Tic mi miyo kony i oro 2022​—Mer mir umego ubenyuthere i timo

Biblia ular uewo nia i rundi mwa eni lwiny bibedo nuti, digidi, thong’om, ku ‘gin mange ma nyayu lworo’ bende. (Luka 21:10, 11) Wec maeno mi lembila umedere nipong’o i kind oro mi tic mi 2022.a Ku lapor, lwiny mir Ukraine umedere nicidho i wang’e, ebino kud adwogi iwi kwo mi dhanu milioni dupa. I ng’om ma dupa, nwang’u fodi dhanu umaku benwang’u alokaloka moko nyaswaswa niai i kum thong’om mi Korona. M’umedo maeno, dhanu ma dupa gibino nwang’iri ku peko ma wok rek, calu ve digidi i ng’om mir Haiti man yamu ma tek m’unyotho piny i ng’om mir Amerika mi diere, i Philippines, man i Afrika ma yo piny ku yo nyangu. Jumulembe pa Yehova gikonyo ju ma ginwang’iri ku peko maeno nenedi?

I kind oro mi tic mi 2022, dilo mwa umiyo kony ni dhanu ma romo 200 ma peko ma wok rek utundo i wigi! I zoone, watiyo ku milioni ma romo 12 mi dolar pi nimiyo kony.b Wakenen kite ma jutiyo ko ku giramiya pi nikonyo ju ma peko ma wok rek ario utundo i wigi.

Digidi i ng’om mir Haiti

I nindo 14 mi dwi mir 8, 2021, digidi moko ma dit urungo piny yo piny mi ng’om mir Haiti. Lembe mi can ubino nia Jumulembe pa Yehova adek utho, niwacu nyimego mwa ario kud umego acel. Dhanu ma giboth lundo piny migi unyothere, ginwang’u ret, man gidong’ ku can. Umego moko ma nyinge Stephane uyero kumae: “Dhanu utho lee dit i adhura, uketho pi dwi ma kadhu ario jubed jukunyo dhanu dupa ku bang’ yenga.” Umego mange ma nyinge Éliézer uyero kumae: “Umego ma dupa gikoso kaka ma giroy wigi i iye, bongu ma gikendi, wara man piny mange ma gicopo lariri ko. Pi dwi ma dupa, dhanu ma pol gibino kwo ku lworo ma lee ma digidine uweko.”

Dilo mwa ugalu ngo ku miyo igi kony. Filial mi Haiti utero cam ma kadhu thon 53, hema, basi man pano mi royo mac i telefon. M’umedo maeno, i kind oro mi tic mi 2022, jugiero kunoke juyiko ot ma kadhu 100. Jutimo garama mi dolar ma kadhu milioni acel pi nikonyo dhanu ma peko ma wok rek utundo i wigi.

Umego ku nyimego mwa gidwoko foyofoc lee dit. Lorette uyero kumae: “Digidi unyotho udi ku kuloka mwa ceke. Wabino mbe ku gin moko acel de ma wacopo camu. Ento dilo pa Yehova ucungo i ng’etwa, emiyo iwa gin moko ci ma watie ku yenyne.” Micheline uyero kumae: “Digidi unyotho ot ma wabino kwo i iye kud awiya para ma co ario. Agam ang’eyo ngo nia aromo timo ang’o m’uweko nirwo pi nikwayu kony, man Yehova de udwoko wang’ rwo parane nikadhu kud i dilo pare. Kawoni watie ku ot ma tek ma wabekwo i iye. Abitimo lembe ceke m’acopo pi nidwoko foyofoc para ni Yehova.”

Kadok judongo pa gavmenti m’i ng’ombe de gineno kony ma wamiyo ni dhanu ma peko uwok i wigi. Jatel wi adhura mi L’Asile uyero kumae: “Abedwoko iwu foyofoc lee pilembe wubino nyapio pio pi nikonyo dhanu. Ayungowu kum wunyutho woro ma lee dit ni judongo pa gavmenti. Atie kud anyong’a kum tie ngo sente re ma wubesayu, ento wubemito konyo dhanu. Tie mer re m’ubecwaluwu andha nitimo lembe maeno.”

Yamu ma tek ma julwong’o Ana unyotho piny i Malawi man i Mozambique

I nindo 24 mi dwi mir 1, 2022, Yamu ma tek ma julwong’o Ana ucaku koto i Mozambique man edok yo reto mi ng’om Malawi. Yamu ma tek maeno ukelo koth ma lee man lake ubino tek ma yerere ngo, niwacu i ng’ey saa acel, eringo kilometre 100. Erwombo tiend mac, buralu man eketho pii upong’o ng’om lee dit.

