Nyo Jumulembe pa Yehova gitie jang dini moko?

Ungo, Jumulembe pa Yehova gitie ngo jang dini. Ento, watie Jukristu m’ubeii nilubo lapor ma Yesu uweko man nikwo nimakere ku ponji pare.

Jang dini utie ang’o?

Wec ma nia “jange,” dhanu betiyo ko pi thelembe ma tung’ tung’. Pieno, wakenen lembe ario ma dhanu gitiyo ko pi jange man wanen nia pirang’o lembene umulo ngo kumwa.

• Jumoko giparu nia jange utie dini moko m’ucaku ma nyen kunoke m’ular ubino mbe i wang’e. Jumulembe pa Yehova gicaku ngo the dini moko ma nyen. Tung’ ku maeno, wabeworo Mungu i ayi ma Jukristu mi rundi ma kwong’a giweko, ma lapor man ponji migi ju kiewo pire i Biblia. (2 Timoteo 3:16, 17) Wayiyo nia ukwayu jutii ku Giragora maleng’ pi ning’iyo dini ma Mungu jolo.

• Jumoko giparu nia jange utie dini ma rac ma ng’atu moko re m’ubetelo wiye. Jumulembe pa Yehova giketho ngo ng’atu moko re m’ubed ni jatela migi. Re, wamoko mwa i kum cik ma Yesu umiyo ni julub pare kinde m’eyero kumae: “Jatelwic mwu en acel, Kristu.”​—Matayo 23:10.

Jumulembe pa Yehova gitie ngo jang dini ma rac, ento dini migi ketho dhanu m’i iye ku ju mange de gibedo i acel. Ku lapor, tic mwa mi rweyo lembanyong’a udaru konyo dhanu dupa nivoyo ng’iyo ma rac ma gibino ko, calu ve nitiyo ku piny ma merojo man kong’o. M’umedo maeno, i wang’ ng’om zoo watiye ku kalasi moko ma bekonyo dhanu dupa niponjo somo, man kiewo piny. Bende, wamiyo kony i saa mi peko ma wok rek. Watimo tego nikwo ma ber ku dhanu mange, tap calu ma Yesu ung’olo nia julub pare gitim.​—Matayo 5:13-16.