Jamtic mi ponjo Biblia m’ukoc ku mange ceke

I dwi mi Kwong’o 2021, Guriri m’utelowic unyutho pi jamtic moko ma nyen m’uwok pi ponjo Biblia: etie buku Icopo kwo kud anyong’a rondo ku rondo!a Iwinjiri nenedi pir atwong’a maeno? Niai kud i Canada Matthew uyero kumae: “Anyong’a unega mi tuko ngo! Anyong’ane umedere ameda i saa mi korolembe, i saa ma juneno video ma tung’ tung’ m’ubino nyutho thelembe m’uketho girasomane uwok, man ayi ma jular jubed jupime ko. Abino kud ava ma dit mi neno bukune man mi caku tiyo kude.”

Buku Icopo kwo kud anyong’a rondo ku rondo! ucaku the bodho ma nyen mi telo wi ponji mi Biblia. Ento, tung’ tung’ utie eno kende ngo i kind buku ma nyen ne ku jamtic mange mi ponjo Biblia m’ular ubino i wang’e. Kan ibetiyo ku buku Icopo kwo kud anyong’a rondo ku rondo! ma juwodho iwi karathasi, ibineno nia ithe ukoc ku buku mange m’iwang’e. Pi ninyang’ i the lembene, dong’ wakenenu cuu kite ma juyiko ko bukune.

Buku ma nyen mir ayi de m’ukoc

Karathasi ma tek. Pirang’o pire bino teki? Buku Icopo kwo kud anyong’a rondo ku rondo! utie ku cal ma ku rangi ma kadhu 600 nisagu buku Biblia ubeponjowa wang’ apar! Bende, buku ma nyen ne utie ku kaka ma lee m’udong’ twolo niwacu m’umbe kwan kadi cal i mbayane. Lembe ario maeno utie ku nyathi peko moko: Kinde ma ka karathasi utie reberebe, icopo neno cal man’i theng mbaya ma kucelo. Pi niuro lembuno, umego ma gitimo i departema mi wodho buku iwi karathasi i wang’ ng’om zoo, ma nwang’ere i Wallkill, New York, i Etats-Unis, upimo kit karathasi ma tung’ tung’ ang’wen ma wabed watiyo ko kaka ma wawodho iye girasoma. Komite mi kiewo girasoma mi Guriri m’utelowic ung’iyo kit karathasiman ma jupimo man eting’o ma iye lero ngo akeca. Kadok karathasine ucamu sente 16 wi dak nisagu ma wabed watiyo ko pi girasoma mwa mange zoo de, re elund ekonyo juponj Biblia nisomo lembe m’i wi mbayaman mi bukune ma cal moko mbe m’ulangu wigi i mbaya ma kucelo mi karathasine.

Kite ma ju mwono ko dende. Dend buku ma nyen maeni ukoc ku dend buku mwa mange ceke pilembe jumwone i ayi ma nyothere ngo pio pio. M’uweko kite ma jumwono ko nja, dend buku maeni ma nyen ketho cal nen ma leng’ mandha. Bende, kite maeno ma jumwone ko konye kara kudi there nyothere pio i ng’ey tiyo kude wang’ ma pol. Re dend buku maeno tic pare ucamu sente nisagu dend buku mange ma kadhu wang’ abic. Pieno, Bethel ma pol gitimo tic karacelo pi ning’iewo jamtic ma beine tek ungo akeca.

Pirang’o jung’iyo nitiyo ku jamtic ma beine tek kumeno? Umego moko ma timo i departema mi wodho buku iwi karathasi i wang’ ng’om zoo ukoro kumae: “Wabeparu nia kara buku maeno ubin ukony ma ber, mito nia ebed ma telo nen asu kadok nwang’u jutiyo kude wang’ ma pol de.” Eduardo, ma timo i biro mi wodho girasoma i Bethel mi Brésil, uyero kumae: “Watie kud anyong’a ma lee nineno kite ma dilo pa Yehova utiyo ko ku jamtic ma beco pi niyiko buku maeni ubed ma leng’, ma galu, man ma nyang’ujo ka jubemule; ma i saa ma rom eno dilone ubetiyo ku giramiya mi sente ku riekowang’.”

