Nimiyo kony pi “lwiny man pi rwong lwiny” m’ubewinjere

I nindo maeni mi kajik ceng’, mito wang’ey nia wabiwinjo pi “lwiny man pi rwong lwiny.” (Matayo 24:6) Ento kan umego mwa ginwang’iri ku peko mi lwiny, jumiyo igi kony ma gitie ku yenyne. Lembe ma nyen mir 3 i kind oro 2022 m’uai i Guriri m’utelowic ubino ku lembe ma tielo cwinyjo iwi kony ma jubewotho miyo i Europe ma yo nyangu ni dhanu ma lwiny mir Ukraine umulo kumgi. Umego gimiyo kony maeno nenedi i ng’om ma lwiny ubetimere ceng’ini i iye? Tic mi miyo kony ubedo kud adwogi ma kani iwi umego mwa mir Ukraine?

Ning’eyo pi piny ma gitie ku yenyne, man kite m’eromo tundo ko i bang’gi

I nindo 24, dwi mir 2, 2022, nindo ma lwiny utuk i iye i ng’om mir Ukraine, Komite mi jutel wi tic uyiyo pi wel sente ma juwodho pi nimiyo kony ni umego mwa mir Ukraine. Bethel mir Ukraine ucaku ng’iewo piny i ng’om migi man gicaku poke nikadhu kud i bang’ Komite 27 ma miyo kony i saa mi peko ma wok rek ma Bethelne ular ung’iyo.

M’umedo kony ma Bethel mir Ukraine umiyo, umego mi kabedo ma dit mi Jumulembe pa Yehova de gicaku paru wang’acel pi kit kony mange ma gicopo miyo. Pieno, Komite mi jutel wi tic man Komite mi wodho girasoma mi Guriri m’utelowic gikwayu departema mi ng’iewo piny i wang’ ng’om zoo utim tic karacelo ku juor m’uai i Bethel mir Ukraine ku mi Pologne pi nineno yeny ma dhanu tie ko man nipangu gin ma jucopo timo. Kubang’ ceng’, umego mi departema ma ng’iewo piny, ma pangu dhu piny, man ma neno lembe mi cik, umego acel mi komite mi Bethel mir Ukraine, man departema mi ng’iewo piny i wang’ ng’om zoo, gibed gitimo tic karacelo.

Jay Swinney mi departema mi ng’iewo piny i wang’ ng’om zoo ukoro kumae: “Ku kwong’a ugam ukwayu wang’ey gin ma jutie ku yenyne. Wamito wamii cam man piny ma tung’ tung’ mi ketho leng’o m’umego ging’iyo ko. Ento, ning’eyo gin ma jutiye ku yenyne ubino theng lembe ma kwong’a. Ugam ukwayu bende wang’ey kite ma pinyne bimondo ko museme i Ukraine kadok kud i kind lwiny de.”

I nindo 9, dwi mir 3, 2022, umego ginwang’u piny m’umego ku nyimego mwa mi ng’om mir Ukraine gitie ku yenyne. Jupoko boksi mi cam ma tung’ tung’ dupa calu ve, ring’o mi kopo, rec, mucele, man ng’or; bende piny mi ketho leng’o ma calu ve savuni man karathasi ma jutiyo ko i soroni. I saa maeno, junwang’u nia piny ma ng’atu acel romo tiyo ko pi dwi acel copo camu dolar 65. Komite mi jutel wi tic uneno nia umego elufu ma lee bibedo ku yeny mi piny maeno, uketho eyiyo jutii ku wend sente ma lee pi nimiyo konyne. Re, piny maeno copo tundo nenedi m’umbe niketho kwo mir umego i ariti?

I nindo 13, dwi mir 3, umego ario mi Pologne gipimo nitero piny m’uai kud i Bethel mi Pologne i depo moko ma ceng’ini kud adhura mi Lviv, i ng’om mir Ukraine. I wang’ cidho migi, umego ma gitimo i Bethel mi Pologne ku mir Ukraine gikonyo umego ario maeno ma gimiyiri ku yiko woth migi. Bethel mi Pologne upong’o wi karathasi pa letha ma gibino ku yenyne kara umegone gikadh kiew mi ng’om mir Ukraine pi nitero kony; bende ukwayu enen nia muthukari migi de utie ku gin m’ubenyutho nia gibetero kony, man Bethelne uyenyo karacelo kud umego mir Ukraine yo ma romo bedo yot kara umego gikadh kiew yot yot. Ni kum yikiri ma ber maeno man ni kum mugisa pa Yehova, i kind saa 24 jumiyo piny maeno i bang’ Komite ma miyo kony i saa mi peko ma wok rek pi nidopoke i adhura mi Lviv. E i ng’eye umego mwa gidok museme i Pologne.

