Nyo Jumulembe pa Yehova giyiyo Lembariba ma con de
Eyo. Jumulembe pa Yehova giyiyo nia theng Biblia zoo “Mungu yuyo i wiye en, man konyne nuti.” (2 Timoteo 3:16) Eno uketho i iye Lembariba ma con ku Lembariba ma nyen, calu ma dhanu lwong’o. I zoone, Jumulembe pa Yehova gitiyo ku theng Biblia ario maeno zoo, niwacu Lembagora mi dhu Juebrania man Lembagora mi Jugiriki mi Jukristu. I ayi maeno re ma waneno ngo nia theng Biblia moko nindo pare daru kadhu kunoke nia dong’ tije mbe.
Pirang’o Jukristu gitiye ku yeny mi Lembariba ma con ku Lembariba ma nyen ceke?
I the telowic mi tipo ma leng’ pa Mungu, jakwenda Paulo ukiewo kumae: “Gin ceke m’ukiewere yang’ con i Lembagora ukiewere pi ponji mwa.” (Jurumi 15:4) Pieno, lembe ma nwang’ere i Lembagora mi dhu Juebrania utie iwa ku kony ma lee. I kind lembe mange, gikoro iwa kpawa m’ubed ukadhu con man juk ma tie iwa ku kony.
Kpawa m’ukadhu. Lembagora mi dhu Juebrania utie ku lembe m’ekoro iwi cwic man kite ma dhanu upodho ko i dubo. M’umbe korolembe maenogi, nwang’u wabecikoso nwang’u dwoko wang’ penji ma pigi tek, calu ve: Wa dhanu e waai kani? Pirang’o dhanu betho? (Thangambere 2:7, 17) M’usagu zoo ke, Lembagora mi dhu Juebrania ukoro kite ma Mungu utiyo ko ku dhanu ma gibedo kud anyong’a man ju ma gikadhu kud i peko m’urombo ku ma wabenwang’ara ko.—Yakobo 5:17.
Juk ma tie ku kony. Buku mi Biblia ma julwong’o Lembrieko man Eklizia ma gitie theng Lembagora mi dhu Juebrania, gitie ku rieko ma kakare kadhu ngo pi kwo mwa. Gimiyo iwa juk iwi kite ma wacopo bedo ko ku mutoro i kwo m’i juruot mwa (Lembrieko 15:17), i kite ma wacopo bedo ko ku nen ma ber iwi tic (Lembrieko 10:4; Eklizia 4:6), man ayi m’aradu gicopo nitelo ko wi kwo migi ma ber kinde ma fodi de gin aradu eni (Eklizia 11:9–12:1).
M’usagu zoo ke, waromo nwang’u faida i kum Cik pa Musa kinde ma ka wabeponje, calu ma jugoro ko pigi i Torathi (buku abic ma kwong’a mi Biblia). Kadok nwang’u jukiewo ngo Cik maeno ni Jukristu de, re gitie ku cik mir ukungu ma pigi tek ma romo konyowa kara wakwo kwo mi mutoro.—Lembe mi Julawi 19:18; Poi mi Cik 6:5-7.