KONY NI JURUOT
Icopo bimo wi ng’ecwiny peri nenedi?
Jadhogi mi gamiri uyero kunoke utimo lembe moko m’uton i ii, ibemito iling’ iwi ng’ecwinyne. Re i ng’eye, enyang’ nia lembe moko ubewotho cuu ngo, e ecaku penji. Eno umedo ng’ecwiny magwei i ii. I saa maeno, icopo bimo wi ng’ecwiny peri nenedi?
Lembe m’icikiri ning’eyo
Niweko ng’ecwiny ucweli i timo ma rac romo nyayu twoyo i kumi. Dhanu ma gitimo sayusac ginwang’u nia ka ng’atini ubimo ngo wi ng’ecwiny pare, eno ketho etwoyo thoj adunde, ketho cwinye tur, man ketho kadok cino pare de nyongo cam cuu ngo. Ginwang’u bende nia ng’ecwiny copo lalu nindo i wang’ ng’atini, medo koo koo i ie, mio peko i dendkume, man nyayu twoyo mange de. Pieno Biblia uyero kakare kumae: “Wek ng’ecwiny. . . , imaru modo i kier.”—Zaburi 37:8
Niling’ iwi ng’ecwiny copo mio peko. Kan ibed iweko ng’ecwiny ubed asu i ii, edok ebedo ve iweko twoyo moko unyang’ i kumi nok nok. Ku lapor, eno romo ketho ava lembe ai i kumi, man icaku cayu dhanu mange zoo acaya. Timo ma kumeno ketho jumange nwag’u nia nikwo kudi tie tek man ecopo nyotho gamiri peri.
Lembe m’icopo timo
Bed iketh wii i kum kite ma beco pa jadhogi mi gamiri. Kieu lembe adek m’imaru i bang’e. I ng’eye, kan etimo lembe m’unyayu ng’ecwiny i ii, poi i kum kite ma beco m’ineno i bang’e. Eno copo konyi nibimo wi ng’ecwiny peri.
Cik mir ukungu mi Biblia: “Wubed ma wufoyo foc.”—Jukolosai 3:15.
Bed ng’atu ma weko lembe. Mi kwong’o, ii nibeneno lembe i ayi ma jadhogi mi gamiri neno ko. Eno bikonyi nikethiri kakare. (1 Petro 3:8) I ng’eye penjiri kumae: ‘Nyo lembe m’uroyo ng’ecwiny i ia e tie lembe ma lee ma copo ketho aweko ngo ni jadhoga mi gamiri?’
Cik mir ukungu mi Biblia: “En e dwong’ pa [ng’atini] ya ewek kier.”—Lembrieko 19:11.
Kor paru peri i ayi ma ber man ku riekoweng’i. Bed itii ku wec ma nia “an”. Ku lapor, kakare niyero kumae: “Idieng’ kuda ngo nyanok de, kadok simu de igoyo ngo pi ninyutho ira kaka ma in i ie,” yer nia, “abino dieng’ lee dit pilembe abedo paru nia nyo lembe moko uwok unweng’i.” Kan ibed ikoro paru peri i ayi ma ber, eno romo konyi nibimo wi ng’ecwiny peri.
Cik mir ukungu mi Biblia: “Wec mu bed ku bero thiri thiri, ma kadu rome.”—Jukolosai 4:6.
Bed iwinj lembe kilili. I ng’ei m’ikoro paru peri, kud ing’ol dhu jadhogi mi gamiri saa m’ebeweco. Kinde m’edaru wec, dwogi iwi wec pare moko kara ing’ei ka nyo inyang’ cuu i paru pare. Niwinjo lembe ma jadhogi mi gamiri ubekoro copo konyi nibimo wi ng’ecwiny peri.
Cik mir ukungu mi Biblia: “Ng’atuman ubed m’ewinj pio, ebed yo kum wec.”—Yakobo 1:19.