PENJI M’ARADU GIPENJIRI KO
Biblia copo konya nenedi?—Thenge mi 1: Yar i Biblia peri
“Agam atimo kero nicaku somo Biblia, ento lworo uwok umaka pilembe dhoge thuthuru dit!”—Briana, oro 15.
Nyo in de itie ku nen maeno? Thiwiwec maeni copo konyi!
Pirang’o ukwayu nisomo Biblia?
Nyo ibed imaru ngo nisomo Biblia? Kan etie kumeno, eno tie lembe ma winjere. Saa moko nyo icopo paru nia Biblia utie buku ma tie ku mbaya ma kadhu elufu, jukiewe nyathindho thindho man embe kadok ku cal de i iye; TV kunoke video de loye!
Ento kepar lembe i ayi mae: Kan inwang’u sanduku moko ma dit, ma jugam jukanu lonyo i iye con, nyo iromo maru ngo nia ikeiyab dhoge?
Biblia de tie tap calu sanduku maeno. Epong’ ku rieko dupa ma beco ma copo konyi kara:
Itim ng’iyong’ic ma cuu
Iwinjiri ma ber ku junyodo peri
Inwang’ jurimo ma beco
Iii kud apidacwiny
Pirang’o buku moko ma jukiewo con romo bedo iwa ku kony lee kumeno tin? Etie pilembe “Lembagora ceke Mungu yuyo i wiye en.” (2 Timoteo 3:16) Eno utie ku thelembe ma nia juk ceke ma nwang’ere i Biblia uai i bang’ Ng’atu ma riek nisagu i polo kud i ng’om zoo.
Biblia utie sanduku m’upong’ ku rieko ma yawe mbe ma calu lonyo
Acikara nisomo Biblia nenedi?
Yo acel utie nisomo Biblia niai i acaki nitundo i ajikine. Eno bikonyi ning’eyo lembe ma pire tek ma Biblia uweco i wiye. Yo utie dupa mi somo Biblia. Wakewec iwi moko ario:
Icopo somo buku 66 mi Biblia i kite ma jukiewo kogi, niai i Thangambere nitundo i Lembanyutha.
Icopo somo Biblia i kite ma lembe mi iye ulwobere ko man i ng’ei wadi man i ng’ei wadi.
Juk: Apendix A7 i Biblia—Lok mi ng’om ma nyen (mi Français) urieyo lembe ma pigi tek m’utimere i kwo pa Yesu iwi ng’om i kite ma gilwobiri ko.
Yo mir ario mi somo Biblia utie nicaku somo lembe moko m’urombo ku peko m’ibenweng’iri ko. Ku lapor:
Nyo ibemaru nia ibed ku jurimo mandha? Som kpawa pa Yonathan giku Daudi. (1 Samwil thek 18-20) I ng’eye, sai ninwang’u kite ma beco ma Daudi ubino ko, ma copere nia ugam utelo Yonathan i bang’e.
Nyo ibemito nia imed tego i kumi pi nicungo i wang’ abidhe? Som kpawa m’ukoro kite ma Yosefu ucungo ko i wang’ abidhe. (Thangambere thek 39) I ng’eye, sai ning’eyo nia tego ma Yosefu ubino ko m’ugam ukonye nicerere i wang’ abidhe ugam uai kani.
Nyo ibemito ing’ei kite ma rwo romo konyi ko? Som lembe ma Nehemia ukadhu kud i iye. (Nehemia thek 2) I ng’eye, sai ning’eyo gin m’unyutho nia rwo pa Nehemia ubino ku tego.
Juk: Kinde m’ibesomo Biblia, nen nia ibedo ka ma ling’ kara iketh wii i kum lembe m’ibesomo.
Yo mir adek mi somo Biblia utie nisomo lembe acel kunoke zaburi acel, kan i ng’eye nineno kite m’iromo tiyo ko kude i kwo peri. I ng’ei m’isome, penjiri ku penji m’ulubo e:
Pirang’o Yehova uketho jukiewo lembe maeni i Biblia?
Lembe maeni ubeponja kud ang’o iwi kite pa Yehova man iwi ayi m’etimo ko lembe?
Acopo tiyo ku lembe maeni nenedi i kwo para?
Juk: Bed ku lembakeca! Keth nindo m’ukwayu icak i iye somo Biblia, man tii ku Program mi Somo Biblia ma nwang’ere i jw.org.