PENJI M’ARADU GIPENJIRI KO
Pirang’o acikara nirwo?
Nimakere ku sayusac moko ma jutimo, aradu mir Amerika 80 wi 100 girwo, ento 40 wi 100 kende re ma girwo kubang’ ceng’. M’umbe jiji, jumoko m’i kindgi gipenjiri kumae: ‘Nyo rwo utie kende kende gin moko ma copo ketho awinjara ma ber kunoke nyo etie ku lembe moko m’usagu maeno?’
Rwo tie ang’o?
Rwo utie wec mandhandha ma juweco ku Jacwic mi piny ceke. Kepar nyanok pi lembe maeno! Yehova tie dwong’ nisagu dhanu i yo moko ci, ento “eni bor ungo ku ng’atuman m’i kindwa.” (Tic mi Jukwenda 17:27) Ku lapor, Biblia ubekwayuwa kumae: “Wucor ceng’ini i vut Mungu, man en de ebicoro ceng’ini i vutwu.”—Yakobo 4:8.
Icopo coro ceng’ini i vut Mungu nenedi?
Yo acel utie rwo, niwacu kite m’ibed iweco ko i bang’ Mungu.
Yo mange utie niponjo Biblia, niwacu kite ma Mungu “weco” ko i beng’i.
Ka wubeweco kumeno i kindwu wuku Mungu, niwacu iberwo i bang’e man ibeponjo Biblia, eno bikonyi kara mer m’i kindwu wukude udok tek.
“Niweco i bang’ Yehova, niwacu niweco ku Ng’atu ma malu ngbir, utie rwom ma lee nisagu rwom moko ci ma dhanu romo nwang’u.”—Jeremy.
“Nikoro paru m’upondo i adundena ni Yehova nikadhu kud i rwo ketho anwang’ara nia an’i ceng’ini mandha kude.”—Miranda.
Nyo Mungu winjo rwo de?
Kadok nwang’u iyiyo Mungu man ibed irwo i bang’e de, re saa moko ecopo bedo tek niyiyo nia andha ewinjo rwo. Ento tung’ ku maeno, Biblia uyero nia Yehova tie ‘Ng’atu ma winjo rwo.’ (Zaburi 65:2) Bende Biblia ubekweyi nia ‘ibol adieng’acwiny peri ceke i kore.’ Pirang’o? ‘Pilembe ebedieng’ piri.’—1 Pethro 5:7.
Lembe m’ukwayu ikenyam iye: Nyo ibed inwang’u saa mi weco ku jurimbi ma ceng’ini wang’ ma pol? Icopo timo bende kumeno ku Mungu. Bed iwec i bang’e nja nikadhu kud i rwo, man kinde m’iberwo, tii ku nyinge ma Yehova. (Zaburi 86:5-7; 88:9) M’umedo maeno, Biblia ubekweyi nia ‘irwo areri.’—1 Juthesaloniki 5:17.
“Rwo utie wec ma waweco i kindwa waku Vwa mi polo, m’etie Ng’atu m’adhwolo ire lembe ceke mir adundena.”—Moises.
“Akoro lembe para ni Yehova i thucne tap calu m’acopo koro ni mama kunoke ni jarimba ma ceng’ini.”—Karen.
Acopo rwo pi lembang’o?
Biblia uyero kumae: “I lembe ceke ku rwo man kwayukwac karacelo ku dwoko foyofoc, wuketh Mungu ung’ey pi kwac mwu.”—Jufilipi 4:6.
Nyo eno nyutho nia etie ber nirwo pi peko peri? Eyo! Pilembe Biblia uyero kumae: “Redh ter peri iwi Yehova, man ebijengi.”—Zaburi 55:22.
I andha, kinde m’iberwo i bang’ Mungu, mito ngo ibed iwec ndhu kende kende pi peko peri. Nyamego moko m’aradu ma nyinge Chantelle uyero kumae: “Nwang’u mer m’i kindwa ku Yehova cibedo ngo mer mandha ka nwang’u abed akwaye kwa saa m’atie ku yeny mi kony. Anwang’u nia ma kwong’a kwayu alar abed adwok ire foyofoc, man lembe m’abedwoko foyofoc pire re m’ucikere nibedo lee nisagu.”
Lembe m’ukwayu ikenyam iye: Lembang’o m’inwang’u nia kwayu idwok foyofoc pire i kwo peri? Nyo iromo paru pi lembe moko adek m’ukwayu idwok foyofoc ni Yehova pigi tin?
“Kadok lembe ma kabang’e mbe, calu ve nineno tiwe moko ma leng’, romo cwaluwa nidwoko foyofoc ni Yehova nikadhu kud i rwo.”—Anita.
“Nyam i lembe iwi giracwiya moko m’utelo nen peri kunoke iwi verse moko mi Biblia m’umulo adundeni, man i ng’eye foy Yehova pire.”—Brian.