere. Ku lapor, jabila Habakuk upenjo Mungu kumae: “Pirang’o iketho abeneno lembe ma rac, man pirang’o ibeneno adici para ku weng’i? Nyoth ku rop gini i wang’a, dhaw nuti man pyem utuk swa?” (Habakuk 1:3, B.L.L) Kakare nicimo wang’ Habakuk pi penji maeno, Mungu uketho jukiewo penjine i Biblia kara dhanu ceke usom.
Vupo: Mungu dieng’ ungo pi masendi mi dhanu.
Lemandha: Mungu udagu timo ma reco man peko m’ebenyayu i kum dhanu. (Lembrieko 6:16-19) Con i rundi pa Noa, lembe ma reco ugam unyai iwi ng’om, eno uketho ‘can ugam unego Mungu i adundene.’ (Thangambere 6:5, 6) M’umbe jiji, Mungu unwang’u can lee i adunde i saa mi nek mi Juyahudi.—Malaki 3:6.
Vupo: Nek mi Juyahudi ubino matira m’uai i bang’ Mungu.
Lemandha: Mungu ugam uweko Jurumi ginyotho adhura mi Yeruzalem i rundi ma kwong’a. (Matayo 23:37–24:2) Ento niai eca, Mungu ng’iyo ngo thek moko kende pi nimiyo ire mugisa kunoke pi nimiyo ire matira. I wang’ Mungu, “tung’ tung’ umbe i kind Jayahudi ku Jagiriki.”—Jurumi 10:12.
Vupo: Ka nwang’u Mungu ma jamer man jategokpo ubino nuti andha, nwang’u ukwayu ecer nek mi Juyahudi.
Lemandha: Kadok nwang’u Mungu benyayu ngo masendi de, re saa moko eweko etimere pi nindo moko.—Yakobo 1:13; 5:11.
Pirang’o Mungu ugam uweko juneg Juyahudi?
Mungu uweko juneg Juyahudi pi thelembe ma rom m’uketho eweko dhanu ceke unen can: pi nidwoko wang’ penji moko m’uwok yang’ con. Biblia unyutho kamaleng’ nia pi kawoni, tie Wonabali re m’ubebimo wi ng’om, ento Mungu ngo. (Luka 4:1, 2, 6; Yohana 12:31) Lembe ario ma pigi tek m’uai i Biblia copo konyojo ninyang’ nia pirang’o Mungu ugam uweko juneg Juyahudi.
Mungu ucwiyo dhanu ku bedagonya. Mungu unyutho ni dhanu ma kwong’a, niwacu Adamu giku Eva gin m’ekwayu i bang’gi, ento ediyogi ngo nia giwore. Ginwang’u nia kwayu gibed ging’ii gin gigi gin ma ber ku gin ma rac, eno ubino ng’iyong’ic ma rac’. Niai con, dhanu ma dupa bende gitimo kit ng’iyong’ic ma rac ma kumeno, eno ukelo peko ma yawe mbe iwi dhanu. (Thangambere 2:17; 3:6; Jurumi 5:12) Etie tap calu ve ma buku moko (Statement of Principles of Conservative Judaism) uyero: “Gin m’ubenyayu peko dupa iwi ng’om utie nitiyo rac ku bedagonya ma jumiyo iwa.” Kakare ma nia Mungu umay dhanu ku bedagonya m’emiyo igi, eweko dhanu gikegipim nitelo wi lembe migi m’umbe telowic pare.
Mungu utie ku copo mi daru peko ceke ma nek ma jugam junego ko Juyahudi unyayu, man ebidare de andha. Mungu ung’olo nia ebicero dhanu milioni dupa ma githo, uketho i iye bende Juyahudi ma jugam junego. Ebidaru bende can ma dhanu moko ma gigam giboth kud i nek ma junego ko Juyahudi ginwang’iri ko kinde ma gibeparu pi lembe ma reco m’ugam utimere. (Isaya 65:17; Tic mi Jukwenda 24:15) Mer ma Mungu umaru ko dhanu uketho wayiyo nia andha ebipong’o lembe maeno m’eng’olo.—Yohana 3:16.
Dhanu ma pol ma gigam giboth kud i nek ma junego ko Juyahudi, gimediri asu nibedo ku yiyoyic man anyong’a i kwo migi, pilembe ginyang’ nia pirang’o Mungu uweko lembe ma rac ubetimere man gin m’epangu nitimo pi nidaru matoke ma lembene nyayu.