Nyo madhu taba tie dubo?

Lembe ma Biblia udwoko

Biblia uweco ngo iwi madhu tabaa kunoke ayi mange mi tio ku taba. Ento, etie ku cik mir ukungu m’ubenyutho nia Mungu umaru ngo timo ma nyayu twoyo man ma cido kumjo. Pieno, eneno madhu taba ni dubo.

• Woro kwo. ‘Mungu . . . umio kwo ni giki ceke, ku lietho m’i igi.’ (Tic mi Jukwenda 17:24, 25) Calu ma kwo utie giramia m’uai i bang’ Mungu, wacikara ngo nitimo lembe moko ma copo jwigo nindo mi kwo mwa, calu ve nimadhu taba. Acel m’i kind thelembe m’uketho dhanu ubetho ma fodi iwi ng’om zoo utie madhu taba, ma ke nwang’u jucopo cero lembene.

• Nimaru wadijo. “Mar wedu calu in giri.” (Matayo 22:39) Nimadhu taba ivut jumange nyutho ngo nia imarugi. Dhanu ma gibed ginwang’iri saa ceke i ng’et umadh taba, gin de gitie i ariti ma lee dit mi nwang’u kit twoyo ma rom ku mi ju ma gimadhu taba.

• Kwayu nibedo leng’. “Wuthier kumwu ubed ni lam ma kwo, ma leng’, ma yire ni Mungu.” (Jurumi 12:1) “Dong’ walwokra giwa ni cilo ceke mi kum ku mi tipo, ma wadwok ko leng’cwiny udok ndhu cu i lworo pa Mungu.” (2 Jukorintho 7:1) Nimadhu taba utie cuu ngo man eromo ketho ngo ng’atini bed leng’, niwacu nibedo m’umbe cilo kunoke nibedo tetete, pilembe ju m’ubemadhu taba akakaka gibemadhu piny ma reco m’ubenyotho leng’kum migi ku rac.

Nyo Biblia uyero lembe moko de iwi nambu ma jutio ko ku njai kunoke ku kit yath mange ma merojo?

Biblia uweco ngo pi njai kunoke pi kit yathne mange ma merojo ku nying’gi. Ento etie ku cik mir ukungu m’ukwero nambu ma jutio ko ku piny ma merojo ma ketho judoko ng’eca mi tio kude. M’umedo cik mir ukungu ma juweco i wie maluno, lembe m’ulubo e copo bende nikonyi:

• Kwayu wagwok paru mwa. “Mar [Yehova] Mungu peri . . . ku pidoii ceke.” (Matayo 22:37, 38) “Wubed nger.” (1 Pethro 1:13) Ng’atini copo telo ngo cuu wi paru pare kan etio akeca ku yath ma merojo man dhanu ma pol gidoko bende ng’eca mi tio ku yathne. Giketho wigi zoo nisayu man nitio ku yath ma merojo kakare niketho wigi i kum lembe ma beco.​—Jufilipi 4:8.

• Niworo cik pa gavmenti. ‘Wubed wor ni jubim, ku weg ng’ol.’ (Tito 3:1) I ng’om ma dupa, cik neno ma tek dit kite ma jutio ko ku yath ma merojo. Tekene wabemito foyo i Mungu, wacikara niworo cik pa gavmenti.​—Jurumi 13:1.