Peko ma wok rek i oro 2021​—Wabeweko ngo umego ku nyimego mwa

I oro mi tic 2021,a ng’om zoo umedere niwang’ere ku peko mi thong’om mi Korona. Calu ma jukoro i thiwiwec m’uyero: “Tic mi miyo kony i wang’ ng’om zoo i saa mi thong’om mi Korona,” watiyo ku dolar milioni swab pi nimiyo kony i saa mi thong’om man wacaku the Komite ma miyo kony i saa mi peko ma wok rek ma kadhu 950.

Ku lemandha, kinde ma thong’om ubino nyobo dhanu, peko mange ma cwic m’udhokowa ku ma dhanu nyayu gin gigi de ubino mulo kum umego ku nyimego mwa mi wang’ ng’om zoo. Pi ninyego ku peko ma tung’ tung’ ma kadhu 200, Komite mi jutel wi tic mi Guriri m’utelowic uyiyo nia jutii ku dolar milioni 8 m’umedo ma jutiyo ko pi thong’om mi Korona. Kawoni kenen kite ma jutiyo ko ku giramiya peri pi nikonyo ng’om ario ma peko uwok i wigi.

Moc pa got Nyiragongo

Nindo 22, dwi mir 5, 2021, i République Démocratique du Congo, volka mi got Nyiragongo umoco mac. Macne m’ubino mol (lave) unyotho udi mi dhanu, odi somo, man thangi mi pii. Re lave kende ngo m’ubino ni ariti. Nindo moko i ng’ey moc pa volka eno, nwang’u fodi vuru m’utie kud adra ma rac i iye utie asu i adhura mi Goma man digidi moko ma thindho de ma romo apar ario uyengo piny. Jung’olo ni wend dhanu ma kadhu nusu nia giwek adhurane. Dhanu elfu dak swa uringo, ma jumoko m’i kindgi ukadhu i Rwanda.

I kind dhanu m’uringone, Jumulembe pa Yehova ubino ma romo 5 000 kumeni. Jumoko volka m’umoc unyotho ot migi, jumange ke juyaku piny mi ot migi ing’ey ma giringo ng’wec. Komite ma miyo kony i saa mi peko ma wok rek mi Rwanda ku mi République Démocratique du Congo gitimo karacelo pi nitelo wi tic mi miyo kony. Bethel mi Congo (Kinshasa) udwoko pi komite moko acel ma miyo kony kumae: “kud i kind lembe maeno ma tek m’ubino i adhura, man kadok jular jung’olo nia dhanu giwek kabedo migi de, nwang’u dong’ komite ucaku poko cam, pii, kavuto man kendi.” I adhurane moko acel m’umego mwa ma kadhu 2 000 gicoko dhogi i iye, komite ma miyo kony uguro hema, umiyo maske, man ukoro ayi ma jucopo jwigo ko dak pa Korona man mi kolera.

I kind dwi adek mi peko maeno, umego mwa gipoko thon mi mucele ma kadhu abusiel, thon abusiel mi kauga, moo mi tedo cam thon adek, man pii de thon adek. Pi nigwoko sente, Bethel umaku yub ma jung’iew ko cam mi kadhiri ma lee i ng’ombe kakare ma nia jung’iew cam ma bei migi tek lee niai i ng’om ma woko.

Nyamego moko ma volka m’umoc unyotho ot migi ma nyen ukoro nia “cwinygi utur man gibino ku can lee dit.” I ng’eye juruot pare ginwang’u kony mi kum ku mi thenge mi tipo zoo. Kawoni elund eyero kumae: “Ku kony pa Yehova, wamedara ninwang’u gin ma watiye ku yenyne. Waneno nia Yehova uyeyo peko mwa man eketho edoko iwa yot nicire.”

Canpiny m’ubodho i ng’om mi Venezuela

Ng’om mi Venezuela utagu pi canpiny pi oro ma dupa. Umego mwa gibeciro hali mi kwo ma tek, can cam, man lembe ma reco m’ubemedere. Re asu, dilo pa Yehova ubewekogi ngo.

I kind oro mi tic m’ukadhu, jutiyo ku milioni mi dolar ma kadhu 1.5 pi ning’iewo cam man savo pi juruot ma gitiye ku yeny mi kony. Bethel mi Venezuela udwoko kumae: “Etie yot ungo nyanok de nitero thon 130 mi cam i gund ng’ombe ang’wen zoo man nipoke i cing umego ma gitiye ku yeny.” Pi ning’eyo nia camne nyothere ngo, wang’ ma pol umego gibed gioro piny ma romo timo nindo ma lee. Bethelne umedo kumae: “Wang’iewo cam i kadhiri ma lee saa ma nwang’u fodi jubewodhe awodha kud i bodho kum eno nwang’u beine utie tek ungo. I ng’eye, wayeye ma watiyo ko ku yore ma camu ngo sente.”

Leonel, ma tie acel m’i kind umego ma miyo kony i saa mi peko ma wok rek i ng’om mi Venezuela umaru tic eno lee mandha. Eyero kumae: “Tic mi miyo kony utie tic ma segi. Rwom maeni utielo cwinya lee mandha, asagane niai ma min ot para mir amara utho ku thong’om mi Korona. Saa ceke abedo ku lembe m’atim man abed anwang’ara nia atie ku kony ni umego ma gin’i yeny. Aneno an gira ku wang’a kite ma Yehova upong’o ko lembang’ola pare m’eweko ko ngo dhanu pare.”

Jumiyo cam ni umego moko m’ular ubed utimo con i komite ma miyo kony i saa mi peko ma wok rek. Eyero kumae: “Kawoni dong’ an re m’atie ku yeny ma nia jukonya ko. Wanwang’u ngo kende kende kony mi thenge mi kum. Bende, umego gikonyowa waku min ot para nibedo ma kumwa upoto; gidieng’ kuwa, gijuko man gitielo cwinywa.”

Lembe ma wok rekne moko wok pare mbwang’ m’umbe nilar poyojo. Re asu, dilo pa Yehova utie pare ayika ninwang’u man nimiyo kony pio pio mandha; wafoyowu pi giramiya mwu pi tic mi wang’ ng’om zoo. Ayi ma tung’ tung’ ma jumiyo ko giramiyane moko jukoro pire i donate.jw.org. Wafoyo berocwiny peri.