Yamu ma tek maeno umulo kum Jumulembe pa Yehova ma kadhu elufu pier adek (30 000) i ng’om mi Malawi man i Mozambique. Umego Charles m’udikere bende i tic mi miyo kony uyero kumae: “Kinde m’aneno can m’umego ku nyimego gibeneno man piny migi m’unyothere, lembene tima rac mandha man anwang’u nia gin m’acopo timo de mbe pi nikonyogi.” M’udwoko lembene rac ma gwei utie piny man cam ma nok ma gibino ko de umol kpo. Udi mi ju ma dupa mi kindgi de urwombere. Lembe ma rac ma gwei, dhaku p’umego moko kud awiya pare ma nyir ario githung’ kinde ma yei m’ucidho nilarugi umwony.

Yamune unyayu lworo lee. I Nchalo i Malawi i saa abiro mi diewor, juruot pa Sengeredo giwinjo dwand pii m’ubemol ma tek mandha. Kulo ario upong’! Umego Sengeredo ung’iyo nia kwayu gimay kumgi cen kud i ode. Eno ubino ng’iyong’ic mi rieko m’etimo kum saa ma nok i ng’eye, pii m’upong’ urwombo ot migine. Piny migi moko unyothere mange ke umol. Juruot maeno ging’iyo nia kwayu giringi i Ot Ker ma nwang’u niai kud i bang’gi juwotho pi dakika 30. Ento cing’ nica, giwotho pi saa ario. Gitundo ma gitop man ma giol, ento peko moko mbe m’unwang’ugi.

Filial mi Malawi man mi Mozambique ucaku nimiyo kony pio pio mandha. Gimiyo telowic ni juliew man judong cokiri nia ginen yeny mir umego ku nyimego ma peko uwok i wigi man gimii igi kony i thenge mi tipo man gijuk cwinygi. Juketho Komite dupa ma miyo kony i saa ma peko wok i iye kara ginen wi tic maeno; bende gicaku konyo umego ku nyimego nyapio pio mandha kara ginwang’ cam ku piny mange ma gitie ku yenyne. Jutiyo ku dolar ma kadhu elufu pier adek wi adek (33 000) pi nikonyo umego ku nyimego man dolar ma kadhu elufu dak adek (300 000) pi niyiko man nigiero udi.

Komite ma miyo kony gitiyo ku sente ku rieko, eno ubino lembe ma pire tek lee kum bei piny ubino medere nikadhu mukero. Ku lapor, i ng’ei dwi abiro ma jucaku tic mi miyo kony, bei mogo anyogi ma tie cam ma pire tek lee i Malawi umedere pasent 70 wi dak. Bei esang’si de umedere nisagu. Pi nigwoko sente, umego gibed ging’iewo piny dongo dongo wang’ acel man i bang’ jukuloka mi ng’ombe. I ayi maeno re ma jubed jujwigo igi bei man gibed giculo ngo transpor mi piny.

Tic maeno mi miyo kony umulo adunde dhanu pa Yehova lee dit. Umego Felisberto mi Mozambique, uyero kumae: “Nwang’u fodi aneno ngo dilo moko m’ukonyo dhanu lee kumeni: Jam giedo, jam yeyo piny, jurudiego, cam man telowic ma ku mer. Tic mi miyo kony maeni unyutho kamaleng’ mer ma segi ma Yesu uweco pire i Yohana 13:34, 35.” Ester ma tie dhatho moko mi Malawi ma ot pare unyothere uyero kumae: “Nwang’u dong’ cwinya uai kum abino mbe ku sente m’acopo dogiero ko ot mange, pieno kinde m’umego gibino man gigiero ira ot, anwang’u nia dong’ adaru mondo i Paradizo.”

Kinde ma wabecoro nimondo i ng’om ma nyen, m’umbe jiji peko ma wok rek bimedere ameda. (Matayo 24:7, 8) Enre nikum giramiya mwu ma ku bero cwinywu, cwinywa tie tek nia dhanu pa Yehova bimediri ninwang’u gin ma gitie ku yenyne kinde ma peko uwok i wigi. Jukoro ayi ma tung’ tung’ mi miyo giramiya i donate.jw.org. Wafoyowu lee pi berocwiny mwu.