Nyo Wonabali unuti andha?

Lembe ma Biblia udwoko

Eyo, Wonabali unuti andha. Etie “jabim mi ng’om,” giracwiya mi tipo m’ugam udoko ng’atu ma rac man ejai i dhu Mungu. (Yohana 14:30; Juefeso 6:11, 12) Biblia ukonyowa ning’eyo Wonabali nikadhu kud i nying’ man lembe m’ekoro m’ulubo e:

• Sitani, ma thelembene tie “Jajai.”​—Yob 1:6.

• Wonabali, ma thelembene tie “Jayernying’.”​—Lembanyutha 12:9.

• Thwol, jutiyo kude i Biblia pi ninyutho “Javupo.”​—2 Jukorintho 11:3.

• Won abidhe.​—Matayo 4:3.

• Jandra.​—Yohana 8:44.

Sitani tie ngo lembe ma rac ma nwang’ere i jo

Jumoko giparu nia Sitani Wonabali utie kende kende lembe ma rac ma nwang’ere i dhanu. Ento Biblia ukoro pi wec m’ukadhu i kind Mungu giku Sitani. Mungu tie leng’, pieno ebino weco ngo ku gin moko ma rac ma nwang’ere i iye gire. (Poi mi cik 32:4; Yob 2:1-6) Bende, Sitani ubidho Yesu m’umbe ku dubo nyanok de. (Matayo 4:8-10; 1 Yohana 3:5) Pieno, Biblia ubenyutho kamaleng’ nia Wonabali unuti andha, ento etie ngo lembe ma rac ma nwang’ere i jo.

Pirang’o iwa ucikere ngo niwang’ ka dhanu dupa giyiyo ngo nia Wonabali unuti andha? Pilembe Biblia ubewacu nia Sitani ubetiyo ku vupo pi nipong’o lembakeca pare. (2 Juthesaloniki 2:9, 10) Niai con, acel m’i kind uwic ma dongo pa Sitani utie niumo wang’ dhanu kara kud ging’ey nia enuti.​—2 Jukorintho 4:4.

Paru ma cuu ngo ma dhanu tie ko iwi Wonabali

Vupo: Lusufer utie nying’ Wonabali mange.

Lemandha: Wec mi dhu Juebrania ma i Biblia moko juloko nia “Lusufer” thelembene tie “ma ryeny.” (Isaya 14:12, B.L.L) Lembe m’udhoko giragora maeni unyutho nia jutiyo ku wec ma nia “Lusufer” pi ninyutho bimobim, kunoke ker mi Babeli ma Mungu jwigo nikum kuhaya pare. (Isaya 14:4, 13-20) Jutiyo ku wec ma nia “ma ryeny” pi ning’iero dhu bimobim mi Babeli i ng’ei ma junyothe.

Vupo: Sitani tie jatic ma Mungu tiyo ko pi nipokolembe iwi dhanu.

Lemandha: Wonabali utie jadegi pa Mungu, ento ungo jatic pare. Sitani Wonabali utie jadhu dhanu ceke ma gibetimo ni Mungu man ekelo adote mi ndra i wigi.​—1 Pethro 5:8; Lembanyutha 12:10.