Jucaku wodhe iwi karathasi i saa mi thong’om mi Korona

Wacaku wodho buku Icopo kwo kud anyong’a rondo ku rondo! i dwi mir Adek 2021. Eno ubino tap i saa ma thong’om mi Korona unyayu peko ma lee i kum dhanu. Calu ma jutwiyo dhu wok ku mondo i Bethel, eno uketho kawodh buku mwa copo nwang’u ngo kony mir umego ma konyo tic niai kud i pacu, man ke juromo jolo de ngo umego ma nyen gibin gitim i Bethel. Matoke mi lembuno ubino nia, kawodh girasoma mwa moko ubino ngo ku wend dhanu m’uromo, man mange lundo jutwiyo dhogi pi saa moko pi cik ma gavmenti uketho.

Juvoyo peko maeno zoo nenedi? Kinde ma ka wodh girasoma mwa ubino ayika pi nicaku tic kendo, jutiyo kud umego ku nyimego mi departema mange mi Bethel pi nikonyo pi saa moko i tic mi wodho girasoma. Joel, ma timo i departema mi wodho buku iwi karathasi i wang’ ng’om zoo, uyero kumae: “Tic migi mi miyiri man ma kuberocwinygi ma giponjo ko bodho ma nyen mi tic uketho ecopere iwa nitimo tic ma pire tek.”

Kadok kud i kind peko ma tung’ tung’ de, wawodho buku Icopo kwo kud anyong’a rondo ku rondo! milioni swa iwi karathasi. Pi niwodhe, wabino ku yeny mi jamtic dupa mir ayi ma tung’ tung’, calu ve ban mi kiewo piny, jam mwono kume, karathasi, wino, man jamdiko kind karathasi. Jutiyo ku dolar ma kadhu milioni 2.3 (U.S.) pi ning’iewo jamtic kende i kind dwi abic ma kwong’a ma jucaku wodho ko girasomane iwi karathasi. Pi nigwoko sente, wabino ku riekowang’ mi wodho bukune i wel ma cokiri utie ku yenyne pi kawoni.

“Etie tic mi bodho”

Juponji ku juponj Biblia migi giwinjiri nenedi pi jamtic maeni ma nyen mi ponjo Biblia? Umego Paul mi ng’om mir Australie uyero kumae: “Nitiyo ku buku Icopo kwo kud anyong’a rondo ku rondo! tie ber dit, enyang’a mi tuko ngo kan abetelo kude wi ponji mi Biblia. Lembe mi bukune telo nen, man eber mandha pi ponji. Etie ku lembe ma beco ma jukoro twolo twolo, penji ma mulo adunde, video, cal, sanduku, man lembakeca pi japonj Biblia. Etie tic mi bodho m’ucwala bende nimedo bodho para mi ponji.”

Japonj Biblia moko mir Etats-Unis uyero kumae: “Amaru buku ma nyen eni lee mandha. Tic mi bodhone ukonya ninyang’ ma ber dit i lembe ma pigi tek. Video ma tung’ tung’ mulo adundena man cwala i timo.” Japonj Biblia maeno ponjo Biblia wang’ ario kubang’ yenga man ebed ecidho nja i coko.

Fodi asu kwayu juwodhi iwi karathasi milioni swa mi buku Icopo kwo kud anyong’a rondo ku rondo! i dhok dupa. I andha, nitundo kawoni Guriri m’utelowic uyiyo nia juwodh buku maeno i dhok 710, eno ke nisagu m’egam eyiyo ko niwodho buku Biblia ubeponjowa ma sagu wang’ 340!

Junwang’u sente mi wodho girasoma maeno zoo kani? Junwang’e nikadhu kud i giramiya ma pi tic m’i wi ng’om zoo, ma m’i kindgi ma pol umiyere nikadhu kud i kite ma nwang’ere i donate.jw.org. Wafoyo lee dit pi giramiya peri ma ku berocwiny, m’ukonyowa niwodho jamtic mi ponjo Biblia pi dhanu ma gimaru niponjo lembe iwi Yehova man nikwo rondo ku rondo.​—Zaburi 22:26.