Kadok woth ma kwong’a urombo ma ber de, re umego gitero piny kago thon acel. Ma re i andha jubino ku yeny mi piny thon 200! Jucopo yeyo man jupoko piny mi kadhiri ma wende lee rukeno pio pio nenedi?

“Dhanu peri gimiri gigi ku berocwiny”

I wang’ ng’om zoo, ng’atuman umito emii kony pare i ng’ey somo rapor i jw.org iwi peko m’unwang’u umego mwa mi ng’om mir Ukraine. Dhanu dupa mi kabedo ma bor gimiyo giramiya ma konyo pi tic mi wang’ ng’om zoo mi Jumulembe pa Yehova, ma ging’eyo nia jubitiyo ku giramiyane cuu mandha. Jumange ma kwo ceng’ini ku kiew mi ng’om mir Ukraine gibino ayika nimiyo saa migi, tego migi, man piny migi ma segi pi nikonyo umego mwa. Kenen lapor moko mi konyne.

I ng’om mi Pologne, ju ma gimiyiri ku berocwinygi gicoko dhu cam elufu swa, man awiya ke ukubo cal iwi karathasi. Umego Bartosz Kościelniak, ma timo i departema mi ng’iewo piny i Bethel mi Pologne ukoro kumae: “Asomo wang’ dupa giragora pa Zaburi 110:3, m’uyero nia ‘dhanu peri gimiri gigi ku berocwiny.’ Ento kawoni aneno ku wang’a kony ceke m’umego ku nyimego gimiyo. Aneno ju m’umiyiri ku berocwinygi dupa ma gibino pio pio man ayika pi nitimo tic. Lembuno uketho ayiyo nia wec mi giragora maeno utie lemandha.”

Jamulembe pa Yehova moko m’utie ku kampuni ma cwalu ter i ng’om ma tung’ tung’, ukonjo moo i muthukari pare m’alor lor (conteneur) man emiyo jutii ko. Eyero kumae: “Etie ira rwom ma lee ninyutho mer para ni umego ku nyimego para man ni Yehova bende. Anyong’a ubenega nia amiyara pi nikonyo.” Unwang’ere nia jumiyo moo ma kadhu litre 7 700 man umego gitiyo ku saa man kero migi pi niringo kilometre ma tundo 48 000 pi nipoko pinyne ni dhanu!

Ni kum miyiri maeno man tic mi mer m’umego ku nyimego gitimo, nitundo nindo 28, dwi mir 3, niwacu nindo 15 kende i ng’ey ma jutero piny wang’ ma kwong’a, judog jutero thon 100 mi piny ma tung’ tung’ calu ve: Cam, piny mi ketho leng’o, man yath i ng’om mir Ukraine! Ni kum umego gimiyo giramiya ma tung’ tung’ mi piny ku berocwinygi, eno uketho wend sente ma lee ma nwang’u juwodho pi nimiyo kony ujwik. Nitundo kawoni, Jumulembe pa Yehova gioro kony thon ma kadhu 190 i ng’om mir Ukraine. Piny maeno ukonyo umego mwa nenedi?

“Wanwang’u bende mer mwu i igi!”

I ng’ey ma piny maeno utundo i adhura mi Lviv, Komite ma miyo kony i saa mi peko ma wok rek upoko pinyne ni ju ma gitie i yeny i ng’om mir Ukraine. Jutero konyne i adhura ma tung’ tung’ ma moko m’i kindgi nwang’ere bor kud adhura mi Lviv i kilometre 1 300. Kadok nwang’u lembe ma jupangu ceke uwotho ma ber i tic maeno de, re asu ecamu saa ma lee.a

Markus Reinhardt, ma tie acel mi Komite mi Bethel mir Ukraine, uyero kumae: “Kud i kind anyoba nyoba maeno, umego dupa uneno mer pa Yehova man bero mi bedo ceng’ini ku dilo pare kadok i wang’e ma fodi peko uwok ungo de. Ku lapor, jumiyo amora i kum ng’atuman nia ugwok cam ma galu man pii moko ma romo konye pi yenga dupa i ot. Pi telowic maeno, jadit cokiri moko ma nyinge Anton ma timo i Kyiv uyero kumae: ‘Dilo pa Yehova ular uyikowa i wang’e pi lembe ma tek ma copo wok man watie ku foyofoc pi lembene. Nibedo ku cam, ku pii man radio ubodho kwo mwa.’ Watie ku foyofoc ma lee pilembe umego gitiyo ku telowic maeno, uketho Bethel unwang’u saa mi pangu pi kony ma jumiyo.”

