Nyo jubinyotho ng’om maeni?
Lembe ma Biblia udwoko
Ungo, jubinyotho ngo ng’om, jubiwang’e ngo i mac man jubiwile de ngo ku mange. Biblia ubeponjo nia Mungu ucwiyo ng’om kara jukwo i iye rondo ku rondo.
“Won bedopwe bicamu ng’om ni aba, man ebibedo i ie mi nja.”—Zaburi 37:29.
“[Mungu] ketho thepiny mi ng’om, kara kud eai mi nja.”— Zaburi 104:5.
“Ng’om bedo mi nja.”—Eklizia 1:4.
“Mungu m’ung’ino ng’om m’utime de, m’uketho ecungo m’ucwie de ni uvuru ngo, . . . ung’ine kara jubed i ie.”—Isaya 45:18.
Nyo dhanu binyotho ng’om maeni?
Mungu biweko ngo dhanu ginyoth ng’om kadok ebed nikadhu kud i yamu ma gibenyotho, lwiny kunoke ayi moko mange. Ento ‘ebinyotho ju m’ubenyotho ng’om.’ (Lembanyutha 11:18) Ebinyothogi nenedi?
Mungu biwilo bimobim mi dhanu ku Ker pare ma leng’ m’i polo, pilembe niai con gwoko ng’om maeni uvoyogi. (Daniel 2:44; Matayo 6:9, 10) Yesu Kristu ma tie Wod Mungu re ma bibedo jabim mi Ker maeno. (Isaya 9:6, 7) Kinde ma Yesu ubino iwi ng’om, etiyo ku copo pare i ayi mir udu pi nibimo wi giracwiya ma tung’ tung’. (Marko 4:35-41) Lembe mi ng’om moko acel de mbe ma bivoyo Yesu ma tie Ubimo mi Ker pa Mungu. Ebidwoko lembe mi ng’om bidoko nyen tap calu m’ubino i podho mir Eden.—Matayo 19:28; Luka 23:43.
Nyo Biblia ubeponjo nia jubiwang’u ng’om ku mac?
Ungo, ebeponjo ngo kumeno. Paru ma cuu ngo maeno uwok pilembe junyang’ ungo cuu i 2 Pethro 3:7, m’uwacu kumae: “Polo ku ng’om ma gitie kawoni jugwokogi ni mac.” Wakewec iwi lembe ario ma pigi tek ma copo konyowa ninyang’ cuu i wec mi giragora maeno:
Biblia utiyo ku wec ma nia “polo,” “ng’om,” man “mac” pi ninyutho bende piny mange. Ku lapor, Thangambere 11:1 uyero kumae: “Ng’om ngung’ en e mi dhok acel.” I giragora maeni, wec ma nia “ng’om” ubenyutho dhanu m’i ng’om.
Lembe m’udhoko 2 Pethro 3:7 ubenyutho thelembe mi polo, ng’om man mac ma jutiyo ko i giragora maeni. Lembe mi verse mir 5 ku mir 6 unyutho winjiri m’utie i kindgi ku Pii ma dit m’uumo ng’om i rundi pa Noa. I saa maeca, junyotho ngo ng’om ma ng’om, ento Pii m’uumo ng’om uweyo kende kende jutimrac, ma julwong’ogi bende nia “ng’om.” (Thangambere 6:11) Piine unyotho bende “polo,” niwacu dhanu m’ubino telowi jutimrac mi ng’om maeca. Pieno, jugam junyotho judubo ento ungo ng’om ma ng’om. Noa ku juruot pare giboth i saa mi nyoth mi ng’om maeno man gidok gikwo iwi ng’om i ng’ei Pii ma dit m’uumo ng’om.—Thangambere 8:15-18.
Rom rom ku Pii ma dit m’uumo ng’om eno, nyoth kunoke “mac,” ma 2 Pethro 3:7 uweco pire bidaru dhanu ma reco mi ng’om maeni, ento Ng’om ma ng’om ungo. Mungu ung’olo “polo ma nyen ku ng’om ma nyen ma i igi bedopwe bibedo nuti.” (2 Pethro 3:13) “Ng’om ma nyen” maeno, kunoke lwak dhanu ma nyen, “polo ma nyen” kunoke bimobim ma nyen re ma bibimo wigi, niwacu Ker pa Mungu. I the bimobim mi Ker maeno, ng’om bidoko ni kabedo mi kwiyocwiny, niwacu paradizo.—Lembanyutha 21:1-4.