Umego mwa giwinjiri nenedi kinde ma kony maeno utundo? Mykola giku Zinaida, ma gikwo i Kharkiv, gikoro kite ma giwinjiri ko kumae: “Mer mwu umulo adundewa mi tuko de ngo. Wafoyowu lee mandha pi cam man pi yath. M’umbe jiji, waneno cing’ Yehova i lembe maeni.” Valentyna ma kwo i kabedo ma rom de uyero kumae: “Niai ma lwiny ucaku, dhanu ubed urieyo leni ma bor i wang’ ka ma jung’iewo iye cam. Ebino yot ungo saa ceke ning’iewo piny m’itie ku yenyne. Ento Yehova ung’eyo man eneno peko maeno. Eng’iyo umego pi nipoko piny ni dhanu i pacu man gin ma jupokone de ubino tap gin ma jutiye ku yenyne! I kind lembe ma tek ma kumeno, ma nwang’u dong’ ebenen ve genogen de mbe, ka julund juneno kony pa Yehova man mi dilo pare i ayi ma segi. . . . Etie lembe mi mutoro ma lee dit nineno kony ma Yehova miyo iwa tap i saane man ma watie ku yenyne.”

Yevhen, Iryna, man Mykyta, ma giringo kud i adhura mi Marioupol, giyero kumae: “Wafoyo lee dit dieng’ mwu man kony m’unyutho ni juruot mwa. Pi niyero lemandha, konyne utundo tap i saane. Wung’eyo, ku kwong’a wakewaparu nia boksine utie kende kende ku piny i igi ento saa ma wayabu dhoggi, wanwang’u bende mer mwu i igi!”

M’umbe jiji, waneno kite ma Yehova utio ko ku tipo pare pi nitelo wi dhanu pare kara gimii kony i kabedo ma “lwiny man pi rwong lwiny” ubewinjere i iye. Giramiya peri ma ku berocwiny ma pi tic m’iwi ng’om zoo, ma m’i kindgi ma pol umiyere nikadhu kud i kite ma nwang’ere i donate.jw.org, ukonyo lee kara kony maeno ucopere. Wafoyo lee dit pi giramiya peri m’imiyo ku berocwinyi!

Nimiyo kony pio pio man i ayi ma miyo ngo ariti kan ucopere

1. 

   I nindo 24, dwi mir 2, 2022: Komite mi jutel wi tic uyiyo pi wel sente moko ma jumii ko kony i Ukraine, m’uketho Bethel ucaku miyo kony

2. 

   I nindo 24, dwi mir 2–Nindo 8, dwi mir 3, 2022: Bethel mir Ukraine ucaku ng’iewo piny i ng’om migi man gicaku poke nikadhu kud i bang’ Komite ma miyo kony i saa mi peko ma wok rek. Bethelne uyikere bende pi nijolo man nipoko piny m’uai i ng’om mi Pologne

3. 

   I nindo 9, dwi mir 3, 2022: Komite mi jutel wi tic uyiyo nia jupok piny ni umego mir Ukraine

4. 

   I nindo 10–12, dwi mir 3, 2022: Jumaku yub mi pimo nitero cam man piny mange m’uai kud i Bethel mi Pologne i adhura mi Lviv, i ng’om mir Ukraine

5. 

   I nindo 13, dwi mir 3, 2022: Jupimo woth ma kwong’a ma jutero ko cam man piny ma juoro niai kud i Pologne i adhura mi Lviv, i ng’om mir Ukraine

6. 

   I nindo 14–16, dwi mir 3, 2022: Umego ma weg pacu m’umiyiri ku berocwinygi giyikiri pi nicoko dhu cam man piny mi ketho leng’o i ot coko ma dit, ceng’ini ku Poznan, i Pologne

7. 

   I nindo 17, dwi mir 3, 2022: Nindo ang’wen kende i ng’ey ma jupimo woth ma kwong’a uwok ma ber mandha, umego gicaku tero thon 13 mi piny ma jumiyo pi kony i kiew mir Ukraine

8. 

   I nindo 21–27, dwi mir 3, 2022: Julubo lembe ma rom eno, jucoko dhu dong’ piny m’udong’ i Pologne, juorogi i Ukraine man jupokogi i kabedo ma yeny utie i iye pi saa 24

9. 

   I nindo 28, dwi mir 3, 2022: I ng’ey nindo 20 ma juyiyo pi tero piny, jutero thon 100 mi piny ma tung’ tung’ calu ve: Cam, piny mi ketho leng’o, man yath i ng’om mir Ukraine

Nitundo kawoni, Jumulembe pa Yehova gioro kony thon ma kadhu 190 i ng’om mir Ukraine.